Хулари 1-мӗш клиника пульницин травматолог-ортопечӗсем Максим Филипповпа Сергей Тарасов пациентӑн аллине ҫӑлнӑ. Вӗсем Республикӑри кардиологи диспансерӗн чӗрепе юн тымарӗсен хирургӗпе Иван Барановпа пӗрле кӑткӑс операци тунӑ.
Пациент болгаркӑпа ӗҫленӗ чухне аллине кастарнӑ. Ӑна пульницӑна илсе ҫитернӗ. Тухтӑрсем алла ҫӑлас тесе пӗр тӑхтамасӑр операци тунӑ.
Операци тунӑ хыҫҫӑн арҫын аллине туйма пуҫланӑ ӗнтӗ. Халӗ ӑна тухтӑрсем сӑнаса тӑраҫҫӗ, сиплев малалла пырать.
Диспансеризаци вӑхӑтӗнче арҫын тухтӑра хырӑмӗ ҫинчи мӑкӑрӑлчӑка кӑтартнӑ. Юлашки тапхӑрта мӑкӑль вӑйлах ӳснӗ-мӗн. Тухтӑр ӑна пӗр тӑхтамасӑр УЗИ тума янӑ.
Унта вара ҫакӑ палӑрнӑ: арҫыннӑн пӳре тӗлӗнче мӑкӑль ӳснӗ. Анчах вӑл хӑш органра пулнине палӑртайман. Пациента Республикӑри онкодиспансера янӑ. Тухтӑрсем ӑна операци тумаллинех палӑртнӑ.
Операци вӑхӑтӗнче шурӑ халатлисем 25 сантиметр тӑршшӗ мӑкӑль касса кӑларнӑ. Операци ансат пулман, ҫапах ӑна пысӑк квалификациллӗ хирургсем, анестезиологсем тата реаниматолгсем ӑнӑҫлӑ ирттернӗ.
Пациентӑн химиотерапи курсӗ витӗр те тухма тивӗ.
Президент пепкелӗх центрӗнче пӗлтӗр 4493 ача ҫут тӗнчене килнӗ. Вӗсенчен 159-шӗ кӑшӑлвируспа чирлӗ амӑшӗнчен ҫуралнӑ.
Ҫак пулницӑра кун ҫути курнӑ ачасен 8 проценчӗ вӑхӑтран маларах ҫуралнӑ. 37 пепкен кӗлетке йывӑрӑшӗ питӗ пӗчӗк пулнӑ: 500-999 грамм.
Сӑмах май, Президент пепкелӗх центрӗнче 490 грамм таякан пепке те кун ҫути курнӑ. Тухтӑрсем унӑн пурнӑҫне упраса хӑварма пултарнӑ.
Республикӑри васкавлӑ медпулӑшу бригадисем виҫӗ хӗрарӑма ҫӑмӑлланма пулӑшнӑ.
Акан 17-мӗшӗнче Елчӗк районӗнче, тепӗр кунхине Элӗк районӗнче ача кӗтекен хӗрарӑмсем васкавлӑ медпулӑшу чӗннӗ. Анчах пульницӑна ҫитеймен, ҫул ҫинчех ҫуратнӑ. Фельдшерсем вӗсене ҫӑмӑллӑнма пулӑшнӑ, унтан пепкепе амӑшне пульницӑна илсе ҫитернӗ.
Акан 19-мӗшӗнче вара Вӑрнар районӗнче хӗрарӑм килтех ҫӑмӑлланнӑ. Вырӑна ҫитнӗ фельдшерсем ӑна пулӑшнӑ, пульницӑна илсе ҫитернӗ.
Чӑваш Енре пурӑнакансен ӗмӗрӗ вӑрӑмланнӑ (анчах ҫав цифра миҫе ҫулпа танлашнинеРеспубликӑн клиника больницин сайтӗнчи хыпарта асӑнман). Ырӑ хыпара республикӑн сывлӑх сыхлав министрӗ Владимир Степанов ӗнер, ака уйӑхӗн 21-мӗшӗнче, Республикӑн клиника больницинче иртнӗ Тӗп тухтӑр кунӗнче палӑртса хӑварнӑ.
Сывлӑх сыхлав министерствин медицина профилактики енӗпе ӗҫлекен штатра тӑман тӗп специалисчӗ Елена Наумова диспансеризаци тата профилактика тӗллевӗпе ирттерекен медтӗрӗслевсен пӗлтерӗшӗ ҫинчен каласа кӑтартнӑ. Кӑҫал 64 пин ытла ҫынна ҫав тӗллевпе тӗрӗслесе ӗлкӗрнӗ. Елена Анатольевна чӗрепе юн тымарӗсен чирӗсене, усал шыҫҫа, сахӑр диабетне тата ӳпкен чирне иртерех тупса палӑртни пӗлтерӗшли ҫинчен те чарӑнса тӑнӑ.
Ака уйӑхӗн 9-мӗшӗнче Республикӑн клиника пульницинче Уҫӑ алӑксен кунне ирттерӗҫ. Тухтӑрсем ҫынсене 8 сехетрен тытӑнса 13 сехетчен йышӑнӗҫ.
