Григорий Сергеев

Шупашкар ҫыннине Сартура РФ Президенчӗн тулли полномочиллӗ полпречӗ пулма шаннӑ. Ҫав ӗҫе Григорий Сергеев пурнӑҫлӗ.

Григорий Витальевич 1983 ҫулта Шупашкарта ҫуралнӑ. Кӑҫалхи ҫӗртме уйӑхӗн 6-мӗшӗнче ӑна Сарту тӑрӑхӗнче полпред тивӗҫне шаннӑ. Ҫурла уйӑхӗн 6-мӗшӗнче ӑна полпред пулма ҫирӗплетнӗ.

Григорий Сергеев 2005 ҫулхи юпа уйӑхӗнчен пуҫласа Чӑваш Енӗн Президенчӗн Администрацийӗнче патшалӑх граждан службин тата кадрсен пайӗнче тӗп специалистӗнче, консультантра ӗҫленӗ. 2008 ҫулхи нарӑс уйӑхӗнче ӑна маларах асӑннӑ пайри патшалӑх службин секторӗн заведующине лартнӑ. Ҫав ҫулхи ҫурла уйӑхӗнче вӑл унта пай пуҫлӑхӗ пулса тӑнӑ. 2009 ҫулхи ҫурла уйӑхӗнче РФ Президенчӗн Атӑлҫи федераци округӗнчи полпредствинче кадр ыйтӑвӗ, патшалӑх награди тата патшалӑх служби енӗпе канашҫӑра тӑрӑшма тытӑннӑ. Чулхула облаҫӗн полпречӗ те пулнӑ.

Чӑваш Ен Элтеперӗ Михаил Игнатьев Атӑл хӗррине уҫӑлма тухнӑ.

Тӗрӗссипе, унччен те вӑл сывӑ пурнӑҫ йӑли-йӗркине тытса пынӑ-ха, спортпа туслипе палӑрать. Хӗлле йӗлтӗрпе, ҫулла ролик конькипе тата велосипедпа ярӑнать. Халӗ вӑл каллех Атӑл хӗррине уҫӑлма тухнӑ. Спорт тумӗ тӑхӑннӑ, хаваслӑ сӑнлӑ Элтепер ҫынсемпе калаҫнӑ, вӗсемпе сӑн ӳкерӗннӗ. Сӑн ӳкерчӗксен айне: «Хастар тата позитивлӑ ҫынсем ҫыран хӗрринче яланхиллех. Атӑл вӑй парать!» — тесе ҫырнӑ.

Сӑн ӳкерчӗксене пӑхсан Элтепер мӗнпе ярӑнни паллӑ мар. Вӑл, ахӑртнех, уҫӑлса ҫӳренӗ.

Атӑл ҫыранӗ хӗрринчи сӑн ӳкерчӗксене Инстаграма паян, ҫурла уйӑхӗн 1-мӗшӗнче, ҫур сехет каярах вырнаҫтарнӑ. Сӑн ӳкерчӗксен айне ҫак самантра тӑватӑ ҫын комментари ҫырнӑ.

forum.na-svyazi.ru сайтран илнӗ сӑнӳкерчӗк

Шупашкар хула администрацийӗн пуҫлӑхӗ Алексей Ладыков пӗлтӗр тупӑш декларацийӗнче банк счечӗсене туллин кӑтартман-мӗн. Ҫакна прокуратура тӗрӗслев хыҫҫӑн тупса палӑртнӑ.

Ведомство администраци ертӳҫи тӗрӗс мар кӑтартусем панине палӑртсан Шупашкарти депутатсен хула пухӑвне представлени панӑ. Хула пухӑвӗ Алексей Ладыкова дисциплинарлӑ майпа явап тыттарнӑ. Мӗнле майпа явап тыттарнине туллин кӑтартман. Саккунпа килӗшӳллӗн, муниципалитет тӳре-шарине асӑрхаттару, выговор пама е ӗҫрен кӑларма пултараҫҫӗ.

Аса илтерер: Алексей Ладыков пӗлтӗр тӗп ӗҫ вырӑнӗнче 1 465 496 тенкӗ ӗҫлесе илнӗ, хушма тупӑш 3 пинпе танлашнӑ.

ЧР Элтеперӗ Питӗрте пульницӑра кардиологи уйрӑмӗнче сипленни пирки хыпарланӑччӗ. Михаил Игнатьев Инстаграмри страницинче хӑйӗн пирки тӑтӑшах пӗлтерсе тӑрать. Хальхинче те ҫӗнӗ хыпар тупӑннӑ – Михаил Васильевич Чӑваш Ене таврӑннӑ.

Утӑ уйӑхӗн 27-мӗшӗнче, паян, Михаил Васильвич страницинче ҫапла ҫырнӑ: «Чӑваш Ене таврӑнтӑм. Пурне те тӑван тӑрӑхра салам яратӑп!»

