Тӑватӑ ачине пӗчченех ӳстерекен амӑшӗ тӗнче тетелӗнче паллашнӑ савнине пула 2,7 миллион тенкӗ ҫухатнӑ. Тӗрӗсрех каласан, вӑл ӑна арҫынна куҫарса панӑ.
Пӗр районта пурӑнакан 45 ҫулти хӗрарӑм полицие каласа кӑтартнӑ тӑрӑх, пӗлтӗр ҫулла вӑл тӗнче тетелӗнче «ҫар тухтӑрӗпе» ҫырӑннӑ. Лешӗ пӗр патшалӑхра ҫар службинче тӑрать-мӗн.
Кӑштахран «савни» хӗрарӑма «хаклӑ груз» илме ыйтнӑ. Кайран вӑл ун патне хӑйех килӗ, нумай ача амӑшне те качча илӗ – ҫапла шантарнӑ «ҫар тухтӑрӗ». Арҫын тӑкака саплаштарассине ӗнентернӗ.
Хайхи хӗрарӑм тӗрлӗ счет ҫине 2,7 миллион тенкӗ куҫарнӑ. Кайран каллех укҫа куҫарма ыйтсан тин вӑл ултавҫӑ аллине ҫакланнине ӑнланнӑ. Кун тӗлӗшпе пуҫиле ӗҫ пуҫарнӑ.
Пуш уйӑхӗн 3-мӗшӗнче Шупашкарти ҫурҫӗр-хӗвеланӑҫ районӗнче нумай хутлӑ ҫурт ҫывӑхӗнче арҫын виллине тупнӑ Кун пирки "Про Город" хаҫата халӑх корреспонденчӗ Юрий Шакеев пӗлтернӗ.
Арҫын виллине 15 сехет ҫурӑра асӑрханӑ. Вӑл Гузовский урамӗнчи 14-мӗш ҫуртри тӑваттӑмӗш хутри балкон ҫинчен ӳкнӗ. Вырӑна полици ӗҫченӗсем, васкавлӑ медпулӑшу бригади ҫитнӗ.
Мӗн пулнӑ-ха? Следстви комитечӗ халӗ ӗҫ-пуҫа уҫӑмлатать.
Нарӑс уйӑхӗн 21-мӗшӗнче Шупашкарта 23 ҫулти хӗр полицие пырса ҫухалнӑ банк карточки ҫинчен укҫа пӗтме тытӑнни пирки каласа кӑтартнӑ. Счет ҫинчен 8 пин тенке яхӑн пӗтнӗ.
Йӗрке хуралҫисем ют ҫын укҫипе усӑ курма пултарнӑ ҫынсен йӗрӗ ҫине ӳкнӗ. Вӗсем 14 суту-илӳ вырӑнӗнче карточкӑпа тӳленӗ. Ватӑрах арҫынпа хӗрарӑмӑн сӑнӗсем видеокамера ҫине лекнӗ.
Сӑнӳкерчӗк ҫинчи ҫынсене палласа илтӗр-тӗк ҫак номерсемпе шӑнкӑравлама ыйтаҫҫӗ: 89003320737, 89279979010 е 102.
Шупашкар районӗнче пурӑнакан 16 ҫулти каччӑ тивӗҫлӗ канури хӗрарӑмӑн укҫине илнӗ. Вӑл ӑна ҫуртне юсаса пама шантарнӑ. Анчах сӑмахне тытман. Ватӑ хӗрарӑмӑн полицие кайма тивнӗ.
74 ҫулти хӗрарӑм каласа кӑтартнӑ тӑрӑх, пӗлтӗрхи ҫурла уйӑхӗнче вӑл дачӑра строительство ӗҫӗсене пурнӑҫлама пулӑшни пирки хыпарланӑ пӗлтерӗве курнӑ. Унти номерпе шӑнкӑравланӑ, каччӑпа карта улӑштармалли пирки калаҫса татӑлнӑ. Лешӗ ӗҫе пурнӑҫланӑ. Кайран вӑл ӑна ҫурта тулаш енчен ҫапма, тӑррине витме хушнӑ. Стройматериалсем туянма тесе каччӑна 135 пин тенкӗ панӑ. Анчах ӗҫе ниепле те пуҫӑнман, вӑл укҫана тавӑрса пама ыйтнӑ.
