Пӗрлехи транспорт карттине укҫа хумалли ятарлӑ вырӑнсене хупма йышӑннӑ.
Хальхи вӑхӑтра ЕТК-карттине Перекет банкӗн NFC-ридерӗллӗ хатӗрӗсем урлӑ ҫӑмӑллӑнах укҫа хума пулать. Ҫавна май пӗрлехи транспорт карттин Шупашкарти мини-офисӗсем паянтан, утӑ уйӑхӗн 15-мӗшӗнчен, хупӑнӗҫ, Ҫӗнӗ Шупашкартисем – ҫурла уйӑхӗн 4-мӗшӗнчен.
Сӑмах май, транспорт картти ҫине укҫана Шупашкарти тата Ҫӗнӗ Шупашкарти мӗнпур почта уйрӑмӗнче хума май пур.
Транспорт карттипе ҫыхӑннӑ ыйту сиксе тухсан «ЕТК» тулли мар яваплӑ обществӑн офисӗпе ҫыхӑнма сӗнеҫҫӗ. Вӑл Шупашкарти Октябре 50 ҫул урамри 17-мӗш «а» ҫуртра вырнаҫнӑ. Телефон номерӗ 8 (8352) 36-33-30.
Чӑваш Енре ҫывӑх вӑхӑтра троллейбус паркне ҫӗнетӗҫ. Паянхи куна мӗнпур троллейбусран 80 проценчӗ кивелнӗ. Ку цифрӑна Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев республикӑн Патшалӑх Канашӗнче утӑ уйӑхӗн 11-мӗшӗнче тухса калаҫнӑ чух асӑнса хӑварнӑ.
Троллейбус паркне ҫӗнетме Раҫҫей Промышленноҫпа суту-илӳ министерстви укҫа уйӑрӗ. Вӑл паракан 1 миллиард та 170 миллион тенкӗ укҫапа 68 троллейбусран кая мар туянма палӑртаҫҫӗ.
«Ыйту вӗҫленсе пырать. Ҫывӑх вӑхӑтра конкурс тата аукцион ирттерессе шанатӑп», — тенӗ Олег Николаев.
Сӑмах май, халӗ Шупашкарпа Ҫӗнӗ Шупашкарта троллейбуссем 22 маршрутпа ҫӳреҫҫӗ. Ҫул ҫине кунсерен 219 троллейбус тухать.
Паян республикӑн Правительство ҫуртӗнче кӑшӑлвирус сарӑлнипе кӗрешекен оперштабӑн черетлӗ ларӑвӗ иртнӗ. Республикӑн сывлӑх сыхлав министрӗ Владимир Степанов пӗлтернӗ тӑрӑх, чирлекенсен шучӗ утӑ уйӑхӗн 2-5-мӗшӗсенче пирӗн тӑрӑхра ӳснӗ.
Владимир Степанов хӑйсем тӑрӑшса ӗҫленипе лару-тӑрӑва йӗркелеме май килнине ӗнентернӗ-ха. Анчах Роспотребнадзорӑн республикӑри управленийӗн ертӳҫи Надежда Луговская тем хаваслансах калаҫман. Лару-тӑру начарланнине вӑл Чӑваш Енре пурӑнакансем маска тӑхӑнманнипе, пӗр-пӗринпе ҫывӑх ҫӳренипе тата пирӗн тӑрӑхрисем ют регионсене канма кайнипе сӑлтавланӑ. Надежда Луговская лавккасенче, халӑх йышлӑ ытти вырӑнти евӗрех общество транспортӗнче малтанхиллех маска тӑхӑнмаллине аса илтернӗ.
Чӑваш Енӗн Транспорт тата ҫул-йӗр хуҫалӑхӗн министерстви пассажирсене тата багажа хулапа хула хушшинче турттарассине унчченхилли йӗркепе ҫӗнӗрен пуҫарма йышӑннӑ. Ҫапла тӑвассине кӑшӑлвирус сарӑлассине хирӗҫ ӗҫлекен республикӑри оперативлӑ штабӑн ларӑвӗнче ырланӑ.
Ҫапла вара ҫӗртме уйӑхӗн 8-мӗшӗ хыҫҫӑн муниципалитетсем хушшинчи маршрутсем реестрти расписанипе килӗшӳллӗн ӗҫлӗҫ.