Аса илтерер: ЧР Элтеперӗ Питӗрти пӗр пульницӑра кардиологи уйрӑменче сипленнӗ. Администраци ертӳҫи Юрий Васильевич хыпарланӑ тӑрӑх, ку планпа пӑхса хунӑ сиплев пулнӑ. Анчах Элтепер пульницӑна ӗҫлӗ тӗлпулу хыҫҫӑн ӑнсӑртран лекнӗ.

Сергей Григорьев

Чӑваш Енӗн Раҫей Федерацийӗн Президенчӗ ҫумӗнчи полпречӗн ҫумӗ пулма Сергей Григорьева шаннӑ. Ку хушӑва паян, утӑ уйӑхӗн 22-мӗшӗнче, республикӑн премьер-министрӗ Иван Моторин алӑ пуснӑ. Ӗҫлӗ хута Чӑваш Енӗн влаҫ органӗсен официаллӑ порталӗнчи «Законодательство» (чӑв. Саккунсен пуххи) ярӑма вырнаҫтарнӑ.

Сергей Вениаминович Григорьев унччен Чӑваш Енӗн экономика аталанӑвӗн, промышленноҫӑн тата суту-илӗвӗн министрӗн ҫумӗ пулса тӑрӑшнӑ. Ҫав пукана ӑна 2017 ҫулхи ҫу уйӑхӗнче шаннӑччӗ. Тӗнче тетелӗнчи уҫӑ ҫӑлкуҫсем пӗлтернӗ тӑрӑх, министерствӑри яваплӑ портфельпе ҫӳреме пуҫличчен Сергей Григорьев Чӑваш Енӗн Суту-илӳпе промышленность палатин Професси квалификацийӗсен сертификацийӗн пуҫлӑхӗ пулнӑ.

ЧР Элтеперӗ Михаил Игнатьев Питӗре ӗҫпе кайсан пульницӑна кардиологи уйрӑмне лекни пирки Чӑваш халӑх сайчӗ темиҫе хут та хыпарларӗ.

Шӑматкун, утӑ уйӑхӗн 20-мӗшӗнче, Юрий Шакеев блогер Питӗре Элтепер патне пульницӑна кайнӑччӗ. Турра шӗкӗр, Михаил Васильевич хӑйне аван туять иккен. Ҫакӑн пирки хайхи-майхи блогер та пӗлтернӗччӗ. Паян ЧР Правительствинче тунтикунсерен иртекен канашлура та ҫавӑн пиркиех каланӑ. Михаил Васильевич патне республикӑн сывлӑх сыхлав министрӗ Владимир Викторов ҫитсе килнӗ. Михаил Игнатьев министрсене телефонпа та ӗҫлӗ хушусем парать иккен.

Юрий Васильев вице-премьер — ЧР Элтеперӗн Администрацийӗн Ертӳҫи Юрий Васильев Элтепере курас тесе Питӗре чӑваш блогерӗ кайнине ырламан. Чирлесси, чӑн та, такамӑн та пулать. Пульницӑра концерт кӑтартмаҫҫӗ — курмалли ним те ҫук.

Хамӑр енчен ҫапах та ҫакна палӑртар: Михаил Игнатьев чирленине Элтеперӗн пресс-служби пытарма хӑтланни МИХсенче тӗрлӗ сӑмах ҫуратрӗ.

ЧР Элтеперӗ Михаил Игнатьев Питӗре ӗҫпе кайсан пульницӑна кардиологи уйрӑмне лекни пирки хыпарланӑччӗ. «Про Город» хаҫатра ҫырнӑ тӑрӑх, Михаил Васильевича операци тунӑ. Кун пирки кӑларӑма халӑх корреспонденчӗ хыпарланӑ.

Михаил Игнатьев операци хыҫҫӑн хӑйне лайӑхах туять. Паян Юрий Шакеев Питӗре Элтепер патне пульницӑна кайнӑ-мӗн. «Элтепер операци хыҫҫӑн хӑйне лайӑхах туять. Вӑл кардиологи уйрӑмӗнче выртать», - ҫырнӑ вӑл.

Михаил Васильевич утӑ уйӑхӗн 31-мӗшӗччен отпускра пулӗ. Унӑн тивӗҫӗсене ЧР Министрсен Кабинечӗн председателӗ Иван Моторин пурнӑҫлӗ.

Ӗнер Питӗрте Раҫҫейри тата Беларуҫри регионсен форумӗн пленарлӑ ларӑвӗ иртнӗ. Унта РФ Президенчӗ Владимир Путин, Беларуҫ президенчӗ Александр Лукашенко, ытти тӳре-шара, регионсен пуҫлӑхӗсем хутшӑннӑ. Ҫав шутра – ЧР Элтеперӗ Михаил Игнатьев та.

