Чӑваш Енре ӳпке шыҫҫипе чирлекен ачасен йышӗ ӳснӗ. Иртнӗ эрнере васкавлӑ медпулӑшу ҫак чирпе аптӑранӑ 53 ача патне ҫитнӗ. Ун умӗнхи эрнере вара 30 шӑпӑрланӑн ӳпке шыҫҫи пулнине палӑртнӑ.
Пневмонипе чирлекен ачан ӳт температури 39 градус ытла хӑпарать, 3 кунран ытларах ҫапла тӑрать. Малтан типӗ ӳслӗк аптӑратать, кайран ҫемҫелет. Сывлама йывӑрланать, чӗри хӑвӑрттӑн тапать.
Тухтӑрсем ашшӗ-амӑшне хӑйсем тӗллӗн сиплеме сӗнмеҫҫӗ, васкавлӑ медпулӑшу чӗнмелле.
Шупашкарти Калинин районӗн администрацийӗ ачасене ытларах мӗнле ят хунине тишкернӗ. Ҫулталӑк пуҫланнӑранпа ку районта 1900 ача ҫуралнӑ.
Хӗрачасене ытларах Ева, Варвара, Дарья, Елизавета ят хунӑ. Арҫын ачасен хушшинче ытларах - Тимур, Даниил, Михаил.
Хӑш-пӗр ашшӗ-амӑшӗ ачине сайра тӗл пулакан ят парать. Кӑҫал Калинин районӗнче ҫакнашкаллисем тӗл пулнӑ: Каролина, Эвелина, Амелия, Агния, Ариэль, Августина, Оливия, Камилла, Злата, Теона, Ясмина, Маргарита, Зайнад, Златан, Арслан, Осман, Рафаэль, Али, Демьян, Граф, Ян, Амир, Дамир, Филипп.
Сӗнтӗрвӑрри районӗнчи Хуракассинче пысӑк инкек пулнӑранпа 61 ҫул ҫитнӗ. Шӑп та лӑп 61 ҫул каялла, чӳкӗн 5-мӗшӗнче, шкулта пушар тухнӑ.
Ҫав кун Октябрь революцине халалланӑ уяв пынӑ. Физика пӳлӗмӗнчен тухнӑ ҫулӑм акт залӗнче хӑвӑртах сарӑлнӑ. Ачасем, вӗрентекенсем чӳречерен урама тухма хӑтланнӑ, кӑшкӑрашнӑ. Часах тӑрри йӑтӑнса аннӑ та ҫуйхашу шӑпланнӑ...
Паян Хуракассинче инкекре вилнисене асӑнса лартнӑ палӑк умӗнче митинг иртнӗ. Ку хӑрушӑ инкекре вилнӗ 106 ачана тата 4 вӗрентекене асӑннӑ.
РФ Федераци Канашӗнче паттӑрлӑх кӑтартнӑ ачасене чысланӑ. Вӗсен йышӗнче Чӑваш Енри Макар Мушков та пулнӑ.
Арҫын ача ҫулла паттӑрлӑх кӑтартнӑ. Вӑл путма пуҫланӑ 4 ҫулти арҫын ачана ҫӑлнӑ. Макар пӗчӗкскер инкеке лекнине курсан пӗр шухӑшламасӑрах пулӑшма ыткӑннӑ.
Наградӑна 54 регионти 154 ача тивӗҫнӗ. Чӑваш Енри тепӗр арҫын ачана та чыслӗҫ. Вӑл - Даниил Порфирьев.
Юпа уйӑхӗн пуҫламӑшӗнче Президент пепкелӗх центрӗнче 3420 грамм таякан, 55 сантиметр тӑршшӗ хӗрача ҫуралнӑ. Пиллӗкмӗш кунхине тӑрук унӑн сывлӑхӗ япӑхланма пуҫланӑ. Унӑн чӗре чирӗ пулнӑ иккен.
Чӑваш Енри тухтӑрсем ҫӗршыври пысӑк квалификациллӗ тухтӑрсемпе канашланӑ. Икӗ эрне сиплесен пӗчӗк ачана ИВЛ аппаратпа сывлаттарма пӑрахнӑ, тин ҫуралнӑ ачасен патологи уйрӑмне куҫарнӑ.
Хӗрача кӑкӑр сӗчӗпе часах ӳт хушма пуҫланӑ. 3900 грамм тайма пуҫласан, сывлӑхӗ лайӑхлансан амӑшӗпе ачине киле янӑ.
