lenin.cap.ru сӑнӳкерчӗкӗ

Пысӑк хуласенче пурӑнакансем машинӑсене ниҫта лартма аптӑрани час-часах пулать. Ятарлӑ парковкӑсем ҫывӑхра мар, кашни килсерен тенӗ пек автомобиль.

Уйрӑмах сӗмсӗррисем нумай хваттерлӗ ҫурт умӗнчи лаптӑка хӑйсем тӗллӗн ярса илеҫҫӗ. Ҫав вырӑнта машина номерне ҫырса ҫакса хураҫҫӗ, тӗрлӗ майпа (кивӗ кустӑрма хурса, тимӗртен карта тытса) паллӑ тӑваҫҫӗ.

Шупашкарти Эгер бульварӗнчи, Кӑкшӑм, Хусанкай урамӗсенчи, 9-мӗш пилӗкҫуллӑх проспектӗнчи ҫавӑн пек картасемпе кустӑрмасене, машина номерӗсене ҫырса ҫакса хунисене хулари яваплӑ службӑсем сӳтсе тиесе кайнӑ.

"Чаваш Ен" ПТРК тунӑ видео скринӗ

Шупашкарта пурӑнакан 12 ҫулти Володя Майоров юр тасатмалли машинӑпа ярӑнса курма ӗмӗтленнӗ. Вӑл мӗн пӗчӗкренех техникӑпа кӑсӑкланать.

Унӑн ӗмӗтне РФ Президенчӗн Атӑлҫи федераци тӑрӑхӗнчи тулли праваллӑ элчи Игорь Комаров пурнӑҫланӑ. Володя патне Хӗл мучипе Юрпике килнӗ, Ҫӗнӗ ҫулпа саламласа пылак парне панӑ. Унтан КамАЗ водителӗ ачана кабинӑна лартнӑ. Ҫапла Володя юр мӗнле тасатнине паллашма пултарнӑ.

Володя хӑй те, унӑн амӑшӗ те Елена Майорова питӗ савӑннӑ. Амӑшӗ «Ӗмӗтсен чӑрӑшӗ» питӗ лайӑх акци пулнине палӑртнӑ.

forum.na-svyazi.ru сайтри сӑн

Шупашкарти 43-мӗш маршрутпа ҫӳрекен микроавтобус пассажирӗсен йышӗнче Хӗл Мучи пулнӑ. Вӑл салонри ҫынсене канфетпа хӑналанӑ. Лешсем вара ӑна юрӑ юрласа, сӑвӑ каласа панӑ. Кун пирки «Ҫыхӑнура» портал пӗлтерет.

Сӑмах май, Ҫӗнӗ ҫул умӗн «Победа» авиакомпани Хӗл Мучин тата Юр пикен тумӗпе килнӗ пассажира самолетпа тӳлевсӗрех вӗҫме ирӗк парассине пӗлтернӗ. Ку акци раштавӑн 31-мӗшӗнче пуҫланӗ те кӑрлачӑн 2-мӗшӗнче вӗҫленӗ.

Тӳлевсӗр вырӑнсене пушӑ вырӑн пулсан кӑна параҫҫӗ.

Ҫӗнӗ ҫул каҫхине Шупашкарти общество транспорчӗ мӗнле ҫӳрӗ? Кун пирки хула администрацийӗнче иртнӗ планеркӑра калаҫнӑ.

Ҫӗнӗ ҫул каҫхине троллейбуссем те, автобуссем те ҫур ҫӗр иртни 1 сехетчен ҫӳрӗҫ. 5-мӗш, 12-мӗш, 20-мӗш, 24-мӗш, 30-мӗш тата 65-мӗш автобуссем ҫур ҫӗр иртиччен ҫӳремӗҫ.

Кӑрлачӑн 1-2-мӗшӗсенче хулара вырсарникунхи графикпе 130 троллейбус ҫӳрӗ, кӑрлачӑн 3-6-мӗшӗсенче - 138 троллейбус, кӑрлачӑн 6-7-мӗшӗсенче - 145 троллейбус.

Ҫӗнтернӗ ӗҫсенчен пӗри. «Ҫыхӑнура» канашлуран

Шупашкарта Сӑр тата Хусан хӳтӗлев чиккисене халалланӑ палӑк пуласси пирки сайтра хыпарланӑччӗ. Кун тӗлӗшпе конкурс та ирттернӗ.

Виҫӗ ҫӗнтерӳҫӗ ӗҫне суйланӑ, вӗсемпе усӑ курӗҫ. Кун пирки Шупашкар хула администрацийӗ пӗлтерет. Ҫӗнтерӳҫӗсен йышӗнче – Альфред Ибрагимов, Семен Удяков тата Владимир Нагорнов архитекторсем.

