Авӑн уйӑхӗнче Андриян Николаев космонавта халалласа «Спица ҫинчи хӗвел» велочупу ирттересси йӑлана кӗнӗ. Кӑҫал вӑл авӑнӑн 7-мӗшӗнче пулӗ. Шӑпах ҫак кун Индири «Чандраян-2» космос аппарачӗ Уйӑх ҫине анса ларӗ. Чӑваш Енри велосипедҫӑсем ҫак ҫӗршыври «Jammu Cyclists» велосообществӑпа ҫыхӑннӑ, ҫак пулӑма «Чандраян» ятлӑ велочупупа паллӑ тума сӗннӗ.
Ҫапла майпа кӑҫал старт икӗ хулара пулӗ: Ҫӗнӗ Шупашкарта тата Индири Джамму хулинче. Икӗ хулари велосипедҫӑсем пӗр вӑхӑтра тапранса кайӗҫ, пӗрешкел ҫухрӑмсене парӑнтарӗҫ. Пирӗн патрисем Ҫӗнӗ Шупашкарти «Химик» культура ҫурчӗ умӗнче 11 сехетре старт илӗҫ. Вӗсем Сӗнтӗрвӑрри районӗнчи Шуршӑл ялне, Андриян Николаевӑн тӑван тӑрӑхне, ҫитӗҫ.
Палӑртма кӑмӑллӑ: Индири велочупӑва «Спица ҫинчи хӗвел» велоюхӑм председателӗ Вячеслав Платонов хутшӑнӗ. Вӑл ҫав ҫӗршывра ӗҫлӗ командировкӑра халӗ.
Ҫурла уйӑхӗн 26-мӗшӗнче чӑвашсен паллӑ журналисчӗ, СССР журналисчӗсен пайташӗ, спорт комментаторӗ Юрий Диомидович Плотников пурнӑҫран уйрӑлнӑ.
Юрий Диомидович республикӑра тухса тӑракан хаҫатсенче ӗҫленӗ: «Ҫамрӑк коммунист», «Советская Чувашия», «Чӑваш Ен». Шупашкарти телекурав студийӗнче те вӑй хунӑ, Чӑвашрадиора 20 ытла ҫул спорт кун кӗнекине ертсе пынӑ. Вӑл «Хыпар», «Почтовый экспресс» хаҫатсемпе, «Спортивная панорама Чувашии» журналпа, Ҫӗрпӳ районӗн «Цивильский вестник» хаҫачӗпе ҫыхӑну тытнӑ.
Юрий Плотников ҫичӗ кӗнеке кӑларнӑ, 1 пин ытла сӑвӑ ҫырнӑ. Хӑй вӑл Ҫӗрпӳ районӗнче ҫуралса ӳснӗ, унтах педагогика училищине пӗтернӗ, каярахпа И.Н.Ульянов ячӗллӗ ЧПУра ӑс пухнӑ. Кӑҫал авӑн уйӑхӗн 17-мӗшӗнче Юрий Плотников 85 ҫул тултармаллаччӗ.
Паллӑ журналистпа, спорт комментаторӗпе паян сывпуллашнӑ.
Ҫак канмалли кунсенче Францире сӗтелҫи теннисӗ енӗпе Европа чемпионачӗ вӗҫленнӗ. Унта Шупашкар пики хутшӑннӑ. Хутшӑннӑ кӑна мар, ӑмӑртуран маттур хӗрача ылтӑн медальпе таврӑннӑ.
Ӑмӑрту Страсбург хулинче иртнӗ. Ҫамрӑк спортсменсем хӑйсен пултарулӑхне виҫӗ кун хушши тӗрӗсленӗ. Унта Европӑри мӗнпур ҫӗршывран тенӗ пек хутшӑннӑ. Пурӗ 356 спортсмен ӑмӑртнӑ. Японири яш-кӗрӗмпе хӗр-упраҫ та пулнӑ.
Чӑваш Енӗн Спорт министерствин пресс-службинче пӗлтернӗ тӑрӑх, Шупашкарти Анастасия Иванова (унӑн тренерӗ — Артем Уточкин) Японири Рин Менде спорстменкӑна 3:0 шутпа выляса илнӗ. Бронза медале Румынири Мэй Россу тивӗҫнӗ.
Пӗлтӗрхи ҫавӑн пек ӑмӑртӑва та хутшӑннӑ вӑл. Ун чух бронза медале ҫӗнсе илнӗ. Раҫҫейӗн пӗрлештернӗ командинче пӗлтӗр ҫавӑн пекех Шупашкарти Юлия Пуговкина та пулнӑ.
