Чӳк уйӑхӗн 12-мӗшӗнче ирхи 5 сехет тӗлӗнче «Атӑл» М–7 автоҫул ҫинче инкек пулса иртнӗ. Шупашкар районӗнчи Апаш ялӗ тӗлӗнче «Хёндай-Туксон» кроссовер тырӑ тиенӗ «КамАЗ» автомобильпе пырса ҫапӑннӑ.
Ҫӑмӑл машина рулӗ умӗнче Чулхула облаҫӗнче пурӑнакан 34 ҫулти арҫын пулнӑ.
Ҫул-йӗр инспекторӗсем малтанласа шухӑшланӑ тӑрӑх, кроссовер водителӗ дистанцие пӑхӑнман.
Эрех ӗҫмен-и тесе икӗ водителе те тӗрӗсленӗ — вӗсем урах пулнӑ.
Чулхула облаҫӗнче пурӑнакан арҫынна пульницӑна ӑсатнӑ, унта ӑна тухтӑрсем малтанхи пулӑшу кӳнӗ хыҫҫӑн сипленме килне янӑ.
Ӗнер, чӳк уйӑхӗн 11-мӗшӗнче, Лапсар ялӗ тӗлӗнче харӑсах пилӗк машина инкеке лекнӗ. Пӑтӑрмахра 3 ҫын аманнӑ.
Инкек 17 сехет тӗлӗнче Ҫӗнӗ Лапсар тӗлӗнче, М-7 «Атӑл» ҫул ҫинче пулса иртнӗ.
Малтанласа палӑртнӑ тӑрӑх, «Skoda Rapid» автомбиле тытса пынӑ хӗрарӑм-водитель хирӗҫ килекен ҫул ҫине тухса кайнӑ, унта вӑл малтан «Audi A3» машинӑпа, кайран «Wolkswagen Transporter» маркӑллипе пырса ҫапӑннӑ.
«Ауди» ҫӑмӑл машина «Scania» фура тата «Volkswagen Transporter» автомобиль ҫине пырса кӗнӗ.
«Ауди» машина водителӗ тата хӗрарӑм-пассажир аманнӑ, «Шкода» автомобильте ларса пынӑ 5 ҫулхи арҫын ача пуҫӗ суранланнӑ.
Чӳк уйӑхӗн 9-мӗшӗнче каҫхине «Муркаш – Турай – Сӑр» автоҫул ҫинче темӗнле машина ҫынна ҫапса кайнӑ. Авари вырӑнӗнче кӑвак тӗслӗ бампер тата патшалӑх номерӗн пайӗсем юлнӑ. Водителе шыраҫҫӗ.
Ҫын виллине тепӗр кун ирхине кӑна асӑрханӑ. Чӳк уйӑхӗн 11-мӗшӗнче тухнӑ хыпара ӗненес тӗк, ҫав ҫын кам пулнине палӑртман.
Водителе тупмашкӑн пулӑшма ыйтаҫҫӗ. 102 телефон номерӗпе шӑнкӑравламалла е телеграмра @antidiler21bot бота ҫырмалла.
Шупашкарпа Ҫӗнӗ Шупашкара ҫыхӑнтаракан 101С-мӗш маршрут ҫине тата тепӗр виҫӗ автобус кӑларнӑ.
Асӑннӑ маршрут Шупашкарти «Университет» чарӑнуран Ҫӗнӗ Шупашкарти «Сокол» чарӑнӑва ҫити ҫӳрет.
Халӑх йышлӑ ҫӳренӗрен Чӑваш Енӗн Транспорт тата ҫул-йӗр хуҫалӑхӗн министерстви маршрутра автобуссен шутне ӳстерме йышӑннӑ — хушма 3 автобус ҫӳретме тытӑннӑ. Ӳлӗмрен вӑл маршрутпа 18 единица автобус ҫӳрӗ.
Маршрутпа «Iveco» маркӑллӑ автобуссем хутлаҫҫӗ. Вӗсене 45 ҫын вырнаҫать, вӗсенчен 20-шӗ валли ларса пымалли вырӑн пур, 25 пассажир тӑрса пырать.
Халӑх ӗҫе кайнӑ тата ӗҫрен таврӑннӑ чухне автобуссем 10 минутра пӗрре хутлаҫҫӗ, ытти чухне — 20 минутра пӗрре.
Паян, чӳк уйӑхӗн 9-мӗшӗнче, 14 сехетре Канаш районӗнчи Кӑшнаруй ялӗ ҫывӑхӗнче авари пулнӑ. Ӑна пула «пӑкӑ» пухӑннӑ.
Аварие куракансем каланӑ тӑрӑх, машинӑсем ҫапӑннӑ хыҫҫӑн пӗри сирпӗнсе кайнӑ. Вырӑна ҫӑлавҫӑсем ҫитнӗ. Аварире пӗр ҫын вилни пирки пӗлтернӗ.
