Iz.ru сайтри сӑнӳкерчӗк

Улатимӗр облаҫӗнче Чӑваш Енри ҫынсем аманнӑ. Вӗсем ӑҫтан ӑҫта кайма тухни хальлӗхе паллӑ мар.

Iz.ru сайтра пӗлтернӗ тӑрӑх, ҫул-йӗр ҫинчи инкек Ковров районӗнче сиксе тухнӑ. Ҫурҫӗр иртни икӗ сехет тӗлӗнче паян, юпа уйӑхӗн 16-мӗшӗнче, ытлари кун, ҫӑмӑл машинӑпа ГАЗель ҫапӑннӑ. «Атӑл» М-7 автоҫулӑн 248-мӗш километрӗнчи аварире тӑватӑ ҫын аманнӑ. Вӗсене пульницӑна сипленме илсе кайнӑ. Шар курнисем хушшинче ачасем пулман.

Аса илтерер, юпа уйӑхӗн 11-мӗшӗнче Шупашкар районӗнчи Карачура ялӗ патӗнчи М-7 федераци ҫулӗ ҫинче пысӑк инкек пулнӑччӗ. Усал ҫав хыпар федераци каналӗсем тӑрӑх ҫиҫӗмле хӑвӑртлӑхпа саланннӑччӗ. Аварире 11 ҫын пурнӑҫӗ (вӗсем Канашран Мускава ӗҫлеме кайма тухнӑччӗ) татӑлнӑччӗ.

Ҫак уйӑхӑн 11-мӗшӗнче Шупашкар районӗнч Карачура ялӗ патӗнчи М-7 федераци ҫулӗ ҫинче шар курнисене Чӑваш Ен хысни шучӗпе укҫа уйӑрнӑ. Юпа уйӑхӗн 15-мӗшӗ тӗлне ӑна пурне те парса пӗтернӗ. Ӗнер ӑна Тольяттинчен пиччӗшне пытарма килнӗ аппӑшне панӑ.

Чӑваш Енӗн Министрсен Кабинечӗн резерв фондӗнчен 3,2 миллион тенкӗ уйӑрма йышӑннӑччӗ. Вилнисен ҫемйисене ҫав укҫаран 250-шар пин тенкӗ тӳлеме, инкекре аманнисене 50-шар пин тенкӗ парас тенӗ.

Чӑваш Енӗн Ӗҫлев тата социаллӑ хӳтлӗх министерствинче пӗлтернӗ тӑрӑх, Социаллӑ старховани фончӗ урлӑ та укҫа илес шанчӑк пур. Анчах вӑл «кӗмӗл» официаллӑ майпа ӗҫленисене ҫеҫ лекӗ. Хальхи вӑхӑтра Чӑваш Енӗн Патшалӑхӑн ӗҫ инспекцийӗпе Роструд ҫавсен списокне палӑртать.

Хӗрарӑмсене ҫапса пӑрахакан арҫынна ҫирӗп режимлӑ колоние кирпӗч шутлама 11 ҫуллӑха ӑсатма йышӑннӑ.

Чӑваш Енри тӗпчевҫӗсем тата суд палӑртнӑ тӑрӑх, кӑҫалхи ҫу уйӑхӗн 4-мӗш тата 5-мӗш кунӗсенчи ҫӗрле арҫын Шупашкарта хӑйӗн паллаканӗн хваттерӗнче эрех ӗҫнӗ. Унта 39 ҫулти хӗрарӑм та пулнӑ. Сӑра сакки сарлака. Вӑл тепӗр чухне тулаштарать те. Арҫынпа хӗрарӑм хушшинче тавлашу сиксе тухнӑ. Вӑй питти хайхине 39 хутран кая мар тапса-ҫапса пӗтернӗ. Суранланнин чӗри ҫавӑнтах тапма чарӑннӑ. Ун хыҫҫӑн арҫын ӑна подъездри картлашка ҫине тухса пӑрахнӑ. Вилене подъезд ҫӑвакан хӗрарӑм асӑрханӑ.

Арҫын 2006 ҫулта пӗр хӗрарӑма хӗнесе пӗтернӗ иккен, лешӗ вилнӗ. Ҫавӑншӑн 8 ҫул тӗрмере ларнӑ. 2015 тата 2017 ҫулсенче вӑл вӑрланӑшӑн тата сывлӑха вӑтам сиен кӳнӗшӗн айӑпланнӑ.

Юлия Кулигина тунӑ сӑн

Паян, юпа уйӑхӗн 14-мӗшӗнче, 13 сехет ҫурӑра Тутарстанри ҫул ҫинче массӑллӑ авари пулнӑ. Унта Чӑваш Енри КамАЗ та лекнӗ.

Ҫакна курнӑ ҫынсем каланӑ тӑрӑх, Сӗве хулинчен инҫех мар пулнӑ ку. КамАЗ «Мазда» маркӑллӑ машина ҫине пырса кӗнӗ. Пысӑк машинӑн чӑваш номерӗсем пулнӑ.

