Шупашкарти 19 ҫулти каччӑ канмалли кунӗнче ҫӑмӑлттай хӗре чӗнсе киленес тенӗ те укҫасӑр тӑрса юлнӑ. Вӑл кун пирки полицие пӗлтернӗ.
Хайхискер пӗлтерӳре телефон номерӗ тупнӑ та шӑнкӑравланӑ. Унпа ҫепӗҫ саслӑ хӗрарӑм калаҫнӑ. Ку «пулӑшу» мӗн хак тӑнине пӗлтернӗ. Каччӑ укҫана куҫарса панӑ.
Кайран ун патне каллех шӑнкӑравланӑ, страховкӑшӑн 10 пин ыйтнӑ. Ку каллех куҫарнӑ. Анчах ҫак та ҫителӗклӗ мар иккен – тепӗр темиҫе пин куҫарма ыйтнӑ. Каччӑн хӑйӗн укҫи пулман: микрозайм тата тусӗсенчен кивҫен илнӗ.
Хӑратса шӑнкӑравлама тытӑнсан тин каччӑ кун пирки полицие пӗлтернӗ.
Ҫӗртме уйӑхӗн 18-мӗшӗнче 17 сехет те 10 минутра ҫӑлав службине васкавлӑ хыпар ҫитнӗ: Ҫӗнӗ Шупашкарти чиркӗве арҫын кӗнӗ те хӑйӗн ҫумӗнче бомба пурри пирки пӗлтернӗ.
Ҫӑлавҫӑсем Интернационалист-салтаксен урамӗнче вырнаҫнӑ чиркӗве хӑвӑртах ҫитнӗ. Арҫын ҫумӗнче нимӗнле бомба та тупман.
Чӑваш Республикинчи ҫӑлавпа шырав служби хыпарланӑ тӑрӑх, ҫав арҫынна полици машинине лартса унпа психологи калаҫӑвӗ ирттернӗ.
Шупашкарта пурӑнакан 56 ҫулти хӗрарӑм велосипед вӑррине тытса чарнӑ. Кун пирки вӑл полицие пӗлтернӗ.
Ӗҫ-пуҫ ҫапла пулса иртнӗ. Ҫӗрле 69 ҫулти арҫын Кӑнтӑр поселокне велосипедпа кайма шутланӑ. Анчах унӑн икӗ кустӑрмаллӑ транспорт пулман. Ӑна вӑл вӑрлама шутланӑ.
Хайхискер пӗр ҫурт картишне кӗнӗ те велосипеда илсе тухса кайнӑ. Анчах вӑл электричествӑпа ӗҫлекенни пулнӑ, Кӑнтӑр поселокне ҫитиччен заряд пӗтнӗ. Арҫын ӑна ҫул ҫинчех пӑрахса хӑварнӑ та ҫав хуҫалӑхах кӗрсе тепӗр велосипед вӑрлама тӑнӑ. Ҫавӑн чухне тытса чарнӑ та ӑна 56-ри хӗрарӑм.
Арҫын тӗлӗшпе пуҫиле ӗҫ пуҫарнӑ.
Ҫӗртме уйӑхӗн 16-мӗшӗнче 16 сехет те 40 минутра Шупашкарти «Ҫӗнӗ хула» микрорайонта пурӑнакан 36-ри хӗрарӑм 6 ҫулти ывӑлӗ ҫухални пирки полицие пӗлтернӗ. Пӗчӗкскер аслисенчен ирӗк ыйтмасӑр урама тухнӑ та самокатпа ярӑннӑ. Хайхискер «Вятка» ҫулпа пынӑ та пынӑ… Ача ҫур сехет ҫапла ярӑннӑ. Ӑна ҪҪХПИ ӗҫченӗсем асӑрханӑ. Ҫав вӑхӑт тӗлне амӑшӗ сехӗрленсе ӳкнӗ ӗнтӗ, ӑна шыранӑ.
Арҫын ачана Ҫӗнӗ Шупашкара кӗнӗ ҫӗрти постра тӑракан Андрей Ильин асӑрханӑ. Полицейскисем ачана поста илсе килсе чей ӗҫтернӗ, мультик ярса панӑ.
Микрорайонтан спутник хулана ҫитиччен пӗр водитель те чарӑнса ача пӗччен ӑҫта кайни пирки кӑсӑкланман.
Ҫӗртме уйӑхӗн 14-мӗшӗнче Шупашкарта пурӑнакан 60 ҫулти хӗрарӑм полицие пынӑ. Унӑн 13 ҫулти мӑнукӗ ултавҫӑсен тӗлне лекнӗ.
Хӗрарӑм каласа кӑтартнӑ тӑрӑх, хӗрача патне 50 пин тенкӗ выляса илни пирки хыпар килнӗ. Вӑл ҫакна ӗненнӗ. Лешсем янтӑ нухрата илес тесен кӑштах укҫа куҫармаллине каланӑ, ӑна тавӑрса пама шантарнӑ.
