Ҫӗмӗрлери «Проект-техника» корпораци «Арктика», «Ҫӗпӗр» тата «Урал» проектсенче усӑ куракан атом пӑр ҫӗмренӗсем валли трансформаторсем кӑларать. Ҫавӑн пирки Чӑваш Ен вице-премьерӗ – экономика аталанӑвӗн тата пурлӑх хутшӑнӑвӗсен министрӗ Дмитрий Краснов «Контактра» социаллӑ сетьри хӑйӗн страницинче пӗлтернӗ.
Пӑр ҫӗмренсем валли трансформатор кӑларасси ҫинчен корпораци нумаях пулмасть ятарлӑ килӗшӳ тунӑ. Министр ҫав хыпара хавхаланса пӗлтернӗ май пирӗн республикӑри предприятисем карапсем тӑвакансен тӗнчери шайне тухнине палӑртнӑ.
Ӗнер Чӑваш Ене Раҫҫей премьер-министрӗ Михаил Мишустин килсе кайрӗ. Пӗччен мар. Унпа пӗрле Раҫҫей министрӗсем те пулнӑ. Мускавран килнӗ тӳре-шара Шупашкарта икӗ ҫӗре: Чапаев ячӗллӗ савута тата «Текстильмаш» предприятие – ҫитсе курнӑ.
«Правда ПФО» тӗнче тетелӗнчи хаҫатра ҫырнӑ тӑрӑх, Мишустин премьер-министр предприятисенче вӑрах тӑман. Протокол тӑрӑх, Чапаев ячӗллӗ савутра ун коллективпа калаҫмалла пулнӑ. Цехри «Ахаль рабочисем» тесе суйланисем рабочисем пулни иккӗленӳллӗ. Вӗсем унччен республикӑн Информаци политикин министерствинче, Стройминӗнче тата ытти ведомствӑра ӗҫленӗ-мӗн. Вӗсем савутра тӑрӑшаҫҫӗ-ха. Анчах рабочи пулса тар тӑкни иккӗленӳллӗ. Андрей Иванов журналист, сӑмахран, министр ҫумӗ пулса тӑрӑшнӑ Сергей Безрукова та «рабочисен йышӗнче» курнӑ.
Шупашкарта ку пӑтӑрмах ҫулталӑк каяллах, пӗлтӗрхи авӑн уйӑхӗн 17-мӗшӗнче, пулнӑ. Администраци ҫурчӗсенчен пӗрне юсанӑ чухне пӗр рабочи ҫивитти ҫинчен персе аннӑ. Йывӑр суранланнӑскер инкек вырӑнӗнчех кӑштахран вилсе кайнӑ.
Пӑтӑрмах хыҫҫӑн РФ Пуҫиле кодексӗн 216-мӗш статйин 2-мӗш пайӗпе пуҫиле ӗҫ пуҫарнӑ. Ку статьяпа строительство ӗҫӗсене пурнӑҫланӑ чух асӑрханманни ҫын вилнипе вӗҫленсен айӑплаҫҫӗ. Тӗпчевҫӗсем строительство ӗҫсене пурнӑҫлакан организацин 43 ҫулти пуҫлӑхӗ тӗлӗшпе ӗҫ пуҫарнӑ.
Пуҫлӑх ӗҫ сыхлавӗн парвилисене пӑснӑ тесе шухӑшлаҫҫӗ. Рабочие вӑл ӗҫ хӑрушсӑрлӑхӗн правилисемпе паллаштарман ҫеҫ мар, ӳкесрен хӳтӗленмелли ятарлӑ хатӗрсӗр тата тӗпӗ шуҫтарман пушмаксӑр хӑпартса янӑ.
Шупашкарти «Ҫеҫпӗл» савут «Союз-5» ракета-носитель валли оборудовани кӑларӗ. Ҫакӑн пирки авӑн уйӑхӗн 2-мӗшӗнче Чӑваш Республикине «Роскосмос» патшалӑх корпорацийӗн генкюеральнӑй директорӗ Дмитрий Рогозин килсен калаҫса татӑлнӑ. Ырӑ хыпара корпорацин пресс-служби пӗлтернӗ.
