Шупашкарти васкавлӑ медпулӑшу пульницин стационар корпусне ковид-госпиталь пек ӗҫлеме чарасси пирки хыпарланӑччӗ. Халӗ ҫак ӗҫе пурнӑҫланӑ.
Унта кӑшӑлвируспа чирлисене пуш уйӑхӗн 15-мӗшӗнче йышӑнма пӑрахнӑ. Ку ковид-госпитале хупасси пирки нарӑс уйӑхӗн 19-мӗшӗнчех калаҫма тытӑннӑ. Кун пирки ЧР Сывлӑх сыхлавӗн министерстви пӗлтерет.
Пульницӑра дезинфекци тунӑ. Паянтан пуҫласа унта ахаль пациентсене сиплеме пуҫланӑ.
Палӑртмалла: халӗ пирӗн республикӑра кӑшӑлвируспа чирлисем валли 10 пульницӑра 1120 койка пур. Вӗсенче 800 ытла пациент сипленет.
Шупашкарти васкавлӑ медпулӑшу пульници текех кӑшӑлвируспа чирлисене йышӑнмӗ. Ҫакна пуш уйӑхӗн 15-мӗшӗнчех йышӑннӑ. Халӗ унта 60 пациент кӑшӑлвирусран сипленет. Кун хыҫҫӑн пульница алӑкӗ кӑшӑлвируспа чирлисемшӗн хупӑнӗ.
Аса илтерер: пульницӑра чирлисем валли 275 койка пулнӑ. Халӗ специалистсем урӑх ыйту пирки шутлаҫҫӗ: тӗп корпуса унчченхи режимпа ӗҫлеме тавӑрмалла-и? Йӑлтах ҫитес эрнере мӗн чухлӗ чирлисем пулнинчен килӗ.
Халӗ республикӑра 10 ковид-госпиталь ӗҫлет. Вӗсенче пӗтӗмпе 1195 койка пур. Сипленекенсем вара 1 пинрен сахалрах.
Ӗнер Ҫӗнӗ Шупашкарта 11 ҫулти арҫын ача 25-мӗш хутран сикни пирки пӗлтернӗччӗ. Вӑл Газель ҫине ӳкнӗ, чӗрех юлнӑ. Ӑна Республикӑри ача-пӑча клиника пульницине илсе кайнӑ.
Арҫын ача халӗ хӑйне мӗнле туять-ха? ЧР Сывлӑх сыхлавӗн министерстви пӗлтернӗ тӑрӑх, ҫав кунах ӑна операци тунӑ. Халӗ тухтӑрсем унӑн сывлӑхӗ йывӑртарах теҫҫӗ, вӑл реанимацире выртать, унӑн ӳт температури хӑпарать. Ача хӑй тӑна кӗнӗ. Тухтӑрсем унӑн пурнӑҫӗшӗн кӗрешеҫҫӗ.
Чӑваш Енри пульницӑсем валли машинӑсем туянасшӑн. Пӗтӗмпе – 24 автомобиль. Ҫавна май аукцион ирттереҫҫӗ. Килӗшӗвӗн малтанхи хакӗ – 16 миллион тенкӗ те 248 пин тенкӗ.
Машинӑра хыҫалта виҫӗ ҫын вырнаҫмалӑх, механика курупкаллӑ пулмалла. Условисенчен пӗри ҫакӑ.
Виҫӗ машинӑна Шупашкар районӗн пульницине парӗҫ. Патӑрьел тата Муркаш районӗсен пульницине икшер машина тивӗҫӗ. Улатӑр, Элӗк, Вӑрнар, Йӗпреҫ, Канаш, Куславкка, Комсомольски, Хӗрлӗ Чутай, Сӗнтӗрвӑрри, Вӑрмар, Ҫӗрпӳ, Шӑмӑршӑ, Етӗрне, Тӑвай тата Елчӗк районӗсен пульницисене, Шупашкарти васкавлӑ медпулӑшу пульницине, Ҫӗмӗрлери территорисен хушшинчи медицина центрне пӗрер машина лекӗ.
Ӗнер Чӑваш Ен Элтеперӗ Олег Николаев Н.И. Турнер ячӗллӗ ача-пӑча травматологийӗпе ортопеди наци медицина тӗпчев центрӗн директорӗпе Сергей Виссарионовпа тӗл пулнӑ.
Асӑннӑ тӗпчев центрӗ ҫурӑм шӑмми пӑсӑлнипе ҫуралакансене пулӑшать. Чӑваш Ен медцентрӑн ҫӗнӗлӗхӗсене пурнӑҫлассипе никӗс регион евӗр ӗҫлӗ.
«Технологи центрӗн специалисчӗсем хатӗрленӗ технологи пекки тӗнчере те ҫук. Вӑл ҫурӑм шӑмми авӑннине сӑнаса пыма май парать. Кирлӗ пулсан ҫийӗнчехх операци тума май парать», – тенӗ Сергей Виссарионов.
Г.И. Турнер ячӗллӗ центр Федерацин травматологи, ортопеди тата эндопротезировани центрӗпе килӗштерсе ӗҫлесшӗн. Унти специалистсем пысӑк пӗлӳллӗ.
Туберкулёзпа кӗрешекен диспансера «Республикӑн судпа медицина экспертизи» хысна учрежденине парӗҫ. Документа паян Чӑваш Ен влаҫ органӗсен официаллӑ порталӗнче пичетленнӗ.
