Шупашкарти пӗр ватӑ хӗрарӑмӑн хваттерӗнче ҫар припасӗсем пытарнӑ вӑрттӑн вырӑн тупнӑ. Ӑна мӑнукӗ хӑварнӑ тесе шутлаҫҫӗ. Арҫынна кунсӑр пуҫне Раҫҫейре тата ют ҫӗршывсенче йывӑр преступеленисем тунӑшӑн айӑпласшӑн.
Хваттер пӳлӗмӗнче полицейскисем ҫар припасӗсем тупсан кинемей питӗ тӗлӗннӗ. Унта пистолет, патронсем пулнӑ. Кинемее пӑхсан мӑнукӗ хваттерте ҫар припасӗсем хӑварни пирки пач та пӗлменни паллӑ пулнӑ.
Ватӑ хӗрарӑман мӑнукӗ киле часах таврӑнмӗ. Ют ҫӗршывра преступлени тунӑшан ӑна тӗрмене хупнӑ.
Юпа уйӑхӗн 30-мӗшӗнчен Шупашкарти аэропорт хӗллехи режимпа ӗҫлеме тытӑнӗ. Ҫавна май хӑш-пӗр ирхи рейс пӑрахӑҫланать.
«Победа» авиакомпанин «Шупашкар – Мускав» рейсӗ икӗ хутчен пулӗ. Пӗри – Шереметьевӑна, тепри – Внуковӑна. Шереметьевӑна 11 сехет те 10 минутра вӗҫӗ (халӗ – 17 сехет те 25 минутра). Внуково аоэропортне вӗҫмешкӗн самолета 21 сехет те 50 минутра лартӗҫ. Чӳкӗн 7-мӗшӗнчен пуҫласа раштавӑн 3-мӗшӗччен Внуковӑна тепӗр рейс пулӗ: 15 сехет те 55 минутра. Анчах кашни кун мар – тунтикун, кӗҫнерникун, эрнекун тата вырсарникун.
Питӗре тунтикун, юнкун, эрнекун, вырсарникун 20 сехет те 20 минутра вӗҫме пулать.
Паян пӗтӗм Шупашкар ура ҫине тӑнӑ. Ҫурҫӗр-хӗвеланӑҫ районӗнче пӑшаллӑ арҫын ҫӳренине курнӑ. Мӗн пулса иртнӗ-ха паян хулара?
Шупашкарта пурӑнакан 55 ҫулти арҫын 11 сехетре хӑйӗн хваттерӗнче, Гузовский урамӗнчи 30-мӗш ҫуртра, пӑшалтан пенӗ. Унтан вӑл подъезда тухнӑ. Кун пирки арҫыннӑн тӑванӗ полицие пӗлтернӗ.
Пӑшаллӑ арҫынна полици нарячӗ шырама тытӑннӑ. Вӑл ӑҫталла кайнине «Хӑрушсӑр хула» камерисемпе сӑнанӑ: арҫын Гузовский урамӗнчен Горький проспекчӗ еннелле утнӑ.
1,5 сехет ҫурӑран ӑна Сверчков урамӗнче, Атӑл хӗрринчи вӑрманта, тупнӑ. Вӑл полицейскисене курсан тарма хӑтланнӑ. Анчах ӑна ҫавӑрса илнине ӑнансан хайхискер хӑйне тӗллесе пенӗ. Вӑл ҫавӑнтах вилнӗ. Юрать-ха, урӑх никам та аманман.
Арҫын тӗнче тетелӗнче хӗрпе паллашнӑ. Хӑй ватӑ пулин те ҫамрӑк тесе паллаштарнӑ. Тӗлпулӑва чечек йӑтса килнӗ, каллех суйнӑ. Ку паллашу хӗре мӑшкӑлланипе вӗҫленнӗ.
Следовательсем пӗлтернӗ тӑрӑх, Шупашкарта пурӑнакан 64 ҫулти арҫын тӗнче тетелӗнче 23-ри хӗрпе паллашнӑ. Утӑ уйӑхӗн 5-мӗшӗнче вӑл ун патне киле пынӑ, чечек парнеленӗ. Ӑна тӗнче тетелӗнчи савнийӗ парса янӑ имӗш, вӑл – унӑн тӑванӗ-мӗн. Арҫын каччӑна хӗрӗн хваттерӗнче кӗтме сӗннӗ.
Ларсан-ларсан нимӗнле савни те пулманнине, хӗрпе вӑл ҫырӑннине каланӑ. Унтан ватӑскер хӗре тапӑннӑ та мӑшкӑлланӑ. Арҫын тӗлӗшпе пуҫиле ӗҫ пуҫарнӑ. Вӑл хӑйӗн айӑпне йышӑнмасть. Ҫапах суд ку ӗҫре пӑнчӑ лартӗ.
Шупашкар хулинче ҫӗнӗ архитектора ҫирӗплетнӗ. Хула администрацийӗн архитектура тата хула строительствин управленийӗн пуҫлӑхӗн ҫумӗ — Шупашкарӑн тӗп архитекторӗ пулма Павел Корнилова шаннӑ. Унччен вӑл хулан архитекторӗн тивӗҫӗсене пурнӑҫланӑ.
Петр Корнилов 1989 ҫулхи ака уйӑхӗн 12-мӗшӗнче ҫуралнӑ. 2015 ҫулта И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. «Архформа» проектпа дизайнер фирминче, «Союзпроект» проект организацийӗнче архитекторта ӗҫленӗ. Раҫҫейри тата Чӑваш Енри архитекторсен союзӗсен пайташӗ.
| ЮПА | 25 |
Иртнӗ канмалли кунсенче Чӑваш Енре тӑватӑ мунча ҫуннӑ. Виҫӗ тӗслӗхӗнче йӑлтах ҫунса кайнӑ.