Шупашкарти «Ҫеҫпӗл» заводра пулнӑ чух Дмитрий Рогозин асӑннӑ предприятин хӑватне пысӑка хурса хакланӑ. Ҫавна май енсем савут «Союз-5» ракета-носитель валли оборудовани кӑларма тытӑнассине тишкернӗ, ӗҫе пуҫӑнма май пуррине палӑртнӑ.
Паян, ҫурла уйӑхӗн 31-мӗшӗнче, «Фармаци» патшалӑхӑн унитарлӑ предприятин пуҫлӑхне Ольга Казаринӑна ӗҫрен кӑларнӑ. Хушӑва республикӑн Элтеперӗн тивӗҫӗсене вӑхӑтлӑх пурнӑҫлакан Олег Николаев алӑ пуснӑ.
Ольга Казарина предприяти пуҫлӑхӗнче 2017 ҫулхи раштав уйӑхӗн 28-мӗшӗнченпе ӗҫленӗ. Асӑннӑ предприятире унччен вӑл 2005-2007 ҫулсенче бухгалтерта ӗҫленӗ. «Фармаци» предприяти пуҫлӑхне лариччен республикӑн юстици министрӗн ҫумӗ пулса тӑрӑшнӑ.
Ольга Казарина 1980 ҫулта Шупашкарта ҫуралнӑ. Мускаври технологи тата управлени университетӗнче бухгалтер пулма вӗреннӗ. Акӑлчан чӗлхи вӗрентекенӗн дипломӗ те пур унӑн.
Сӑмах май каласан, «Фармаци» предприятие чылай ҫул Валерий Филимонов ертсе пынӑ. Ӑна чӑваш парламенчӗн ертӳҫине лартнӑ хыҫҫӑн предприятире пуҫлӑхсем улшӑнкаланӑ. Унта пӗр вӑхӑт Дмитрий Матвеев та тилхепене тытса пынӑ.
Паян, ҫурла уйӑхӗн 27-мӗшӗнче, Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев «ВНИИР» акционерсен уҫӑ обществинче пулнӑ. Вӑл электротехника оборудованийӗн производствипе паллашнӑ, электроэнергетика тытӑмӗсене йӗркелекен центра пӑхса ҫаврӑннӑ.
Отрасле кадрсемпе тивӗҫтерес ыйтӑва та сӳтсе явнӑ. Олег Николаев уйрӑм предприятисем валли специалистсене тӗллевлӗн вӗрентсе кӑларас тӗллев лартнине пӗлтернӗ. Унсӑр пуҫне аслӑ шкулсенче хысна вырӑнӗсен шутне ӳстересшӗн.
«ВНИИР» предприятин пуҫлӑхӗ Павел Литвиненко хӑйсен ӗҫӗпе паллаштарнӑ. Мӑнаҫланмалӑх, чӑн та, пур. Предприятире туса кӑларакан цифра комплексӗсене энергетикӑн тӗрлӗ объекчӗнче усӑ кураҫҫӗ.
Шупашкарти «АККОНД» акционерсен обществи паян хӑйӗн черетлӗ ҫуралнӑ кунне паллӑ тунӑ. Унта халӗ ҫӗнӗ лини хута янӑ. Ҫавӑн валли 149 миллион тенкӗ укҫа хывнӑ. Предприятире республика Элтеперӗн тивӗҫӗсене вӑхӑтлӑх пурнӑҫлакан Олег Николаев пулнӑ.
Предприяти пуҫлӑхӗ Валерий Иванов экономика кӑтартӑвӗсем ҫулталӑкра 10-15 процент ӳснине ӗнентернӗ. Цехсене юсаса ҫӗнетес ӗҫе пӗрмай туса ирттернине пӗлтернӗ.
