Етӗрне хули ҫумӗпе юхса иртекен Сӑр юханшывӗ урлӑ эстакада тӑвассине Чӑваш халӑх сайчӗ пӗлтернӗччӗ. Аса илтерер, «Волго-Вятскуправтодор» федерацин хысна учрежденийӗ ҫав ӗҫе хӑш организаци пурнӑҫлассине пӗлтӗрхи утӑ уйӑхӗн 17-мӗшӗнче палӑртнӑччӗ.

Атӑл-Вятскуправтодорӑн пресс-службинче пӗлтернӗ тӑрӑх, ӗҫсене графикпа килӗшӳллӗн пурнӑҫласа пыраҫҫӗ. Халӗ унта эстакадӑн пӑрӑсӗсене хума пуҫланӑ. Пӗтӗмпе 23 тӑрӑх хурса тухмалла, вӗсем 33 метр тӑршшӗ тимӗр конструкцирен тӑрӗҫ.

700 метр ытла вӑрӑмӗш эстакада 100 тонна ытла машина йывӑрӑшне пӗр харӑс чӑтма пултарассине шантараҫҫӗ.

Атӑл-Вятскуправтодорӑн пресс-служби хыпарланине ӗненсен, мӗнпур ӗҫе 2020 ҫулхи утӑ уйӑхӗччен туса пӗтермелле.

Ҫитес тунтикунран, ака уйӑхӗн 1-мӗшӗнчен, Шупашкартан районсене ҫӳрекен 7 маршрут автобусӗсем ҫӗнӗ автостанцирен тапранса кайӗҫ. Кун пирки «ПроГород Чебоксары» кӑларӑм хыпарлать.

Хайхи ҫӑлкуҫ пӗлтернӗ тӑрӑх, ҫӗнӗ автостанци Бабушкин урамӗнчи 8-мӗш А ҫурт адреспа вырнаҫнӑ. Ӑнланмалла каласан, вӑл «Ярмӑрккӑ» суту-илӳ комплексӗ ҫумӗнче пулӗ. Унтах билет сутакан касса ӗҫлӗ. Ку ҫӗнӗлӗх 137, 148, 217, 230, 252, 321, 330 маршрутсемпе ҫӳрекен автобуссене пырса тивӗ.

Палӑртса хӑвармалла, автобуссен расписанийӗ улшӑнмӗ. Хайхи автобуссем Хулаҫум автовокзалӗ ҫумӗнчен иртӗҫ, пассажирсене унтан та лартса кайма пултарӗҫ:

№ 137. Шупашкар — Ҫӗрпӳ — Кӑнар.

№ 148. Шупашкар — Апакасси.

№ 217. Шупашкар — Вӑрӑмҫут.

№ 230. Шупашкар — Аксарин — Ҫатракасси.

№ 252. Шупашкар — Малтикасси.

№ 321. Шупашкар — Янӑш.

№ 330. Шупашкар — Ҫӗньял Покровски.

Чӑваш Енӗн Аслӑ сучӗ пуҫлӑха тӳрре кӑларман. Чӑваш Енӗн Шалти ӗҫсен министерствин пресс-служби пӗлтернӗ тӑрӑх, Патӑрьел район администрацийӗн пуҫлӑхӗн ҫумӗ пӗлтӗрхи пуш уйӑхӗн 2-мӗшӗнче ӳсӗр ҫын ҫине машинӑпа пырса кӗнӗ.

Инкек Патӑрьел районӗнче «Калинино-Патӑрьел-Елчӗк» ҫул ҫинче пулса иртнӗ. «Тойота-Камри» машинӑна тытса пыракан 31 ҫулти арҫын ҫул ҫинче ҫывӑрса кайнӑ ҫын ҫине пырса кӗнӗ. Машина айне лекнӗ 51 ҫулти этем сусӑр пулса юлнӑ.

Машина рульне тытса пынӑ Патӑрьел район администрацийӗн пуҫлӑхӗн ҫумӗ хӑйӗн айӑпне йышӑнман иккен. Чылай экспертиза ирттернӗ хыҫҫӑн тӗпчевҫӗсем машина ытла хӑвӑрт пынине палӑртнӑ.

Айӑпне йышӑнман пулин те руль умӗнчи ҫын шар курнӑ арҫынна 100 пин тенкӗ укҫа куҫарса, эмел, сусӑр кӳми туянса панӑ. Патӑрьел район сучӗ водителе каҫарма йышӑннӑ. Анчах Чӑваш Енӗн Аслӑ сучӗ ҫав приговора пӑрахӑҫланӑ.

