«Ҫанталӑк 21» порталти сӑн

Юпа уйӑхӗ кун пек ӑшӑ та уяр тӑнине астумастӑр-и? Астумалла та мар, мӗншӗн тесен кун пекки тахҫанах пулман. «Ҫанталӑк 21» сайт пӗлтернӗ тӑрӑх, кӑҫал юпа уйӑхӗ рекорд лартма пултарӗ. Кун валли юлнӑ 9 кунра сывлӑш температури вӑтамран 5,1 градус ӑшӑ пулмалла.

Гидрометцентр пӗлтернӗ тӑрӑх вара, ҫитес 10 кунра Чӑваш Республикинче вӑтам сывлӑш температури 6 градус ӑшӑ пулӗ. Ку – климат норминчен 4 градус ӑшӑрах.

Уйӑх вӗҫӗччен ҫумӑр та, юр та ҫумӗ. Кун пек типӗ юпа уйӑхӗ 1961 ҫулта тата 1987 ҫулта пулнӑ. 39 ҫул каялла юпа уйӑхӗн 1-2-мӗшӗсенче кӑна ҫумӑр ҫунӑ.

Шӑматкун 11-16 градус ӑшӑ пулӗ. Кӑнтӑрла ҫил вӑйланӗ те каҫ енне лӑпланӗ, ҫавна май тӑм ӳкме пултарать.

Малтанлӑха пӗлтернӗ тӑрӑх, кун пек ҫанталӑк ҫитес эрне тӑршшӗпех пулӗ. Чӳк уйӑхӗн пуҫламӑшӗнче кӑна сивӗтӗ.

#ҫутҫанталӑк, #синоптиксем, #ҫанталӑк