traveltimes.ru сӑнӳкерчӗкӗ

Шупашкарти ҫамрӑк лавккари телефона укҫа тӳлемесӗр йӑтса тухса кайнӑ. Халӗ каччӑ тӗлӗшпе пуҫиле ӗҫ пуҫарнӑ.

Каччӑ 90 пине яхӑн тенкӗ тӑракан телефона интернет урлӑ саккас парса туянма шухӑш тытнӑ. Хаклӑ гаджет интернет-лавккан тавар паракан пунктне ҫитнӗ. Йӗрке тӑрӑх, ҫын малтан тавар илет, унтан уншӑн укҫа тӳлет. Каччӑ суту-илӳ йӗркин пӗр пайне пӑхӑннӑ, анчах иккӗмӗшне — ҫук. Вӑл телефоншӑн укҫа тӳлемен — тавара илсе тухса кайнӑ.

Телефон ҫухалнӑ тесе йӗрке хуралҫисене пӗлтернӗ хыҫҫӑн пакунлисем каччӑна шырама тытӑннӑ, ӑна тупса палӑртнӑ хыҫҫӑн ун тӗлӗшпе пуҫиле ӗҫ пуҫарнӑ.

cheb.ru сӑнӳкерчӗкӗ

Паян, утӑ уйӑхӗн 27-мӗшӗнче, ҫӗрле, ҫурҫӗр тӗлӗнче, Чӑваш Республикин Шыравпа ҫӑлав службине Шуашкарти ҫуртсенчен пӗрин ҫивиттийӗ ҫинче ҫара арҫын ҫӳрени пирки пӗлтерекен тупӑннӑ.

Ҫара арҫын Шупашкарти Миттов бульварӗнчи ҫурт ҫивиттийӗ ҫинче пулнӑ. Вӑл хӑйне йӗркеллӗ тытман.

Арҫынна куракансем вӑл персе анасран хӑранӑ, ҫавӑнпа ҫӑлавҫӑсем патне шӑнкӑравланӑ. Специалистсем ун патне пусма тӑрӑх хӑпарса кайнӑ, альпинист снаряженийӗпе ҫыхса арҫынна ҫивитти ҫинчен антарнӑ. Унтан ӑна полици ӗҫченӗсен аллине панӑ.

ҪҪХПИ тунӑ сӑн

Ӗнер каҫхине, 21 сехет ҫурӑра, Комсомольскинче авари пулнӑ: мотоциклпа ҫӑмӑл машина пырса ҫапӑннӑ. Шел, пӗр ҫыннӑн пурнӑҫӗ татӑлнӑ.

Малтанлӑха пӗлтернӗ тӑрӑх, ҫӑмӑл машина водителӗ сулахаялла пӑрӑннӑ чухне тӳрӗ пыракан мотоцикла ирттерсе яман. Пырса ҫапӑнсан мотоцикл пассажирӗ, 34-ри арҫын, вилнӗ. Хӑй водитель 50 ҫулта, ӑна пульницӑна илсе кайнӑ. Унӑн сывлӑхӗ йывӑр.

Палӑртмалла: мотоцикл водителӗн А категориллӗ права пулман. «Хонда» маркӑллӑскере ҪҪХПИре те регистрацилемен.

medboli.ru сайтри сӑн

М-12 ҫула тунӑ ҫӗрте ӗҫлекен виҫӗ арҫын темӗнле япалапа наркӑмӑшланнӑ. Вӗсене ӗҫтешӗсем бытовкӑра тупнӑ. Ҫав вӑхӑт тӗлне виҫҫӗшӗ те комӑра пулнӑ.

Ҫӗмӗрлери васкавлӑ медпулӑшу бригади хӑвӑртрах реанимаци мероприятийӗсем тума пуҫланӑ. Хушма медпулӑшу машинисем ҫитиччен икӗ арҫын тӑна кӗнӗ. Вӗсене Ҫӗмӗрлери пульницӑна илсе кайнӑ.

Виҫҫемӗш арҫын тӑна кӗмен-ха, вӑл комӑра. Ӑна та Ҫӗмӗрлери пульницӑна илсе кайнӑ. Тухтӑрсем каланӑ тӑрӑх, унӑн сывлӑхӗ йывӑр.

chuvashia.sledcom.ru сӑнӳкерчӗкӗ

Ҫӗнӗ Шупашкар хулинче пурӑнакан 36 ҫулти арҫын пӗлӗшне асӑрханмасӑр вӗлернӗ. Пӑтӑрмах сӑлтавӗ — кӗвӗҫӳ.

Арҫын асӑннӑ хулари общежитисенчен пӗринче тусӗ патӗнче пулнӑ. Пӑтӑрмах кӑҫалхи ҫу уйӑхӗн 2-мӗшӗнче пулса иртнӗ. Пӗлӗшне вӑл хӑйӗн хӗрӗ ҫумне кӗвӗҫнӗ. Арҫынна хайхи питӗнчен икӗ хутран кая мар ҫапса янӑ, унтан аллипе ҫипуҫӗнчен ярса илнӗ те тӗксе янӑ. Кил хуҫи пуҫӗпе урайне ҫапӑннӑ. Пуҫ мимине чӗтретнӗскер кӑштахран вилсе кайнӑ.

