Ӗнер Шупашкарта ҫӑмӑл атлетика енӗпе Раҫҫей чемпионачӗ пуҫланнӑ. Пӗрремӗш ҫитӗнӳсем пур.
Анжелика Сидорова ҫӳллӗшне шӑчӑпа сиксе Елена Исинбаева 2016 ҫулта лартнӑ рекорда ҫӗнетнӗ. Ун чухне ку кӑтарту 4,90 метр пулнӑ тӑк Анжелика 4,91 метра парӑнтарнӑ.
Хальлӗхе тӗнчери абсолютлӑ рекорд Елена Исинбаевӑнах. Вӑл уҫӑ сывлӑшра - 5,06, пӳлӗмре 5,01 метра парӑнтарнӑ. Сидоровӑн вара ку кӑтартусем 5,01-пе тата 4,95-пе танлашаҫҫӗ.
Аса илтерер: чемпионат ҫурла уйӑхӗн 5-мӗшӗнче вӗҫленет.
Шупашкарта ҫурла уйӑхӗн 2-5-мӗшӗсенче ҫӑмӑл атлетика енӗпе Пӗтӗм Раҫҫейри чемпионат иртет. Ӑна ыран саванӑҫлӑ лару-тӑрура 15 сехет ҫурӑра уҫӗҫ.
Ӑмӑртусем 15 пин ҫын вырнаҫакан «Олимпийский» стадионта иртӗҫ. Чемпионата курмашкӑн лекеймесен те кулянмалла мар. Ӑна федераци спорт каналӗсемпе онлайн мелпе кӑтартсах тӑрӗҫ.
Сӑмах май, кун пек чемпионат Шупашкарта 2016 ҫулта иртнӗ. Ун чухне ӑмӑртусене Олимп чемпионки Елена Исимбаева килнӗччӗ.
Муркаш тӑрӑхӗн пилӗк гражданне савӑнӑҫлӑ лару-тӑрура вӗсене Муркаш районӗн Хисеп Кӗнекине кӗртесси пирки Свидетельствӑсем панӑ. Вӗсенчен пӗри — Татьяна Огандерова (Моисеева) — Раҫҫей биатлонистки. Спорт мастерӗ, биатлон енӗпе тӗнче шайӗнчи Раҫҫей спорт мастерӗ, Раҫҫей тава тивӗҫлӗ спорт мастерӗ, вӑл ҫамрӑксен хушшинче биатлон енӗпе тӗнче чемпионки, ҫуллахи биатлонта тӗнче чемпионки, Чӑваш Енри, Раҫҫейри тата Европӑри ӑмӑртусен ҫӗнтерӳҫи, тӗнче ӑмӑртӑвӗнче виҫӗ хут ҫӗнтерӳҫӗ ятсене ҫӗнсе илнӗ. Биатлон енӗпе Тӗнче Кубокӗн тапхӑрӗн кӗмӗл призерӗ, Раҫҫейри хӗрарӑмсен команди йышӗнче эстафетӑра тӗнче чемпионачӗн бронза призерӗ шутланать.
Спортсменка хӑй ҫапла пӗлтернӗ: «Муркаш район администрацийӗ мана ҫакӑн пек чыс туни кӗтмен ҫӗртен пулчӗ, ҫакӑ вара питӗ кӑмӑллӑ».
Чӑваш Республикинчи — Чӑваш Енри — Раҫҫей УФСИНӗ хӑйӗн ӗҫтешне саламласа ҫирӗп сывлӑх, ырлӑх, ыранхи кун пирки пӑшӑрханмасӑр пурӑнма тата вӑрӑм ӗмӗр сунать, ҫывӑх ҫыннисем ӑна пулӑшса та тимлӗх уйӑрса тӑрассине шанать!
Чӑваш Ен спортсменӗ Владислав Поляшов Раҫҫейӗн спорт гимнастики енӗпе иртекен кубокӗнче ҫитӗнӳ хыҫҫӑн ҫитӗнӳ тӑвать. Паянхи куна илсен вӑл икӗ кӗмӗл медаль ҫӗнсе илнӗ.
Лаша ятлӑ гимнастика хатӗрӗ ҫинче хӑнӑхтару туса ентешӗмӗр кӗмӗл медаль ҫӗнсе илнӗ. Ҫавӑн чухне вӑл тӳресенчен 13,900 балл пухнӑ. Ун хыҫҫӑн Владислав мӑшӑр кашта ҫинче кӗмӗл медале тивӗҫнӗ. Мухтанатпӑр ентешӗмӗрпе – маттур спорт гимнасчӗпе!
Мӑкшӑ Республикинче Пӗтӗм Раҫҫейри ял Сапантайӗпе килӗшӳллӗн лаша кӳлсе чупакансен ӑмӑртӑвӗ иртнӗ. Унта 1600 метра чупса пирӗн ентеш Инсур Галимзянов финиша чи малтан ҫитнӗ. Вӑл Вернблум Аш ятлӑ лашапа ӑмӑртнӑ. Инсур тӗп парнене - Лада Грантӑна - ҫӗнсе илнӗ. Палӑртмалла: пирӗн ентешпе пӗрле Мӑкшӑ, Тутар республикисенчи, Пенза облаҫӗнчи спортсменсем хӑйсен урхамахӗсемпе ӑмӑртнӑ.
