Чӑваш Енри художниксем «ФормАРТ» Аталҫи федераци округӗнчи урамри ӳнер фестивальне хутшӑнӗҫ.
Унта хутшӑнма Атӑлҫи тӑрӑхӗнчи ултӑ регионтан 300 ытла ҫамрӑк художникран заявка пырса ҫитнӗ. Пирӗн республикӑран виҫӗ та художниксем хутшӑнӗҫ.
Урамри ӳнер фестивалӗ кӑҫалхипе улттӑмӗш хут иртет.
Ҫӗнтерӳҫӗсене укҫа парса хавхалантарӗҫ.
Сӗнтӗрвӑрринче пурӑнакан Иван Веденеев «Кустӑрма» ятлӑ музей уҫнӑ. Ӑна вӑл ӗлӗкхи хула уесӗнчи хуҫалӑха халалланӑ.
Экспозицире – хӑйне евӗр япаласем. Пӗтӗмпе – 100 ытла. Ӗлӗкхи савӑт-сапа, урапапа ҫуна пайӗсем… –тӗрлӗ япала пур унта. Вӗсем XIX–XX ӗмӗрсенче Атӑлҫи тӑрӑхӗнче усӑ курнӑскерсем. Вӗсене вӑл хӑйсен таврашӗнче пухнӑ.
Иван Веденеев хӑй экскурсисем ирттерет, ватӑ ҫынсенчен ыйтса пӗлнӗ информацисемпе паллаштарать.
Ҫу уйӑхӗн 15-мӗшӗнче Чӑваш Енӗн Культура институчӗн концерт залӗнче пултаруллӑ балетмейстерӑн, педагогӑн, Людмила Нянинӑн 85 ҫулхи юбилейне халалланӑ савӑнӑҫлӑ каҫ иртӗ.
Сцена ҫине Культура колледжӗн студенчӗсем, ача-пӑча ансамблӗсен воспитанникӗсем тухӗҫ. Вагаповсем, «Катюша» тата «Сарпике» халӑх ташшин коллективӗсем, Чӑваш патшалӑх юрӑпа ташӑ ансамблӗн артисчӗсем те пулӗҫ.
Пултарулӑх каҫӗ ӳнер ӗҫӗнче нумай ҫул тӑрӑшнӑ Людмила Нянинӑн хӑйне евӗрлӗ пултарулӑхӗпе паллаштарӗ.
Нянина Людмила Николаевна ҫинчен тӗплӗнрех Рувикин чӑваш уйрӑмӗнче вуласа пӗлме пулать.
Ҫу уйӑхӗн 15-мӗшӗнче Шупашкарти Ф.П.Павлов ячӗллӗ музыка училищинче паллӑ совет тата Раҫҫей композиторне, пианистне, педагогне, СССР халӑх артистне Андрей Эшпая халалласа концерт иртӗ. Вӑл ҫуралнӑранпа 100 ҫул ҫитнӗ.
Андрей Эшпай Чӑваш Ене хӑйӗн иккӗмӗш тӑван ҫӗршывӗ тесе каланӑ. Унӑн амӑшӗ, Александр Тогаев чӑваш композиторӗн тӑванӗн хӗрӗ, Шупашкар районӗнчи Шемшер ялӗнче ҫуралнӑ. Унӑн ашшӗ — ҫармӑссен профессиллӗ пӗрремӗш композиторӗ. Вӑл фольклор пухнӑ. Ҫемье Степан Максимов чӑваш композиторӗпе туслӑ пулнӑ.
Пӗчӗк Андрей кашни ҫуллах Сӗнтӗрвӑррине Тогаевсем патӗнче пурӑннӑ. Унта Родион Щедрин тата Ростислав Бойко композиторсем те пӗрре ҫеҫ мар хӑнана килсе ҫӳренӗ.
Красноармейскинче ҫӗнӗ культура ҫурчӗ пулӗ. Ӑна Пензӑри фирма хута ярӗ. Аукциона вӑл кӑна хутшӑннӑ.
Контракт хакӗ – 249,1 миллион тенкӗ. Подрядчикӑн культура клубне 2017 ҫулхи ҫӗртме уйӑхӗн 30-мӗшӗччен туса пӗтермелле. Клуб виҫӗ хутлӑ пулӗ, унта 243 ҫын вырнаҫӗ. Ҫавӑн пекех костюмернӑй, курав залӗсем пулӗҫ, артистсене тумланмалли пӳлӗмпе тивӗҫтерӗҫ. Иккӗмӗш хутра балкон вырнаҫӗ, унта 57 ҫын валли вырӑн пулӗ. Проектпа килӗшӳллӗн, виҫҫӗмӗш хутра вулавӑш вырнаҫӗ. Кунсӑр пуҫне ҫуртра ике лифт лартӗҫ.
Чӑваш кӗнеке издательствинче «Сирень сенкерӗ» кӗнеке кун ҫути курнӑ. Унӑн авторӗ – Елена Николаева ҫыравҫӑ-журналист. Редакторӗ – Ольга Иванова, ӳнерҫи – Ирина Калентьева.