Ӗҫлӗ хутра асӑннӑ диспансер 680,9 тӑваткал метр йышӑнать. Вӑл Ҫӗнӗ Шупашкарти Селикат урамӗнче 6-мӗш ҫуртра вырнаҫнӑ. Асӑннӑ ҫурт патшалӑх харпӑрлӑхӗ шутланать. Унпа Чӑваш Ен Сывлӑх сыхлав министерствин Туберкулёзпа кӗрешекен республика диспансерӗ» хысна учежденийӗ хуҫаланнӑ. Судпа медицина экспертизине ҫурта 2023 ҫулхи раштав уйӑхӗн 31-мӗшӗччен парӗҫ.
81 ҫулти хӗрарӑма, кӑшӑлвируспа чирленӗскере, тухтӑрсем леш тӗнчерен кӑларнӑ. Унӑн вӑраха кайнӑ чирсем пулнӑ, ку лару-тӑрӑва тата ҫивӗчлетнӗ.
Ватӑскер Хулари клиника центрӗнче сипленнӗ. Вӑл унта вӑрах выртнӑ. Сывлӑхӗ тӑрук япӑхланнӑран ӑна ИВЛ аппарачӗпе сывлаттарнӑ. Унӑн ӳпки вырӑнне аппарат ӗҫленӗ. Анчах ватӑ ҫынсене кун хыҫҫӑн хӑй тӗллӗн сывлаттарма йывӑр.
Пульница пресс-служби пӗлтернӗ тӑрӑх, ҫынна сывлӑхӗ йывӑр чухне аппаратпа сывлаттарма тытӑнсан темиҫе кунран мышцӑсем хавшаҫҫӗ, кайран вӗсене ӗҫлеттерсе яма ҫӑмӑл мар.
Хӗрарӑмӑн сывлӑхӗ лайӑхлансан ӑна стационара куҫарнӑ. Пульницӑран вӑл 26 кунран тухнӑ. Халӗ ӑна вырӑнти тухтӑрсем сӑнаса тӑраҫҫӗ.
Мускавра Чӑваш Енре ҫуралса ӳснӗ хӗрарӑм виҫӗ ачине хӗл варринче вӑрмана илсе кайса хывӑнтарни пирки пӗлтернӗччӗ. Ачасем ун хыҫҫӑн пульницӑна лекнӗ. Вӗсен сывлӑхӗ халӗ хӑрушлӑхра мар. Амӑшне те пульницӑна вырнаҫтарнӑ, вӑл психика тӗлӗшӗнчен сыввипе сывӑ маррине тӗрӗслӗҫ.
Ачасем кӗҫех Чӑваш Ене килмелле. Вӗсене хӗрарӑмӑн тӑванӗ опекӑна илнӗ. Шӑпӑрлансем ача ҫуртне ан лекчӗр тесе документсене хӑвӑрт хатӗрленӗ.
Малтанах аслин тата вӑтам ачан сывлӑхӗ хӑрушлӑхра пулнӑ. Вӑтамми искусственнӑй аппаратпа сывланӑ. Телее, халӗ йӗркеллех.
Чӑваш Ене кӑшӑлвирусран вакцинӑн черетлӗ партийӗ килсе ҫитнӗ. Ӑна «Фармаци» патшалӑхӑн унитарлӑ предприятине кӳрсе килнӗ.
«Гам-КОВИД-Вак» (сутлӑхри унӑн марки — «Спутник-V») вакцинӑна Чӑваш Ене пурӗ 4100 доза илсе ҫитернӗ.
Вакцинӑна яталӑ условире упрамаллине кура ӑна вӑрах тӑхтамасӑр медицина организацийӗсене тата вакцинаци пукнчӗсене валеҫсе парӗҫ. Аса илтерер: хальхи вӑхӑтра пирӗн республикӑра вакцинацин 41 пункчӗ ӗҫлет.
Привикӑна икӗ хутчен пурнӑҫламалла. Иккӗмӗш укола 21 кунтан тепре тумалла.
Нарӑсӑн 11-мӗшӗнчи каҫхине 33-ри хӗрарӑм Ҫӗнӗ Мускавра хӑйӗн виҫӗ ачине вӑрмана илсе кайса янине Чӑваш халӑх сайчӗ пӗлтернӗччӗ. Аса илтерер: амӑшӗ тӗпренчӗкӗсене вӗлересшӗн пулнӑ тесе шухӑшлаҫҫӗ, мӗншӗн тесен шартлама сивӗре вӑл вӗсене салтӑнтарса вӑрманта пӑрахса хӑварнӑ. Ҫакна куракан ҫын йӗрке хуралҫисене систернӗ. Ачасене тӑм илнӗ.
Хӗрарӑм тӗлӗшпе пуҫиле ӗҫ пуҫарнӑ. Сывлӑхне тӗрӗслеме ӑна хӑйне те пульницӑна ӑсатнӑ.
Пӑтӑрмах пирки халӗ ҫакӑ паллӑ. Вӑрмана хӗрарӑм «Лада» машинӑпа кайнӑ. Вӑл Мускав облаҫӗнчи уйрӑм ҫуртра пурӑннӑ. Унӑн ачисен ашшӗ паллӑ телеканалсенчен пӗринче телеертӳҫӗре ӗҫлет, вӑл хӑй ювелир-мӗн. Хӗрарӑм психика чирӗпе аптӑрать тесе шухӑшлаҫҫӗ. Вӑл Чӑваш Енрен тени тӳрре килнӗ.
+17.3 °C