Республикӑра ҫулталӑк пуҫланнӑранпа 15574 ҫын ӗҫе вырнаҫнӑ, вӗсенчен 254-шӗ сусӑр.
Ҫулталӑк пуҫланнӑранпа республикӑра 29 пине яхӑн ҫын ӗҫсӗррисен йышӗнче тӑрать. Ку, пӗлтӗрхипе танлаштарсан, 6 хут ытларах. Кун пирки Чӑвашстат пӗлтерет.
Кӑҫал кӑшӑлвирус пандемийӗ вӑхӑтӗнче ӗҫсӗррисен йышне лекнисене чи нумаййи уйӑхра 12130 тенкӗ тӳлеҫҫӗ. Юпа уйӑхӗнче Чӑваш Ен валли ӗҫсӗррисене тӳлеме 227 миллион тенкӗ уйӑрнӑ.
Халӗ ӗҫсӗррисем ӗҫсӗр тесе регистрациленес тесен «Работа России» порталӑн харпӑр кабинетӗнче онлайн мелпе заявлени пама пултараҫҫӗ.
Юпа уйӑхӗн 19-мӗшӗнче Шупашкарти полицейскисенчен икӗ хӗрарӑм пулӑшу ыйтнӑ. Иккӗшне те пӗр пек хуйхӑ канӑҫсӑрлантарнӑ. Вӗсем тӗнче тетелӗнчи ятарлӑ лапамсем урлӑ тавар пӗрле туянмалли меслетпе усӑ курас тенӗ. Апла меслетпе вӗсем унччен вӗҫӗм туяннӑ. Анчах хальхинче укҫа кирлӗ ҫӗре ҫитеймен.
59 ҫулти хӗрарӑм вырӑн ҫине сармалли комплект туянма икӗ пин тенкӗ куҫарнӑ. Анчах тавар сутакан патне вӑл укҫа ҫитмен. Ултавҫӑсем ун ячӗпе суя страница хатӗрленӗ иккен.
Шупашкарти 37 ҫулти хӗрарӑм та улталаннӑ. Вӑл 3 пин тенкӗ ытларах куҫарса янӑ.
Шупашкар хулинчи Ленин район сучӗ хулара пурӑнакан икӗ ҫамрӑк арҫынна суд тунӑ. Вӗсем ҫынсене 3 миллион тенкӗ ытлалӑх улталанӑ.
Пуҫиле ӗҫе РФ Пуҫиле кодексӗн 159-мӗш статйин 4-мӗш пайӗпе пуҫарнӑ. Тӗпчевҫӗсем тата суд палӑртнӑ тӑрӑх, 32 тата 35 ҫулсенчи арҫынсем хӑйсемпе риелторсем тесе паллаштарнӑ. Вӗсем ҫынсене кредит илсе ҫурт-йӗр туянма ӳкӗте кӗртнӗ. Уншӑн хайхисене кӑштах укҫа тӳлесе хавхалантарнӑ. Кредита «риелторсем» хӑйсем тӳлеме шантарнӑ. Кредитӑн пӗр пайӗпе ҫурт-йӗр туяннӑ, ытти ултавҫӑсен кӗсйине кӗрсе ҫухалнӑ. Кредита ултавҫӑсем тӳлесе тӑман.
Суя риелторсен капкӑнне икӗ ҫын ҫакланнӑ.
Следстви ҫулталӑка яхӑн пынӑ. Халӗ ултавҫӑсен тӗлӗшпе суд пулнӑ. Вӗсене ҫулталӑк ҫурӑран пуҫласа икӗ ҫул таран хупса хума йышӑннӑ. Айӑплав вӑхӑтне ултавҫӑсем пӗтӗмӗшле режимлӑ колонире ирттерӗҫ. Суд приговорӗ хальлӗхе саккунлӑ вӑя кӗреймен-ха.
Чӑваш Енре пурӑнакан икӗ хӗрарӑм самолет туяннӑ чух улталаннӑ. Вӗсенчен пӗри 18 пин тенкӗсӗр юлнӑ, тепри - 16 пинсӗр.
Шупашкарта пурӑнакан 30 ҫулти хӗрарӑм онлайн-билет илес тесе пӗр сайта кӗрсе кайнӑ. Унта вӑл анкета тултарнӑ май хӑйӗн пирки йӑлт ҫырса пӗлтернӗ. Ҫав шутра – банк карттин тӳнтер енчи CVV-кода та. Смс-ҫырупа килнӗ кода ҫырса янӑ хыҫҫӑн электрон авиабилета электрон почтӑпа ярса парассине кӗтме тытӑннӑ. Анчах усси пулман.
Шупашкарта пурӑнакан 43 ҫулти хӗрарӑм та ҫавӑн пек мелпе улталаннӑ.
Тӗнче тетелӗнче тавар туяннӑ чух питӗ тимлӗ пулмалла. Чӑваш Енӗн Шалти ӗҫсен министерствинче сайтӑн домен адресне тата браузерта хӑрушсӑрлӑх ҫӑри пуррине пӑхмалла.
Шупашкарта пурӑнакан арҫын тӗнче тетелӗнче ҫӑмӑлттай шухӑшлӑ хӗрпе паллашнӑ, унпа ҫывӑхланма ӗмӗтленнӗ. Куншӑн вӑл ӑна 38 пин тенкӗ куҫарса панӑ. Лешӗ вара сӑмахне тытман, хӑй пачах ҫухалнӑ. Арҫын кун пирки полицие кайса пӗлтернӗ.
