Раҫҫейӗн Инкеклӗ ӗҫсен министерствин Чӑваш Енри Тӗп управленийӗнче пӗлтернӗ тӑрӑх, ыран, ҫӗртме уйӑхӗн 11-мӗшӗнче, пирӗн республикӑра вӑйлӑ ҫил тухма, аслати авӑтма пултарӗ. Аслати вӑхӑтӗнче ҫил ҫеккунтра 15 метр хӑвӑртлӑхпа вӗрӗ. Ҫакӑн пек асӑрхаттарать маларах асӑннӑ управленин Инкеклӗ лару-тӑру управленийӗн центрӗ.

Ҫил вӑйлӑ алхассан ҫутӑ пӑралукӗсем татӑлса каяс, ҫирӗп мар хуралтӑсем, ытти ҫавӑн йышши конструкцисем тӳнсе каяс хӑрушлӑх пур. Ҫавӑнпа та асӑрханмалла, сыхланмалла. Яваплӑ службӑсен уйрӑмах сыхӑ тӑмалла.

«Чӑваш Енри ҫанталӑк» проект синоптикӗсем ҫуллахи ҫанталӑк мӗнле пулассине палӑртнӑ. Вӗсем пӗлтернӗ тӑрӑх, кӑҫал вӑл климатпа килӗшӳллӗн пулӗ.

Ҫӗртме тата ҫурла уйӑхӗсенче ҫумӑр нормӑран ытларах ҫӑвӗ. Утӑ уйӑхӗнче вара нормӑпа килӗшӳллӗн пулӗ. Ку уйӑхри сывлӑш температури вӑтамран 17 градус пулӗ.

Утӑ уйӑхӗ чи ӑшши тата нӳрӗкки пулӗ. Сывлӑш температури вӑтамран 20 градус кӑтартӗ, ҫурла уйӑхӗнче – 18 градус.

Улатӑрта икӗ эрнене яхӑн вӑйлӑ ҫумӑр тавраш пулман. Паян унта курӑкпа тата пахчаҫимӗҫ кӗтнӗ ҫумӑр ҫуса савӑнтарнӑ. Ҫутҫанталӑкӑн хӑйӗн саккунӗ те – Улатӑрта пӑр та ҫунӑ. Шултра пӑра ҫынсем ӳкерсе илнӗ. Сӑнӳкерчӗкре самай пысӑк пӑр купи сӑнланнӑ.

Ҫитес вӑхӑтра Улатӑрпа ҫывӑх районсенче те пӑр ҫума пултарӗ. Кун пек хӑрушлӑх Патӑрьелпе Шӑмӑршӑ районӗсенче пурри пирки «Погода в Чувашии» (чӑв. Чӑваш Енри ҫутҫанталӑк) проект авторӗ Владимир Михайлов пӗлтернӗ.

w-dog.ru сайтри сён

Икӗ эрнене яхӑн ӗнтӗ республикӑра ҫумӑр ҫуманччӗ. Ӗнер вырӑнӑн-вырӑнӑн ҫумӑр ҫукаларӗ.

«Чӑваш Енри ҫанталӑк» проект синоптикӗсем пӗлтернӗ тӑрӑх, пирӗн пата Хура тинӗҫ ҫывӑхӗнчи циклон килме пултарать. Уйрӑмах республикӑн хӗвел анӑҫ районӗсенче ҫумӑр ытларах ҫӑвӗ. Унта пӗр эрнере 1 тӑваткал метр ҫине 20 литр шыв ӳкме пултарӗ.

Ҫапах, синоптиксем систернӗ тӑрӑх, ҫуллахи шӑрӑхра ҫумӑр хӑш вырӑнта ҫӑвассине татӑклӑн калама ҫук. Пӗр ялта хӗвел пӑхнӑ хушӑра тепринче ҫумӑр чашлаттарма та пултарать.

Лайӑх хыпар: унчченхи пек ҫанталӑк тӑрук сивӗтмӗ. Ҫӗртмен 17-мӗшӗнче вара антициклон килӗ, 30 градус шӑрах тӑрӗ.

Ҫӗртме уйӑхӗ ӑшах мар пек. Синоптиксем лӑплантараҫҫӗ: кӗҫех шӑрӑх килӗ.

Тӳрех палӑртар: ӗнер Мурманск хулинче сывлӑш 28 градус таран ӑшӑннӑ. Ку хула валли ку – рекорд. Шӑпах ҫав енчен пирӗн пата ӑшӑ килет те.

Ыран ҫил лӑпланать, хушӑран ҫумӑр ҫума, аслати авӑтма пултарать, уйрӑмах – республикӑн кӑнтӑр енче. Шупашкарта ҫӗртмен 7, 8 тата 9-мӗшӗсенче ҫумӑр ҫума пултарӗ. Эрнен иккӗмӗш ҫурринче ҫумӑр ӳкме чарӑнӗ, сывлӑш температури 20-25 градус тӑрӗ.

Ҫӗртмен иккӗмӗш ҫурри шӑрӑх ҫанталӑкран пуҫланӗ. Термометр 30 градус е ытларах кӑтартӗ.