Маунтинбайк енӗпе иртекен чемпионата тата тӗнче ӑмӑртӑвне Ирина Калентьевӑпа пӗрлех Евгений Евграфов та хутшӑнӗ. Аса илтерер: тупӑшу ҫурла уйӑхӗн 28-31-мӗшӗсенче Канадӑра пулӗ. Унта спорстменсем «кросс-кантри» тата эстафета дисципилинӑсенче ӑмӑртӗҫ.
Чӑваш Ен Спорт министерствинче пӗлтернӗ тӑрӑх, чӑваш велоспорчӗн воспитанникӗсем «кросс-кантри» дисциплинӑра тупӑшӗҫ. Раҫҫейӗн хӗрарӑмсен командине тӗнчен икӗ хут чемпионки, Раҫҫей тава тивӗҫлӗ спорт мастерӗ Ирина Калентьева кӗнӗ, 19-22 ҫулсенчи юниорсенне – Раҫҫей тава тивӗҫлӗ спорт мастерӗ Евгений Евграфов.
Тӗнче шайӗнчи ӑмӑртӑва Ҫӗр чӑмӑрӗ ҫинчи 700 ытла спорстмен хутшӑнӗ. Ӑмӑрту Монт-Сант-Анне хулари кӑткӑс трасса ҫинче иртӗ.
Ҫурлан 28-мӗшӗнчен пуҫласа авӑнӑн 1-мӗшӗччен Канадӑра Тӗнче чемпионачӗ иртӗ. Ӑмӑртура Олимп лицензийӗсене выляттарасшӑн. Унта Чӑваш Ен спортсменки Ирина Калентьева та хутшӑнӗ.
«Манӑн ҫурӑм хыҫӗнче – пилӗк Олимп вӑййисем. Хӑҫан та пулсан професси карьерине вӗҫлемелли самант ҫитет, мӗншӗн тесен вӑй пӗтет. Ҫавӑнпа эпӗ ку сезон маншӑн юлашки пулӗ тесе йышӑнтӑм», - ҫапла пӗлтернӗ Ирина Калентьева.
Каласа хӑварар: спортменка 1977 ҫулта Патӑрьел районӗнчи Нӑрваш Шӑхаль ялӗнче ҫуралнӑ. 20 ҫулта чухне Тӗнче кубокне пӗрремӗш хут илнӗ. Халӗ вӑл Швейцарире пурӑнать, мӑшӑрӗ (Швейцари ҫынни) йӗркеленӗ профессионал велокомандӑшӑн тупӑшать.
Ҫак кунсенче Венгринчи Будапешт хулинче ишес енӗпе тӗнче шайӗнчи ӑмӑрту иртет. Унта 14-17 ҫулсенчи пикесем тата 15-18 ҫулсенчи яшсем хутшӑнаҫҫӗ.
Раҫҫейӗн пӗрлештернӗ командине 30 спортсмен кӗнӗ. Вӗсен йышӗнче чӑваш ҫӗрӗн икӗ каччи пур: Александр Егоров тата Никита Данилов. Вӗсем Олимп резервӗн 9-мӗш спорт шкулӗнче ӑсталӑха туптанӑ. Халӗ яшсем Мускавра тренировкӑсем ирттереҫҫӗ.
Ӑмӑртӑвӑн пӗрремӗш кунӗ Чӑваш Ен каччисемшӗн ӑнӑҫлӑ пулнӑ. Александр Егоров 400 метра ирӗклӗ мелпе ишессипе бронза медале ҫӗнсе илнӗ. Унӑн кӑтартӑвӗ (3.47,36) — Раҫҫей ҫамрӑкӗсен хушшинче рекорд тивӗҫ. Журналистсемпе калаҫнӑ май Александр 400 метра ишме кӑмӑлланине пӗлтернӗ. Асӑннӑ дистанцире Никита Данилов пиллӗкмӗш вырӑна тухнӑ.
И.Н. Ульянов ячӗллӗ Чӑваш патшалӑх университетӗнче вӗренекен Алина Алексеева мас-рестлинг енӗпе иртнӗ тӗнче чемпионачӗн иккӗмӗш тапхӑрӗнче бронза медале тивӗҫнӗ. Спортсменсем Узбекистанри Алмалык хулинче ҫурла уйӑхӗн 17-18-мӗшӗсенче ӑмӑртнӑ. Унта 200 ытла спорстмен хутшӑннӑ. Вӗсем Азербайджанран, Бангладешран, Болгаринчен, Казахстанран, Кӑркӑстанран, Литваран, Пакистанран, Словакинчен, Узбекистанран, Украинӑран, Финляндинчен тата ытти ҫӗршывран пырса ҫитнӗ.
