Пуш уйӑхӗн 1-мӗшӗнче, ирхи 4 сехетре, пӗр ҫамрӑк хупӑ павильона кӗме пӑхнӑ. Унта вӑл ӑшӑнас тенӗ-мӗн.

Шупашкар хулинчи йӗрке хуралҫисем патне пӗри Мускав проспектӗнчи общество транспорчӗн чарӑнӑвӗ тӗлнче такам тем ватать тесе хыпарланӑ. Ҫав вӑхӑтра унтан ҫул-йӗр инспекторӗсен уйрӑм батальонӗн нарячӗ иртсе пынӑ. Вӗсем чарӑнӑва пырса тӗрӗслеме шут тытнӑ. Унта пӗр каччӑ пулнӑ. Пакунлисене курсан вӑл вырӑнтан тапса сикме пӑхнӑ. Анчах тарса инҫе каяйман. Вӑл Канашра пурӑнакан 23 ҫулти ҫамрӑк пулнӑ. Ӳсӗрскер йӗрке хуралҫисене ӑнлантарнӑ тӑрӑх, вӑл шӑнса хытнӑ та чарӑнури пӗчӗк лавккана кӗрсе ӑшӑнас тенӗ.

Йӗрке хуралҫисем ӑна хӑйсемпе пӗрле илсе кайнӑ. Урӑлса илсен каччӑ каҫхине хӑй мӗн хӑтланнине та аса илеймен. Пуҫтахланиччен вӑл юлташӗн ҫуралнӑ кунне уявланӑ иккен.

kuban.mk.ru сайтри сӑн

Хӗрлӗ Чутай районӗнче пурӑнакан 65 ҫулти хӗрарӑм тӗлӗшпе Следстви комитечӗ пуҫиле ӗҫ пуҫарнӑ. Вӑл ҫыннӑн сывлӑхне асӑрханмасӑр сиенлетсе ӑна вӗлернӗ тесе шутлаҫҫӗ.

Следстви версийӗ тӑрӑх, нарӑс уйӑхӗн 10-мӗшӗнче 21 сехетре ҫак ӳсӗр хӗрарӑм пӗрле пурӑнакан 61 ҫулти арҫынпа хирӗҫсе кайнӑ та ӑна ҫӗҫӗпе темиҫе хутчен чикнӗ.

Арҫынна пульницӑна илсе ҫитернӗ. Вӑл реанимацире 12 кун пурнӑҫпа вилӗм хушшинче выртнӑ. Шел те, нарӑсӑн 22-мӗшӗнче унӑн чӗри тапма пӑрахнӑ.

Хӗрарӑма тытса чарнӑ. Пуҫиле ӗҫе тишкернӗ чухне вӑл решетке хыҫӗнче пулӗ.

im0-tub-ru.yandex.net сайтри сӑн

Чӑваш Енре 64 ҫулти арҫын ҫӑкӑр тип пыра кайнипе чутах вилмен. Ӑна васкавлӑ медпулӑшу фельдшерӗ Сергей Николаев, Ҫӗрпӳри подстанци ӗҫченӗ, ҫӑлса хӑварнӑ.

Ку нарӑс уйӑхӗн 27-мӗшӗнче пулнӑ. Каҫхине апатланнӑ чухне арҫын ҫӑкӑра пырне лартнӑ. Вӑл ҫавӑнтах сывлӑш ҫитменнипе аптӑрама пуҫланӑ. Тӑванӗсем часрах медпулӑшу чӗннӗ.

Тухтӑрсем ҫитсен пациента тӗрӗсленӗ те пырӗнче темӗн ларнине асӑрханӑ. Сергей Николаев фельдшер ӑна пӗрремӗш медпулӑшу панӑ.