Йӗрке хуралҫисем ултавҫӑ йӗрӗ ҫине ӳкнӗ. Йӗр вӗсене Ставрополь крайне илсе ҫитернӗ. Хайхи «каҫхи лӗпӗш» хӗр те пулман, арҫын иккен! 25 ҫулти арҫын Шупашкар ҫыннипе калаҫнӑ чухне сассине хӗрарӑмӑнни пек тунӑ.
Полицейскисем ҫав ҫынна Шупашкара илсе ҫитернӗ, пуҫиле ӗҫ пуҫарнӑ. Вӑл кунашкал преступленипе ҫыхӑннипе ҫыхӑнманнине те тӗрӗслеҫҫӗ халӗ.
Канаш районӗнче водитель тӗттӗмре ӗнесем ҫине пырса тӑрӑннӑ. Ҫав вырӑнта выльӑх каҫма пултарнине кӑтартакан паллӑ та пулман. Водитель фермера куншӑн явап тыттарнӑ.
Кун хыҫҫӑн машинӑна юсама 144 пин тенкӗ кирлӗ пулнӑ. Кӑмӑл-сипет тӗлӗшӗнчен хур кӑтартнӑшӑн – 5 пин тенкӗ. Анчах суд фермер кӑна мар, водитель те айӑплӑ тесе йышӑннӑ. Фермера 46 пин тенкӗ тӳлеттернӗ.
Фермер ҫапса хӑварнӑ ӗнесемшӗн суда тавӑҫ тӑратнӑ-и е ҫук-и – паллӑ мар.
Тӑван ҫӗршывӑн аслӑ вӑрҫине хутшӑннӑ ветерансен федераци хысни шучӗпе хваттер туянма май пур. Юпа уйӑхӗн 1-мӗшӗ тӗлне пирӗн республикӑра 11 ватӑ хваттер черетӗнче тӑрать. Вӗсем валли хыснара 15,7 миллион тенкӗ укҫа пӑхса хӑварнӑ.
Ҫурт-йӗр условине лайӑхлатас шухӑшлӑ ветерансене 1,4-шар миллион тенкӗлӗх свидетельство парӗҫ. Вӑл укҫапа ватӑсем е хваттер, е пӳрт туянайӗҫ. Ҫитменнине, паллах, хушма тивӗ.
Ветерансемпе ҫурт-йӗрпе тивӗҫтересси ҫинчен калакан саккуна 2008 ҫулхи ҫу уйӑхӗнчи 8-мӗшӗнче йышӑннӑранпа 6034 ветерана хваттерпе тивӗҫтернӗ.
Юпа уйӑхӗн 12-мӗшӗнче Шалти ӗҫсен министерствин Шупашкарти управленийӗн 4-мӗш пайне 42 ҫулти хӗрарӑм пулӑшу ыйтма пынӑ.
Хӗрарӑм тӗнче тетелӗнче арҫынпа паллашнӑ. Вӑл хӑйӗн пирки ют ҫӗршыв патшалӑхӗн ҫар докторӗ тесе каланӑ. Арҫынпа хӗрарӑм темиҫе уйӑх ҫыру ҫӳретнӗ. Кӑштахран арҫын ҫар служби вӗҫленнине пӗлтернӗ, укҫа йӑпӑртлӑха кивҫен пама ыйтнӑ. Тупра авиабилет туянма тата медицина тӗрӗслевӗ тухма кирлине ӗнентернӗ. Кивҫен илнине киле ҫитсен тавӑрса пама шантарнӑ.
Шупашкар хӗрарӑмӗ ют ҫынна шаннӑ, ӗненнӗ, 2 миллиона яхӑн тенкӗ куҫарса панӑ. Хӗрарӑмӑн укҫи пӗтсе ҫитсен арҫын та ҫухалнӑ.
Шупашкар хулинче лавккара ҫын карттипе укҫа тӳленӗ ҫынна шыраҫҫӗ.
Хулара пурӑнакан 29 ҫулти хӗрарӑм банк карттине ҫухатнӑ. Кӑштахран вӑл унта пулнӑ 3 пин тенкӗ те 900 тенкӗ укҫа ҫухалнине сиснӗ. Ҫав укҫапа хулари Энгельс урамӗнчи лавккара тӳленӗ.
Йӗрке хуралҫисем шухӑшланӑ тӑрӑх, ҫын карттипе 20-30 ҫулсенчи ҫамрӑк усӑ курнӑ тесе шухӑшлаҫҫӗ. Вӑл ҫутӑ симӗс кӗпе, хура куртка тӑхӑннӑ.
Видеокамерӑна лекнӗ каччӑна уйӑрса илнисене (8352) 34-18-40, 24-07-02 телефон номерӗсемпе шӑнкӑравласа пӗлтерме ыйтаҫҫӗ.
Юпа уйӑхӗн 12-мӗшӗнче Ҫӗнӗ Шупашкарти шкул ертӳҫисем тӗрӗслевҫӗсенчен хӑранипе укҫасӑр юлнӑ.
Хулари шкулсенчен пӗрне палламан ҫын шӑнкӑравланӑ. Хӑйӗн пирки вӑл право органӗсенче ӗҫлекен тесе каланӑ. Ҫав ҫын шкула тӗрӗслевҫӗсем пырассине пӗлтернӗ. Хӑнасене чечекпе, тутлӑ апат-ҫимӗҫпе кӗтсе илме сӗннӗ. Ултавҫӑна ӗненсе шкул директорӗ палламан ҫын счечӗ ҫине 23 пин тенкӗ ытларах куҫарса панӑ.
Тепӗр шкул директорне те ҫавӑн улталанӑ. Анчах тӑкак виҫи пӗчӗкрех. Вӑл тӗслӗхре пурӗ 12 пин тенкӗ ытларах куҫарнӑ.
-6.7 °C