Алина Алексеева Чӑваш Енӗн тава тивӗҫлӗ тренерӗ Алексей Атласкин патӗнче пултарулӑха туптать. Узбекистанри ӑмӑртура хӗр 75 килограмчченхи виҫере вӑй виҫнӗ. Кӑҫалхи чӳк уйӑхӗнче вӑл мас-рестлинг енӗпе иртнӗ тӗнче чемпионачӗн виҫҫӗмӗш тапхӑрне хутшӑнӗ. Ӑмӑрту чӳк уйӑхӗн 15-18-мӗшӗсенче иртмелле.
Чӑваш Енӗн спортсменки Евгения Захарченко Таллинти ӑмӑртура кӗмӗл медале ҫӗнсе илнӗ. Евгения ирӗклӗ мелпе кӗрешет. Таллинта хӗр юниорсен тӗнче ӑмӑртӑвне хутшӑннӑ.
Чӑваш Ен Спорт министерствин пресс-служби пӗлтернӗ тӑрӑх, пирӗн ентешӗмӗр 72 килограмчченхи виҫере кӗрешнӗ.
Раҫҫейӗн ытти спортсменки те ӑмӑртура тивӗҫлипе палӑрнӑ. Хӗрарӑмсен пӗрлештернӗ команди Таллинтан 3 кӗмӗл тата 3 бронза медальпе таврӑннӑ. Кӗмӗл медале Дарья Хвосткова тата Мария Лачугина 50 килограмчченхи тата 62 килограмчченхи виҫесенче ҫӗнсе илнӗ. Мария Тюмерекова 53 килограмчченхи хӗрсем хушшинче бронза медале тивӗҫнӗ, Мария Лачугина — 62 килограмчченхисем хушшинче, Ханум Валиева — 68 килограмчченхисен ушкӑнӗнче.
Ыран, ҫурла уйӑхӗн 18-мӗшӗнче, Шупашкарти «Шупашкар» универмаг патӗнче кӗрешӳ енӗпе уҫӑ первенство пулӗ. Ӑмӑртӑва спорт кӗрешӗвӗн кирек мӗнле тӗсӗнче те хатӗрленнӗ спортсменсем хутшӑнӗҫ. Пӗтӗмпе 20 ытла заявка килнӗ. Спортсменсем тӗрлӗ виҫе категорийӗнче вӑй виҫӗҫ.
Ӑмӑрту 17 сехет те 15 минутра пуҫланӗ. 16 сехетре спортсменсене виҫӗҫ. Виҫе категорийӗсенче ҫӗнтернисене медальпе тата дипломпа чыслӗҫ. Первенство триумфаторне тӗп парне кӗтет: чӗрӗ така.
Ыран универмаг умӗнче кирек пуканне йӑтас енӗпе те ӑмӑрту иртӗ.
«Шупашкар Арена» пӑр керменӗнче ҫурла уйӑхӗн 23-мӗшӗнче хулари тӳре-шара тата «Стрижи» (чӑв. Вӗршӗнсем) пилотаж ушкӑнӗн командисем хоккейла вылӗҫ.
Шупашкарсен командине Чӑваш Ен тӗп хулин администрацийӗн пуҫлӑхӗ Алексей Ладыков ертсе пырӗ, «Вӗршӗнсен» командирӗ Сергей Осяйкин полковник пулӗ.
Куракансем валли матчсӑр пуҫне тӗрлӗ кӑсӑклӑ программа хатӗрленине ӗнентереҫҫӗ хула администрацийӗн пресс-службинче. Хоккей курма пынисем пилотсемпе калаҫайӗҫ, вӗсемпе сӑн ӳкерӗнейӗҫ.
Шупашкарти тӳре-шара тата пилотаж ушкӑнӗ унччен те хоккейла вылянӑ. 2015 ҫулта вӗсен юлташла ӑмӑртӑвӗ 5:5 шутпа вӗҫленнӗ.
Кӑҫалхи ӑмӑрту ҫурла уйӑхӗн 23-мӗшӗнче 12 сехетре пуҫланӗ. Унта кирек кам та кайса курма пултарать. Тӳлевсӗрех кӗртӗҫ.
+12.7 °C