Аварире «Маздӑна» икӗ пысӑк машина хӗстерсе лартнӑ. «Про Город» хаҫата ку авари пирки халӑх корреспонденчӗ каласа кӑтартнӑ. Вӑл шӑпах авари тӗлӗнчен иртсе кайнӑ. Ун чухне полици ҫитсе ӗлкӗреймен-ха.

Аварире ҫынсем вилни пирки хальлӗхе хыпар ҫук.

Ӗнер, юпа уйӑхӗн 13-мӗшӗнче, Муркаш районӗнче 24-ри ҫамрӑк сарӑмсӑр вилнӗ.

М-7 «Волга» (чӑв. Атӑл) ҫулӑн 629-мӗш километрӗнче, Муркаш районӗнчи Шомик ялӗ патӗнче, авари пулса иртнӗ. Кун пирки Чӑваш Енӗн Шалти ӗҫсен министерствин пресс-служби хыпарланӑ.

Малтанласа палӑртнӑ тӑрӑх, «Ауди» автомобиль грузовикӑн ҫурма прицепне айккипе пырса ҫапӑннӑ. Ун хыҫҫӑн вӑл ҫул айккинче чарӑннӑ «Мазда» ҫӑмӑл машинӑна пырса ҫапӑннӑ. Мӑнтарӑна шӑпи ҫавӑн пек пӳрнӗ-ши: шӑпах ҫав вӑхӑтра «Маздӑран» 24 ҫулти каччӑ тухнӑ. «Ауди» ӑна пырса ҫапнӑ. Инкекре ҫамрӑк куҫне ӗмӗрлӗхех хупнӑ.

«Мазда» водителӗ тата «Ауди» пассажирӗ суранланнӑ.

Инкек сӑлтавне тата яваплисене ҫул-йӗр инспекторӗсемпе тӗпчевҫӗсем палӑртӗҫ.

Чӑваш Енри Шалти ӗҫсен министерствин тӗпчевҫисем «Мед-Клиник» тулли мар яваплӑ обществӑн ӗҫ-хӗлне тӗпчеҫҫӗ. Халӑха тухтӑр пулӑшӑвӗ кӳрекен учреждени, пакунлисем шухӑшланӑ тӑрӑх, ҫынсене кредит илме хистенӗ. Укҫана хаклӑ сиплевшӗн ыйтнӑ тесе калаҫҫӗ.

Медицина клиникине кайса шар курнӑ пирки полицие темиҫе ҫын та пӗлтернӗ хыҫҫӑн тӗпчев пуҫланӑ. Пӑтӑрмаха Экономика хӑрушсӑрлӑхӗн тата коррупципе кӗрешес енӗпе ӗҫлекен управлени тӗпчет.

«Мед-Клиник» тулли мар яваплӑ обществӑн медпулӑшу кӳме лицензи те пулман теҫҫӗ. Клиника ӗҫченӗсем Чӑваш Енре пурӑнакансем патне, уйрӑмах вӑтам тата аслӑ ҫулсенчи хӗрарӑмсем патне, шӑнкӑравласа тӳлевсӗр диагностикӑна йыхравланӑ. Медицина пӗлӗвӗ ҫук ҫынсем клиентсене чир-чӗр тупса палӑртнӑҫи пулса хӑратнӑ, сипленме 60 пинтен пуҫласа 120 пин тенкӗ таран кредит илме хистенӗ.

Ӗнер Шупашкар районӗнче пулнӑ хӑрушӑ авари пирки халӗ те хӗрсех калаҫаҫҫӗ, форумсенче сӳтсе яваҫҫӗ. Унта миҫе ҫын вилни пирки тӗрлӗ информаци пулчӗ: малтан – 8, унтан – 11, кайран – 13… Хӑшне ӗненмелле?

ЧР сывлӑх сыхлавӗн министрӗ Владимир Викторов Чӑваш наци телекуравӗн корреспонденчӗсене пӗлтернӗ тӑрӑх (паян 18 сехетре тухнӑ «Республика» хыпарсен кӑларӑмӗ), аварире 11 ҫын вилнӗ, тепӗр виҫҫӗшӗн сывлӑхӗ йывӑртарах (пӗрин вара питӗ япӑх), виҫӗ ҫын нейрохирурги уйрӑмӗнче сипленет.

Микроавтобус салнӗнче миҫе ҫын пулнӑ? Тӗнче тетелӗнче 21 ҫын текен те тупӑннӑ. Хальлӗхе официаллӑ ҫӑлкуҫсем кун пирки пӗлтермен. Ӗнер «Россия 24» телеканалпа микроавтобус водителӗ те вилнӗ тесе хыпарланӑ. Вӑл вилмен, ун тӗлӗшпе пуҫиле ӗҫ пуҫарнӑ (ҫынсене илсе ҫӳренӗ чухне хӑрушсӑрлӑхпа тивӗҫтерменшӗн). Водитель Канашра 5э маршрут ҫинче ӗҫлет. Мускава кайма тухнӑ ҫынсем водителе BlaBlakar сарӑм урлӑ тупни пирки те калаҫакан тупӑннӑ. Ку информацие ҫирӗплетмен.

