Шупашкар районӗн сучӗ тӑватӑ ҫынна вӗлерме тӑнӑ 31 ҫулти арҫын тӗлӗшпе приговор вуланӑ.
Ӑна 4 ҫынна вӗлерме тӑнӑшӑн, ҫурт чӗртсе янӑшӑн, пикене мӑшкӑлланӑшӑн, ун тӗлӗшпе ясар шухӑшне пурнӑҫланӑшӑн айӑпланӑ. Суд палӑртнӑ тӑрӑх, арҫын савнийӗнчен уйрӑлсан ӑна тавӑрас тесе Шупашкар округӗнчи ҫуртне чӗртсе яма шухӑшланӑ. Ку ӗҫе хӑй туман, пӗлӗшне явӑҫтарнӑ. Телее, пике ҫав каҫ килӗнче пулман. Пӳртре ҫывӑрнӑ ашшӗпе амӑшӗ, пӗртӑванӗ ҫунакан ҫуртран тухса ӗлкӗрнӗ.
Тӑкак 7,5 млн тенкӗпе танлашнӑ. Прокурор арҫынна тӗрмене 19 ҫуллӑха ӑсатма ыйтнӑ. Суд приговора ҫемҫетнӗ. Приговорпа килӗшӳллӗн, арҫыннӑн ҫирӗп режимлӑ колонире 13 ҫул ирттерме тивӗ.
Ют ҫӗршыври ултавҫӑсем ҫынсене телефонпа темле майпа та улталаса укҫасӑр, хваттерсӗр хӑварнине пӗлетпӗр-ха. Маларах тӗрмери ҫынсем те ҫавӑн пек шӑнкӑравлаҫҫӗ тетчӗҫ. Анчах хамӑр патрисемех улталаса ҫӳрени тата та ытларах тӗлӗнтерет пек туйӑнать.
Акӑ, Элӗк районӗнчи пӗр арҫын карчӑк-кӗрчӗке улталаса пурӑннӑ. 33 ҫулти вӑйпитти Елчӗк районӗнче пурӑнакан ватӑсене улталаса ҫӳренӗ.
Социаллӑ ӗҫчен тесе вӑл ватӑсене пӗчӗк парнесем валеҫсе ҫӳренӗ, унтан налук тесе 20-шер пин тенкӗ ыйтнӑ.
Ҫапла майпа вӑл пилӗк кинемее улталама хӑюлӑх ҫитернӗ, вӗсенчен 97 пин тенкӗ ыйтса илнӗ.
Ҫынна суйма именмен, Турӑран та хӑраман, ватӑсене сума сума пӗлмен намӑссӑра ҫывӑх вӑхӑтра Елчӗкре суд тенкелӗ ҫине лартӗҫ.
Чӑваш Енре 36 ҫулти арҫынна нумаях пулмасть суд тенкелӗ ҫине лартнӑ.
Ҫӗнӗ Шупашкарти ҫав этем, тӗпрен илсен, ача укҫипе пурӑннӑ. Ниҫта та ӗҫлеменскер, ӗҫме юратаканскер 9 тата 11 ҫулти тӑван мар ачасене пластик пӑрӑхпа хӗненӗ. Ачасене 5 минут кая юлса киле килнӗшӗн те, тӑван асламӑшӗпе (тен, кукамӑшӗ-тӗр. Вырӑсла хыпарта бабушка тенӗ) телефонпа калаҫнӑшӑн та алӑ ҫӗкленӗ.
Арӑмӗпе хӑйӗн 4 ҫулти тӑван ывӑлне те патак ҫитернӗ.
Арҫынна суд 5 ҫул ҫурӑлӑха пӗтӗмӗшле режимлӑ колоние ӑсатнӑ.
Чӑваш Енре 36 ҫулти арҫынна нумаях пулмасть суд тенкелӗ ҫине лартнӑ.
Ҫӗнӗ Шупашкарти ҫав этем, тӗпрен илсен, ача укҫипе пурӑннӑ. Ниҫта та ӗҫлеменскер, ӗҫме юратаканскер 9 тата 11 ҫулти тӑван мар ачасене пластик пӑрӑхпа хӗненӗ. Ачасене 5 минут кая юлса киле килнӗшӗн те, тӑван асламӑшӗпе (тен, кукамӑшӗ-тӗр. Вырӑсла хыпарта бабушка тенӗ) телефонпа калаҫнӑшӑн та алӑ ҫӗкленӗ.
Арӑмӗпе хӑйӗн 4 ҫулти тӑван ывӑлне те патак ҫитернӗ.
Арҫынна суд 5 ҫул ҫурӑлӑха пӗтӗмӗшле режимлӑ колоние ӑсатнӑ.
Куславкка тӑрӑхӗнчи арҫын паллакан хӗрарӑмӑн 500 пин тенкине вӑрланӑ. Ҫав хӗрарӑм упӑшки ятарлӑ ҫар операцине хутшӑннӑ, унта пуҫ хунӑ.
Ҫав кун арҫын ун патӗнче хӑнара пулнӑ. Хайхискер хӗрарӑм асӑрхаман чухне унӑн телефонне тытса банк сарӑмне кӗнӗ, 500 пин тенке хӑйӗн счечӗ ҫине куҫарнӑ.
Тепӗр кунхине те вӑл ун патне хӑнана килнӗ. Хальхинче хваттерте упраннӑ 96 пин тенке вӑрласа кайнӑ.
Арҫын куншӑн явап тытнӑ. Суд ӑна 4 ҫуллӑха тӗрмене хупма йышӑннӑ.
