Васкакан вакка сикнӗ тесе ваттисем ахальтен каламан ҫав. Шупашкар хулинче пӗр хӗрарӑм ҫул урлӑ каҫмалли ятарлӑ вырӑн патне утма ӳркеннӗ те машина айне лекнӗ.
Инкек ӗнер ирхи 8 сехет те 50 минутра Гагарин урамӗнчи Тӗп пасар тӗлӗнче пулнӑ. 81 ҫулти хӗрарӑм ҫулӑн тепӗр енне машинӑсемпе ӑмӑртмалла талпӑннӑ. Утмӑл ҫултан иртнӗ ҫынна ултӑ ҫулти ача ӑсӗ кӗрет тесе ахальтен каламан тейӗн. Ҫул ҫине кӗтмен ҫӗртен сиксе тухнӑ ватӑ ҫын ҫине «Лада Гранта» пырса кӗнӗ.
Хӗрарӑм пуҫ мимине суранлатнӑ. «Ӑна тухтӑрсем пулӑшнӑ, унтан килне янӑ», – пӗлтереҫҫӗ ҫул-йӗр хӑрушсӑрлӑхӗн инспекторӗсем.
Чӑваш Енӗн Инкеклӗ ӗҫсен патшалӑх комитечӗ тата йӗрке хуралҫисем халӑхран пулӑшу ыйтаҫҫӗ. Вӗсем чӳк уйӑхӗн 11-мӗшӗнче кӑнтӑрла Шупашкар районӗнчи Анатри Макаҫ ялӗ патӗнчен иртсе кайнӑ водительсенчен видеорегистратора ҫырӑнса юлнӑ файлсене ыйтаҫҫӗ.
Ӗнер кӑнтӑрла иртни икӗ сехетре паллӑ мар водитель ҫул хӗррине наркӑмӑшлӑ япала, гидрохлорид, тӑкса хӑварнӑ тесе шухӑшлаҫҫӗ. Ҫул хӗрринче тем пӑсланнине асӑрхакансем ятарлӑ службӑсене шӑнкӑравласа пӗлтернӗ.
Вырӑна йӗрке хуралҫисем тата тӗрлӗ служба ӗҫченӗсем васкаса ҫитнӗ. Территорие тасатнӑ, наркӑмӑшлӑ япалана сиенсӗрлетнӗ.
Паян, чӳк уйӑхӗн 11-мӗшӗнче, 9 сехет те 55 минутра М-7 ҫулӑн 62-мӗш ҫухрӑмӗ ҫинче авари пулнӑ. Шупашкар районӗнчи Апаш ялӗ ҫывӑхӗнче, Ҫӗрпӳ хули еннелле кайнӑ ҫӗрте, «Форд Транзит» микроавтобус трактор ҫине пырса тӑрӑннӑ.
ШӖМ пӗлтернӗ тӑрӑх, аварире пилӗк ҫын тӗрлӗрен суранланнӑ. Вӗсене тухтӑрсем медпулӑшу панӑ. Вайлах аманманнисем пулман. Халӗ аварири ӗҫ-пуҫа уҫӑмлатаҫҫӗ. Маршруткӑн малти пайӗ сиенленнӗ.
Чӑваш Енре «Мускав – Чулхула – Хусан» маршрутпа хӑвӑрт ҫӳремелли ҫул тӑвас енӗпе ӗҫлекен оперативлӑ штаб ҫирӗплетнӗ.
Асӑннӑ ушкӑн ӗҫне йӗркелесе тӑрассишӗн республикӑн Транспорт тата ҫул-йӗр хуҫалӑхӗн министерстви яваплӑ тесе палӑртнӑ. Оперативлӑ штаба республикӑн Министрсен Кабинечӗн Ертӳҫи ертсе пырӗ. Унӑн ҫумӗ пулма транспорт тата ҫул-йӗр хуҫалӑхӗн министрне шаннӑ. Ӗҫлӗ йыша хамӑр регионти тӗрлӗ министерствӑпа ведомство ертӳҫисене кӗртнӗ. Хӑвӑрт ҫӳремелли ҫул иртекен районсен: Вӑрнар, Йӗпреҫ, Канаш, Комсомольски, Ҫӗмӗрле, Тӑвай – администрацийӗн пуҫлӑхӗсем оперштаба кӗнӗ.
Ӗнер, юпа уйӑхӗн 30-мӗшӗнче, Ҫӗрпӳ районӗнче, «М-7» автоҫул ҫинче, тӑватӑ машина ҫапӑннӑ. Инкекре 13 ҫулти хӗрачапа 11-ти арҫын ача аманнӑ. Вӗсем машинӑсенчен пӗрин салонӗнче ларса пынӑ.
Ҫул-йӗр инспекторӗсем малтанласа шухӑшланӑ тӑрӑх, «Хендай» автомобиль водителӗ ҫул урлӑ каҫакана ирттерсе яма чарӑннӑ. Ҫуран ҫӳрекен ятарлӑ вырӑнтах, анчах светофор ҫук тӗлте, каҫнӑ.
Ҫӑмӑл машина ҫине ҫурма прицеплӑ, йывӑр тиевлӗ машина пырса кӗнӗ. «Хендай» ҫавна май хирӗҫ ҫул ҫине тухса кайнӑ, унта «Лада Грантӑпа» пырса ҫапӑннӑ. Икӗ машина та ҫул айккине чӑмнӑ. Ҫав вӑхӑтрах йывӑр машина ҫине «Лада Приора» пырса кӗнӗ. Унӑн салонӗнче икӗ ача пулнӑ. Руль умӗнче пулнӑ 18 ҫулти хӗр тата машинӑри икӗ ачана ӑсатнӑ.