Хӑш-пӗр сайтра микроавтобус ҫине фура кӗрсе кайни пирки хыпарланӑ. Чӑннипе вара самосвал, Мерседес маркӑллӑскер, пырса кӗнӗ. Вӑл «ТУС» строительство команин пулни пирки малтан иккӗленсе калаҫрӗҫ.

Малалла...

Ҫӗркаҫ, 19 сехет тӗлӗнче, Шупашкар районӗнчи Мӑн Карачура патӗнче хӑрушла инкек пулнине, унпа ҫыхӑннӑ хыпарсене Чӑваш халӑх сайчӗ пӗлтерсех тӑчӗ. Аса илтерер, Чӑваш Енӗн влаҫ органӗсен официаллӑ порталӗнче 12 ҫын вилнине малтан пӗлтерчӗҫ, тепӗр пӗр-ик сехетрен хыпара ҫӗнетрӗҫ. Вилнисен шучӗ, Турра шӗкӗр, пӗр ҫын сахалраххи палӑрчӗ. Усал хыпар федерацин телекуравӗ тӑрӑх хӑвӑрт сарӑлчӗ.

Паян Чӑваш Енре хурлану кунӗ тесе пӗлтерчӗҫ, вилнисен тата аманнисен ҫемйисене укҫан пулӑшма йышӑнчӗҫ. Паллӑ ӗнтӗ, нимле кӗмӗл те хуйха сиреймӗ. Анчах шута хуни пӗрех паха. Ҫӗнӗ Шупашкарта вара хурланнине палӑртса ҫветтуй Улатимӗр кнеҫ палӑкӗ умне чечек хунӑ. Тӳре-шара та, ахаль ҫынсем те, чиркӳре ӗҫлекенсем те.

Историе аса илсен, сӑмах май, ҫакна та палӑртмалла: Улатимӗр кнеҫ пирӗн асаттесене — пӑлхарсене — хирӗҫ темиҫе хут та вӑрҫӑпа тухнӑ. Тӑван халӑхӑмӑрӑн кун-ҫулне сума сӑвакансенчен хӑшӗсем шухӑшланӑ тӑрӑх, Улатимӗр кнеҫ палӑкӗ умне чечек хуни вырӑнлах мар.

Ӗнер каҫхине Ҫӗнӗ Лапсар ҫывӑхӗнчи хӑрушӑ аварире 11 ҫын вилни пирки пӗлтернӗччӗ. Кӑштахран вилнисен шучӗ 13-е ҫитни пирки сайтра хыпарларӑмӑр.

«На связи» форумра аварире вилнисемпе суранланнисен списокне пичетленӗ (РЕН ТВ телеканал пӗлтерни тӑрӑх). Хальлӗхе вилнисен списокӗнче 11 ят паллӑ:

1. Иванов М.

2. Павлов Н.

3. Порфирьева С.

4. Тимофеева Т.

5. Никифорова Р.

6. Федоров А.

7. Буторова О.

8. Афанасьева Т.

9. Иванова Л.

10. Васильева О.

11. Кудряшова З.

Суранланнисен йышӗнче ҫаксем:

1. Варфоломеева А. (1970)

2. Васильева Л. (1976)

3. Герасимова Л. (1986)

4. Иванов С. (1965)

5. Никоноров А. (1960)

6. Малыгина В. (1956)

7. Чукмарева В. (1970)

8. Ильин О.

Вилнисемпе суранланнисен тӑванӗсем валли «хӗрӳ лини» ӗҫлет: 8(8352) 39-99-99. Хальлӗхе республикӑра хурлану кунӗ пуласси пирки пӗлтермен.

Карачурапа Лапсар хушшинчи М7 ҫул ҫинчи паян пулса иртнӗ пӑтӑрмахра вилнисен шучӗ 13 ҫитнӗ. Кун пирки пульницӑри ҫӑлкуҫсем хыпарланӑ — шар курнисенчен тепӗр ҫын пурнӑҫӗ татӑлнӑ.

Суранланнисене Шупашкарти васкавлӑ медицина пулӑшӑвӗн пульницине илсе ҫитернӗ. Ҫиччӗшӗнчен тӑваттӑшӗ йывӑр сурансемпе. Тепӗр икӗ ҫынна амбулатори майӗпе пулӑшу панӑ, ҫав шутра пӑтӑрмахшӑн айӑплӑ йывӑр тиевлӗ машина водительне те. Ӑна тытса чарнӑ.

Чӑваш Республикин Элтеперӗ Михаил Игнатьев пӑтӑрмахпа ҫыхӑннӑ лару-тӑрӑва хӑй сӑнаса тӑрасси пирки пӗлтернӗ, шар курнӑ ҫынсене пӗтӗм енчен пулӑшма хушнӑ.

Аса илтеретпӗр, Канашран Мускав ҫула тухнӑ Fiat микроавтобуспа Мерседес тев машини (маларах Камаз тесе хыпарлатчӗҫ) 19 сехетсенелле ҫапӑннӑ. Пӑтӑрмах йывӑр тиевлӗ машина хирӗҫ килекен ҫул ҫине тухнӑран пулнӑ тесе пӗлтереҫҫӗ. Мӗн сӑлтава пула вӑл унта лекни пирки хальлӗхе калани ҫук.