Чӑваш Енре наставниклӑх институтне чи лайӑх саракансене палӑртма конкурс ирттерме йышӑннӑ. Кун пирки ЧР влаҫ органӗсен официаллӑ порталӗнче паян пӗлтернӗ. Конкурсшӑн явапли — ЧР Элтеперӗн Администрацийӗ.
Конкурса кирек кам та хутшӑнаять. Чи кирли — вӗсем республика территорийӗнче тӑрӑшакан предприятисем пулни. Харпӑрлӑх форми кирек мӗнли пулсан та юрать.
Наставниклӑха сарассипе ырӑ тӗслӗх кӑтартакансен ҫак опытпа палалштармалла. Ҫӗнтерӳҫӗне палӑртнӑ чухне настанвиклӑх тӗслӗхне ытти ҫӗрте усӑ курма май пуррине те шута илӗҫ.
Конкурса хутсене кӑҫалхи юпа уйӑхӗн 24-мӗшӗнчен пуҫласа 2020 ҫулхи нарӑс уйӑхӗн 28-мӗшӗччен йышӑнӗҫ. Ҫӗнтерӳҫӗсене хавхалантарма 150 пин тенкӗ уйӑрма палӑртнӑ.
Аса илтерер: ака уйӑхӗн вӗҫӗнче ЧР Элтеперӗ Михаил Игнатьев наставниклӑх институтне аталантарасси ҫинчен калакан хушӑва алӑ пуснӑччӗ.
Чӑваш Енри чи лайӑх участковӑй Тӑвай районӗнче пурӑнать. Ҫапла палӑртнӑ ЧР Шалти ӗҫсен министерстви ирттернӗ он-лайн сасӑлава хутшӑннисем.
Тӑвай районӗнчи Николай Шамбулин «Народный участковый 2019» (чӑв. 2019 ҫулхи халӑх участковӑйӗ) Пӗтӗм Раҫҫейри конукрсӑн Чӑваш Енри тапхӑрӗнче ҫӗнтернӗ. Чӑваш Енри участковӑй Раҫҫерйи конкурса хутшӑнӗ.
Николай Шамбулин — полици капитанӗ. Шалти ӗҫсен пайӗнче 14 ҫул тӑрӑшать, ҫав шутран 10 ҫул ытларах — участковӑй пулса. Шамбулин участковӑй 6 ялти йӗркелӗхе тытса тӑрать. Унӑн участокӗнче 4200-е яхӑн ҫын пурӑнать. Пушӑ вӑхӑта вӑл ҫемьепе ирттерме кӑмӑлать. Инна мӑшӑрӗпе вӗсен 3 ҫулхи ывӑла, Димитрие, ӳстереҫҫӗ. Май килсенех Николай Шамбулин пулла каять.
Чӑваш Енре «Лидер XXI века» (чӑв. XXI ӗмӗрти ертӳҫӗ) пӗтӗм Раҫҫейри конкурсӑн республика тапхӑрӗнчи ҫӗнтерӳҫӗсене палӑртнӑ.
«Ҫамрӑксен общество пӗрлешӗвӗсен 18-25 ҫулсенчи лидерӗ» номинацире 1-мӗш вырӑна Анна Кузьмина тухнӑ. Вӑл — И.Я. Яковлев ячӗллӗ Чӑваш патшалӑх педагогика университечӗн профсоюз организацийӗн пайташӗ.
«Ҫамрӑксен общество пӗрлешӗвӗн 26-30 ҫулсенчи лидерӗ» — Раҫҫейри студентсен отрячӗн пайташӗ Олеся Илларионова.
«Ҫамрӑксен общество пӗрлешӗвӗн 18-25 ҫулсенчи лидерӗ» — Диляра Вахитова (И.Я. Яковлев ячӗллӗ ЧППУри студентсен конгресӗ).
Ҫӗнтерӳҫӗсем Раҫҫейри конкурсӑн куҫӑн тапхӑрне хутшӑнӗҫ. Вӑл кӑҫалхи юпа-чӳк уйӑхӗсенче иртӗ. Республикӑри конкурсӑн куҫӑн тапхӑрне 10-ӑн хутшӑннӑ.
Чӑваш наци музейӗ «Амазонки поколения Z» (чӑв. Z ӑрури амазонкӑсем) сӑнӳкерчӗксен конкурсне пӗтӗмлетнӗ. Музейҫӑсем ӑна «Амазонки донских степей» (чӑв. Дон тӑрӑхӗнчи ҫеҫенхирхсенчи амазонкӑсем) курав иртнӗ май йӗркеленӗ.