Уява 50 пин ытла ҫын пухӑннӑ. Спорт ӑмӑртӑвӗсемсӗр пуҫне наци вӑййисемпе конкурсӗсем иртнӗ. Хӑнасем наци апат-ҫимӗҫне тутанса курнӑ. Ҫавӑн пекех концерт, флешмоб пулнӑ.
Шупашкарти Пӗтӗм чӑвашсен «Акатуй» уявне (вӑл хулари «Амазони» паркра иртнӗ) чӑваш пӑхаттирӗсем те пуҫтарӑннӑ. Спортсменсем ӑмӑртнине пӑхма куракансем те йышлӑ пухӑннӑ.
Спортсменсене республика Элтеперӗ Олег Николаев та саламланӑ. «Кӗрешӳ – Чӑваш Республикин наци спорчӗн кӑсӑклантаракан енӗ. Кавир ҫине тухниех ҫитӗнӳ, мӗншӗн тесен кӗрешӳҫӗсем наци спортне аталантараҫҫӗ», — тенӗ республика ертӳҫи.
Спортсменсем 80 килограма ҫитичченхи тата 80 килограмран йывӑртарах виҫере ӑмӑртнӑ.
80 килограмчченхи виҫере Шупашкарти Станислав Никифоров ҫӗнтернӗ. Шупашкарти тепӗр ар, Александр Ефимов, 80 килограмран йывӑртарах виҫере пӗрремӗш вырӑна тухнӑ.
И.Н. Ульянов ячӗллӗ Чӑваш патшалӑх университетӗнче тренерсене чӑвашсен кӗрешӳ мелӗпе вӗрентме хӑнӑхтарнӑ. Халӗ вӗсене квалификаци шайне ӳстерни ҫинчен калакан сертификатсем панӑ.
Кӗрешӳ — чӑвашсен спорт енӗ. Ҫав енӗпе тренерсен пӗлӗвне туптама республикӑн Спорт министерстви сӗннӗ. Программӑна спорт кӗрешӗвӗ, дзюдо, самбо енӗпе ӗҫлекен тренерсем валли ятарласа хатӗрленӗ.
Пӗлӗве ӳстермелли курсра хальлӗхе 36 тренер вӗреннӗ. Вӗсем пурте — республикӑри тата муниципалитетсенчи спорт шкулӗсенче ӗҫлекенскерсем.
Чӑваш Енӗн тӗп хулинче роллер йӗлтӗрпе ярӑнма ҫул тӑвасшӑнни пирки Чӑваш халӑх сайчӗ пӗлтернӗччӗ-ха. Халӗ вара ҫв трасса валли федераци хыснинчен укҫа уйӑрса парасси пирки пӗлтӗмӗр.
Ырӑ хыпар республика Элтеперӗ Олег Николаев Раҫҫейӗн вице-премьерӗпе Дмитрий Чернышенкӑпа тӗл пулсан паллӑ пулнӑ.
Роллер йӗлтӗрпе ярӑнмалли ҫул 4 километра яхӑн пулӗ. Ӑна Спортӑн хӗллехи енӗсен тӗсӗсен центрӗ ҫумӗнче сарӗҫ. Унта биатлонистсене пемелли хальхи вӑхӑтри ятарлӑ вырӑн та пӑхса хӑварӗҫ.
Ӗҫӗн проект хакӗ – 970,4 млн тенкӗ.
Чӑваш Ен спортсменки Полина Андреева Сыктывкарта юниорсемпе юниоркӑсен хушшинче йывӑр атлетика енӗпе иртекен ӑмӑртӑва хутшӑннӑ. Пирӗн ентеш виҫӗ ылтӑн медаль ҫӗнсе илнӗ, ҫӗршывӑн 8 рекордне ҫӗнетнӗ.
Полина 49 килограмм тайман виҫе категорийӗнче вӑй виҫнӗ. Вӑл сулласа 79 кг ҫӗкленӗ, тӗртсе – 95 кг. Пӗтӗмпе 174 кг пухнӑ. Пӗлтӗр Албанире кӑтартнӑ кӑтартуран ку 3 киолограмм нумайрах.
Палӑртмалла: Полина Олимп резервӗсен 3-мӗш спорт шкулӗнче ӑсталӑхне туптать.
Мускавра ӗҫлесе пурӑнакан чӑвашсем футболла выляссипе ӑмӑрту ирттернӗ. Патӑрьел районӗнчи «Авангард» хаҫатра пӗлтернӗ тӑрӑх, вӑййа 6 команда — Улатӑр, Патӑрьел, Канаш, Йӗпреҫ, Елчӗк, Шӑмӑршӑ районӗсен хастарӗсем — хутшӑннӑ.
«Вӑйӑ ҫивӗч те интереслӗ иртнӗ. Пирӗн район команди финалта Йӗпреҫсемпе вылянӑ. Вӑйӑ пӗр-пек очкосемпе вӗҫленнӗрен пенальти тапнӑ. Патӑрьелсем иккӗмӗш вырӑна тухнӑ. Вӑйӑсене йӗркелеме Треньелӗнчи В. Зайцевпа Чӑваш Ишекӗнчи А. Краснов тӑрӑшнӑ.
Патӑрьелӗнчи А. Моисеев «Чи лайӑх тапӑнса вылякан», Именкассинчи А. Нянин «Чи лайӑх хӳтӗлевҫӗ», Треньелӗнчи О. Михайлов «Чи лайӑх вратарь» ятсене тивӗҫни те кӑмӑллӑ», — хыпарланӑ хаҫат.
+1.9 °C