Раҫҫейӗн чукун ҫулӗсен Федерацин пассажир компанийӗ Мускавран Петрозаводска хутлакан ҫӗнӗ маршрут уҫӗ. Унта пуйӑс Питӗр тата Сортавалу урлӑ кайӗ.
Хальхи вӑхӑтра «Карели» фирма пуйӑсӗ «Мускав—Петрозаводск» маршрутӑа хутлать-ха. Кӑҫалхи раштавӑн 3-мӗшӗнчен унта икӗ хутлӑ пуйӑссем ҫӳреме пуҫлӗҫ.
Раштавӑн 2-мӗшӗнчен уҫӑлакан рейс Мускаври Ленинград вокзалӗнчен 16:00 сехетре хускалӗ, Петрозаводска тепӗр кунхине 12:10 сехете ҫитӗ. Карелин тӗп хулинчен пуйӑс 14:10 сехетре хускалса ҫӗршывӑн тӗп хулине 10:16 сехетре ҫитӗ.
Пуйӑс Тверь, Чудово, Питӗр (Ладога вокзалӗ), Белоостров, Зеленогорск, Выборг чарӑнусенче, Хийтола, Элисенваар, Яккима, Сортавала, Хелюля, Маткаселькя, Янисъярви, Суоярви, Новые Пески, Эссойла, Чална станцисенче чарӑнӗ.
«Победа» лоукостер ют ҫӗршывсенчен вӗҫекен рейссенче билет хакне 40 процент ӳстерӗ. Е 25 евро. Хак хӗллехи навигаци пуҫлансан, юпа уйӑхӗн 28-мӗшӗ хыҫҫӑн, хӑпарӗ.
«Победа» компани ют ҫӗршывсенчи аэропортсенче клиентсене регистрациленӗшӗн малтан уйрӑм тӳлеттернӗ. Мускаври транспорт прокуратури авиакомпани тӗлӗшпе суда ҫитнӗ. Лоукостера вӑл ют ҫӗршывсенчи стойкӑра регистрациленнишӗн пассажирсене тӳлеттерме чарнӑ. Ҫав вӑхӑтрах ют ҫӗршывсенчи аэропортсем пассажирсем регистрациленнишӗн авиакомпанисене илеҫҫӗ. Вӑтамран 25 евро (паянхи курспа 1800 тенкӗ). Ҫавна май авиакомпани ҫав тӑкака билет хакне кӗртӗ. Пӗлтӗрхи хӗлле авиабилет хакӗ вӑтамран 4500 тенкӗ тӑнӑ. Апла хак 40 процент ӳсӗ.
Халӗ «Победа» 28 направленипе вӗҫет: иккӗ – Ҫывӑх Хӗвелтухӑҫне, пӗрре – Армение (Гюмри), ыттисем – Европӑпа Турцие.
«Победа» билечӗсем йӳннине кура ытти авиакомпани те хака чакарма тӑрӑшать. Авиабилетсене лоукостер хаклатнине кура ытти авиакомпани те хака ӳстерессине тавҫӑрма йывӑр мар.
«Коммерсантъ» хаҫат пӗлтернӗ тӑрӑх, Федерацин хӑрушсӑрлӑх службин Чӑваш Енри управленийӗн ӗҫченӗсем Ҫӗнӗ Шупашкарти «Химтехникум» чарӑнуран Шупашкар районӗнчи Тутаркассине пассажирсене турттаракан автобуса тӗрӗслес тенӗ. Кв вӑл кӑҫалхи утӑ уйӑхӗнче пулса иртнӗ. Сирпӗнмелли хатӗр евӗр япалана чекист хӗрарӑмӑн ҫӗнӗ пушмакне хунӑ. Пушмака — хут курупкӑна. Пушмак ӑшне сирпӗнмелли евӗр япала чиксе хунӑ.
Хуҫасӑр япалана водитель вӑхӑтра асӑрхаман, асӑрхасан та тивӗҫлӗ мера йышӑнман тесе руль умӗнчине те, предприяти ертӳҫине те штрафланӑ.
Транспорт предприятийӗн пуҫлӑхӗ капла йышӑнупа килӗшмесӗр суд тӑрӑх ҫӳреме тытӑннӑ. Тӳрре тухмалла унӑн хӑйӗн ӑнлантарӑвӗ тупӑннӑ. Водитель курупкӑна хӑрушсӑр мар тесе хакланӑ, ҫавӑнпа вӑл ятарлӑ органсене пӗлтермен. Автобусра ҫынсем тӗрлӗ япала час-часах манса хӑвараҫҫӗ, кайран шыраса пыраҫҫӗ.
Штрафласси ҫинчен кӑларнӑ йышӑнӑва суд пӑрахӑҫланӑ.