Йӗпреҫ поселокӗнче хӗрарӑмпа ачана шар кӑтартнӑ 30 ҫулти арҫынна тытса чарнӑ. Ун тӗлӗшпе пуҫиле ӗҫ пуҫарнӑ.
Следстви шутланӑ тӑрӑх, ҫак арҫын юпа уйӑхӗнче курайманнипе арӑмне тата унӑн 14 ҫулти ывӑлне хӗненӗ. Хӗрарӑм пусмӑра чӑтайман - кун пирки полицие кайса пӗлтернӗ.
Арҫын следстви вӑхӑтӗнче решетке хыҫӗнче ларӗ.
Чӑваш Республикин Вӗренӳ институчӗ «Чи пӗлтерӗшли ҫинчен калаҫатпӑр» проекта пурнӑҫласа класс сехечӗсен валли чӑвашла сценарийӗсене малалла хатӗрлет.
Хальхинче унта 1-2 классенче ирттермелли «Атом ледоколӗсен флочӗ. Ҫурҫӗр тинӗс флочӗн аталанӑвӗ» темӑпа чӑвашла материал хатӗрленӗ.
Институтра пӗлтернӗ тӑрӑх, класс тулашӗнче ирттермелли заняти тӗллевӗ — кӗҫӗн класс ачисене Раҫҫей Арктикин уйрӑмлӑхӗсемпе тата Ҫурҫӗр тинӗс ҫулӗпе паллаштарасси, ҫӗршывӑмӑрпа тата ун ҫыннисемпе мухтанма хӑнӑхтарасси.
Йӑлана кӗнӗ тӑрӑх, Раҫҫейре Хӗл мучи пуйӑсӗ регионсем тӑрӑх ҫӳрет. Ку – «Чукун ҫулӗпе» Вологда облаҫӗн правительствин пӗрлехи проекчӗ.
Хӗл мучи пуйӑсӗ юпа уйӑхӗн 22-мӗшӗнче ҫула тухнӑ. Вӑл Аслӑ Устюгран пуҫласа Владивостока ҫитӗ, унтан – каялла. Хӗл мучи ҫӗршыври ачасене савӑнӑҫ парнелӗ.
Пуйӑс Чӑваш Ене раштав уйӑхӗн 4-мӗшӗнче килӗ. Вӑл Шупашкарта чарӑнӗ.
Шӑмӑршӑ районӗнче пурӑнакан 29 ҫулти хӗрарӑм ӑнсӑртран ҫуратма пуҫланӑ. Варти ачи 33 эрнере кӑна пулнӑ.
Вӑл пепкене килӗнче хӑех ҫуратнӑ. Хӗрарӑм телефон патне тепӗр ҫур сехетрен кӑна тӑсӑлса ҫитнӗ. Вӑл васкавлӑ медпулӑшӑва шӑнкӑравласа хӑй ҫуратнине пӗлтернӗ.
Оперативлӑ уйрӑмӑн аслӑ тухтӑрӗ Надежда Артемьева ӑна фельдшерсем ҫитиччен телефонпа мӗн тумаллине каласа тӑнӑ, кӑвапине мӗнле касмаллине ӑнлантарнӑ. Васкавлӑ медпулӑшу ҫитсен амӑшӗпе ачине Шупашкара илсе кайнӑ.
Палӑртмалла: ку хӗрарӑмӑн виҫҫӗмӗш ачи пулнӑ.
Ҫӗмӗрлере пӗр ачана йытӑ ҫыртнӑ. Ҫавӑн пирки ача амӑшӗ прокуратурӑна ҫул тытнӑ.
Прокуратура тӗрӗсленӗ май ҫакна палӑртнӑ. Кӑҫалхи авӑн уйӑхӗн 12-мӗшӗнче ача шкултан килне таврӑннӑ, ҫавӑн чухне ӑна килсӗр-ҫуртсӑр йытӑ ҫыртнӑ.
Ачана амӑшӗ больницӑна илсе кайнӑ. Унтан вӑл надзор органне ҫӑхавланӑ. Ҫавӑн хыҫҫӑн прокуратура суда тавӑҫпа тухнӑ. Унта Ҫӗмӗрле хула администрацийӗнчен ачана кӑмӑл-сипет тӗлӗшӗнчен сиен кӳнӗшӗн саплаштарма ыйтнӑ.
Суд ачана майлӑ пулнӑ — администрацирен 10 пин тенкӗ шыраса илме йышӑннӑ.
-9.7 °C