Паян Шупашкарта 101 ҫулти тухтӑра саламланӑ. Михаил Сорокин тахҫанах тава тивӗҫлӗ канура-ха. Анчах вӑл травматологра ӗҫленине унӑн вӗренекенӗсем тата пӗрле тӑрӑшнисем паян та асра тытаҫҫӗ. Вӑл Хусанти медицина институтӗнчен вӗренсе тухнӑ. 1959-1991 ҫулсенче Шупашкар хулинче тӗп травматолог пулса тӑрӑшнӑ.
Михаил Григорьевича черетлӗ сумлӑ ҫуралнӑ кунпа саламлама хулари тӳре-шара тата Шупашкар хулинчи халӑхӑн социаллӑ ыйтӑвӗсене тивӗҫтрекен комплекслӑ центртан пырса ҫитнӗ.
Михаил Григорьевич патне Владимир Путин Президентӑн саламлӑ открыткине те ҫитернӗ. Тата, паллах, чечек ҫыххи тата асӑнмалӑх парне парнеленӗ.
Ватӑ ҫын хӑнасене ӑспа-тӑнпа, ура ҫинче кӗтсе илнӗ, иртни ҫинчен те каласа кӑтартнӑ.
Паян Шупашкарта 101 ҫулти тухтӑра саламланӑ. Михаил Сорокин тахҫанах тава тивӗҫлӗ канура-ха. Анчах вӑл травматологра ӗҫленине унӑн вӗренекенӗсем тата пӗрле тӑрӑшнисем паян та асра тытаҫҫӗ. Вӑл Хусанти медицина институтӗнчен вӗренсе тухнӑ. 1959-1991 ҫулсенче Шупашкар хулинче тӗп травматолог пулса тӑрӑшнӑ.
Михаил Григорьевича черетлӗ сумлӑ ҫуралнӑ кунпа саламлама хулари тӳре-шара тата Шупашкар хулинчи халӑхӑн социаллӑ ыйтӑвӗсене тивӗҫтрекен комплекслӑ центртан пырса ҫитнӗ.
Михаил Григорьевич патне Владимир Путин Президентӑн саламлӑ открыткине те ҫитернӗ. Тата, паллах, чечек ҫыххи тата асӑнмалӑх парне парнеленӗ.
Ватӑ ҫын хӑнасене ӑспа-тӑнпа, ура ҫинче кӗтсе илнӗ, иртни ҫинчен те каласа кӑтартнӑ.
Агентий Хирбиков ятлӑ ҫын «Контактра» халӑх тетелӗнчи хӑйӗн странцинче Григорий Хирпӳн асӑну хӑмине сӑрласа хуни пирки пӑшӑрханса пӗлтернӗ. Тӗрӗсрех каласан, йӑлтах мар иккен-ха, ятне ҫырнине сӑрласа хунӑ.
Кунта сӑмах Сӗнтӗрвӑрри районӗнчи Аксаринкасси ялӗнчи пирки пырать. Вӑл ҫуралнӑ вырӑнта хӑй вӑхӑтӗнче асӑну хӑми уҫнӑ.
Григорий Хирпӳ — паллӑ чӑваш композиторӗ, Чӑваш Республикин патшалӑх премийӗн лауреачӗ, РСФСР халӑх артисчӗ.
Агентий Хирбиков пӗлтернӗ тӑрӑх, пӗр икӗ ҫул каялла ҫав хӑма ҫинче композитор ятне ҫырса хунине сӑрласа хунӑ. Ҫавӑн пирки ватӑ ҫын прокуратурӑна та евитлесе пӑхнӑ иккен, унтан вара ыйтӑва администрацие ярса панӑ. Администраци йӑлтах йӗркеллӗ тесе хуравланӑ.
Ӗнер, юпа уйӑхӗн 10-мӗшӗнче, Шупашкарта пурӑнакан Галина Авдеева 85 ҫул тултарнӑ. Ӑна ҫав ятпа хулари халӑхӑн социаллӑ ыйтӑвӗсене тивӗҫтерекен комплекслӑ центрӑн заведующийӗ Надежда Шикарева саламланӑ. Ватӑ ҫынна юлашки вӑхӑтра асӑннӑ центрӑн ӗҫченӗ пӑхса пулӑшать.
Галина Авдеева — Раҫҫей Федерацийӗн тава тивӗҫӗ врачӗ. Авдеева тухтӑр медицинӑра 40 ҫул ӗҫленӗ, ҫав вӑхӑтран 30 ҫулне вӑл кардиологи отрасльне уйӑрнӑ, чӗрӗк ӗмӗре яхӑн Республикӑри кардиологи больницин тӗп врачӗнче тӑрӑшнӑ.