«Ҫыхӑнура» портал пӗлтернӗ тӑрӑх, ҫапӑннӑ машинӑсем «Приора» тата «Камри» пулнӑ. Ҫунаканни - "Приора", унӑн водителӗ вилнӗ.
2023 ҫулхи кӑрлач уйӑхӗн 1-мӗшӗнчен пирӗн ҫӗршывра пуйӑспа ҫӳрекенсен ҫул укҫишӗн ытларах кӑларса хума тивӗ. Сӑмах аякка илсе ҫӳрекен плацкарт тата пӗтӗмӗшле вакунсем пирки пырать. Федерацин монополипе кӗрешекен служби хака 8,1 процент ӳстерме ирӗк панӑ.
2022 ҫулхи кӑрлач уйӑхӗн 1-мӗшӗнчен плацкартри хаксем 4,3 процент ӳснӗ, кӑҫалхи юпа уйӑхӗн 1-мӗшӗнчен — 6,25 процент.
«Купе», «СВ» тата «люкс» вакунсенче хак ҫутҫанталӑкӑн тӗрлӗ тапхӑрӗнчен, эрнерни хӑш кун пулнинчен, халӑх билетсене епле туяннинчен килет.
Паян ирпе ирех Ҫӗрпӳ районӗнче ҫул ҫинче инкек пулса иртнӗ.
«Форд Фокус» машина Хусан еннелле кайнӑ. Ҫӗнӗ Катӗк ялӗ тӗлӗнче водитель машинӑсем хирӗҫ килекен ҫул ҫине сиксе тухнӑ та фурӑпа пырса ҫапӑннӑ.
Чӑваш Енӗн патшалӑхӑн ҫул-йӗр хӑрушсӑрлӑхӗн инспекцийӗнче пӗлтернӗ тӑрӑх, инкеке лекнисем пурте чӗрех юлнӑ. Ҫапах та ҫӑмӑл машинӑри водительпе пассажир-хӗрарӑм хытӑ суранланнӑ. «Форд Фокус» водителӗ правасӑр пулнӑ, руль тытма вӑл вӗренсе тухман. Кӑҫалхи кӑрлач уйӑхӗнче ҫул-йӗр инспекторӗсем ӑна пӗрре тытса чарнӑ та пулнӑ...
Юпа уйӑхӗн 29-мӗшӗнче 16 сехет ҫурӑра "Мускав - Ӗпхӳ" М-7 ҫул ҫинче авари пулнӑ. "Скания" рулӗ умӗнче ларнӑ 59 ҫулти водитель малта пыракан ҫӑмӑл машина ҫине пырса кӗнӗ. "Опел" машинӑра Ҫӗнӗ Шупашкарта пурӑнакан 42 ҫулти арҫын тата унӑн 7-ри ывӑлӗ пулнӑ. Вӗсем суранланнӑ. Ашшӗне тухтӑрсем пулӑшнӑ та киле янӑ, ывӑлне вара пульницӑна вырттарнӑ.
Ҫакӑ паллӑ: фура водителӗ ӳсӗр пулман.
Ӗнер, юпа уйӑхӗн 25-мӗшӗнче, каҫхине Комсомольски районӗнче авари пулнӑ. Шел те, инкекре ҫынсен пурнӑҫӗ татӑлнӑ. ҪҪХПИ пӗлтернӗ тӑрӑх, арҫынпа хӗрарӑм вилмеллех суранланнӑ.
Вӗсем ҫӑмӑл машинӑра пулнӑ. Хайхискерсем малта пыракан грузовик ҫине пырса кӗнӗ. Водительпе пассажир вырӑнтах вилнӗ.
«Ҫыхӑнура» порталта комментари ҫыракансене ӗненес тӗк, вилекеннисем каччӑпа хӗр пулнӑ, пӗрлешме хатӗрленнӗ. Пӗри 31-ре, тепри 20 ҫулта пулнӑ.
Чӑваш Енре виҫӗ кунта 51 ӳсӗр водителе тытса чарнӑ. Юпа уйӑхӗн 21-23-мӗшӗсенче ятарлӑ тӗрӗслев ирттернӗ. Ҫул-йӗр хӑрушсӑрлӑхӗн инспекторӗсене хастар ҫынсем те пулӑшнӑ — вӗсем киккирикне хӗртнӗ ҫын руль умне ларнине курсан кирлӗ ҫӗре систернӗ.
Ӳсӗрсем инкеке час-часах лекеҫҫӗ. Юпа уйӑхӗн 21-мӗшӗнче, сӑмахран, Шупашкарти Сӗнтӗрвӑрри шосси ҫинче «Лада-Приора» автомобиль ҫул айккинчи чул ҫине пырса кӗнӗ. Юпа уйӑхӗн 22-мӗшӗнче республикӑн тӗп хулинчи Граждан урамӗнче пӗр ӳсӗр водитель умра пыракан «Приора» машинӑпа пырса ҫапӑннӑ.
-6.7 °C