Кӗвӗҫ арҫын тепӗр усал ӗҫ те тунӑ. Унччен маларах вӑл хӑйӗн хӗрӗн тусӗн сумкинчен карас телефонне вӑрланӑ.

Арҫынна суд ҫирӗп режимлӑ колоние 3 ҫуллӑха ӑсатма йышӑннӑ.

21.мвд.рф сӑнӳкерчӗкӗ

Муркаш районӗнчи Шупуҫӗнче пӗлтӗрхи ҫурла уйӑхӗн 15-мӗшӗнче пӗр водитель хӑйӗн машинипе курнӑҫланас тенӗ.

Ӳсӗр водитель, унччен судпа темиҫе хутчен те айӑпланнӑскер, ҫурҫӗр тӗлӗнче тусӗсене« ВАЗ-21124» автомобиле лартса ҫурҫӗр тӗлӗнче ял тӑрӑх вӗҫтерсе пынӑ. Машинӑна вӑл сехетре 140 километр хӑвӑртлӑхпа хӑваланӑ. Автомобильпе кӗсех малтан йывӑс ҫине пырса тӑрӑннӑ, унтан — газ пӑрӑхӗн юпи ҫине. Салонти пӗр пассажир вырӑнтах вилсе выртнӑ, тепри йывӑр суранланнӑ.

Суд водителе 7 ҫуллӑха колони-поселение ӑсатма йышӑннӑ.

Ҫӑлав службин архивӗнчи сӑн

Ҫанталӑк шӑрӑх тӑрать, шывра чӑмпӑлтатас килет. Ӗнер республикӑра 3 ҫын путса вилни пирки хыпарлать Инкеклӗ лару-тӑру министерствин Чӑваш Енри тӗп управленийӗ.

Муркаш районӗнче Сурӑм юханшывӗнче 27 ҫулти арҫын путса вилнӗ. Вӑл Элӗк районӗнчи Мӑн Шӗвӗш ҫынни пулнӑ. Малтанлӑха пӗлтернӗ тӑрӑх, вӑл юраман ҫӗрте шыва кӗнӗ, хӑй ӳсӗр пулнӑ.

Ҫӗмӗрлере 17-ри каччӑн пурнӑҫӗ татӑлнӑ. Унӑн виллине паян шывран кӑларнӑ. Улатӑр районӗнче пулӑҫ путса вилнӗ. Унӑн кимми ҫаврӑнса ӳкнӗ.

Кӑҫал республикӑра 20 ҫын путса вилнӗ. Вӗсенчен 3-шӗ - ачасем.

cheb.mk.ru сайтран илнӗ сӑнӳкерчӗк

Шупашкарта подъезд тӑрринче ҫамрӑк хӗрарӑм виллине тупнӑ.

Вилене паян ирпе, 6 сехет те 48 минутра, Кадыков урамӗнчи 30-мӗш ҫуртра асӑрханӑ. Ҫамрӑк хӗрарӑм подъезд тӑрринче выртнӑ.

Ҫамрӑк хӗрарӑм виллине асӑннӑ ҫуртра пурӑнакан арҫын курнӑ, вӑл пакунлисем патне ҫийӗнчех шӑнкӑравланӑ. Вӗсем вырӑна пырса ҫитнӗ. Вилӗм сӑлтавне йӗрке хуралҫисем палӑртӗҫ.

"Про Город" сайтӗнчи сӑн

Ҫӗнӗ Шупашкарти ача ҫуратмалли ҫурт ҫывӑхӗнче хӗрарӑм виллине тупнӑ. Халӗ РФ Следстви комитечӗн Чӑваш Енри следстви органӗсем ӗҫ-пуҫа уҫӑмлатаҫҫӗ.

Хӗрарӑм виллине паян 10 сехет ҫурӑра асӑрханӑ. Хӑй 50 ҫулти пек курӑнать. Малтанлӑха пӗлтернӗ тӑрӑх, хӗрарӑм 5-мӗш хутран ӳкнӗ.

Ҫакӑ паллӑ: хӗрарӑма ача ҫуратмалли ҫурта экстреннӑй шӑнкӑрав пулнӑ хыҫҫӑн илсе ҫитернӗ. Вӑл ҫӗре ӳксенех вилнӗ.

21.mchs.gov.ru сӑнӳкерчӗкӗ

Утӑ уйӑхӗн 21-мӗшӗнче Шупашкар районӗнчи Ҫӗнӗ Тутаркассинче пахча-ҫимӗҫ управӑшӗ ҫуннӑ. Пушарпа кӗрешекенсем вут-ҫулӑма сӳнтерес тесе икӗ сехет таран тӑрӑшнӑ.

Пушар пирки каҫхи пилӗк сехет ҫурӑ тӗлӗнче пӗлтернӗ. Ҫӑлавҫӑсем вырӑна васкавлӑн тухса кайнӑ. Вут-ҫулӑма сӳнтерме 10 машина тата 50 ҫын пырса ҫитнӗ. Пушара 19 сехет те 45 минут тӗлне сӳнтернӗ.

Вут-ҫулӑм пахча-ҫимӗҫ управӑшӗн ҫивиттине пурӗ 550 тӑваткал метр лаптӑкра сиенлетнӗ.

Инкек сӑлтавне тата вут-ҫулӑм миҫе тенкӗлӗх сиен кӳнине экспертсем палӑртӗҫ.