Конкурса хутшӑнакансен курав экспоначӗсем тӗлӗнче ӳкерӗнмелле пулнӑ. Сӑнӳкерчӗке музейӑн тӗнче тетелӗнчи «Контактра» ушкӑнӗнчи фотоальбомра вырнаҫтарма тивнӗ.
Ӳкерӗннӗ чух бутафори хӗҫ-пӑшалӗпе: сӑнӑллӑ ухӑпа, авалхи салтаксен хӗҫӗпе тата сӑнӑпа — усӑ курма ирӗк панӑ.
Ҫӗнтерӳҫӗне тӗнче тетелӗнчи сасӑлав урлӑ палӑртнӑ. Мария Самделова 102 сасӑ пухса пӗрремӗш вырӑн йышӑннӑ, 55 сасӑллӑ Анна Казакова – иккӗмӗш, 41 сасӑллӑ Людмила Чулахова — виҫҫӗмӗш. «Ҫамрӑк амазонка» — Елизавета Мершина, «Амазонкӑсен тусӗ» — Илья Мершин.
Сӑнав лесничествин вӑрманҫи Владислав Васильев Раҫҫейри чи лайӑх патшалӑх вӑрман испекторӗ яти тивӗҫнӗ. Конкурс Наци вӑрман форумӗпе килӗшӳллӗн иртнӗ.
Владислав Васильев ку ята вӑрмансене пушартан сыхлас ыйтӑва пропагандӑланӑшӑн, вӑрман пирки ҫынсене каласа кӑтартнӑшӑн тивӗҫнӗ. Вӑл 5 тӑрӑшнипе 320 ытла памяткӑпа буклет саланнӑ, шкул ачисемпе 10 урок ирттернӗ, халӑхпа 250 ытла калаҫу, лекци йӗркеленӗ. Ҫавӑн пекех участковӑй 5 статья пичетлесе кӑларас ӗҫе хутшӑннӑ.
Палӑртмалла: унӑн территорийӗнче «Чӗрӗ ҫутҫанталӑкӑн йывӑҫ-палӑкӗ» ӳсет. Вӑл – республикӑри ватӑ юман
Раҫҫейри кӗнеке кӑларакансен ассоциацийӗ «Лучшие книги года» (чӑв. Ҫулталӑкри чи лайӑх кӗнеке) конкурса пӗтӗмлетнӗ. Издательство ӑмӑртӑвӗ кӑҫал 28-мӗш хут иртнӗ. Унта 153 издательство хутшӑннӑ. Конкурса вӗсем 700 ытла кӗнеке тӑратнӑ.
Экспертсем Чӑваш Енри виҫӗ кӗнекене Раҫҫейри чи лайӑх 50 кӑларӑм йышне кӗртнӗ. Вӗсен шутӗнче — Ю.В. Викторовӑн «Чувашская станковая живопись» монографийӗ, КВ. Ивановӑн «Нарспи» поэми, чӑваш халӑх юмахӗсен «Золотая сумка» пуххи.
«Чувашская станковая живопись» кӗнекене Чӑваш патшалӑх ӳнер музейӗн фондӗнчи фоторепродукцисемпе капӑрлатнӑ. «Нарспи» вара пӗлтӗр пичетленнӗ. Поэмӑна унта чӑвашла, вырӑсла тата акӑлчанла кун ҫути кӑтартнӑ. Ӳкерчӗксемпе ӳкерчӗксен фрагменчӗн авторӗ — Анатолий Миттов живопись ӑсти тата график. «Золотая сумка» юмахсен пуххине Раҫҫей тава тивӗҫлӗ художникӗ Виктор Бритвин илемлетнӗ.
Юпа уйӑхӗн 5-мӗшӗнче Чӑваш Ен Элтеперӗ Михаил Игнатьев ташӑ спорчӗн ӑмӑртӑвне савӑнӑҫлӑ лару-тӑрура уҫма хутшӑннӑ. Ташлакансем республика пуҫлӑхӗн кубокӗшӗн тупӑшаҫҫӗ.
Михаил Игнатьев шухӑшланӑ тӑрӑх, ташӑ спорчӗ республикӑра анлӑ сарӑлнӑ. «Чылай енчен ҫакӑнта пирӗн тренерсен, педагогсен, ашшӗ-амӑшӗн тата, паллах, ташлакансен хӑйсен тӳпи. Чӑваш ҫӗрӗ ҫинче ют регионсенчи ташӑҫӑсене тата тӳресене курма хавас. Ӑнӑҫу сунатӑп сире, ҫӗнӗ ҫитӗнӳсем. Эсир — маттурсем. Малашне те ҫапла пултӑр!» — тенӗ Михаил Игнатьев.
