Паян, авӑн уйӑхӗн 11-мӗшӗнче, Шупашкарти 22-мӗш номерлӗ автобус Миттов бульварне ҫити ҫӳреме тытӑннӑ. Вӑл Граждан урамӗнчи 131-мӗш ҫуртран пуҫласа 101Б ҫурт патне хутлама пӑрахнӑ.

Маршрут схемине ылмаштарассипе ҫыхӑннӑ ыйтӑва хула ҫыннисемпе утӑ уйӑхӗнче «Открытый город» (чӑв. Уҫӑ хула) порталта сасӑлав ирттерсе сӳтсе явнӑ. Маршрут схемине ҫӗнетме хула ҫыннисем сӗннӗ.

Шупашкар хула администрацийӗн ҫурт-йӗрпе коммуналлӑ хуҫалӑх, энергетика, транспорт тата ҫыхӑну управленийӗнче пӗлтернӗ тӑрӑх, ҫӗнӗ маршрутпа ҫӳрекен 22-мӗш номерлӗ автобус малашне Миттов бульварӗнчи 35-мӗш тата 7/1 ҫуртсем тӗлӗнче чарӑнӗ.

cap.ru сӑнӳкерчӗкӗ

Канмалли кунсенче Шупашкарти «Ҫӗнтерӳ» паркӗнче Сӑр чиккине чавнӑ ҫынсене халалланӑ палӑкӑн пӗрремӗш чулне вырнаҫтарнӑ. Ку мероприятие ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев, ЧР культура министрӗн ҫумӗ Ольга Ярилова хутшӑннӑ.

Ҫак вырӑна ахальтен суйламан. Паркра вӑрҫӑ астӑвӑмӗ упранать. Ҫитес ҫул республикӑра Сӑр тата Хусан чиккисене чавнӑ ҫынсене халалланӑ ҫулталӑк пулӗ. «Тӗпчемен япалана тӗпчемелле. Ҫакна тума пире ҫӗршыв президенчӗ тӗллесе ярать», - тенӗ Олег Николаев.

Палӑртмалла: ҫак чикӗсен тӑршшӗ 300 ҫухрӑмпа танлашнӑ, ку ӗҫе 171450 хӗрарӑмпа ҫамрӑк хутшӑннӑ.

Ҫемье архивӗнчи сӑн

Ҫӗнӗ Шупашкарта пурӑнакан хӗрарӑм ҫывӑрма каятӑп тенӗ те… ҫухалнӑ. Тӑванӗсем вӑл ӑҫтине пӗлмеҫҫӗ.

Ҫурла уйӑхӗн 29-мӗшӗнче 53 ҫулти Светлана Михайлова, Коммунистсен урамӗнчи 31-мӗш ҫуртра пурӑнаканскер, каҫхине килте хӗрӗпе, мӑнукӗпе пулнӑ. Хӗрарӑм ҫывӑрма каятӑп тесе пӳлӗме кӗнӗ. Вӑл чӑнах та хӑйӗн патӗнче телевизор пӑхнӑ.

Ирхине хӗрӗпе мӑнукӗ вӑраннӑ – тӑванӗ пӳлӗмре ҫук, телевизор кӑна ӗҫлесе ларнӑ. Унччен амӑшӗ кун пек килтен тухса кайман, киле пӗр кун ҫеҫ килменни пулкаланӑ. Тӑванӗсем ун патне шӑнкӑравласа ҫитеймеҫҫӗ, вӑл ӑҫтине пӗлмеҫҫӗ.

Шупашкар хули ҫулсерен илемленсе капӑрланса пырать ҫеҫ мар, пысӑкланать те. Ҫӗнӗ микрорайонсем йӗркеленеҫҫӗ, вӗсенче – ҫӗнӗ урамсем.

Пирӗн куҫ тӗлне Шупашкарти пӗр урам ячӗ лекрӗ. Шупашкарти «Премьер» микрорайонта @chebmedia ҫӳренӗ-ха. Унти вырӑнсене вӑл ӳкерсе илсе Инстаграма лартнӑ.

