Паян, нарӑс уйӑхӗн 8-мӗшӗнче, Чӑваш Ен Элтеперӗн тивӗҫӗсене пурнӑҫлакан Олег Николаев республикӑн транспорт тата ҫул-йӗр хуҫалӑхӗн министрӗ пулма тивӗҫ ҫынна ҫирӗплетнӗ. Ку должноҫе вӑл Владимир Осипова шаннӑ. Документа республикӑн влаҫ органӗсен официаллӑ порталӗнче пичетленӗ.
Хӑй вӑхӑтӗнче Владимир Осипов Чӑвашупрдор ертӳҫинче ӗҫленӗ. Юлашки ҫулсенче вӑл «Раҫҫей Федерацийӗн Президенчӗ ҫумӗнчи Карели элчелӗхӗ» патшалӑхӑн хысна учрежденийӗн директорӗ пулнӑ. Владимир Осипов 1962 ҫулта ҫурални паллӑ.
Чӑваш Енӗн транспорт тата ҫул-йӗр хуҫалӑх министрӗ пулнӑ Александр Николаева Чӑваш Ен Элтеперӗн тивӗҫӗсене пурнӑҫлакан Олег Николаев нарӑс уйӑхӗн 6-мӗшӗнче ӗҫрен кӑларнӑ. Министрта Александр Николаев 2019 ҫулхи ака уйӑхӗнченпе ӗҫленӗччӗ.
Валерий Филимонова Чӑваш Енӗн Элтеперӗн Администрацийӗн Ертӳҫин ҫумӗнчен кӑларнӑ. Аса илтерер: ӑна ҫав пукана 2018 ҫулхи юпа уйӑхӗн 19-мӗшӗнче шанса панӑччӗ. Валерий Филимонова Чӑваш Енӗн ун чухнехи Элтеперӗ Михаил Игнатьев «тухӑҫлӑ ӗҫшӗн» тав тунӑччӗ. Республика Элтеперӗн Администрацине куҫиччен Валерий Филимонов Чӑваш Ен Патшалӑх Канашӗн спикерӗ пулса ӗҫленӗччӗ.
Паян, нарӑс уйӑхӗн 6-мӗшӗнче, Чӑваш Ен Элтеперӗн тивӗҫӗсене пурнӑҫлакан Олег Николаев Валерий Филимонова ӗҫрен кӑларма йышӑннӑ.
Сӑмах май, кӑҫалхи кӑрлачӑн 30-мӗшӗнче Олег Николаевӑн пулӑшуҫи пулма ҫирӗплетнӗ Татьяна Михайловӑна ку ӗҫрен кӑларнӑ. Мӗн сӑлтавпа ҫапла йышӑннине паянхи 29-мӗш номерлӗ йышӑнура асӑнман.
Паян Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев республикӑн Патшалӑх Канашӗн ертӳҫисемпе тата фракци пайташӗсемпе тӗл пулнӑ. Унта Олег Николаев халӑхӑн тӗрлӗ категорине паракан социаллӑ тӳлевсене индексацилес ыйтӑва хускатнӑ. Ҫакӑн пирки Олег Николаев Фейсбукри хӑйӗн страницинче хыпарланӑ.
Чӑваш Ен Элтеперӗн тивӗҫӗсене вӑхӑтлӑх пурнӑҫлаканӗ республикӑн Ӗҫлев тата Финанс министерствисене маларах асӑннӑ тӗллевпе мӗн чухлӗ укҫа кирлине ҫывӑх вӑхӑтра шутласа пӑхма хушнӑ. Хыснана улшӑну кӗртнӗ чухне социаллӑ тӳлевсене индексацилеме укҫа-тенкӗ пӑхса хӑварасшӑн.
Олег Николаев Фейсбукра ҫырнӑ тӑрӑх, инфляци пӗр вырӑнта тӑман, социаллӑ тӳлевсене вара виҫӗ ҫул ӗнтӗ индексацилемен.
Чӑваш Ен Правительствин тытӑмне улӑштарнӑ. Ҫакӑн ҫинчен калакан хушӑва ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев паян, нарӑс уйӑхӗн 6-мӗшӗнче, алӑ пуснӑ.