Чӑваш кӗнеке издательствинче пӗлтернӗ тӑрӑх, хайлав пуххине авторӑн тӗрлӗ ҫулта ҫырнӑ новеллисем кӗнӗ. Елена Николаева 1974 ҫулхи ҫӗртме уйӑхӗн 3-мӗшӗнче Тӑвай районӗнчи Тушкилте ҫуралнӑ. Тӑван ялти вӑтам шкулта вӗреннӗ чухнех районта, республикӑра тухса тӑракан хаҫат-журналпа ҫыхӑну тытнӑ. 1991–1996 ҫулсенче И.Н. Ульянов ячӗллӗ Чӑваш патшалӑх университечӗн чӑваш филологийӗпе культура факультетӗнче вӗреннӗ.
Аслӑ шкул пӗтерсенех республикӑра тухса тӑракан «Хресчен сасси» хаҫатра ӗҫлеме пуҫланӑ. 2015 ҫултанпа «Хресчен сасси – КИЛ» хаҫатра пай редакторӗнче тӑрӑшать.
Чӑваш кӗнеке издательствинче Валентин Константиновӑн кӗнеки пичетленсе тухнӑ.
Вӑл «Ют ҫын ачи» ятлӑ. Кӗнекери хайлавсене икӗ ушкӑна пайласа вырнаҫтарнӑ.
Пӗрремӗшӗ, «Тӗрӗслӗх пурах тӗнчере» ятлӑ. Унта вулакана шухӑшлаттаракан, тавлаштаракан хайлавсем кӗнӗ. Иккӗмӗш ярӑмра – шӳтлӗ хайлавсем.
Палӑртса хӑварар: Валентин Константинов – журналист, ҫыравҫӑ, хальхи вӑхӑтра Куславкка районӗн хаҫачӗн тӗп редакторӗнче ӗҫлет.
Чӑваш Енӗн Наци вулавӑшӗнче тӑван чӗлхене вӗрентекенсен пысӑк форумӗ иртнӗ.
Ольга Туркай радиожурналист пӗлтернӗ тӑрӑх, мероприяти вӑхӑтӗнче Наци библиотеки йӗркелесе ирттернӗ «Тӑван сӑмах» вулакансен аудиокӗнеке конкурс ҫӗнтерӳҫисене чысланӑ. «Республика шайӗнче иртнӗ конкурса 90 яхӑн ҫын хутшӑнчӗ. Пиллӗк номинаципе ҫӗнтерӳҫӗсене палӑртрӑмӑр. Ӑста вулакансем нумай пулчӗҫ. Тӗлӗнмелле пултаруллӑ халӑх пирӗн! Ҫакӑн пек кирлӗ, лайӑх конкурс ирттернӗшӗн Наци библиотекин ӗҫченӗсене пысӑк тав!» — хыпарланӑ Ольга Туркай.
Иртнӗ эрнере, ака уйӑхӗн 24-мӗшӗнче, Муркашри культура ҫуртӗнче «Муркаш» фольклор коллективӗн 25 ҫулхине уявланӑ. Коллектива Чӑваш Республикин культурӑн тава тивӗҫлӗ ӗҫченӗсем А.В. Аникин, Ф.Ф. Григорьева, С.А. Каликов ертсе пыраҫҫӗ.
Чӑваш халӑх юррине ламран лама парса хӑварассипе йыш пысӑк тӳпе хывать. Асӑннӑ ансамбльтен ача-пӑчан «Шӑнкӑрав» тата «Шӑпчӑк» ансамблӗсем йӗркеленсе кайнӑ.
Юбилейпа саламлама Йӗпреҫ районӗнчи «Ахах», Шупашкарти «Эткер», Мари Элти «Мырылтенӑ, кушталтенӑ» ансамбльсем пырса ҫитнӗ. Унсӑр пуҫне Муркаш тӑрӑхӗнчи «Тӑванлӑх», «Екрем», «Хавас» ансамбльсем те саламланӑ.
Элӗкри литературӑпа таврапӗлӳлӗх музейӗнче Иван Яковлев ҫуралнӑ куна халалласа «Янра, чӑваш чӗлхи!» мероприяти ирттернӗ.
Мероприятие Элӗкри ИЯ. Яковлев ячӗлӗ вӑтам шкулта вӗренекенсем, Элӗкри ача-пӑча ӳнер шкулӗн баянисчӗ Владимир Терентьев тата вырӑнти тӗрӗҫӗсем хутшӑннӑ.
Пухӑннисене музей директорӗ Ольга Алексеева саламланӑ, Иван Яковлевӑн пуян эткерлӗхне тата чӗлхине пысӑка хурса хакламаллине палӑртса хӑварнӑ. Музей специалисчӗ Светлана Железнова чӑваш тӗррипе паллаштарнӑ. Ачасем музейра ӗслекен «Чӑваш тӗрри – чи илемли» куравпа паллашма пултарнӑ.
Унтан ачасем чӑвашсен тӗрлӗ вӑййине вылянӑ тата «Линька- линька» ташланӑ.
Кораккассинчи Людмила Андреева ӑста хӑйӗн сӑввине вуласа панӑ.
+3.3 °C