Каччӑ укҫине хӑйех хуратӑп тесе кинемейрен банк карттине, унӑн пин-кодне ыйтнӑ. Лешӗ килӗшнӗ. Карттӑ ҫинче укҫа пулман. Анчах блокировка пулнӑ. Каччӑ ӑна илме темиҫе хутчен укҫа ыйтнӑ. Кинемей тепӗр 145 пин куҫарса панӑ. Каччӑ укҫана тавӑрмассине вӑл темиҫе уйӑхран тин ӑнланнӑ. Полицейскисем 16-ри каччӑна часах шыраса тупнӑ. Вӑл ӑнлантарнӑ тӑрӑх, ӗҫе ҫуркунне пуҫӑнма шутланӑ, укҫине хӑй пӗлнӗ пек тӑкакласа пӗтернӗ.
Шупашкарта пурӑнакан арҫын укҫа хывса пуяс тенӗ те темӗн чухлех парӑма кӗрсе кайнӑ. Халӗ унӑн банка, пӗлӗшӗсене укҫа парса татмалла.
Йӑлтах халӑх тетелӗнче укҫа хӑвӑрт ӗҫлесе илмелли пирки хыпарланӑ пӗлтерӗве курнинчен пуҫланнӑ. Вӑл унта хӑйӗн номерне хӑварнӑ. Часах унпа суя брокерсем ҫыхӑннӑ.
Арҫын вӗсем каланипе биржа патне кӗме май пултӑр тесе телефонӗ ҫине сарӑм вырнаҫтарнӑ, счечӗ ҫине 15 пин тенкӗ хунӑ. Кун хыҫҫӑн ӑна пысӑкрах укҫапа выляма сӗннӗ. Арҫын банкран кредит илнӗ, пӗлӗшӗсенчен укҫа ыйтнӑ. Ҫапла вӑл ултавҫӑсене 2 миллион та 960 пин тенкӗ куҫарса панӑ.
Анчах арҫын укҫа-тенке каялла тавӑрайман. Ултавҫӑсен аллине лекнине ӑнлансан вӑл полицие кайса пулӑшу ыйтнӑ. Кун тӗлӗшпе йӗрке хуралҫисем пуҫиле ӗҫ пуҫарнӑ.
Шупашкрати Павлов мичман урамӗнчи 62-мӗш ҫуртра лифтсем ӗҫлеме пӑрахнӑ. Йӑлтах вӑрӑсене пула.
Такамсем 2-мӗш, 3-мӗш тата 4-мӗш подъездри лифтсен пайӗсене вӑрласа кайнӑ. Вӗсем вара йӳнӗ тӑмаҫҫӗ. Ҫавна май лифтсем хӑҫан ӗҫлесе каясси паллӑ мар-ха. Палӑртмалла: ҫуртра пӗтӗмпе тӑватӑ подъезд.
Йӗрке хуралҫисем кун тӗлӗшпе следстви умӗнхи тӗрӗслев ирттереҫҫӗ. Вӗсем палламан ҫынсене, хӑйсене урӑхла тытакансене, курсан кун пирки полицие пӗлтерме ыйтаҫҫӗ.
Ватӑ хӗрарӑм хӗрне ҫӑлас тесе ултавҫӑсене чутах 700 пин куҫарса паман. Ку Шупашкарта пулса иртнӗ.
75 ҫулти хӗрарӑм каласа кӑтартнӑ тӑрӑх, нарӑсӑн 4-мӗшӗнче килти телефонӗ ҫине хӗрӗ шӑнкӑравланӑ имӗш, ҫул ҫинче аварие лекни пирки, ыйтӑва татса пама 700 пин кирли ҫинчен каланӑ.