Савнийӗ пӑрахсан каччӑ ӑна тавӑрма шухӑшланӑ. Ку — кинори сюжет мар, Шупашкар округӗнче пулса иртнӗ тискер ӗҫ ку.
2025 ҫулхи нарӑс уйӑхӗнче пулса иртнӗ. Шупашкарти 31 ҫулти арҫын савнийӗпе уйрӑлнӑ хыҫҫӑн ӑна тата унӑн ҫывӑх ҫыннисене вӗлерме шухӑш тытнӑ: вӗсен Шупашкар округӗнчи Хурӑнлӑх ялӗнчи ҫуртне чӗртсе ярас тенӗ. Ку ӗҫе хӑй туман, 33 ҫулти пӗлӗшне явӑҫтарнӑ. Вӑл каҫхине ҫунакан хатӗр илсе чӳречерен пенӗ.
Анчах, хӗр ҫав каҫ килте пулман. Телее, унӑн ашшӗпе пӗртӑванӗ ҫунакан ҫуртран тухса ӗлкӗрнӗ. Кил-ҫуртран нимӗн те юлман.
Вӗсем тӗлӗшпе пуҫарнӑ пуҫиле ӗҫе тишкерсе пӗтернӗ, ӑна кӗҫех Шупашкар районӗн сучӗ пӑхса тухӗ.
Канашлу вӑхӑтӗнче ҫынна тапӑннӑшӑн Шӑмӑршӑ округӗн пуҫлӑхӗ Сергей Галкин судра явап тытнӑ.
Аса илтеретпӗр: 2025 ҫулхи пушӑн 22-мӗшӗнче Шӑмӑршӑ округӗнче сунар сезонне уҫассипе ҫыхӑннӑ канашлура Сергей Галкин 70-ти сунарҫа тапӑннӑ, киревсӗр сӑмахсемпе кӳрентерме пуҫланӑ. Ҫапла сӑмах ҫине сӑмах – алӑсем те хута кайнӑ, пуҫлӑх сунарҫа ҫапнӑ. Суд вӑл унӑн сывлӑхне ҫӑмӑл сиен кӳнӗ тесе йышӑннӑ.
Приговорпа килӗшӳллӗн, Сергей Галкинӑн 25 пин тенкӗ штраф тӳлемелле. Ҫавӑн пекех суд сунарҫӑн граждан тавӑҫне те тивӗҫтернӗ.
Канаш округӗнче прокуратура ятарлӑ ҫар операцийӗнче вилнӗ салтакшӑн патшалӑх паракан тӳлеве тӑванӗсене памалла тунӑ.
Укҫана вара малтан ют хӗрарӑм хапсӑннӑ. Вӑл салтакпа РФ Хӳтӗлев министерствипе килӗшӳ тунӑ кун паллашнӑ. Вӗсем ҫав кунах пӗрлешнӗ. Анчах пӗрле пурӑнман, пӗр хуҫалӑх тытса пыман. Ҫак хӗрарӑма салтакӑн тӑванӗсем те палламан. Салтак ятарлӑ ҫар операцийӗнче пулнӑ чухне хӗрарӑм унпа ҫыхӑну тытман.
Темиҫе уйӑхран арҫын хыпарсӑр ҫухалнӑ, вӑхӑт иртсен суд вӑл вилнӗ тесе йышӑннӑ. Кун хыҫҫӑн «арӑмӗ» патшалӑх паракан тӳлеве илме тесе тӑнӑ. Анчах май килмен: суд вӗсем суя майпа пӗрлешнӗ тесе йышӑннӑ.
Вӑрмар округӗнчи хӗрарӑм харпӑр клиникӑра ФГДС тунӑ хыҫҫӑн вилнӗ.
Ку 2022 ҫулта пулнӑ. Хӗрарӑм ҫак процедурӑна тума Шупашкарти медцентра кайнӑ.
Тухтӑр тӗрӗслев вӑхӑтӗнче пациенткӑн шалти органне сиенлетнӗ. Анчах медпулӑшу паман, ҫавӑн пекех киле янӑ. Темиҫе кунран хӗрарӑм больницӑра вилнӗ.
ФГДС тунӑ тухтӑра тӗрмене хупмасӑр 2 ҫуллӑха айӑпланӑ. Клиникӑран вара 2 миллион тенкӗ шыраса илнӗ.
Анчах вилнӗ хӗрарӑмӑн тӑванӗсем приговорпа килӗшмен – Аслӑ суда апелляци панӑ. Кун хыҫҫӑн приговора улӑштарнӑ: тухтӑра 1,5 ҫуллӑха ирӗкрен хӑтарнӑ.
Ӗнине таптаса кайнӑ, машина хуҫине вара куншӑн 1 миллион тенкӗ тӳлемелле. Ҫавӑн пек лару-тӑрӑва лекнӗ Пӑрачкав округӗнчи хӗрарӑм.
Авари «Йӗпреҫ – Березовка – Кудеиха» ҫул ҫинче каҫхине пулнӑ. Ӗне «Киа» машина айне пулса вилнӗ. Машина вара самай сиенленнӗ. Экспертиза тунӑ та – тӑкак 2 млн та 867,7 пин тенкӗпе танлашнӑ. Машинӑн пасарти хакӗ – 3,7 млн тенкӗ.
Суд ҫапла йышӑну тунӑ: хӗрарӑмӑн машина хуҫине 1 млн та 33,9 пин тенкӗ тӳлемелле.
+25.3 °C