Элӗк район администрацийӗ йӑлари хытӑ каяшсен свалкине рекультиваци тӑвасшӑн. Ҫавна май аукцион ирттерме палӑртнӑ.
Свалка Элӗк ялӗнчен ҫурҫӗрелле 500 метр аякра вырнаҫнӑ. Ӑна 1980 ҫулта уҫнӑ, 2016 ҫулта хупнӑ, ҫапла вӑл 36 ҫул ӗҫленӗ. Ку свалкӑна 40 пин ытла кубла метр йӑлари хытӑ каяш пырса тӑкнӑ. Свалкӑн чи ҫӳллӗ вырӑнӗ – 3,6 метр. Халӗ ӑна Элӗк районӗн администрацийӗ рекультиваци тума палӑртнӑ.
Администраци ку тӗллевпе 24 миллион та 893 пин тенкӗ тӑкаклама хатӗр. Ку – пуҫламӑш хак. Аукцион ака уйӑхӗн 2-мӗшӗнче иртӗ. Унта выляса илекенӗн ӗҫе кӑҫалхи чӳк уйӑхӗн 2-мӗшӗччен вӗҫлемелле.
Муркаш ял тӑрӑхӗн администрацийӗ Муркашри «Ҫӗнтерӳ» парка тата тӗп лапама ҫӗнетесшӗн. Ҫавна май аукцион ирттерессине пӗлтернӗ.
Муркашри парка тӳре-шара 8 миллион тенкӗпе ҫӗнетме хатӗр. Ӑна кӑҫал ҫурла уйӑхӗн 1-мӗшӗччен туса пӗтермелле.
Паркра канмашкӑн хальлӗхе хӑтлӑ условисем ҫук. Тротуарсем арканнӑ, пандуссем ҫук, унта чечексем те ешермеҫҫӗ. «Салтак» палӑкӑн никӗсӗ те юхӑнма пуҫланӑ. Ачасем валли вылямалли вырӑн ҫук – кӳлленчӗксем ҫеҫ.
Ҫӗнелнӗ паркра вара сукмаксем, тӗмсем, чечек клумбисем пулмалла. Ларса канма сак-дивансем вырнаҫтарӗҫ, «Икӗ мӑшӑр» ятлӑ 4 беседка пулӗ. Палӑк никӗсне те ҫӗнетӗҫ.
Шупашкар хула администрацийӗ хулара общество транспорчӗн чарӑнӑвӗсенче ҫӗнӗ павильонсем вырнаҫтарасшӑн. Ҫавна май патшалӑх закупкисен сайтӗнче лот уҫнӑ. Килӗшӗвӗн малтанхи хакӗ – 8 999 991 тенкӗ.
Хула администрацийӗ алюмини профилӗнчен хатӗрленӗ, 6-8 милимметр хулӑнӑш кантӑклӑ павильонсем вырнаҫтарасшӑн. Унта йывӑҫ сак лартмалӑх вырӑн та пулмалла. Саксем ан нӳрелччӗр тесе ятарлӑ сӑрӑпа сӑрламалла.
Аукцион нарӑс уйӑхӗн 28-мӗшӗнче иртӗ. Подрядчике суйласан, килӗшӳ алӑ пуссан павильонсене 25 кунра вырнаҫтармалла.
Элтепер администрацийӗ официаллӑ ҫынсемпе делегацисем валли банкетсемпе фуршетсем ирттерме аукцион ирттерессине пӗлтернӗ. Малтанхи хак – 1,2 миллион тенкӗ.
Банкет ирттермелли менюна улма-ҫырла вази, какай тата пулӑ ассорти, пулӑ, какай, хуплу, пулӑллӑ бутерброд, пан улми кукӑлӗ тата ытти кӗреҫҫӗ. Паллах, тата сӗткенсем пур.
Аукцион ҫӗнтерӳҫи банкетсемпе фуршетсем йӗркелӗ. Укҫана республика хыснинчен уйӑрӗҫ. Аукцион пуш уйӑхӗн 23-мӗшӗнче иртӗ.
Ҫӗнӗ Шупашкарти ачасен кӗҫех чӑн-чӑн телей пулӗ. Унта хута каякана ача пахчине «Телей» ят пама йышӑннӑ. Вӑл хулара 52-мӗш пулӗ.
Виҫӗ хутлӑ ача пахчине кӑҫал тума пуҫланӑ, унта 10 ушкӑн валли вырӑн пулӗ. Аукционра «СтройГрад» тулли мар яваплӑ общество 117 миллион та 538 пин тенкӗпе выляса илнӗ.
Тӗрӗссипе, ача пахчине чӳк уйӑхӗн 1-мӗшӗ валли туса пӗтермелле пулнӑ, анчах подрядчик вӑхӑтра ӗлкӗреймен.
