Ака уйӑхӗн 15-мӗшӗнче 17 сехет те 40 минутра Патӑрьел районӗнчи Именкасси ялӗнче юпа персе аннӑ. Ӑна "Лада Гранта" водителӗ йӑтса антарнӑ. Вӑл унта пырса ҫапӑннӑ.
Юпа ӳкнӗ. Юрать-ха, водитель те, унпа юнашар ларса пынӑ пассажирка та чӗрӗ юлнӑ. 31 ҫулти водитель ӳсӗр пулнӑ. Ҫитменнине, унӑн права та пулман. Хӗрарӑм вара пуҫне суранлатнӑ. Ӑна пульницӑна илсе кайнӑ.
Сургута Шупашкартан самолет вӗҫме пуҫлӗ.
Ҫурҫӗрти ҫав хулана пирӗн республикӑран авиарейс ҫӗртме уйӑхӗн 6-мӗшӗнче уҫӑлӗ. Самолет эрнере пӗрре — ытларикунсерен — вӗҫӗ.
Самолёт Сургутран Шупашкара 9 сехет те 40 минутра килсе ҫитӗ, Сургута 10 сехет те 30 минутра вӗҫсе кайӗ.
Ӗнер 18 сехет ҫурӑра Шупашкарта 10 ҫулти хӗрача "Лада Калина" машина кустӑрми айне пулнӑ. Ку инкек Шумилов урамӗнче пулса иртнӗ.
Видеокамерӑна пӑхсан 33 ҫулти водитель ҫул хӗресленекен вырӑна светофорӑн симӗс ҫутипе тухни паллӑ. Анчах кӑшт кайсан ун умне хӗрача сиксе тухнӑ.
Ачана Республикӑри ача-пӑча клиника пульницине илсе ҫитернӗ.
«Ниссан» автомобильпе ҫӳрекен пӗр хӗрарӑм йӗркене пӑсма питех те юратнӑ.
Ака уйӑхӗн 4-мӗшӗнче 16 сехет те 23 минутра Патшалӑхӑн ҫул-йӗр хӑрушсӑлӑхӗн инспекцийӗн ӗҫченӗсем унӑн автомобильне тӗрӗслес тӗллевпе чарнӑ. Хӗрарӑм икӗ ачине автокреслосӑр илсе ҫӳрени палӑрнӑ.
Хӗрарӑм-водителе йӗркене пӑсма юраманни, автокресло ҫыншӑн мар, ачасене инкеке лекесрен асӑрханма кирли ҫинчен ӑнлантарса панӑ, административлӑ майпа явап тыттарнӑ.
Тепӗр сехетрен ҫав машиӑна каллех чарнӑ. Руль умӗнчи хӗрарӑм ӳсӗр пулнӑ. Тепӗр кунхине ҫав хӗрарӑм каллех йӗрке хуралҫисен куҫӗ тӗлне ҫакланнӑ. Ун чухне вӑл унчченхи кунхинчен те ӳсӗртерех пулнӑ.
Ӗнер 20 сехет 10 минутра Етӗрне районӗнчи Совхозный поселокӗ ҫывӑхӗнче хӑрушӑ авари пулнӑ.
ШӖМ пӗлтернӗ тӑрӑх, 18 ҫулти водитель транспорт хирӗҫ килекен ҫул ҫине тухса кайнӑ та "Сканийӑпа" ҫапӑннӑ. Кун хыҫҫӑн ҫамрӑк водитель КамАЗ ҫине пырса кӗнӗ. Ҫав вӑхӑтрах 38 ҫулти водитель "Опель" машинӑпа "Скания" ҫине пырса тӑрӑннӑ.
18 ҫулти каччӑ авари вырӑнӗнчех вилнӗ. "Опель" машинӑри 9 ҫулти ачан хырӑмӗ суранланнӑ, ӑна пульницӑна илсе ҫитернӗ.
Пуш уйӑхӗн 31-мӗшӗнче Чӑваш Ен Элтеперӗ Олег Николаев ҫынсен ыйӑвӗсене тӳрӗ эфирта хуравланӑ чухне Элӗк районӗнчи пӗр хӗрарӑм Мӑн Этмен плотини ишӗлме пуҫлани, «Испухан — Мӑн Ямаш» ҫул япӑхни пирки пӗлтернӗ.