Республика пульницин консультацин 1-мӗш уйрӑмӗнче (вӑл Шупашкарти Мускав проспектӗнче 11-мӗш ҫуртра вырнаҫнӑ, «Республика пульници» чарӑнура тухмалла) ҫак специалистсем йышӑнӗҫ: акушер-гинеколог, аллерголог-иммунолог, гастроэнтеролог, гематолог, невролог, нейрохирург, офтальмолог, пульмонолог, ревматолог, нефролог, уролог, хирург, травматолог, эндокринолог.
Консультацин 2-мӗш уйрӑмӗнче (вӑл Шупашкарти Мускав проспектӗнче 19/4-мӗш ҫуртӗнче вырнаҫнӑ, «Афанасьев урамӗ» чарӑнура тухмалла) гастроэнтеролог, акушер-гинеколог, невролог-паркинсонолог, эпилептолог, офтальмолог, ревматолог, сурдолог-отоларинголог, терапевт, кардиолог, хирург-колопроктолог йышӑнӗҫ.
Специалистсем патне лекес тесен Республика пульницин поликлиникин call-центрне 8 (8352) 45-95-58) номерпе шӑнкӑравласа ҫырӑнмалла.
Чӑваш Енре фельдшерпа акушер пункчӗсен фельдшерӗсем валли ятарласа программа туса хатӗрленӗ.
Республикӑн медицинӑпа информаци тытӑмӗн ҫӗнӗ модульне хальлӗхе сӑнавлӑ мелпе ӗҫлеттереҫҫӗ. Ӑна Элӗк районӗнчи Йӑлкӑш тата Канаш районӗнчи Вӑрманкас Енӗш ялӗсенчи фельдшерпа акушер пункчӗсенче тӗрӗслемелле ӗҫлеттереҫҫӗ.
Чӑваш Республикин Сывлӑх сыхлав министерствинче пӗлтернӗ тӑрӑх, ҫӗнӗлӗх тухтӑрсене хут ҫырас ӗҫрен хӑтарӗ.
Мӗнпур фельдшера компьютерпа маларах тивӗҫтернӗ, фельдшерпа акушер пункчӗсенче Интернетпа ҫыхӑнтарнӑ.
Шупашкарти Президент пепкелӗх центрӗнче пӗлтӗр чӳк уйӑхӗн вӗҫӗнче 550 грамм таякан, 32 сантиметр тӑршшӗ ача ҫуралнӑ. Пепке ҫут тӗнчене маларах, 27 эрнере, килнӗ.
Тухтӑрсем унӑн пурнӑҫӗшӗн кӗрешнӗ. Малтан ача хӑй тӗллӗн сывлама, ҫиме хӑнӑхнӑ. 2 уйӑха ҫитсен ӑна тин ҫуралнӑ ачасен патологи уйрӑмне куҫарнӑ. Унта офтальмолог тӗрӗсленӗ те куҫне операци тумаллине палӑртнӑ. Ачапа пӗрле амӑшӗ те выртнӑ.
Тепӗр эрнерен ачана операци тунӑ. Кун хыҫҫӑн ача пульницӑра тепӗр икӗ уйӑх вӑй пухнӑ. Нумаях пулмасть ӑна киле кӑларнӑ. Ун чухне вӑл 2601 грамм тайнӑ, 44 сантиметр тӑршшӗ пулнӑ.
Хӗрарӑм фисташка ҫисе ларнӑ чухне тӑрук унӑн шӑл протезӗ хуҫӑлса кайнӑ. Ӑна пула вӑл чутах вилмен.
Ку, «Чӑваш Ен» ПТРК пӗлтернӗ тӑрӑх, пуш уйӑхӗн 13-мӗшӗнче пулнӑ. Хӗрарӑм фисташка ҫинӗ, тӑрук шӑл протезӗ хуҫӑлнӑ та пӗр пайӗ пырне анса кайнӑ.
Юрать, хӗрарӑм патне васкавлӑ медпулӑшу часах ҫитнӗ, ӑна ҫӑлса хӑварнӑ. Пациентка протез пайӗ пырне ларнипе сывлаймаи те пулайнӑ. Ӑна тухтӑрсем пульницӑна сипленме илсе ҫитернӗ.
Краснодар крайӗнчи Эсто-Садок ялӗ патӗнче ту ҫинчи аттракционпа ярӑннӑ чухне Чӑваш Енри турист шар курнӑ.
Ҫӗнӗ Шупашкарта пурӑнакан 38 ҫулти арҫын питне тата мӑйне суранлатнӑ. Ҫӑлавҫӑсен ӑна Аибга ту хырҫин айккинчен, тинӗс ҫийӗнчен 2 пин те 200 метр ҫӳллӗшӗнчен, илсе анма тивнӗ.
Малтанласа арҫынна курортри ҫӑлавҫӑсем пулӑшнӑ. Кайран ӑна вӗсем канат ҫулӗпе вертолёт лапамӗ таран илсе аннӑ. Вӑл лапам 960 метр ҫӳллӗшӗнче вырнаҫнӑ.
Кайран МЧСӑн вырӑнти ӗҫченӗсемпе Кӑнтӑрти авиаципе ҫӑлав отрячӗн пилочӗсем вертолётпа Сочие, унтан васкавлӑ пулӑшу тухтӑрсем арҫынна пульницӑна илсе ӑсатнӑ.
+3.7 °C