Урам ятне икӗ чӗлхепе: чӑвашла тата вырӑсла – ҫырма тӑрӑшни сисӗнет. Анчах сӑнӳкерчӗкре «Автономная урамӗ» тата «Автономная улица» тесе ҫырни курӑнчӗ.

Ҫак йӗркесен авторне «Автономная урамӗ» тесе шӑрҫалани тӗлӗнтерчӗ.

retail.ru сайтри сӑн

41 ҫулти хӗрарӑм смартфон туяннӑ та уншӑн страховка илес тесе полицейскисене суйнӑ.

Хайхискер Кадыков урамӗнче хаски ӑратӗнчи йытӑпа уҫӑлса ҫӳренӗ чухне ӑна икӗ палламан ҫын тапӑннӑ та сумкине, хваттер тата машина уҫҫисене вӑрланӑ имӗш. Сумкӑра вара икӗ смартфон пулнӑ.

Хӗрарӑм хӑйне ҫаратнӑ тесе полицие пӗлтерме пынӑ. Йӗрке хуралҫисем видоекамерӑсене пӑхнӑ. Ҫак хӗрарӑм килтен сумкӑпа тухнӑ, сумкӑпах кӗнӗ. Ҫурта уҫӑпах уҫнӑ.

Кайран ҫакӑ тӑрӑ шыв ҫине тухнӑ: вӑл смартфон страховкине илес тесе суйнӑ-мӗн. Хӗрарӑм тӗлӗшпе пуҫиле ӗҫ пуҫарнӑ.

Шупашкар ҫынни урам тӑрӑх чупакан хир сыснисене ӳкерсе илнӗ. Чӗрчунсем хулан Кӑнтӑр-Хӗвеланӑҫ районӗӗче ҫӳренӗ. Чӑваш Ен Ҫутҫанталӑк ресурсӗсен тата экологи министерствинче шухӑшланӑ тӑрӑх, хир сыснисене пиҫсе ҫитнӗ улма-ҫырла пиҫсе, пахча-ҫимӗҫ пулса ҫитни илӗртнӗ.

Чӗрчунсем хулана ҫурла уйӑхӗн 25-мӗшӗн каҫхине пырса кӗнӗ. Хула ҫынни «Байконур» микрорайонта уҫӑлса ҫӳренӗ. Тискер чӗрчунсем ҫырма патӗнчи ҫул урлӑ чупса каҫнӑ.

«Пӗр вунна яхӑн хир сысниччӗ. Ҫуртсем патӗнче вӗсене курни кӗтменлӗх пулчӗ», – тенӗ видео авторӗ.

Хир сыснисем маларах хулара ҫӳренӗ. Чӑваш Ен ҫутҫанталӑк ресурсӗсен тата экологи министрӗн ҫумӗ Николай Косулин каланӑ тӑрӑх, хир сыснисене дачӑсемпе пахчасенчи панулми, слива, ҫӗрулми илӗртет.

Раҫҫей почтин Чӑваш Енри управленийӗ 5 ҫӗнӗ автомобильпе пуянланнӑ. Вӗсен марки — «LADA Largus». Ҫулталӑк вӗҫлениччен тата тепӗр 14 автомобиль илсе килӗҫ.

Раҫҫей почтин Чӑваш Енри уйрӑмӗнче хальхи вӑхӑтра – 117 транспорт, ҫав шутран 8-шӗ курьер службине тивӗҫтерет. Почта машинисен пӗтӗмӗшле маршручӗ 12 пин те 500 метрпа танлашать.

Халӗ илсе килне пилӗк автомобильтен иккӗшне курьер службине уйӑрса парӗҫ, виҫҫӗшӗ почта турттаракан хаҫат-журналпа ытти япалана Шупашкарта пӗр вырӑнта тепӗр ҫӗре илсе ҫитерӗ. Автомобильсене 750 килограмм таран тиеме пулать. Вӗсене маякпа, сиренӑпа тата сигнализаципе тивӗҫтернӗ.

