Чӑваш Ен Сывлӑх сыхлав министерствин Президент пепкеллӗх центрӗнче организмра кӑшӑлвируса хирӗҫ ятарлӑ белок (вырӑсла ӑна антитела теҫҫӗ) пуррине палӑртма май пур. Тӗпчев меслечӗ – иммуноферментлӑ анализ.
Анализа Шупашкарти Ярославль урамӗнчи 48-мӗш ҫуртри репродуктивлӑ пулӑшу кӳрекен 2-мӗш уйрӑмӗн хуҫалӑх расчечӗн пайӗнче (вӑл «Республика лапамӗ» чарӑнура вырнаҫнӑ) йышӑнаҫҫӗ: тунтикун, юнкун кӗҫнерникун – ирхи 7 сехет те 30 минутран пуҫласа 9 сехет те 30 минутчен; шӑматкун – 8 сехетрен пуҫласа 12 сехетчен. Ҫумра паспорт тата укҫа кирлӗ.
Анализ париччен 2-3 сехет маларах апат ҫимелле мар, пирус туртма юрамасть. Газсӑр тӑрӑ шыв ӗҫнишӗн тем мар.
Анализ парас тесен 8 (8352) 62-02-84 телефонпа тунтикунтан пуҫласа эрнекун таран ирхи 8 сехетрен тытӑнса 14 сехетчен шӑнкӑравласа ҫырӑнмалла.
Ҫӗртме уйӑхӗн 19-мӗшӗнче Раҫҫейре Пирогов орденне ҫирӗплетнӗ. Медицина ӗҫченӗсен кунӗнче унпа тухтӑрсене чысланӑ.
Ҫак ордена Ҫӗнӗ Шупашкар хула пульницин тӗп тухтӑрӗн ҫумӗ Вера Алексеева тата Шупашкарти васкавлӑ медпулӑшу пульницин инфекци уйрӑмӗн заведующийӗ Сергей Ефимов тивӗҫнӗ.
Сергей Ефимов асӑннӑ пульницӑра 35 ҫул ӗҫлет, инфекци уйрӑмне 19 ҫул ертсе пырать. Вера Алексеева тӑрӑшнипе пульницӑра кӑшӑлвируспа чирлӗ ҫынсем валли 75 койка хатӗрленӗ. Вӑл унти тухтӑрсене пандеми вӑхӑтӗнче ӗҫлеме вӗрентнӗ.
Паян ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев ирттернӗ планеркӑра Шупашкарти пульницӑра ҫӗрле ҫутӑ сӳнсе ларни пирки ыйтӑва хускатнӑ. Унта кӑшӑлвируспа чирлӗ 200 яхӑн пациент сипленет, вӗсенчен хӑшӗ-пӗри ӳпкене сывлаттармалли аппарат айӗнче выртать.
«Кунашкал объектсене резервлӑ энерги ҫӑлкуҫӗпе тивӗҫтересси пирки шутламалла», - тенӗ Олег Алексеевич. Инкеклӗ лару-тӑру патшалӑх комитечӗн ертӳҫи Вениамин Петров ун пеккисене кашни пульницӑрах пӑхса хӑварнине каланӑ. «Пысӑк авари пулсан, ку чылай учреждение пырса тивет тӗк, энерги ҫӑлкуҫӗ пулмаллах. Сӳтсе явӑпӑр, сире пӗлтерӗпӗр», - тенӗ Вениамин Петров.
Электроэнергипе ҫыхӑннӑ авари Хулари клиника центрӗнче пулнӑ. Кӑштахран йӑлтах йӗркене кӗртнӗ, пациентсенчен никам та шар курман.
Чӑваш Ен Элтеперӗ пулнӑ Михаил Игнатьев Питӗрти лайӑх клиникӑсенчен пӗринче сипленни паллӑ. Ҫакӑн пирки ТАСС информаци агентстви пӗлтернӗ.
Михаил Игнатьев Питӗр хулинчи Алмазов ячӗллӗ Наци медицина тӗпчев центрӗнче выртнӑ. Центрӑн тӗп врачӗн ҫумӗ Раиса Конашкова журналистсене пӗлтернӗ тӑрӑх, 2019 ҫулта Михаил Игнатьева темиҫе хутчен те тухтӑр пулӑшӑвӗ кирлӗ пулса тухнӑ. 2020 ҫулхи нарӑс уйӑхӗнче ӑна центра илсе пынӑ. Ун чухне вӑл хӑйне йывӑр туйнӑ.