Галина Петровна Вӑрнар районӗнчи Кульцав ялӗнче ҫуралнӑ. Ачаранпах тухтӑр пулма ӗмӗтленнӗскер Челепирти медицина институтӗнчен вӗренсе тухнӑ хыҫҫӑн асӑннӑ хулари тата облаҫри тӗрлӗ учрежденире ӗҫленӗ.
1978 ҫулта вӑл Шупашкара куҫса килнӗ. 1981 ҫулта кардиодиспансер туса хунӑ хыҫҫӑн вӑл тӗп врач пулса тӑнӑ. Ку должноҫре вӑл 24 ҫул тӑрӑшнӑ.
Шупашкарта, юпа уйӑхӗн 6-7-мӗшӗсенче «Петров вулавӗсем» пӗтӗм Раҫҫейри ӑслӑлӑхпа практика конференцийӗ 25-мӗш хутчен иртнӗ. Унта хутшӑнакансене саламланӑ чух республикӑн культура министрӗн пӗрремӗш ҫумӗ Татьяна Казакова ӑшӑ сӑмах нумай каланӑ. Сӑмах май каласан, конференцие пуҫласа ирттерме хӑй вӑхӑтӗнче шӑпах вӑл нумай тӑрӑшнӑ иккен.
Чӑваш Енӗн наци музейне вӑл Петров-Тинехписен ҫемйин йӑх несӗлӗпе паллаштаракан паха ӗҫе парнеленӗ. Михаил Петрович Петров-Тинехпи — Татьяна Казакован ват асламӑшӗн (тен, кукамӑшӗн-тӗр. Вырӑсла хыпарта «прабабушка» тенӗ) тӑван пиччӗшӗ (тен, шӑллӗ-тӗр. Вырӑсла хыпарта «брат» тенӗ) иккен.
Пӗтӗм ҫӗршыври ӑслӑлӑхпа практика конференцийӗ Чӑваш Енӗн наци музейӗнче иртнӗ.
Паян Чӑваш Ен Элтеперӗ Олег Николаев Андрей Марушина «Чӑваш Республики умӗнчи тава тивӗҫлӗ ӗҫсемшӗн» орден медалӗпе чыслама йышӑннӑ. Ку чыса Андрей Александрович «саккун кӑларас енӗпе хастар пулнӑшӑн тата нумай ҫул тӑрӑшса ӗҫленӗшӗн» тивӗҫнӗ.
Андрей Марушин — Чӑваш Енӗн Патшалӑх Канашӗн патшалӑх строительствин тата вырӑнти хӑй тытӑмлӑхӑн комитечӗн председателӗ.
Вӑл 1982 ҫулхи раштав уйӑхӗн 27-мӗшӗнче Улатӑр районӗнчи Киря поселокӗнче ҫуралнӑ. И.Н. Ульянов ячӗллӗ Чӑваш патшалӑх университетӗнче финанспа кредит енӗпе пӗлӳ илнӗ, кайран — юриспруденци енӗпе. 2021 ҫулта Атӑлҫи патшалӑх технологи университетӗнче «вӑрман ӗҫӗ» специальноҫпа магистратурӑран вӗренсе тухнӑ. 2006 ҫулта уйрӑм усламҫӑ пулса тӑрӑшма тытӑннӑ, 2008–2021 ҫулсенче «Континенталь» тулли мар яваплӑ обществӑн гендиректорӗ пулнӑ, 2018–2021 ҫулсенче – «Анмар» общество директорӗ.
2021 ҫулхи авӑн уйӑхӗн вӗҫӗнче ӑна Чӑваш Патшалӑх Канашӗн комитечӗн председателӗ пулма шаннӑ.
Ҫӗнӗ Шупашкарти «Группа Оргсинтез» тулли мар явалӑ обществӑн генеральнӑй директорне Сергей Мерзлякова Чӑваш Республикин Хисеп грамотипе чыслама йышӑннӑ. Ӑна республикӑн промышленноҫне аталантарма тӳпе хывнӑшӑн ҫавӑн пек хавхалантарас тенӗ.
Сергей Владимирович 1971 ҫулхи авӑн уйӑхӗн 25-мӗшӗнче Тӗмен хулинче ҫуралнӑ. Унти индустри институтӗнчен «автоматика тата техника тытӑмӗсен управленийӗ» енӗпе вӗренсе тухнӑ, 1997 ҫулта вӑл Самар хулинчи экономика академине вӗренсе пӗтернӗ, унта финанспа кредит енӗпе пӗлӳ илнӗ, 2000 ҫулта вара экономика енӗпе диссертаци хӳтӗленӗ. Ун хыҫҫӑн татах вӗреннӗ. 2006 ҫулта Мускаври Ломоносов ячӗллӗ патшалӑх университетӗнчен вӗренсе тухнӑ.