Хӗрарӑм хӗрне пулӑшас тесе банка кайнӑ, укҫине илнӗ те ӑна куҫарса пама тӑнӑ. Анчах ун патне хӗрӗ шӑнкӑравланӑ – унпа нимӗн те пулса иртмен иккен. Кун хыҫҫӑн ватӑскер укҫана каялла счет ҫине хунӑ та кун пирки полицие пӗлтернӗ.
71 ҫулти хӗрарӑм вара ултавҫӑсен аллине лекнӗ. Хӗрне ҫӑлас тесе вӑл палламан арҫынна хӗрӗн япалисене, пухнӑ пӗтӗм укҫине – 500 тенке – парса янӑ.
Кӑрлачӑ уйӑхӗн 26-мӗшӗнче Шупашкарти Байдул урамӗнче пурӑнакан арҫын машинӑна ӑшӑтма тухнӑ та – вӑл ҫук. Вӑл кун пирки полицие пӗлтернӗ.
Оперативниксем машинӑна часах тупнӑ. Вӑл унччен ларнӑ вырӑнтан инҫех мар пулнӑ. Анчах хуҫи суя шӑнкӑравшӑн айӑплӑ пулман – машинӑна чӑнах та тапратса кайнӑ, кайран вара каялла килсе лартнӑ.
Ҫакӑ паллӑ: кузовлӑ транспортера 27 ҫулти каччӑ тапратса тарнӑ. Вӑл унпа хӗр тусне ярӑнтарма шутланӑ-мӗн. Ун тӗлӗшпе пуҫиле ӗҫ пуҫарнӑ.
Кӑрлач уйӑхӗн 30-мӗшӗнче 49 ҫулти хӗрарӑм полицие пырса пулӑшу ыйтнӑ. Вӑл вилнӗ упӑшкин хваттерӗнчен 18 пин тенкӗ тӑракан холодильнике такамсем вӑрлани пирки каласа кӑтартнӑ.
Вӑрӑсене часах шыраса тупнӑ. Пӳрне тата пушмак йӗрӗсем тӑрӑх ҫакна палӑртнӑ: холодильнике 32-ри тата 48 ҫулти арҫынсем йӑкӑртнӑ. Вӗсем эрех ӗҫнӗ, ҫырткаламалли шыраса вилнӗ кӳршин кладовкине кӗнӗ. Унта вара хваттер уҫҫине тупнӑ.
Хайхискерсем ют ҫын хваттерне кӗнӗ, анчах ҫимелли нимӗн те тупайман. Ҫавӑнпа вӗсем холодильнике вӑрласа сутма шутланӑ. Ӑна ломбарда илсе кайма такси те чӗннӗ. Водитель ҫул ҫинче пынӑ чухне холодильнике 3 пинпе илме килӗшнӗ.
Халӗ вӑрланӑ япалана тупнӑ ӗнтӗ.
Шупашкарта пурӑнакан 79 ҫулти хӗрарӑм полицие пырса пулӑшу ыйтнӑ. Вӑл каланӑ тӑрӑх, унӑн килти телефонӗ ҫине палламан хӗрарӑм шӑнкӑравланӑ, хӗрӗн тусӗ тесе паллаштарнӑ. Хайхискер мӑнукӗ айӑпӗпе авари пулни пирки каланӑ. Ун тӗлӗшпе пуҫиле ӗҫ ан пуҫарччӑр тесен укҫа памалла-мӗн. Кун валли 1 миллион тенкӗ кирлӗ имӗш. Ватӑ хӗрарӑм хӑраса ӳкнипе палламан ҫын мӗн каланине йӑлтах тунӑ. Анчах унӑн ун чухлӗ укҫа пулман, мӗн пуррине парса яма килӗшнӗ.
Кӗҫех ун патне арҫын килнӗ, 300 пин тенке тата апат-ҫимӗҫ илсе кайнӑ. Кӑштахран ватӑ хӗрарӑм мӑнукӗпе нимӗн те пулманнине пӗлнӗ.
Ҫав кунах 83-ри тата 73 ҫулти хӗрарӑмсем полицие пынӑ. Вӗсем те ҫавнашкалах улталаннӑ. Пӗри – 100 пин, тепри 200 пин тенкӗ куҫарса панӑ.
+12.5 °C