2010 ҫултанпа кӑҫалхи ҫу уйӑхӗ чи шӑрӑххи пулнӑ. Сывлӑш температури нормӑран 3 градус ытларах пулнӑ.

Ҫулла сивӗ ҫанталӑкран пуҫланчӗ. Ҫапах та синоптиксем шӑрӑх кунсем те пулассине систереҫҫӗ. Ҫӗртме уйӑхӗн 5-7-мӗшӗсенче ӑшӑтса илӗ. Декада вӗҫӗнче ҫумӑр вӑйлӑ ҫӑвӗ.

Иккӗмӗш декадӑра шӑрӑх сывлӑш килет, типӗ ҫанталӑк тӑрӗ. Ҫӗртме уйӑхӗн 16-17-мӗшӗсенче тата уйӑх вӗҫӗнче ҫумӑр ҫума пултарӗ. Ҫапах термометр 25-30 градус ӑшӑ кӑтартӗ.

Ҫуркунне вӗҫленсе пырать, урамра вара ҫуллахи ҫанталӑк хуҫаланать. Анчах синоптиксем ҫуркунне сивӗ ҫанталӑкпа пӗтессине пӗлтереҫҫӗ. Ан кулянӑр, вӑл нумайлӑха мар.

Ыран та паянхи пек ӑшӑ тӑрӗ, 25-30 градус пулӗ. Вырсарникун та ӑшӑ каймӗ-ха. Ҫапах кӑнтӑрла ҫумӑр ҫукалӗ, аслати авӑтма пултарӗ. Ҫил те вӑйланӗ.

Тунтикун 12-17 градус ҫеҫ тӑрӗ. Ытларикун ҫӗрле вырӑнӑн-вырӑнӑн тӑм ӳкес хӑрушлӑх пур.

Сивӗ ҫанталӑк нумайлӑха килмӗ. Ҫитес эрне варринче термометр 20 градус кӑтартӗ. Канмалли кунсем тӗлне вара сывлӑш 25 градус таран ӑшӑнӗ, ҫумӑр ҫумӗ.

news.nashbryansk.ru

Чӑваш Енре чылай вӑхӑт шӑрӑх ҫанталӑк тӑчӗ. Юлашки кунсенче кӑштах сивӗтрӗ, ҫумӑр та ҫурӗ.

«Чӑваш Енри ҫанталӑк» проект авторӗсем пӗлтернӗ тӑрӑх, кӗҫех республикӑна каллех сивӗ ҫанталӑк килӗ. Хальлӗхе, шӑматкунпа вырсарникун, 22-27 градус ӑшӑ тӑрӗ.

Унтан ҫанталӑк сивӗтӗ. Вырсарникун термометр 15-20 градус кӑтартӗ. Ҫитес эрнере вара тӑм ӳкме те пултарӗ.

Чӑваш Енри вӑрмансене сыхлама тӑхӑр грузовик туяннӑ. Ку тӗллевпе хыснаран 27,1 миллион тенкӗ уйӑрнӑ.

ГАЗ САДКО НЕКСТ йывӑр тиевлӗ машинӑсен кабинине 7 ҫын вырнаҫать. Вӑл ҫӳреме йывӑр вырӑна та кӗреет. Кузовне тент витнӗ.

Машинӑсене «Вӑрмансене упра» федераци проекчӗн «Экологи» наци проекчӗпе килӗшӳллӗн туяннӑ. Каярахпа грузовиксене пушар сӳнтермелли хатӗр-хӗтӗрпе, шыв тултармалли хатӗрпе тивӗҫтерме палӑртнӑ. Вӗсем, ЧР Ҫутҫанталӑк министерстви пӗлтернӗ тӑрӑх, вӑрмансене сыхлӗҫ.

Урамра ҫу уйӑхӗ мар, ҫулла тейӗн. Чӑнах та, ҫу кунӗсем ҫур уйӑх маларах ҫитрӗҫ. Анчах кун пек шӑрӑх хыҫҫӑн сивӗ пулса пахча ҫимӗҫе пӗтермест-и? Синоптиксем мӗн калаҫҫӗ?

Ҫитес эрнере те 30 градус шӑрӑх тӑрӗ. Ҫапах шыва кӗме тӑхтамалла. Сезон уҫӑлман, шыв та хальлӗхе ӑшӑнман. Ҫитес вахӑтра тӑм ӳкес хӑрушлӑх ҫук. Ҫӗрле те 15 градус ӑшӑ тӑрӗ. Ҫапах вырӑнӑн-вырӑнӑн ҫумӑр ҫума, ҫил вӑйланма пултарать.

Ҫу уйӑхӗн 18-19-мӗшӗсенче чи шӑрӑх кунсем пулӗҫ: 33 градуса ҫитӗ. Канмалли кунсем тӗлне 20-25 градуса анӗ. Хальлӗхе пӗлтернӗ тӑрӑх, сивӗтес умӗн ҫумӑр нумай ҫӑвӗ. Ку, ахӑртнех, уйӑх вӗҫӗнче пулӗ.