Олег Николаев ҫирӗплетсе панӑ тӑрӑх, сметӑпа проект докуменчӗсене хатӗрлесе ҫитернӗ. Республика ертӳҫи ӗнентернӗ тӑрӑх, плотинӑна кӑҫал, ҫула ҫитес ҫул юсама палӑртнӑ.
Плотинӑсене тӗрӗслес ӗҫе республикӑра 2020 ҫултах пуҫланӑ-мӗн. Нумайӑшӗн хуҫи ҫук. Халӗ ҫав кӑлтӑка пӗтерессипе ҫине тӑраҫҫӗ.
Паян Мари Элте "Звенигово - Шелангер - Морки" ҫул ҫинче трассӑн пӗр пай ишӗлсе аннӑ. Тӗрӗсрех каласан, ӑна ейӳ шывӗ татса янӑ.
Ҫав вырӑнтан халӗ машинӑсем ҫӳреймеҫҫӗ, ӑна хупса хунӑ. Ҫул 6-10 метр тӑршшӗ ишӗлнӗ. Тарӑнӑшӗ - 6 метр.
Машинӑсене вӑхӑтлӑха Волжск районӗнчен "Помары - Коркатово" ҫулпа яраҫҫӗ. Ҫула юсас ӗҫ пырать-ха. Анчах юр шывӗ йӑлтах кайса пӗтмен, тепӗр талӑк вӑйлӑ анмалла.
Ҫул ҫинче кӑҫалхи пек шӑтӑк-путӑк нихӑҫан та пулман. Ҫапла пӗлтернӗ ЧР Элтеперӗ Олег Николаев хӑйӗн Телеграм-каналӗнче.
"Кӑҫал республикӑра 600 пин тӑваткал метр ҫул ҫинчи шӑтӑк-путӑка юсамалла. Кун пекки унччен пулман", - ҫапла ҫырнӑ Олег Алексеевич каналта.
Кӑҫал ҫулсем мӗншӗн вӑйлӑ арканнӑ-ха? Республика влаҫӗ ҫакна ҫанталӑк условийӗсемпе тата М-12 федераци ҫулне тунипе ҫыхӑнтарать.
Хальччен 1,5 пин тӑваткал метр ҫул ҫинче шӑтӑк-путӑка сапланӑ. Ку ӗҫе ҫӗртмен 1-мӗшӗ тӗлне вӗҫлеме палӑртнӑ.
«Шупашкар – Мускав» маршрутпа ҫӳрекен 71/72 номерлӗ пуйӑса икӗ хутлипе ылмаштарӗҫ. Паянхи куна фирма пуйӑсӗ икӗ хутли ҫӳрет-ха.
«Раҫҫейӗн чукун ҫулӗсем» холдинг икӗ хутлӑ пуйӑссем ҫӳрекен полигона анлӑлатасшӑн. Сӑмахран вӗсем «Ӗпхӳ – Имерет курорчӗ» тата «Екатеринбург – Мускав» маршрутсемпе хутлӗҫ.
Тверьти вакунсем тӑвакан завод холдинга 550 ҫӗнӗ вакунпа тивӗҫтерӗ, ҫав шутран 100-шӗ икӗ хутлисем пулӗҫ.
Чӑваш Енре, Чулхула облаҫӗнче тӳлевлӗ М-12 ҫула тӑвас ӗҫ хӗрсех пырать. Халӗ ӗҫсен улттӑмӗш тапхӑрне пурнӑҫлаҫҫӗ.
«Автодор» ГК правленийӗн пуҫлӑхӗ Вячеслав Петушенко пӗлтернӗ тӑрӑх, ҫул ҫинчи специалистсем талӑкӗпех ӗҫлеме пуҫлӗҫ. Ҫул-йӗр тата строительство объекчӗсене тума хушма ресурсем уйӑрӗҫ.
Палӑртмалла: «Мускав – Чулхула – Хусан» М-12 федераци трассин пур участокне те 2023 ҫулхи раштав уйӑхӗччен туса пӗтермелле.
-8.7 °C