Cheb.media пӗлнӗ тӑрӑх, официаллӑ пӗр тӗлпулу хыҫҫӑн Михаил Игнатьева Мариинка пульницин кардиологи уйрӑмне илсе кайнӑ. Ку информацие асӑннӑ портал журналисчӗсене Питерти МИХсенчи ӗҫтешӗсем те ҫирӗплетнӗ.

Cheb.media журналисчӗсем кун пирки Элтеперӗн пресс-секретарӗнчен Олег Сидоровран ыйтса пӗлнӗ. Вӑл каланӑ тӑрӑх, утӑ уйӑхӗн 18-мӗшӗнчен Михаил Игнатьев отпускра, Чӑваш Ен тулашӗнче диспансеризаци тухать.

Портал журналисчӗсем лару-тӑрӑва сӑнаса тӑраҫҫӗ. «Палӑртмалла, хальлӗхе Питӗрти официаллӑ репортажсенчи сӑнсенче Михаил Игнатьева тупаймарӑмӑр. Унӑн пресс-секретарӗн сӑнӳкерчӗкӗ ҫеҫ пур», - ҫапла ҫырнӑ порталта.

Иркутскра хула администрацийӗн ертӳҫине малалла мӗнле суйлассине сӳтсе явнӑ. Хула Уставне улшӑну кӗртесшӗн. 35-мӗш статьяна. Улшӑну кӗртнӗ хыҫҫӑн хула ертӳҫине вӑрттӑн сасӑласа суйласшӑн. Халӗ уҫҫӑн сасӑлаҫҫӗ. Анчах ҫапла суйлассине пурте ырламаҫҫӗ. Устава улӑштарассине халӑхпа сӳтсе явнӑ. Педагогсемпе, общественниксемпе, ветерансемпе, спортсменсен организацийӗсен пайташӗсемпе, наци-культура автономийӗн ертӳҫисемпе. Иркутскри Вероника-Атӑлпи Тимофеева Чунташ та пулнӑ.

Устава улӑштарассине сӳтсе явма мӗнпур депутат хутшӑнман. Ҫакӑнтан тӗлӗннӗ Вероника-Атӑлпи Тимофеева Чунташ. Сасӑлава вӑрттӑн йӗркелесшӗн депутатсем. Вӗсем уҫҫӑн суйлама хӑраҫҫӗ. Пынисем ҫапла каланӑ. Чӑваш хӗрарӑмӗ хальхи созыври депутатсен йышӑнӑвӗ ҫӗнӗ созыврисене тивет тесе каланӑ. Депутатсем мӗнле сасӑланине халӑхӑн пӗлмелле тенӗ вӑл. Вӑрттӑн суйласан кам мӗнле сасӑланине пӗлеймӗн.

Александр Андреев депутат

Нумаях пулмасть чӑваш парламентӗнче депутатсенчен пӗрне тишкернӗ. «Хыпар» хаҫатра пӗлтернӗ тӑрӑх, утӑ уйӑхӗн 11-мӗшӗнче ЧР Патшалӑх Канашӗн Патшалӑх строительстви, вырӑнти хӑй тытӑмлӑх, Регламент тата депутат этики енӗпе ӗҫлекен комиссийӗн ларӑвӗ иртнӗ. Ӑна Александр Федотов вице-спикер ертсе пынӑ.

Комитет пайташӗсем Александр Андреев «халӑх тарҫи» депутат этикин правилисене мӗнле пӑхӑннине пӑхса тухнӑ. Ҫапла тума вӗсене юстици тата пурлӑх хутшӑнӑвӗсен министрӗ Наталья Тимофеева сӗннӗ иккен.

Андреев депутат Шупашкар районӗнчи Ҫӗньял ял тӑрӑхӗнчи ҫӗре ял хуҫалӑх ҫӗрӗсен категорийӗнчен промышленноҫ ҫӗрӗсен категорине куҫарни пирки тӗрӗс мар калаҫнӑ-мӗн. Ҫавна вӑл парламентӑн черетлӗ 33-мӗш сессийӗнче те каланӑ иккен, ҫавӑн пекех МИХсенче, тӗнче тетелӗнче хыпарланӑ-мӗн.

Маларах асӑннӑ комитет пайташӗсем Андреев депутат республикӑн ӗҫ тӑвакан влаҫ органӗсен ӗҫне тӗрӗс мар информацие тӗпе хурса, вырӑнти хӑй тытӑмлӑх органӗсен халӑх итлевӗсем ирттермелли полномочийӗсене шута илмесӗр критикленӗ тесе хакланӑ. Александр Андреева хайхисем тӗрӗс фактсемпе усӑ курма сӗннӗ.

Малалла...