Арҫын ирӗклӗн сывлама пуҫласан ӑна пульницӑна малалла сипленмешкӗн илсе кайнӑ.

forum.na-svyazi.ru сайтри сӑн

Шупашкарта каллех ҫемье газ сӗрӗмӗпе чутах наркӑмӑшланса вилмен. Нарӑс уйӑхӗнче кун пек тӗслӗх иккӗмӗш хут пулнӑ. Виҫӗ эрне каялла Патрис Лумумба урамӗнчи пилӗк хутлӑ ҫуртра ҫынсем газ сӗрӗмӗнчен шар курнӑччӗ.

Хальхинче – Афанасьев урамӗнче. Нарӑс уйӑхӗн 27-мӗшӗнче каҫхи 9 сехет хыҫҫӑн ҫак урамри 4-мӗш ҫуртра 1978 ҫулта ҫуралнӑ хӗрарӑм тата унӑн 13-ри, 4 ҫулти ачисем наркӑмӑшланнӑ. Газ колонкин сӗрӗме туртмалли хатӗрӗ ӗҫлемен. Хӗрарӑмпа ачасене пульницӑна илсе ҫитернӗ.

Палӑртмалла: пилӗк хутлӑ ҫурт 1968 ҫулта хута янӑскер. Ӑна «Ниди» управляющи компанийӗ пӑхса тӑрать.

"Про Город" сайтран илнӗ сӑн

Паян Шупашкарта нумай хутлӑ ҫуртра хваттер ҫуннӑ. Ҫак пӑтӑрмаха курнӑ халӑх корреспонденчӗ кун пирки «Про Город» хаҫата пӗлтернӗ.

Пушар 13 сехет те 50 минутра пулнӑ. Трактор тӑвакансен проспектӗнчи 56-мӗш ҫуртӑн 1-мӗш корпусӗнчи 8-мӗш хутри хваттер ҫуннӑ.

Инкеклӗ лару-тӑру министерстви ӗҫченӗсем вырӑна ҫийӗнчех ҫитнӗ. Ҫавӑн пекех суранланнисене пулӑшма васкавлӑ медпулӑшу тухтӑрсем килнӗ.

Шупашкарта пӗр усламҫӑ ҫынна вӗлернӗ. Пуяна тытса чарнӑ, ӑна вӑхӑтлӑха хупса хунӑ, ҫынна вӗлернӗ этем тӗлӗшпе РФ Пуҫиле кодексӗн 105-мӗш статйин 1-мӗш пайӗпе килӗшӳллӗн пуҫарнӑ пуҫиле ӗҫе малалла тӗпчеҫҫӗ.

Тӗпчевҫӗсем шухӑшланӑ тӑрӑх, нарӑс уйӑхӗн 21-мӗшӗнче, каҫхи вунӑ сехет тӗлӗнче, «Имидж-оптика» тулли мар яваплӑ обществӑн директорӗ хӑйӗн килӗнче пулнӑ. Ун патӗнче 47 ҫулти арҫын, хайхи кӳрши, хӑналаннӑ. Хӑнапа кил хуҫи хирӗҫсе кайсан ӳсӗр усламҫӑ кӳрше ҫӗҫӗпе 44 хутчен ҫӗҫӗпе чиксе пӗтернӗ. Йывӑр суранланнӑ хӑна кӑштахран килсе кайнӑ.

21.мвд.рф сӑнӳкерчӗкӗ

Паян, нарӑс уйӑхӗн 25-мӗшӗнче, 8 сехет те 50 минутра Патӑрьел районӗнчи Шӑнкӑртам ялӗнче инкек пулса иртнӗ. «Тури Чакӑ-Патӑрьел» маршрутпа ҫула тухнӑ автобус ҫине йывӑр тиевлӗ «DAF» машина пырса кӗнӗ. Автомобиль рульне 30 ҫулти водитель тытса пынӑ.

«FiatDucato» автобус салонӗнче 14 ҫын пулнӑ. Инкекре пурӗ 5 ҫын суранланнӑ, ҫав шутра — 2010 ҫулта ҫуралнӑ ача. Вӗсене пурне те больницӑна илсе кайнӑ.