Тӗрлӗ хулара тӗрлӗ должноҫре тӑрӑшнӑ.
Чӑваш патшалӑх оперӑпа балет театрӗнче ӗҫлекен Сергей Кузнецова «Чӑваш Республикин тава тивӗҫлӗ артисчӗ» хисеплӗ ят панӑ. Хушӑва республика Элтеперӗ Олег Николаев нумаях пулмасть алӑ пуснӑ.
Сергей Павлович Чӑваш патшалӑх оперӑпа балет театрӗнче вокалист-солист пулса ӗҫлет. Хисеплӗ ята ӑна театр ӳнерӗнчи тава тивӗҫлӗ ӗҫшӗн тата пултарулӑх енӗпе нумай ҫул тӑрӑшнӑшӑн пама йышӑннӑ.
Сергей Кузнецов Чӑваш патшалӑх культурӑпа ӳнер институтӗнчен вӗренсе тухнӑ. Вӑл Раҫҫей тава тивӗҫлӗ артистки, чӑваш халӑх артистки А. Сергеева-Зинкина класӗнче вӗреннӗ, кайран Хусанти Н.Г. Жиганов ячӗллӗ патшалӑх консерваторийӗнче аспирантурӑра пӗлӳ илнӗ. Унта вӑл Тутарстан халӑх артистки А. Шагимуратова класӗнче пултарулӑха туптанӑ.
2010 ҫултанпа Чӑваш патшалӑх оперӑпа балет театрӗнче ӗҫлет.
Ҫӗнӗ Шупашкарти 18-мӗш лицейра ӗҫлекен Людмила Турковская «Чӑваш Республикин халӑх вӗрентекенӗ» ята тивӗҫнӗ.
Людмила Николаевна — физика учителӗ. Хӑй вӑл Ҫӗмӗрле хулинче 1960 ҫулта ҫуралнӑ. 1982 ҫулта И.Н. Ульянов ячӗллӗ Чӑваш патшалӑх университетӗнчен «физик, преподаватель» специальноҫа алла илни ҫинчен калакан дипломпа вӗренсе тухнӑ.
Ҫӗнӗ Шупашкарти 18-мӗш лицейра физика учителӗ пулса 1991 ҫултанпа ӗҫлет. Аслӑ квалификаци категориллӗ учитель. 1995 ҫултах ӑна «Халӑх вӗрентӗвӗн отличникӗ» паллӑпа чысланӑ. 2003 ҫулта хӗрарӑм Чӑваш Республикин Президенчӗн премине «чи лайӑх учитель» пулнӑ май тивӗҫнӗ. Тепӗр ҫулхине ӑна «Чӑваш Республикин тава тивӗҫлӗ учителӗ» ят панӑ.
Педагог тӗрлӗ шайри конкурсра та пӗрре ҫеҫ мар палӑрнӑ.
Шӑматкун, авӑн уйӑхӗн 26-мӗшӗнче Раҫҫейӗн тава тивӗҫлӗ тренерӗ, Канаш хулин хисеплӗ ҫынни Владимир Григорьев куҫне ӗмӗрлӗхе хупнӑ. Владимир Яковлевич 98-мӗш ҫулпа пынӑ.
Владимир Яковлевич — чӑваш спортӗнче сумлӑ вырӑн йышӑнать. Вӑл ҫуллӗ шайри спорстменсене сахал мар вӗрентсе кӑларнӑ. Унӑн воспитанникӗсен шутӗнче: спортӑн хӗллехи енӗсем енӗпе Олимп чемпионӗ пулса тӑнӑ Владимир Воронков; СССР чемпионки Дина Григорьева; вӑл йӗлтӗр спорчӗ тата биатлон енӗпе 50 ытла спорт мастерне хатӗрленӗ.
Владимир Григорьев 67 ҫул тренер, унсӑр пуҫне тата 40 ҫул спорт шкулӗн директорӗ пулса ӗҫленӗ.
Шупашкарти Олимп резеврӗн 2-мӗш шкулӗнче пӗлтернӗ тӑрӑх, Владимир Яковлевич ачасемшӗн ӑҫлӑ-тӑнлӑ наставник, чӑнлӑха мала хуракан ертӳҫӗ тата ҫывӑх ҫын пулнӑ.
+3.3 °C