Сӑмах май, Сӑр тата Хусан хӳтӗлев чиккисене халалланӑ палӑк Куславкка районӗнче те пур. Ӑна кӑҫал утӑ уйӑхӗн 1-мӗшӗнче уҫнӑ.

pravoved-plus.msk.ru сайтри сӑн

Шупашкарта пурӑнакан 36 ҫулти арҫын ывӑлӗн класс ертӳҫине сӑмахпа хӑртса пӗтернӗ. Куншӑн ун судра явап тытма тивнӗ.

Прокуратура пӗлтернӗ тӑрӑх, ывӑлӗ 9-мӗш класра вӗренет. Авӑн уйӑхӗнче шкул ачисем хирӗҫсе кайнӑ. Кун хыҫҫӑн пӗрин ашшӗ вӗрентекен патне шӑнкӑравланӑ. Ун чухне вӑл 30 ҫул ӗҫлекен педагога ят-сумне, чысне пӗтерекен сӑмахсем каласа пӗтернӗ. Ку сӑмахсене класри ытти ача та илтнӗ.

Арҫынна куншӑн 3500 тенкӗлӗх штрафланӑ. Суд йышӑнӑвӗ вӑя кӗмен-ха.

ШӖМ архивӗнчи сӑн

Шупашкарти пӗр аслӑ шкулта вӗренекен студентка, Египетран килнӗскер, лавккаран япаласем вӑрласа тухма хӑтланнӑ. Алӑк патӗнче ӑна хуралҫӑсем тытса чарнӑ.

Ун тӗлӗшпе пуҫарнӑ пуҫиле ӗҫе суда ярса панӑ. Следстви версийӗ тӑрӑх, юпан 31-мӗшӗнче вӑл Трактор тӑвакансен проспектӗнче вырнаҫнӑ лавккаран тӗрлӗ япала вӑрласа тухма хӑтланнӑ, вӗсене кутамккана чикнӗ. Урапа ҫинче выртакан таваршӑн кӑна укҫа тӳленӗ вӑл. Анчах алӑк патӗнче ӑна хуралҫӑсем тытса чарнӑ.

дпг38.рф сайтри сӑн

Ҫӗнӗ Шупашкарта пурӑнакан 41 ҫулти арҫын 11 ҫул хӗрӗшӗн алимент тӳлемен, пулӑшман. Парӑм 557 пин тенкӗ пухӑннӑ. Ӑна административлӑ майпа та, уголовлӑ майпа та явап тыттарнӑ.

Арҫыннӑн хваттер сутма тӑрсан алимента тӳлемех тивнӗ. Ҫӗнӗ Шупашарта унӑн хваттерте 1/4 пай чухлӗ харпӑрлӑх пур-мӗн. Анчах парӑм пуррипе вӑл ӑна сутайман. Кун хыҫҫӑн ун часах алимента татма укҫа тупӑннӑ.

"Про Город" сайтран илнӗ сӑн

Шупашкарта ҫаппа-ҫарамас арҫын 6-мӗш хутран тухса ӳксе чӗрӗ юлнӑ. Кун пирки «Про Город» хаҫата халӑх корреспонденчӗ пӗлтернӗ.

Ку Трактор тӑвакансен проспектӗнчи 29-мӗш ҫуртра пулнӑ. Курнӑ ҫынсем каланӑ тӑрӑх, арҫын ӳсӗр пулнӑ, 6-мӗш хутран ӳкнӗ. Юрать-ха, вӑл подъезд умне купаласа хунӑ юр купи ҫине персе аннӑ. Ҫакӑ унӑн пурнӑҫне ҫӑлнӑ ӗнтӗ.

Васкавлӑ медпулӑшу килсен арҫынна тухтӑрсем пульницӑна илсе кайнӑ.

gcheb.cap.ru сӑнӳкерчӗкӗ

Кӑҫалхи юлашки ӗҫ кунӗнче, раштавӑн 30-мӗшӗнче, Шупашкарта Хӗл Мучиллӗ ретро-троллейбус ҫула тухӗ. Вӑл 1-мӗш номерлӗ маршрутпа ирхи 8 сехетрен пуҫласа 17 сехет те 30 минутчен ҫӳрӗ.

Хула урамӗсем тӑрӑх 1964 ҫулта пуҫласа ҫула тухнӑ «ЗИУ-5» маркӑллӑ троллейбус хутлӗ. Ӑна гирляндӑпа тата мишурапа капӑрлатӗҫ. Пассажирсене Хӗл Мучисӗр пуҫне Юрпике те савӑнтарӗ.

Ретро-троллейбус маршрутне ҫав кун buscheb.ru сайтра е «Ӑслӑ транспорт» приложенире сӑнаса тӑма май килӗ, ӑна «Р» саспаллипе палӑртӗҫ.