ЧР Элтеперӗн администрацийӗн автобази кӗҫех ҫӗнелӗ: 5 ҫӗнӗ машина туянма палӑртнӑ. Ку тӗллевпе 9 миллион тенкӗ тӑкаклама хатӗр. Ҫапла майпа пӗр машина 1,8 миллион тенке кайса ларӗ.
Аукцион ирттересси пирки Патшалӑх закупкисен сайтӗнче пӗлтернӗ. Малтанхи хак – 8,93 миллион тенкӗ. Укҫа-тенке республика хыснинчен тӗллевлӗ субсиди пек уйӑрӗҫ.
Иномаркӑсенче климат-контроль, ҫумӑр, ҫутӑ тата парковка датчикӗсем, круиз-контроль, харушсӑрлӑх минтерӗ тата карри пулмалла. Ку машинӑсемпе патшалӑх влаҫӗнче вӑй хуракансем ҫӳрӗҫ.
Чӑваш Енӗн Арбитраж сучӗн ертӳҫи валли 2,5 миллион тенкӗ парса машина туянӗҫ.
Автомобиль туянасси ҫинчен калакан пӗлтерӗве туянасси ҫинчен калакан сайтра пӗлтернӗ. ЧР Арбитраж сучӗ машинӑна 2,5 миллион тенкӗпе илме кӑмӑл пуррине пӗлтернӗ. Тата тӗрӗсрех каласан, унтан ытла хаклӑ марпа.
Машинӑна Раҫҫейӗн пурлӑх комитечӗн фондне парӗҫ. Автомобиле туянма укҫана федераци хыснинчен уйӑрӗҫ.
Машина комплектацийӗнче мӗн пулмаллине те палӑртса хӑварнӑ. Двигатель хӑвачӗ, сӑмахран, 195 лаша хӑватӗнчен пӗчӗк пулмалла мар. Тулли приводлине туянасшӑн. Передача курупки автомат, чӳрече тарласран ятарлӑ тытӑм тата динамиклӑ аудиотытӑм пулмалла.
Чӑваш Енӗн Арбитраж сучӗ ӗнентернӗ тӑрӑх, машинӑна туянма унчченех палӑртнӑ.
«Экоцентр» компание штрафлама йышӑннӑ. Вӑл ҫӳп-ҫап турттаракансемпе саккуна пӑсса килӗшӳсем тунӑ-мӗн. Штраф виҫи 2018 ҫулхи юпа уйӑхӗнчи тупӑшран 2 процент нумай мар.
«Экоцентр» ҫӳп-ҫап турттаракан 16 перевозчикпа аукционӑн малтанхи чи пысӑк хакӗпе килӗшӳ тунӑ. Тӗрӗссипе вара малтанхи хака пӗчӗклетме торг тумалла пулнӑ.
Саккуна пӑснӑшӑн «Экоцентрӑн» 731 280 тенкӗ тӳлемелле.
ЧР Элтеперӗн администрацийӗ социологи тӗпчевӗ ирттерме палӑртнӑ. Теми «Чӑваш Енри обществӑпа политика лару-тӑрӑвӗ» ятлӑ. Ҫавна май администраци аукцион ирттерет. Малтанхи хак – 1 миллион та 190 пин те 667 тенкӗ.
Аукцион юпа уйӑхӗн 28-мӗшӗнче иртӗ. Унта ҫӗнтернӗ подрядчикӑн килӗшӳ тунӑ хыҫҫӑн 10 кунра республикӑри ҫынсем патне шӑнкӑравласа ыйтӑм ирттермелле. Вӗсен 75 процент - кӗсье телефонӗ, 25 процент стационар телефонӗн номерӗсемпе усӑ курмалла.
Ыйтӑм ирттернӗ хыҫҫӑн пӗтӗмлетӗве ЧР Элтеперӗн администрацине раштав уйӑхӗн 16-мӗшӗччен памалла.
Республикӑри психиатри пульници машина туянасшӑн. Кун валли 1 миллион та 189 пин тенкӗ тӑкаклама хатӗр. Аукцион авӑн уйӑхӗн 10-мӗшӗнче иртӗ.
Аукцион докуменчӗсенче палӑртнӑ тӑрӑх, машинӑна Шупашкар хулинчи Пирогов урамӗнче 6-мӗш ҫурта илсе ҫитермелле. Машинӑна ӗҫ панӑ тупӑшпа туянаҫҫӗ-мӗн.
Психиатри пульници Skoda Octavia или эквивалент туянасшӑн. Тӗсне те суйланӑ: хура. Передача курупки механика е автомат пулмалла.
-2.7 °C