Ӗнер кунӗпех йӗпе юр ҫунӑран ҫул-йӗр ҫинче чӑрмавсем те сиксе тухнӑ. М-7 ҫулӑн пӗр пайне хупни пирки хыпарланӑччӗ.

Паян республикӑри ҫулсем ҫинче шуҫлак. Уйрӑмах – ирхине. Ҫавӑнпа водительсене асӑрхануллӑ пулма ыйтаҫҫӗ.

Ҫапах пӑтӑрмахсӑр пулман паян. Ирхине «Вятка» ҫул ҫинче, Кӳкеҫ поселокӗнчен инҫех мар, авари пулнӑ: йывӑр тиевлӗ машинӑпа ҫӑмӑл машинӑпа ҫапӑннӑ.

Малтанлӑха пӗлтернӗ тӑрӑх, «ВАЗ-2114» рулӗ умӗнче ларакан 45 ҫулти водитель транспорт хирӗҫ килекен ҫул ҫине тухса «Скания» бензовозпа ҫапӑннӑ. Пысӑк машина кюветалла чӑмнӑ, пӗчӗк машинӑна та пӗрле сӗтӗрсе кайнӑ.

«Вунтӑваттӑмӗш» рулӗ умӗнче ларнӑ водитель тата 43 ҫулти пассажирка ҫавӑнтах вилнӗ. Бензовоз водителӗ аманман. Фура тиевпе пыман, пушах пулнӑ.

Ӗнер каҫхи 10 сехет те 20 минутра Канаш районӗнчи Кармами Выҫӑлкки ялӗ тӗлӗнчи чукун ҫул урлӑ каҫмалли вырӑнта «Мерседес» машинӑна Мускавран Хусана каякан пуйӑс ҫапса кайнӑ.

Чӑваш Енӗн Шалти ӗҫсен министерствин пресс-службинче пӗлтернӗ тӑрӑх, 20 ҫулхи водитель машина чукун ҫул ҫинче лакса ларнине ӗнентернӗ. Ун урлӑ вӑл семафорӑн асӑрхаттаракан ҫути чӗрӗличченех каҫма тӑнӑ имӗш. Путса ларнӑ машинӑна ытти водительпе пӗрле кӑларма хӑтланнӑ иккен, анчах чукун ҫул ҫинчен куҫарса ӗлкӗреймен. Инкекре ҫынсем аманман.

Машина ҫине пырса кӗнине пула пуйӑсӑн вӑхӑтлӑха чарӑнма тивнӗ. Вӑл 22 сехет те 43 минутра хускалса кайнӑ.

Чӑваш Енӗн Шалти ӗҫсен министерствин пресс-службинче пӗлтернӗ тӑрӑх, инкекӗн тӗп сӑлтавне специалистсем палӑртӗҫ.

Паян пирӗн республикӑра кӗтмен-туман ҫӗртен асар-писер ҫил-тӑман алхасать. Ҫавна пула «Атӑл» М-7 автоҫулӑн пӗр пайне, Ҫӗрпӳрен Тутарстан еннелле каяканнине, вӑхӑтлӑха хуплама тивнӗ. Кун пирки ҫул-йӗр инспекторӗсем хайсен Инстаграмри аккаунтӗнче кӑнтӑрла ҫитиччен хыпарланӑччӗ.

Сӑмах май каласан, федераци трасси ҫинче паян ирех авари пулнӑ. Куславкка район территориийӗнче фурӑпа бензовоз ҫапӑннӑ. Топливо юхса тухман. Водительсене вара тухтӑр пулӑшӑвӗ кирлӗ пулнӑ.

Ҫула хуплани пирки каларӑмӑр та, кӑнтӑрла иртни икӗ сехет ҫитеспе ӑна уҫнӑ. Кун пирки Чӑваш Енӗн Транспорт тата ҫул-йӗр хуҫалӑхӗн министерстви Росавтодоруа пӑхӑнса тӑракан «Волго-Вятскуправтодор» федерацин хысна учрежденийӗ хыпарлани тӑрӑх пӗлтернӗ. Унта М-7 федераци трасси ҫинчи 679 километрӗнчен пуҫласа 730 километр таранчченхи лаптӑка уҫнине каланӑ.

Паян пирӗн республикӑра асар-писер ҫил-тӑман алхаснӑран Шупашкарти аэропортри самолетсем те вӑхӑтра вӗҫеймен. Аэропортӑн Инстаграмри аккаунтӗнче рейссем тытӑнса тӑрассине кӑнтӑрлачченех пӗлтернӗ-ха. Ҫав хыпара вулакансенсен пӗри Мускавран килекен самолетӑн Чулхулара анса ларма тивнине пӗлтернӗ. «Халӗ Шупашкара килетпӗр», — тенӗ вӑл. Паллах, самолетпа мар.