Абакан хулин мэрӗ Николай Булакин ҫул ҫинчи инкекре вилнӗ. Хакас Республикин тӗп хулин пуҫлӑхӗ сарӑмсӑр вилӗмпе куҫ хупнине ТАСС информаци агентствине Хакас Республикин правительствин пресс-службинче ҫирӗплетнӗ.
Пӑтӑрмах Красноярск крайӗнчи Топольки ялӗ тӗлӗнче пулнӑ. Николай Булакин тытса пыракан «Ford» автомобиль Р-257 «Енисей» трассӑпа пынӑ чух ҫул айккине чӑмнӑ, йывӑҫа пырса тӑрӑннӑ. Ҫакӑн пек малтанласа пӗлтернӗ ҫул-йӗр инспекторӗсем. Инкекре вырӑнтах вилнӗ мэр.
Булакин 1952 ҫулхи раштав уйӑхӗн 17-мӗшӗнче Томскра ҫуралнӑ. Мускаври патшалӑх университетӗнче вӗреннӗ. Мускав облаҫӗнчи конструктор бюровӗнче инженерта ӗҫленӗ. Мускаври авиаципе технологи институтӗнче аспирантурӑра вӗреннӗ. Техника ӑслӑлӑхӗсен кандидачӗ. Красноярскри политехника институчӗн Абаканти филиалӗнче ӗҫленӗ. 1995 ҫулта ӑна Абакан мэрӗ пулма суйланӑ.
«Priority Pass» портал ҫул ҫӳрекенсене тӗпчеве хутшӑнтарнӑ. Тишкерӳ палӑртнӑ тӑрӑх, ҫул ҫӳревӗн чи ывӑнтаракан саманчӗ — багаж кӗтсе тӑни. Тӗнче курса ҫӳреме юратакансем аэропортра кутамккасене кӗтсе тӑма юратмаҫҫӗ. Малтан чӑматансемпе сумкӑсене илсе тухакан контейнер ӗҫлесе каяссине кӗтмелле, унтан контейнер ҫаврӑннине пӑхса хӑвӑн багажу килессине сӑнаса тӑмалла.
Ыйтӑма 1 700 авиапассажир хутшӑннӑ. Вӗсенчен 49 проценчӗ аэропортра багаж кӗтсе тӑнӑ чух ывӑннине тата кӑмӑлсӑрланнине пӗлтернӗ. Вӗсенчен 61 проценчӗ хӑйсен чӑматанӗ ҫухаласран хӑрать.
Хӑрушсӑрлӑх служби тӗрӗсленӗ чух хӑракансем те пур. Каплисен хисепӗ — пассажирсен 47 проценчӗ.
Теприсем аэропорта ҫитичченех канӑҫсӑрланма тытӑнаҫҫӗ. Авиапассажирсен 63 проценчӗ ҫул ҫинче «пӑкка» лекесрен тата рейс ҫине ӗлкӗреймесрен хӑрать.
Юлашки вӑхӑтра ҫынсен пӗр пайӗ «Bla-bla-car» тытӑмпа анлӑ усӑ курма пуҫларӗ. Ун урлӑ пассажирсем ҫула май машина тупаҫҫӗ, водительсем — пассажир. Вӑл тытӑма темиҫе ҫул каялла ҫынсене ҫула май лартса кайма йӗркеленӗ. Тӳлевсӗр илсе ҫӳрекенсем те пулнӑ, е питӗ йӳнӗ хакпа. Халӗ ҫав пулӑшу услама ҫаврӑнчӗ. Асӑннӑ тытӑмра регистрациленсе укҫа тӑваҫҫӗ.
Нумаях пулмасть Чӑваш Ен Транспорт тата ҫул-йӗр хуҫалӑх министерстви, ҫул-йӗр инспекторӗсем, налук службин специалисчӗсем рейд йӗркеленӗ. Вӗсем пассажирсене таксипе турттарас ӗҫе епле йӗркеленине Шупашкар районӗнче тӗрӗсленӗ.
15 транспорта чарнӑ. «Lada Largus» автомобиль водителӗ ҫул ҫӳрекенсене «Bla-bla-car» сервис урлӑ тупса Шупашкартан Мускава турттарнӑ.
Шупашкар аэропорчӗ ҫуллахи навигаци тапхӑрӗ вӗҫленнине пӗлтерет. Юпа уйӑхӗн 27-мӗшӗнче аэропорт хӗллехи тапхӑра куҫӗ. Кӑнтӑр енне вӗҫнӗ самолетсем ҫуллахи тапхӑр вӗҫленнӗ хыҫҫӑн кӑнтӑр енне Шупашкартан ҫӳреме пӑрахӗҫ.
«Икар» авиакомпани Мускава каякан ирхи рейса каярах вӑхӑта куҫарать. «Победа» авиакомпанин расписанийӗ те самай ылмашӗ.