Чӑваш Енӗн Шалти ӗҫсен министерствинче паян кӑнтӑрла тӗлӗнче пӗлтернӗ тӑрӑх, инкек вырӑнӗнче тӗпчевҫӗсем ӗҫлеҫҫӗ.

Инкелӗ лару-тӑру министерстви тунӑ сӑн

Ҫӗнӗ Шупашкарти Совет урамӗнчи 9-мӗш ҫурт адреспа вырнаҫнӑ общежитире пушар алхаснӑ. Ку нарӑс уйӑхӗн 23-мӗшӗнче 13 сехетре пулнӑ.

Ҫулӑм общежитири пӗр пӳлӗмре тухнӑ. Унта кравать ҫунса кайнӑ. Ҫулӑм шалти отделкӑна та сиенлетнӗ.

Пушарнӑйсем вырӑна часах ҫитнӗ. Вӗсем кӳршӗре пурӑнакан тивӗҫлӗ канури ҫынна, 61 ҫулти хӗрарӑма, урама илсе тухнӑ. Пӳлӗмри пушара 20 минутран сӳнтернӗ. Унта виҫӗ техника хутшӑннӑ.

Халӗ, Инкеклӗ лару-тӑру министерстви пӗлтернӗ тӑрӑх, ҫулӑм мӗнрен тухнине уҫӑмлатаҫҫӗ.

chuvashia.sledcom.ru сӑнӳкерчӗкӗ

РФ Следстви комитечӗн Чӑваш Енри управленийӗ Сӗнтӗрвӑрри районӗнчи Кӗчкей ялӗнче пурӑнакан 33 ҫулти арҫынна пӗлӗшне вӗлернӗ тесе шухӑшлаҫҫӗ. Ун тӗлӗшпе РФ Пуҫиле кодексӗн 111-мӗш стайин 4-мӗш пайӗпе пуҫиле ӗҫ пуҫарнӑ.

Тӗпчевҫӗсем шухӑшланӑ тӑрӑх, нарӑс уйӑхӗн 15-мӗшӗнче, хӑйӗн кил картинче пулнӑ. Вӑл, ӳсӗрскер, хӑйӗн пӗлӗшӗпе, 45 ҫулти арҫынпа хирӗҫме тытӑннӑ. Хӗнесе пӗтернӗ хыҫҫӑн арҫын вырӑнтах вилсе кайнӑ. Вилене сарайне пытарнӑ. Вилене нарӑс уйӑхӗн 19-мӗшӗнче тупнӑ.

Следстви комитечӗ тунӑ сӑн

Паян ирхи 7 сехет те 50 минутра Шупашкарти "Энергия" стадионта инкек пулнӑ. Унта ҫурт тӑррине юр антарма хӑпарнӑ арҫын сарӑмсӑр вилнӗ.

"Про Город" хаҫата халӑх корреспонденчӗ пӗлтернӗ тӑрӑх, арҫын иккӗмӗш хут тӑрринчи юра антарма пусма лартнӑ. Анчах хӑпарнӑ чухне тытӑнса тӑрайман, аялалла, цоколь хутри картлашка хушӑкне, ӳкнӗ. 56 ҫулти арҫын йывӑр сурансене пула ҫавӑнтах вилнӗ.

Вырӑна васкавлӑ медпулӑшу, йӗрке хуралҫисем ҫитнӗ. Шел, тухтӑрсем арҫынна нимпе те пулӑшайман. Йӗрке хралҫисем ӗҫ-пуҫа уҫӑмлатаҫҫӗ. Тӗрӗслев хыҫҫӑн стадионта хӑрушсӑрлӑх техникишӗн, ӗҫ хӑрушсӑрлӑхӗшӗн яваплӑ ҫынна тупса палӑртӗҫ.