Аса илтерер: республикӑра хальхи вӑхӑтра ятарлӑ санитарипе эпидемиологи режимӗ вӑйра. Ҫавӑ ҫӗнӗ кӑшӑлвирус инфекцийӗ алхаснипе ҫыхӑннӑ. Автобуссем унчченхиллех ҫӳреме тытӑнсан та хӑрушсӑрлӑх мерисене пӑхӑнмалла мар тесе асӑрхаттарать ЧР Транспорт тата ҫул-йӗр хуҫалӑхӗ. Транспортра тата чарӑнусенче маска тӑхӑнмалла.
ЧӑваштЕнре пурӑнакансем ӗнер харӑсах виҫӗ ҫӗршывран Мускава вӗҫсе килнӗ. Паян вӗсем республика правительстви уйӑрна машинӑпа Чӑваш Ене ҫитнӗ.
Ентешӗмӗрсене ют ҫӗршывран ятарлӑ авиарейссемпе илсе килнӗ. Ӗнер килнӗ йышра — пӗр ҫын Шри-Ланкӑран таврӑннӑскер, тепри – Грецирен, виҫҫӗн – Индирен.
Мускаври «Шереметьево» аэропортран тӑван тӑрӑха илсе килме Чӑваш Ен правительстви машина уйӑрнӑ. Еӗтешсене Муркаш районӗнчи «Алые паруса» санаторире йӗркеленӗ обсерватора ӑсатнӑ. Унта вӗсен икӗ эрне карантинта пулма тивӗ.
Паянхи кун тӗлне Чӑваш Енри 262 ҫын чикӗ леш енче тӑрса юлнӑ. Ҫав шутра ачасем те пур. Пурӗ 33-ӗн. Вӗсенчен чылайӑшӗ
– Таиландра, АПШра, Индире. Кӑҫалхи ака уйӑхӗн 10-мӗшӗ хыҫҫӑн республикӑри 74 ҫынна тӑван тӑрӑха илсе килнӗ.
Чӑваш Енре ҫу уйӑхӗн 12-мӗшӗ хыҫҫӑн лавккасемпе аптекӑсене маскӑсӑр кӗме юрамасть, общество транспортне ларас тесен те ҫав хатӗр кирлӗ. Республикӑра йӗркеленӗ ятарлӑ ушкӑнсем (вӗсен йышӗнче — вырӑнти администрацисенче, право хуравлӗнче ӗҫлекенсем, Роспотребнадзор специалисчӗсем) маска режимне республикӑра епле пӑхӑннине тӗрӗслеҫҫӗ.
Общество транспортӗнче, таксире, лавккасенче, аптекӑсенче, парикмахерскисенче тутапа сӑмсана маскӑпа е респираторпа хупламалла.
Тӗрӗслевҫӗсем йӗркене пӑхӑнмалли пирки аса илтереҫҫӗ. Хӑш-пӗр чухне административлӑ майпа явап тыттарма та пултараҫҫӗ тесе пӗлтернӗ Чӑваш Ен Элтеперӗн Администрацийӗн пресс-службинче.
Сӑмах май, ҫу уйӑхӗн 15-18-мӗшӗсенче Шупашкарта пилӗк ушкӑн ӗҫленӗ. Вӗсем 74 суту-илӳ точкине кӗрсе тухнӑ, темиҫешер теҫетке автобуспа троллейбуса тӗрӗсленӗ. Йӗркене пӑсни ҫинчен 5 акт тата 6 протокол ҫырнӑ.
Ҫу уйӑхӗн 1-мӗшӗнче Чӑваш Ен ҫыннисене дачӑна муниципалитетсем хушшинчи автобуссемпе кайма ирӗк панӑ. Анчах салона лӑк туллм тултарма юрамӗ. Ҫур автобус ҫеҫ . Ҫакӑ —ҫынсем ҫывӑх ларасран тунӑ йышӑну. Мӗнпур пассажирӑн, ҫавӑн пекех водительсен маска тӑхӑнмалла. Автобуссене вӑхӑтра дезинфекцилемелле, водительсен аллинче ятарлӑ электрон ирӗк пулмалла.
Билет туянма пассажирсен кассӑна каймасан та. Шупашкарта автовокзал сайтӗнче билета онлайн туянма май пур.