Шупашкарти аэропорт хӗллехи ӗҫ вӑхӑчӗ ҫине куҫнӑ. Кун пек вӑл юпа уйӑхӗн 25-мӗшӗнченпе ӗҫлет. Хӗллехи режим пуш уйӑхӗн вӗҫӗччен пырӗ.
Шупашкарти аэропортӑн расписанийӗнче «Победа» авиакомпанин рейсӗсем йышланнӑ. Юпа уйӑхӗн 27-мӗшӗнченпе лоукостер Питӗр хулине эрнере тӑватӑ хутчен вӗҫет. Ҫапла вара пирӗн республика ҫыннисем архитектура тата культура енчен пуян ҫав хулана
ытларикунсерен, кӗҫнерникунсерен, эрнекунсерен тата шӑматкунсерен кайма пултараҫҫӗ. Самолет Питӗрти Пулково аэропортне илсе ҫитерет. Кунне кура расписани тӗрлӗрен. Ытларикунпа шӑматкун самолет Шупашкартан 12 сехет те 50 минутра хускалать, Питӗре вӑл 14 сехет те 55 минута ҫитерет; кӗҫнерникун 12 сехет те 40 минутра вӗҫсе кайӗ, Пулково аэропортӗнче 14 сехет те 45 минутра пулӗ; эрнекун 19 сехет те 25 минутра хускалӗ, 21 сехет те 30 минута ҫитерӗ.
Икӗ тӑван урам урлӑ пурӑнаҫҫӗ, нихҫан та пӗр-пӗрне курмаҫҫӗ тесе калакан ваттисен сӑмахӗ аса килчӗ-ха. Ҫӗнӗ Шупашкара Шупашкарӑн спутник хули те теҫҫӗ, анчах Ҫӗнӗ Шупашкартан ирхине Шупашкара килме хӗн, каҫхине — таврӑнма. Мӗншӗн йывӑррине паян республикӑн Правительствин ҫуртӗнче тишкернӗ.
Республикӑн транспорт министрӗ Владимир Осипов икӗ хулана ҫыхӑнтаракан 7 маршрутпа 185 автобус ҫӳремеллине пӗлтернӗ. Анчах вӗсенчен 120-130-шӗ ҫеҫ ҫула тухать иккен. Сӑлтавӗ — транспорт тата водительсем ҫитменни. Пуррисем маршрут тупӑшли марри ҫине йӑвантараҫҫӗ. Хака 2012 ҫултанпа ӳстермен-мӗн.
Транспорт министерстви ҫывӑх вӑхӑтра ҫӗнӗ маршрут уҫасшӑн.
Ӗнер, юпа уйӑхӗн 16-мӗшӗнче, «Ҫӗрпӳ-Чӗмпӗр» А-151 ҫул ҫинче инкек пулнӑ. Пӑтӑрмах кӑнтӑрла, 12 сехет тӗлӗнче, сиксе тухнӑ.
«Мерседес» минивэн водителӗ ҫулӑн сулахай енче ларакан манипуляторпа ҫапӑннӑ.
Ҫӑмӑл машинӑра 9 пассажир пулнӑ. Вӗсене водитель Мускавран Патӑрьел районне илсе килнӗ. Анчах Ҫӗрпӳ районӗнче ҫынсем инкеке ҫакланнӑ. Манипуляторпа ҫапӑнсан «Мерседес» водителӗ аманнӑ. Унсӑр пуҫне тӑватӑ пассажира пульницӑна ӑсатнӑ. Ыттисене вырӑнта пулӑшнӑ.
Чӑваш Енӗн ШӖМӗнче пӗлтернӗ тӑрӑх, инкек ют ҫӗршывра кӑларнӑ ҫӑмӑл автомашина водитель тимсӗрлӗхӗпе ҫыхӑнма пултарнӑ.
Паян Куславкка районӗнчи Куснар ялӗ тӗлӗнчи автоҫула савӑнӑҫлӑ лару-тӑрура уҫнӑ. «Атӑл» М-7 ҫула пурӗ 17 километр тӑршшӗ лаптӑк ҫинче юсанӑ. Калӑпӑшлӑ ӗҫсене пурнӑҫлама 1,5 миллиард тенкӗ тӑкакланӑ. Тупрана федераци хыснинчен уйӑрнӑ.
Ҫула юсаса ҫӗнетнӗ май автодус чарӑнӑвӗсене кирпӗчрен пурӗ сакӑр штук купаланӑ. Шӑв-
шавран сыхлакан экрансем, ҫутӑ хунарӗсем вырнаҫтарнӑ.
Юсав ӗҫӗсене подряд организацийӗ пӗлтӗрхи утӑ yйӑxӗнче пуҫланӑ.
Юсаса ҫӗнетнӗ ҫула уҫма тӳре-шара пухӑннӑ. Чӑваш Ен Элтеперӗ Олег Николаев строительсене ӗҫшӗн тав тунӑ.
Улатӑр районӗнчи Иваньково-Ленино ялӗнче руль умӗнчи хӗрарӑм йывӑҫ ҫине пырса тӑрӑннӑ. Вӑл руле итлеттереймен, ҫул ҫинчен тухса кайнӑ.
Ку авари юпа уйӑхӗн 12-мӗшӗнче ирхи 7 сехет те 35 минутра пулнӑ. 35 ҫулти хӗрарӑмпа пӗрле 7 ҫулти ачи пулнӑ. Хӗрарӑм хӑй те, ачи те ятарлӑ пиҫҫиххипе ҫыхӑнман. Ҫитменнине, ачан ятарлӑ кресло пулман.
Аварире шар курнӑ хӗрарӑмпа шӑпӑрлана пульницӑна илсе кайнӑ. Вӗсен сурансем пур.
-3.7 °C