«Анлӑ инфаркт хыҫҫӑн чӗре чирӗ аталанма пуҫланӑ. Шалти органсен ӗҫне те ҫавӑ витӗм кӳнӗ», — каласа кӑтартнӑ Конашкова ТАСС информаци агентствине.
Ҫу уйӑхӗн пуҫламӑшӗнче Михаил Игнатьева ӳпки икӗ енӗпе шыҫнӑран Питӗрти пульницӑна вырттарнӑ.
Чӑваш Енре тепӗр 3 ҫын кӑшӑлвирусран вилнӗ. Ҫапла майпа вилнисен йышӗ 21 ҫынна ҫитнӗ.
ЧР Сывлӑх сыхлавӗн министерстви пӗлтернӗ тӑрӑх, 87 ҫулти пациент Шупашкарти Васкавлӑ медпулӑшу пульницинче сипленнӗ. 81 ҫулти тата 68 ҫулти хӗрарӑмсем Хулари клиника центрӗнче тата Ҫӗнӗ Шупашкарти хула пульницинче выртнӑ. Виҫҫӗшӗн те вӑраха кайнӑ йывӑр чирсем пулнӑ.
Республикӑра 28 ҫын ӳпкене сывлаттармалли аппарат айӗнче выртать. Паянхи кун тӗлне 4259 ҫын кӑшӑлвируспа чирленӗ. Юлашки талӑкра ку йыша 73 ҫын хушӑннӑ. Обсерватора 65 ҫынна вырнаҫтарнӑ.
Кӑшӑлвируспа чирлисем валли пирӗн республикӑра 103 койка ҫеҫ юлнӑ. Ку вӑл ҫав чир ернисем валли хатӗрленӗ мӗнпур (1613) койкӑн 6,4 проценчӗ пулать. Ку цифрӑна Чӑваш Ен Сывлӑх сыхлав министерстви ҫӗртмен 14-мӗшӗнче пӗлтернӗ.
Кӑшӑлвируса пула йышӑннӑ чарӑва тапхӑрӑн пӑрахӑҫлама инфекци сарӑлнин коэффициенчӗ пирӗн тӑрӑхра — 0,93 (пӗрремӗш тапхӑра куҫма вӑл 1-рен пысӑк пулмалла мар); пушӑ койкӑсен фончӗ — 16,9% (50 процентран ытларах кирлӗ); 100 пин ҫын пуҫне COVID-19 тӗрӗслевӗ — 131,6 (70-тен кая мар пулмалла).
Ҫапла вара пирӗн республика чарӑва пӑрахӑҫлассин пӗрремӗш тапхӑрӗ ҫине пульницӑсенче вырӑн ҫитменнишӗн куҫаймасть. Пӑхса хӑварнӑ 609 койкӑран 305-рен кая мар пушӑ кирлӗ.
Ҫав вӑхӑтрах республика ертӳҫи Олег Николаев Чӑваш Ен кӑшӑлвирус тӑрӑмне ҫӗнес ҫул ҫине тӑнине палӑртнӑ. Юлашки сакӑр кунта сывалакансен шучӗ чирлекенсенчен виҫ хут пысӑкрах пулнине пӗлтернӗ.
Ҫӗршывӑн ытти регионӗнче чарӑва пӑрахӑҫлассин тӗрлӗ тапхӑрӗ ҫине куҫма пуҫланӑ. Унчченхиллех куҫайманнисем – Чӑваш Енпе Мордва Республики.
Тухтӑра вӗренекенсем кӑшӑлвируслисене пулӑшаҫҫӗ. 13 ҫын практикӑна Шупашкарти Иккӗмӗш хула пульницине практикӑна кайнӑ. Тепӗр 13 ҫын Республикӑри инкексен медицинин центрӗнче телефонпа дежурствӑра лараҫҫӗ. 66 студент-медик ковид центрӗсенчи «хӗрлӗ зонӑсенче» аслӑ ҫулсенчи санитарсемпе медсестрасен вырӑнӗнче ӗҫлет.
Тӗнче тетелӗнчи «Шикленмен Чӑваш Ен» халӑх ушкӑнӗнче пӗлтернӗ тӑрӑх, пулас врачсем, фельдшерсем тата медсестрасем ку утӑма хӑйсен кӑмӑлӗпе тунине ӗнентереҫҫӗ.
Кӑшӑлвируспа чирлӗ мӗнпур медиксем пекех вӗсем те президент тӳлевӗсене тивӗҫӗҫ.