Шӑматкун Шупашкарти Богданкӑра Серафимович урамӗнчи мунча кӑнтӑрла ҫуннӑ. Малтанлӑха пӗлтернӗ тӑрӑх, ҫулӑм мӑрье тӗрӗс мар ӗҫленӗрен тухнӑ.
Ҫав кунах Куславккара та мунча ҫуннӑ. Унта ҫулӑм ҫапӑнмалли пӳлӗме ҫеҫ сиенлетнӗ. Мунчана хуҫисем тӗрӗс мар хутнӑран пушар тухнӑ тесе шутлаҫҫӗ.
Вырсарникун Красноармейски районӗнич Туҫи Чуракасси ялӗнче тата Улатӑрта мунча ҫуннӑ. Ку тӗслӗхсенче пӗтӗмпех ҫунса кайнӑ.
Юпа уйӑхӗн 23-мӗшӗнче Шупашкарта нумай хутлӑ ҫурт ҫывӑхӗнче ҫамрӑк арҫын виллине тупнӑ. Кун пирки «Про Город» хаҫата халӑх корреспонденчӗ пӗлтернӗ.
Пӑтӑрмах ирхи 5 сехет ҫурӑра пулса иртнӗ. Радужнӑй урамӗнчи 11-мӗш ҫурт патӗнче арҫын виллине тупнӑ. Вӑл 13-мӗш хутран ӳкни паллӑ.
«Про Город» хаҫата халӑх корреспонденчӗ пӗлтернӗ тӑрӑх, арҫын Етӗрне районӗнче ҫуралса ӳснӗскер пулнӑ. Вӑл савнӑ хӗрӗпе пурӑннӑ.
Следстви комитечӗ кун тӗлӗшпе тӗрӗслев ирттерет.
Шупашкарта пурӑнакан арҫыннӑн хваттер сутас тесен 700 пин тенкӗ алимент тӳлеме тивнӗ. 47-ри арҫыннӑн ачи 18 ҫултан иртнӗ ӗнтӗ. Анчах парӑмӗ – 700 пин тенкӗ – ҫавӑн пекех юлнӑ.
Унӑн пӗр пурлӑх ҫеҫ – хваттер – пур. Парӑм пулнӑран ӑна регистрацилеме чарнӑ. Ҫакӑ ҫеҫ арҫынна алимент парӑмне татма хистенӗ. Мӗншӗн тесен вӑл хваттерне сутма хатӗрленнӗ.
Алимент парӑмӗ татӑлсан, укҫа счет ҫине куҫсанах, хваттере те регистрацилеме ирӗк панӑ.
Чӑваш Республикин Ҫеҫпӗл Мишши фончӗ 2021 ҫулта Халӑхсем хушшинчи Ҫеҫпӗл Мишши ячӗллӗ премие кама парассине палӑртнӑ. Вӗсем — «Чӑваш Ен» Патшалах телерадиокомпанийӗн телевиденипе радиовещани информаци программисен службин корреспонденчӗ Енейкин Алексей Николаевич тата Ҫеҫпӗл Мишшин Шупашкарти музейӗн ертӳҫи Андреева Антонина Васильевна.
Алексей Николаевича премие «Чӑвашкино» Патшалах киностудийӗпе пӗрле режиссер-сценарист пулса «Тӗрӗслӗх ҫутаттӑр Ҫеҫпӗлӗн ятне» документлӑ фильм ӳкернӗшӗн панӑ, Антонина Васильевӑна вара — Ҫеҫпӗл Мишшин Шупашкарти музейӗн ертӳҫи пулса нумай ҫул ӑнӑҫлӑ ӗҫленӗшӗн тата общество пурнӑҫне хастар хутшӑннӑшӑн. Фонд шухӑшӗпе вӗсем иккӗшӗ те Ҫеҫпӗл Мишшин пултарулӑхне тӗпчес, ӑна халӑх хушшинче сарас тӗлӗшпе нумай вӑй хунӑ.
Алейсей Енейкин — Елчӗк тӑрӑхӗнчен. Аслӑ пӗлӗве И.Я. Яковлев ячӗллӗ Чӑваш патшалӑх педагогика университетӗнче илнӗ, 2011 ҫултанпа «Чӑваш Ен» патшалӑх телерадиокомпанин корреспонденчӗ пулса ӗҫлет.
Антонина Андреева — Шӑмӑршӑ районӗнче ҫуралнӑ. Чӑваш патшалӑх университечӗн чӑваш филологийӗпе культура факультетӗнче аслӑ пӗлӳ илнӗ.
Шупашкарти усламҫӑ налук службине 4,5 миллион тенкӗ тӳлессине пытарнӑ тесе шутлаҫҫӗ. Куншӑн ӑна явап тыттарасшӑн.
Следстви палӑртнӑ тӑрӑх, 2018 ҫулхи утӑ уйӑхӗнчен пуҫласа пӗлтӗрхи утӑ уйӑхӗччен усламҫӑ налук хумалли патент тытӑмне улӑштарнӑ. Ҫакна тума унӑн ирӗк пулман.
Кунсӑр пуҫне вӑл 2018 ҫулхи тӑваттӑмӗш кварталшӑн тата 2019 ҫулшӑн налук службине деклараци тӑратман. 2018 ҫулти декларацие суя сведенисем кӗртнӗ. Ҫапла вӑл 4,5 миллион ытла тенкӗлӗх налук тӳлессинчен пӑрӑннӑ тесе шутлаҫҫӗ.
+22.3 °C