Республика ертӳҫисем дачӑна каякансене уйрӑм ҫын машинипе усӑ курма сӗнеҫҫӗ. Кун пек тусан ют ҫынсемпе хутшӑнмӑн, чирлес хӑрушлӑх пулмӗ. Апла пулин те санитарипе эпидемиологи нормисене пӑхӑнса маска тӑхӑнмалла.
Транспорта мӗнпур муниципалитерах тӗрӗслӗҫ. Полици ӗҫченӗсем те, ятарласа йӗркеленӗ 20 ытла мобильлӗ бригада та. Шупашкартан тухнӑ ҫӗрте 12 пост ӗҫлӗ.
Ӗнертенпе пирӗн республикӑра общество транспорчӗпе ҫыхӑннӑ чару йышӑннӑ. Хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев ака уйӑхӗн 3-мӗшӗнче алӑ пуснӑ.
Хулапа хула хушшинче ҫӳрекен транспорта ятарлӑ хушу кӑлариччен ӗҫлеме чарнӑ. Муниципалитетсем хушшинчи маршрутпа хутлакан транспорт 5 сехетрен пуҫласа 9 сехетчен, 12 сехетрен пуҫласа 14 сехетчен, 17 сехетрен пуҫласа 21 сехетчен ӗҫлӗ.
«Шупашкар – Ҫӗнӗ Шупашкар» маршрутӑн расписанийӗ улшӑнӗ. 5 сехетрен 9 сехетчен транспорт кашни 10 минутра пӗрре ҫӳрӗ, 9 сехетрен 17 сехетчен – 20 минутсерен, 17 сехетрен 21 сехетчен – 15 минутсерен.
Чӑваш Ен территорийӗнче, ҫав шутра Шупашкарпа Ҫӗнӗ Шупашкар хулисенче те, пассажирсемпе багажа саккаспа турттаракансен ӗҫне те чарнӑ.
Сӑмах май каласан, Шупашкарпа Кӳкеҫ пирки уйрӑммӑн асӑнман. Апла пулсан, унти транспорт муниципалитетсем хушшинчи маршрут расписанийӗпе ҫӳрет пулӗ.
Ҫынсем пандеми вӑхӑтӗнче килте ларнӑ вӑхӑтра общество транспорчӗ сайрарах, канмалли кун графикӗпе килӗшӳллӗн, ҫӳреме тытӑннӑ. Малашне транспорт шучӗ тата чакассине пӗлтереҫҫӗ.
Паянтан «час пик» мар вӑхӑтра общество транспорчӗ сайрарах ҫӳреме пуҫлӗ. Ака уйӑхӗн 1-мӗшӗнчен пуҫласа ҫак графикпе ҫӳрӗ: 6-9 сехетсенче тата 15-18 сехетсенче – канмалли кун графикӗпе. 9-15 сехетсенче тата 18-21 сехетсенче транспорт 20-40 минутран ҫӳрӗ.
Шупашкартан Ҫӗнӗ Шупашкара ҫӳрекен 100-мӗш маршрута вӑхӑтлӑха хупнӑ.
Чӑваш Енри общество транспорчӗ ҫитес эрнере канмалли кун графикӗ ҫине куҫӗ. Кун пирки республикӑн Транспорт тата ҫул-йӗр хуҫалӑхӗн министерствинче пӗлтернӗ.
Ведомствӑра ҫак йышӑнӑва туни ытахальтен мар. Республикӑра эпидемие хирӗҫ тӑрӑм йышӑннӑ, ҫӗршыв Президенчӗ ҫитес эрнере канмалли кунсем пулӗҫ тесе пӗлтерчӗ.
Чылай организаци-учреждени каннине кура ҫитес эрнере ҫул ҫинче халӑх сахалтарах ҫӳрӗ тесе шухӑшлаҫҫӗ. Хулара та, муниципалитетсем хушшинче те. Ҫавна май пуш уйӑхӗн 30-мӗшӗнчен пуҫласа ака уйӑхӗн 5-мӗшӗччен транспорт ҫӗнӗ режимпа ӗҫлӗ.
Чӑваш Ен Транспорт тата ҫул-йӗр хуҫалӑхӗн министерствинче транспорта пӗрмай дезинфекцилемеллине аса илтереҫҫӗ. Ҫакна Роспотребнадзор сӗнӗвне тӗпе хурса пурнӑҫламалла.
+12.5 °C