Сахӑр печенийӗ кӑларакан ҫӗнӗ лини ҫулталӑкра 3 пин ытла тонна продукци кӑларма май парӗ.
Ҫитес ҫулсенче предприяти тата тепӗр инвестици проекчӗ хута яма ӗмӗтленет. Унӑн хакӗ – 2 млрд тенке яхӑн. Палӑртнине пурнӑҫласан 500 ҫынлӑх ӗҫ вырӑнӗ пулӗ.
Ҫак кунсенче Чӑваш Енри тӳре-шара хӑйсен ведомствине пӑхӑнакан организацисене, районсемпе хуласене ҫине тӑрсах тухса ҫӳрерӗҫ. Республикӑн Строительство, архитектура тата ҫурт-йӗрпе коммуналлӑ хуҫалӑх министерстви те ҫак ӗҫрен пӑрӑнман.
Вырӑна тухса ҫӳренӗ май вырӑнтисем тӗрлӗ кӑлтӑк, татса памалли ыйтусем пирки час-часах сӑмах хускатнӑ. Ҫавсене тишкерме ӗнер Стройминра канашлӑва пуҫтарӑннӑ. Шупашкар районӗнче, тӗслӗхрен, ӑшӑпа тивӗҫтерес тытӑма тӗпрен юсаса ҫӗнетмелле. Унти тӳре-шара болкпа модульлӗ котельнӑйсем тӑвас ӗмӗтлине ӗнтернӗ-ха. Александр Героев министр ҫак енӗпе «Чӑвашгаз» патшалӑхӑн унитарлӑ предприятийӗн те хастар пулмаллине палӑртса хӑварнӑ. Унӑн проект тӑвас ӗҫе хутшӑнмалла.
Ҫӗмӗрлери «Проектэлектротехника» предприяти вунӑ ҫул ӗнтӗ хӑйӗн трансформаторӗсене ҫӗршывӗпех сутать, чикӗ леш енне те ӑсатать.
Ҫӗмӗрле – калӑпӑшӗпе Чӑваш Енри пиллӗкмӗш хула. Унта 28 пин ҫын пурӑнать, вӗсенчен 1,5 пине яхӑн ҫын «Проект-техника» корпорацинче тӑрӑшать. Асӑннӑ корпораци – машина тӑвакан Раҫҫейри чи пысӑк компанисенчен пӗри. Корпорацие 1988 ҫулта Мускавра йӗркеленӗ, 1993 ҫулта ун йышне ытти предприятипе пӗрле Ҫӗмӗрлери спецавтомобильсен савучӗ кӗнӗ. Вӑл вара 1929 ҫултанпа ӗҫлекенскерех.
Унта хальхи вӑхӑтра виҫӗ фазӑллӑ трансформаторсем туса кӑлараҫҫӗ. Продукци тӗнчери 21 ҫӗршыва ӑсанать. Предприятире кунсерен икшер трансформатор пухса хатӗрлеҫҫӗ, ҫулталӑкра – 400-е яхӑн.
Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев республикӑри строительсене «Чӑваш Республикин тава тивӗҫлӗ строителӗ» ят пама йышӑннӑ. Списокра — 16 ҫын. Вӗсен хушшинче предприяти ертӳҫисемпе инженерсем те, малярпа штукатур та пур.
Акӑ, Шупашкарти 28-мӗш строительство управленийӗнче тӑрӑшакан Светлана Шагаева маляр, Шупашкарти 44-мӗш строительство управленийӗнчи Юрий Пашков каменщик, Ҫӗмӗрлери 3-мӗш стройтрестӑн 8-мӗш управленийӗнче ӗҫлекен Елена Никитина штукатур, Шупашкрати «Промвентиляци» предприятири санитарипе техника тытӑмӗсен тата оборудованисен монтажникӗ Анатолий Васильев, асӑннӑ предприятири Александр Ефимов механик; унсӑр пуҫне предприятисен тӗп инженерӗсем, ертӳҫисем пур.
+9.3 °C