Ирхи 9 сехет те 20 минутра Мускаври Шереметьево аэропорта вӗҫсе каймалли самолет, тӗслӗхрен, халӗ те хускалайман. Шупашкарти аэропортран рейс 16 сехетсӗр те каяймассине, анчах ун чух та шанчӑклӑ пулассине татса калайман.

Мӗн тӑвӑн, васкакансен васкамалла пулӗ те, анчах васкакан вакка сикет тесе каланине те асра тытма тивет. Ҫутҫанталӑкӑн хайӗн саккунӗ...

ШӖМ тунӑ сӑн

Шӑматкун, пуш уйӑхӗн 23-мӗшӗнче, Шупашкар районӗнчи Карачура ҫывӑхӗнче шкул автобусӗ аварие лекнӗ. Ҫав самантра салонра 19 ача пулнӑ.

Юрать, ЧР ШӖМӗн пресс-служби пӗлтернӗ тӑрӑх, пур пассажир та хӑрушсӑрлӑх пиҫҫиххипе ҫыхӑннӑ пулнӑ, аварире никам та аманман.

Малтанлӑха пӗлтернӗ тӑрӑх, светофор умӗнче шкул автобусӗн 56 ҫулти водителӗ тимлӗхне ҫухатнӑ та малта пыракан «Шкодӑна» пырса тӑрӑннӑ. Икӗ транспорт та кӑштах сиенленнӗ. Патшалӑх автоинспекцийӗн ӗҫченӗсем авари пирки хут ҫине ҫырнӑ хыҫҫӑн автобус малалла кайнӑ. Вӑл Йӗпреҫ поселокӗнчен Шупашкара кайма тухнӑ пулнӑ.

Сапличчен...

Ҫӗрпӳ районӗнчи Чурачӑкран Тӗрер ялне каякан ҫул варринчи асфальт путса аннӑ. Кун пирки Чӑваш Енри массӑллӑ информаци хатӗрӗсем ҫеҫ мар, kazan.kp.ru та пӗлтернӗ.

Маларах асӑннӑ тӑрӑхра пурӑнакансем ҫулпа машинӑсем ҫӳрейменнине хыпарланӑ.

Вырӑнти пӗлтерӗшлӗ трассӑна ҫав тӑрӑхри Чурачӑкра вырнаҫнӑ «Воддорстрой» тулли мар яваплӑ общество тытса тӑрать иккен. Ҫак йӗркесен авторне паян предприятин тӗп директорӗпе Анатолий Федоровпа телефонпа калаҫма тӳр килчӗ. Вӑл ҫула паянах сапласа хунине ӗнентерчӗ. Ҫав вӑхӑтрах путӑк пирки МИХсене ҫыртарас килменнине палӑртрӗ.

Пуҫлӑх кӑмӑлне ӑнланма пулать. Чӑваш Енри ҫулсен пахалӑхӗ начарри пирки Ижевскра федерацин Атӑлҫин округӗсен ериӳҫисемпе нумаях пулмасть иртнӗ канашлура та сӑмах пулнӑччӗ.

Канашра иномаркӑпа микроавтобус ҫапӑннӑ. Патшалӑх автоинспекцийӗ пӗлтернӗ тӑрӑх, аварире 6 ҫын шар курнӑ.

Инкек ӗнер, пуш уйӑхӗн 19-мӗшӗнче, пулнӑ. 17 сехетре «Ниссан» транспорт хирӗҫ килекен ҫул ҫине тухнӑ та ГАЗельпе ҫапӑннӑ. Микроавтобус салонӗнче 4 ҫын пулнӑ. Вӗсенчен иккӗшӗ – 17-ри тата 15 ҫулти ҫамрӑксем.

ГАЗельри пассажирсем суранланнӑ. Водитель хӑй чиперех. Тӗрӗслев ирттернӗ хыҫҫӑн ҫакӑ паллӑ: водитель пассажирсене саккуна пӑхӑнсах илсе ҫӳренӗ, анчах салонрисем хӑрушсӑрлӑх пиҫиххипе ҫыхӑнман пулнӑ.

Иномаркӑри 35 ҫулти пассажирка та суранланнӑ. Руль умӗнче ларнӑ водитель ӳсӗр пулни паллӑ. Ӑна административлӑ майпа явап тыттарӗҫ.