Pxhere.com сайтри сӑн

Шупашкарта Президент пепкелӗх центрӗнче ҫуралнӑ ачана хӑйне евӗр ят хунӑ. Ашшӗ-амӑшӗ ҫут тӗнчене килнӗ хӗрачана Лусэ тесе ҫыртарнӑ. Вӑл ҫурла уйӑхӗн 7-мешӗнче кун ҫути курнӑ, ятне вара ӗнер, ҫурла уйӑхӗн 25-мӗшӗнче, ҫыртарнӑ.

Тӗнче тетелӗнче Лусэ ята шыраса тупма ҫук, вӑл мӗне пӗлтернине калама хӗн. Ҫапах Шупашкарти Мускав районӗн администрацийӗн ӗҫченӗсем ашшӗ-амӑшӗн кӑмӑлне тивӗҫтернӗ, ята ҫыртарнӑ.

ЗАГС пайӗн ӗҫченӗсем ашшӗ-амӑшне хӗрача ҫуралнӑ ятпа саламланӑ, ҫуралнине ӗнентерекен свидетельство панӑ.

Warheroes.ru сайтран илнӗ сӑнӳкерчӗк

Шупашкарта СССР Паттӑрне Александр Боголюбова халалласа палӑк лартма палӑртнӑ. Ҫак тӗллевпе «Уҫӑ хула» порталта сасӑлав та ирттернӗ.

Сасӑлава 1475 ҫын хутшӑннӑ. Чылайӑшӗ палӑка «Ҫӗнӗ хула» микрорайонти шкул умӗнче курасшӑн. Куншӑн 795 ҫын сасӑланӑ. 623 ҫын Боголюбов палӑкне «Салют» культура керменӗ умне лартма сӗннӗ. 57 ҫын пӗр варианта та смуйламан. Хӑшӗ-пӗри хӑйӗн шухӑшне пӗлтернӗ. Тӗслӗхрен, палӑка Ҫӗнтерӳ паркне, Кадет скверне, «Садовый» микрорайона лартма сӗнекенсем пулнӑ.

Александр Боголюбов – Шупашкар ҫынни, вӑл кунта ҫуралса ӳснӗ. Граждан вӑрҫинче тата Тӑван ҫӗршывӑн Аслӑ вӑрҫинче ҫапӑҫнӑ. Ленин орденӗпе тата «Ылтӑн ҫӑлтӑр» медальпе пӗрле Совет Союзӗн Паттӑрӗн ятне тивӗҫнӗ. Сӑмах май, Шупашкарта унӑн ячӗпе пӗр урам хисепленет.

Шупашкрати Иван Яковлев проспектне каярах хута ярса пӗтерӗҫ. Асӑннӑ проспекта лаптӑкӑн-лаптӑкӑн юсаса пычӗҫ. Кӑҫал ӗҫсене Кӑнтӑр поселокӗ тӗлӗнче пурнӑҫларӗҫ. Хула администрацийӗнче пӗлтернӗ тӑрӑх, ӗҫе вӑхӑтра вӗҫлеме ҫумӑр час-час ҫуса тӑни кансӗрленӗ. Тӑпра типӗ мартан тротуар пахалӑхӗ начар пулать тесе васкаман. Ҫавна май «Никитин урамӗ» чарӑну тӗлӗнчи тротуара тата чарӑнӑва туса пӗтереймен.

Шупашкарти Сӑкӑт кӗперӗ ҫинче те юсав ӗҫе малалла пырать. Унти асфальта тӗрӗсленӗ те пахалӑхӗ тивӗҫтермен. Ҫавна май ҫул-йр организацийӗн хӑйӗн шучӗпе ӑна ҫӗнӗрен сарма тивӗ.