Пӗтӗм Раҫҫейри ташӑ спорчӗн тата акробатика рок-н-ролӗн тӳресен комитечӗн пайташӗ, ӑмӑртӑвӑн тӗп тӳри Ирина Лисенкова йӗркелӳҫӗсене тата Михаил Игнатьев Элтепере тав тунӑ.
Ӑмӑртӑвӑ 7 ҫултан пуҫласа 20 ҫулччсенхисем тата аслӑраххисем пухӑннӑ. Вӗсем икӗ кун ташлӗҫ. Ташӑҫӑсене ҫуьне кура тӑватӑ ушкӑна пайласа хаклӗҫ.
Нумаях пулмасть Чечняри Грозный хулинче «Раҫҫейри ҫулталӑк вӗрентекенӗ» конкурс иртнӗ. 15 лауреата савӑнӑҫлӑ лару-тӑрура чысланӑ. Палӑртма кӑмӑллӑ: вӗсен йышне пирӗн ентеш те, Вӑрнарти 2-мӗш шкулта акӑлчан чӗлхине вӗрентекен Ольга Физер, лекнӗ.
Лауреатсен лӑпланса ларма вӑхӑт ҫук. Малта – куҫӑн майпа иртекен тур. Вӑл авӑн уйӑхӗн 29-30-мӗшӗсенче иртет. Ыран, юпа уйӑхӗн 1-мӗшӗнче, ҫак турта ҫӗнтернӗ 5 ҫыннӑн ячӗ паллӑ пулӗ.
Юпан 3-мӗшӗнче Мускавра куҫӑн майпа виҫҫӗмӗш тур иртӗ. Ҫӗнтерӳҫӗсемпе призерсене Патшалӑх Кремль керменӗнче юпан 4-мӗшӗнче чыслӗҫ.
Сочи хулинче Пӗтӗм тӗнчери ачасемпе ҫамрӑксен «Ҫӗнӗ ҫырансем» пултарулӑх конкурсӗ иртнӗ. Шупашкарти Воробьев ячӗллӗ ачасен 2-мӗш музыка шкулӗнче сӗрме купӑс класӗнче вӗренекен Александра Николаева пысӑк наградӑна тивӗҫнӗ.
Хӗрачан вӗрентекенӗ – Наталья Серегина. Пӗтӗм тӗнче шайӗнчи конкурсра гран-при илни 11 ҫулти Алескандрӑшӑн – пысӑк ҫитӗнӳ. Саша конкурса хутшӑнса «Планета дарований» фонд пулӑшнипе йӗркеленекен тӗнче шайӗнчи «Пултарулӑх юхӑмӗ» проекта та хутшӑннӑ.
Палӑртмалла: Александра Николаева Раҫҫей тата тӗнче шайӗнчи конкурссенче нумай хутчен ҫӗнтернӗ.
Ҫурла уйӑхӗн вӗҫӗнче Хусанта «WorldSkills» 45-мӗш тӗнче чемпионачӗ иртнине Чӑваш халӑх сайчӗ пӗлтернӗччӗ. Аса илтерер, унта Шупашкарти Евгений Краснов медальона тивӗҫнӗччӗ.
Каччӑна Чӑваш Ен Элтеперӗ Михаил Игнатьев Инстаграмра саламланӑччӗ. «Евгения саламлатӑп тата унӑн ашшӗ-амӑшӗпе педагогӗсене профессионал хатӗрленӗшӗн тав тӑватӑп!», — тесе ҫырнӑччӗ вӑл Инстаграмри хӑйӗн страницинче.
Халӗ Михаил Игнатьев Элтепер Евгений Краснова 40 пин тенкӗ преми пама йышӑннӑ. Ҫавӑн ҫинчен калакан хушӑва республика ертӳҫи паян алӑ пуснӑ. Документа ЧР влаҫ органӗсен официаллӑ порталӗнче вырнаҫтарнӑ.
Евгений Краснов — Шупашкарти апатлану технологийӗпе коммерцин техникумӗн производство вӗрентӗвӗн мастерӗ. Чемпионта вӑл Раҫҫейӗн наци командин йышӗнче, «Кондитер ӗҫӗ» компетенцире, хутшӑннӑ. Ку енӗпе 23 ҫын тупӑшнӑ. Конкурссенче Евгений 700 ытла балл пухнӑ.
-1.7 °C