Чӑваш Енре Промышленность тата энергетика министерстви туса хунӑ. Асӑннӑ енпе яваплӑх ҫапла вара Экономика министерствинчен тата Стройминран ҫӗнӗ министерствӑна куҫӗ.
Юстици тата пурлӑх хутшӑнӑвӗсен министерстви Юстици енӗпе ӗҫлекен комитета ҫаврӑннӑ.
Экономика, промышленность тата суту-илӳ министерстви малашне Экономика аталанӑвӗн тата пурлӑх хутшӑнӑвӗсен министерстви ятлӑ пулӗ.
Туризм функцине Культура, национальноҫсен ӗҫӗсен тата архив ӗҫӗн министерствинчен Экономика аталанӑвӗн тата пурлӑх хутшӑнӑвӗсен министерствине панӑ.
Гражданла хӳтӗлев тата инкеклӗ лару-тӑру енӗпе ӗҫленӗ министерство унчченхиллех Патшалӑх комитечӗ пулса тӑнӑ.
Министрсен Кабинечӗн Председателӗн тивӗҫне Чӑваш Ен Элтеперӗн тивӗҫне вӑхӑтлӑх пурнӑҫлакан ҫине тиенӗ.
ЧР Элтеперӗ пулнӑ Михаил Игнатьевӑн хуралҫи те тек администрацире ӗҫлемест. Унта ӗҫсене йӗркелесе пыраканӗ те пулнӑскер ӗҫрен кайнӑ.
Владислав Кротов Михаил Игнатьевӑн хуралҫинче тӑрӑшнӑ, 2016 ҫул вӗҫӗнче ӑна ЧР Элтеперӗн администрацийӗн ертӳҫин ҫумӗ туса хунӑ. 2018 ҫулхи кӑрлачра вара ӑна Михаил Игнатьевӑн пулӑшуҫине куҫарнӑ. Пӗлтӗр юпа уйӑхӗнче ӗҫсене йӗркелекенӗ пулнӑ.
Владислав Кротов Элтеперпе пӗрле Атӑл хӗрринче чупнине, велосипедпа ярӑннине пӗрре мар куракансем пулнӑ. Вӑл Чӑваш Ен правительствин хоккей командинче те вылянӑ.
Чӑваш Енӗн экономика аталанӑвӗн, промышленноҫӑн тата суту-илӗвӗн министрӗн тивӗҫӗсене пурнӑҫланӑ Павел Иванова паян ӗҫрен кӑларнӑ. Кун пирки ЧР Элтеперӗн тивӗҫӗсене вӑхӑтлӑх пурнӑҫлакан Олег Николаевӑн 19-мӗш номерлӗ хушӑвӗнче каланӑ.
Республикӑн экономика аталанӑвӗн, промышленноҫӑн тата суту-илӗвӗн министрӗ пулма Павел Иванова пӗлтӗрхи утӑ уйӑхӗн 5-мӗшӗнче шаннӑччӗ.
Павел Иванов И.Н. Ульянов ячӗллӗ ЧПУра вӗреннӗ. РФ Правительствин Халӑх хуҫалӑхӗн академийӗнче, Финанс университетӗнче квалификацие ӳстернӗ. Республикӑн Министрсен Кабинечӗн Ертӳҫин пулӑшуҫи пулнӑ. ЧР финанс министрӗн ҫумӗ пулса, Тулашэкономбанкра, Перекет банкӗнче ӗҫленӗ опыт та пур.
Павел Иванова республикӑн финанс министрӗн ҫумне лартӗҫ сӑмах та тухнӑччӗ.
Нарӑс уйӑхӗн 5-мӗшӗнче Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев районсемпе хула администрацийӗсен пуҫлӑхӗсемпе канашлу ирттернӗ.
Элтеперӗн Администрацийӗн пресс-службинче ку лару пирки кӗскен ҫеҫ хыпарланӑ.