Шупашкарти аэропортӑн кӗрхи-хӗллехи вӑхӑтри расписанийӗпе ҫак каҫӑпа http://aerocheb.ru/passazhiram/zimnee-raspisanie/ иртсе паллашма пулать.
Аса илтерер: Питӗре хальхи вӑхӑтра самолетсем эрнере икӗ хутчен хутлаҫҫӗ. Ҫӗнӗ навигаци тапхӑрӗ пуҫлансан самолетсем эрнере виҫӗ хут вӗҫӗҫ. Шупашкартан самолет 15 сехет те 35 минутра хускалӗ, Питӗрти Пулково аэропортран Чӑваш Ен тӗп хулине — 12 сехет те 55 минутра. Авиапассажирсене «B-738» самолет турттарать. Шупашкартан Питӗр хулине вӑл 2 сехет те 10 минут вӗҫет.
Шупашкарти икӗ ҫула тӑвакан организацисене палӑртнӑ. «Университетски-2» микрорайонти ҫула «ТУС», «Хӗвеллӗ» микрорайонтине «Дорэкс» строительство организацийӗсем тӑвӗҫ. Контрактсен хакӗсем — 243 тата 52 миллион тенкӗшер.
Патшалӑх закупкисен сайтӗнче пӗлтернӗ тӑрӑх, «Университетски-2» микрорайонти ҫула саракана палӑртмалли аукциона «ТУС» акционерсен обществи кӑна хутшӑннӑ. Контракт хакӗ унччен палӑртнинчен чакман, вӑл — 243 миллион тенкӗ.
«Хӗвеллӗ» микрорайонти ҫула тума «Дорэкс» акционерсен обществине суйланӑ. Унти ҫула «Старатель» строительство компанийӗ те сарас тенӗ. Вӑл аукционта ҫӗнтереймен. «Дорэкс»-па 52 миллион тенкӗлӗх килӗшӳ тунӑ.
Аукционсем тӗлӗшпе Барнаулти «КС-Строй» организаци кӑмӑлсӑрланнӑ. Вӑл Федерацин монополипе кӗрешекен службин республикӑри управленине ҫӑхавланӑ. Монополипе кӗрешекенсем кӑлтӑк асӑрхаман.
Шупашкарти Чайкин тата Лермонтов урамӗсенче пурӑнакансем Мускав район администрацине пӗлтӗрех пӗлтернӗ: ҫула юсамалла. Халӗ Октябрь ҫулӗнчен пуҫласа Кошевой урамӗ таран хытӑ сийлӗ ҫул сараҫҫӗ. Ӑна пуҫаруллӑ бюджетировани мелӗпе пурнӑҫлаҫҫӗ.
Укҫа-тенкӗн пӗр пайне ҫынсем хӑйсем пухнӑ. Ӗҫ хакӗн смети 2 миллион ытла тенкӗпе танлашнӑ. Ҫак урамсенчи харпӑр ҫуртсене пурӑнакансем вара пӗр пайне – 213 пин тенке – хӑйсем пухнӑ.
Ку программӑпа усӑ курма йывӑр мар. Халӑх малтан пуху ирттерсе мӗнле ӗҫсем пурнӑҫламаллине сӳтсе явать. Ҫынсем ӗҫ хакӗн 10-15 процентне хӑйсем пухаҫҫӗ.
Шӑмӑршӑ районӗнче полицин стажерӗ пулнӑ ҫынна ҫул-йӗр ҫинчи инкеке лекнӗшӗн явап тыттарӗҫ. Ҫул-йӗр ҫинчи пӑтӑрмахра ҫул ҫитмен ҫамрӑк шар курнӑ.
Раҫҫей Следстви комитечӗн Чӑваш Енри управленийӗ пӗлтернӗ тӑрӑх, инкеке лекнӗ стажер-полицейскипе контракта пӑрахӑҫланӑ.
Айӑпланаканни — 33 ҫулти ҫамрӑк арҫын. Вӑл ҫул ҫинчи инкекре ҫынна йывӑр суран кӳнӗ тесе шухӑшлаҫҫӗ.
Пӑтӑрмах кӑҫалхи ҫӗртме уйӑхӗнче Шӑмӑршӑра пулнӑ. Ҫул-йӗр правилине пӑснине пула «Hyundai Elantra» машина ҫул ҫинчен тухса кайса ҫаврӑнса ӳкнӗ. Водитель сехетре 100 километртан кая мар хӑвӑртлӑхпа пынӑ тесе шухӑшлаҫҫӗ. Машинӑн хыҫалти ларкӑчӗ ҫинче ларнӑ 14 ҫулти пике йывӑр суранланнӑ. Инкек хыҫҫӑн стажерпа ӗҫ килӗшӗвне татнӑ.
-1.7 °C