Хулари иккӗмӗш пульницӑсӑр таиа Инкексен медицин центрӗсӗр пуҫӗе ҫамрӑксене Ҫӗнӗ Шупашкарти медицина центрӗ, Хулари клиника центрӗ, Хулари 1-мӗш номерлӗ клиника пульници, Республикӑн ача-пӑча клиника пульници, Хулари ача-пӑчан инфекци пульници, Васкавлӑ медицина пулӑшӑвӗн пульници, Республикӑн онкологи диспансерӗ, Республикӑн кардиологи диспансерӗ, Республикӑн офтальмологи пульници йышӑннӑ.
Чӑваш Енӗн шырав юхӑмӗ хӑйсен хастарне Евгений Шумилова пульницӑна вырттарас тесе Фейсбукра ӗнер пулӑшу ыйтса ҫырнӑ.
Арҫыннӑн ӳпки икӗ енӗпе шыҫнӑ. Вӑл пысӑк температурӑпа пӗр эрне нушаланнӑ, виҫ кун каялла тӑн ҫухатнӑ. Юнри сахӑр виҫи чакса кайнӑ. Участокри врач кӑшӑлвирусран тест тума ҫӗртме уйӑхӗн 18-мӗшӗнче ҫеҫ вырӑн пур тенӗ. Васкавлӑ пулӑшу чӗнсен тухтӑрсем 3 сехет ытла кӗттернӗ. Врач юн пусӑмне те виҫмен имӗш. Евгений Георгиевич вара юн пусӑмӗ пысӑккипе, диабет чирӗпе нушаланать иккен. 64 ҫулти арҫын пӗччен пурӑнать.
Евгений Шумилов ӗҫлекен «Советская Чувашия» хаҫат та ҫине тӑнӑ — усси пулман.
Паян вара чирлӗ ҫынна тинех пульницӑна вырттарнӑ. Вырӑн тупас, пульницӑна хурас тесе Шумиловӑн ҫывӑх ҫыннисем тӗнче тетелӗнчи халӑх ушкӑнӗнче ҫырнӑ, депутатсене пулӑшма ыйтнӑ.
Шупашкарта пурӑнакан 25 ҫулти ҫамрӑк пӗр кунхине амӑшне тата пӗрле пурӑнакан хӗрарӑма ҫӗҫӗпе чиксе пӗтернӗ, тӑван ашшӗне вӑл вӗлерессипе хӑратнӑ.
Пӑтӑрмах пӗлтӗрхи ҫурла уйӑхӗн 22-мӗшӗнче ҫурҫӗр иртни 2 сехетре пулса иртнӗ. Ӳсӗр ҫамрӑк 59 ҫулти амӑшне тата пӗрле пурӑнакан 31 ҫулти хӗрарӑма ҫӗҫӗпе чиксе пӗтернӗ. Ҫав вӑхӑтра лешсем ҫывӑрнӑ. Хӗрарӑмсене кил хуҫи, каччӑн ашшӗ, хӳтӗлеме тӑнӑ. Анчах ҫамрӑк ҫын ӑна вӗлерессипе хӑратнӑ.
Каччӑ тӗлӗшпе тӗпчевҫӗсем пуҫиле ӗҫсем пуҫарнӑ: икӗ ҫынна вӗлерме тӑнӑшӑн, вӗлерессипе хӑратнӑшӑн. Пуҫиле ӗҫе тӗпченӗ май судпа медицина экспертизи ирттернӗ. Каччӑ хӑй мӗн хӑтланнине ӑнланман, халӗ те ӑнланмасть тесе пӗтӗмлетнӗ. Суд ӑна психитари пульницине ӑсатма йышӑннӑ.
Шупашкар район пульницинче тухтӑрсем ҫитмеҫҫӗ. Ҫакна унта кайса ҫӳрекенсем те аван сисеҫҫӗ пулӗ. Врачсем кирлине паян Врачсен пӗлӗвне ӳстерес енӗпе ӗҫлекен институт тӗнче тетелӗнчи халӑх ушкӑнӗсенчен пӗринче пӗлтернӗ.
Республикӑн тӗп хулипе юнашар вырнаҫнӑ Шупашкра район пульницинче участокри терапевтсем валли 3 вырӑн пур, оториноларинголог — 1, анестизиолог-реаниматолог — 2, эндоскопист — 1, ульрасасӑ диагностикин врачӗ — 1, кардиолог — 1, невролог — 1, инфекционист — 1.
Тухтӑрсен «Земство тухтӑрӗ» программӑпа та ӗҫе вырнаҫма май пур пӗлтернӗ.
+11.3 °C