Унта ҫырнӑ тӑрӑх, «Раҫҫей Федерацийӗн Президенчӗн Ҫырӑвӗнче палӑртнӑ наци проекчӗсене тата задачӑсене пурнӑҫламалли ыйтусене, ҫавӑн пекех республикӑн муниципалитет пӗрлӗхӗсен территорийӗсене комплекслӑн аталантарассипе ҫыхӑннӑ ытти темӑна сӳтсе явнӑ».
Паянах Олег Николаев Чӑваш Республикин Элтеперӗ ҫумӗнчи потребительсен прависене хӳтӗлес енӗпе ӗҫлекен координаци канашӗн ларӑвне ирттернӗ. Унта транспорт ыйтӑвне те сӳтсе явнӑ. Олег Николаев Шупашкарта пӗрлехи проездной тумаллине палӑртнӑ.
Паян Чӑваш Енӗн Правительствинче черетлӗ хутчен кадр улшӑнӑвӗ пулса иртнӗ. ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев хӑйӗн нарӑс уйӑхӗн 5-мӗшӗнчи 17-мӗш тата 18-мӗш номерлӗ хушӑвӗсемпе тепӗр икӗ ҫынна министр тивӗҫӗсене пурнӑҫлама шаннӑ.
Хальхинче улшӑнусем Культура, национальноҫсен ӗҫӗсен тата архив ӗҫӗн министерствине тата Ҫут ҫанталӑк ресурсӗсен тата экологи министерствине пырса тивнӗ. Константин Яковлева тата Иван Исаева министр пуканӗсене пушаттарнӑ хыҫҫӑн тивӗҫе пурнӑҫлама министрсен ҫумӗсене хушнӑччӗ.
Ҫут ҫанталӑк ресурсӗсен тата экологи министрӗн тивӗҫне пурнӑҫлама паян Виктор Косачева ҫирӗплетнӗ; культура, национальноҫсен ӗҫӗсен тата архив ӗҫӗн министрӗ пулма — Роза Лизаковӑна.
Республика Элтеперӗн тивӗҫӗсене вӑхӑтлӑх пурнӑҫлакан Олег Николаев Михаил Игнатьевӑн канашҫисем пулнисене ӗҫрен кӑларнӑ.
Ҫапла вара республика ертӳҫин Михаил Игнатьевӑн канашҫисем пулнӑ Александр Владимиров («Агарикус»акционрсен уҫа обществи), Ярослав Кузнецов («Ренова Оргсинтез» акционерсен хупӑ обществи), Николай Николаев (Федерацин травматологи, ортопедипе эндпротезировани центрӗ), Михаил Петров («Малалла» ял хуҫалӑх эртелӗ), Сергей Колесников («ТехноНИКОЛЬ» корпораци), Лев Кураков (ЧПУн ректорӗ пулнӑскер), Владимир Иванов (Чӑваш патшалӑх педагогика университечӗ), Роман Караулов («Холдинг КиПиАй» предприяти), Владимир Крупнов, Евгений Селиванов (Пӗтӗм Раҫҫейри самбо федерацийӗ) текех канашҫӑсем мар.
Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев хӑйӗн пулӑшуҫисен тивӗҫне пурнӑҫлакансене ҫирӗплетнине Чӑваш халӑх сайчӗ унччен пӗлтернӗччӗ.
Аса илтерер: кӑрлач уйӑхӗн 30-мӗшӗнчи йышӑнусемпе Олег Николаева пулӑшма Иван Даренкова, Татьяна Михайловӑна, Иван Филиппова, Георгий Какабадзене ҫирӗплетнӗччӗ.
Халӗ, ав, тата тепӗр йышӑну тунӑ. Пулӑшуҫӑн тивӗҫне пурнӑҫлама ку хутӗнче Марина Кудрявцевӑна шаннӑ. Кун пирки 26-мӗш номерлӗ йышӑну тунӑ. Ӗҫлӗ хута Чӑваш Ен Элтеперӗн тивӗҫӗсене пурнӑҫлакан Олег Николаев нарӑс уйӑхӗн 4-мӗшӗнче алӑ пуснӑ. Йышӑнӑва республикӑн влаҫ органӗсен порталӗнчи «Законодательство» (чӑв. Саккунсем) ярӑмра паян пичетленӗ.
+24.3 °C