Хӗрача асламӑшӗн /е кукамӑшӗн/ харпӑр кабинетне кӗрсе палламан ҫынсем каланӑ счет ҫине 30 пин тенкӗ куҫарнӑ. Хӗрарӑм кун пирки пӗлсен ҫав ҫынсем ултавҫӑсем пулнине ӑнлантарнӑ.
Кун тӗлӗшпе пуҫиле ӗҫ пуҫарнӑ
Ҫу уйӑхӗн 30-мӗшӗнче 33 ҫулти хӗрарӑм Шупашкарти Мир проспекчӗпе утса пынӑ. Ӑнсӑртран ӑна такам пуҫӗнчен ҫапнӑ та сумкине вӑрласа тарнӑ. Хайхискер ҫаврӑнса пӑхсан таракан арҫынна курса юлнӑ.
Хӗрарӑм кун пирки полицие пӗлтернӗ. Пакунлисем вӑрра хӑвӑртах тытса чарнӑ. Вӑрланӑ япаласене, документсене унӑн хваттерӗнче тупнӑ.
Ҫав ҫын - Шупашкарта пурӑнакан 41 ҫулти арҫын, унччен судпа айӑпланнӑскер. Вӑл ӑнлантарнӑ тӑрӑх, урамра утакан ӳсӗр хӗрарӑма курсан унӑн тӑрук вӑрлас шухӑш ҫуралнӑ. Ҫав вӑхӑтра хӑй те урӑ пулман. Ун тӗлӗшпе пуҫиле ӗҫ пуҫарнӑ.
Кӑҫал нарӑс уйӑхӗн 12-мӗшӗнче ҫӗрле Шупашкарти пӗр каҫхи клуб умӗнче 33 ҫулти арҫын ӑна шала кӗртменнипе харкашма пуҫланӑ. Клуб ӗҫченӗсем полицие шӑнкӑравласа пӗлтернӗ.
Пакунлисем вырӑна ҫитсен хайхи арҫынна лӑпланма ыйтнӑ. Лешӗ пушшех те урса кайнӑ - полицейские питӗнчен чӑмӑрӗпе ҫапнӑ.
Арҫын тӗлӗшпе пуҫиле ӗҫ пуҫарнӑ. Суд пулнӑ. Ӑна ҫирӗп режимлӑ колоние 1 ҫул та 4 уйӑхлӑха яма йышӑннӑ.
Ют ҫӗршывран килнӗ икӗ ҫын Шупашкарта наркотик сутма тӑнӑшӑн суд сакки ҫине ларнӑ.
Следстви палӑртнӑ тӑрӑх, вӗсем мессенджер урлӑ следстви хальлӗхе палӑртман ҫынпа наркотик сутасси пирки калаҫса татӑлнӑ. Ӑна хӑйсем те тутанма палӑртнӑ. Лешӗн курттӑмӑн кӳрсе килмелле, кусен хутаҫсене пайласа вӑрттӑн вырӑнсене хумалла пулнӑ.
Ют ҫӗршыв ҫыннисем 118 грамм наркотик илнӗ. Пӗр пайне хутаҫсене пайласа чикнӗ. Анчах ӑна сутайман, пӗлтӗр юпа уйӑхӗнче вӗсене вӑрттӑн вырӑна хума тытӑннӑ чухне полицейскисем тытса чарнӑ.
Шупашкарта ултавҫӑсем ҫӳреҫҫӗ. Кун пирки тӳре-шара халӑха асӑрхаттарать.
Хваттерсем тӑрӑх ҫынсем ҫӳреҫҫӗ, вентиляци тӗрӗслеҫҫӗ имӗш. Кайран куншӑн укҫа ыйтаҫҫӗ. Анчах ун пек ҫынсене укҫа памалла кӑна мар, хваттере те кӗртмелле мар.
Астӑвӑр: венитляцие управляющи компанийӗ тӗрӗслет. Кун пирки маларах пӗлтереҫҫӗ: мессенджерта е подьезд умӗнчи пӗлтерӳ хӑми ҫинче. Ку - тӳлевсӗр.
Вентиляци тӗрӗслеме килнӗ ултавҫӑсем пирки полицие шӑнкӑравласа каламалла.
Ҫу уйӑхӗн 27-мӗшӗнче ҫӗрле Ҫӗнӗ Шупашкарта полицейскисем ача-пӑча велосипедне йӑтса утакан арҫынна курнӑ та ун патне пырса ыйту панӑ. Велосипедпа ӑҫта каять вӑл? Лешӗ нимех те хуавлайман.
Кайран ҫакӑ паллӑ пулнӑ. 36 ҫулти арҫын ӑна Винокуров урамӗнчи ҫуртри подьездран вӑрланӑ иккен. Тӑванӗсем патне хӑнана килнӗ те эрех ӗҫес килсе кайнӑ. Подьездра велосипед курсан ӑна йӑтса тухнӑ. Хайхискер икӗ кустӑрмаллӑ транспорта сутса эрех туянма шутланӑ иккен.
Велосипед хуҫи тепӗр кунхине полицие пынӑ. Транспорта тавӑрса панӑ, арҫыннӑн вара явап тытма тивӗ.
-1.7 °C