Дарья Нагорнова ҫамрӑк дизайнер наци эрешӗллӗ коллекци хатӗрлет.
Ҫамрӑк ӑста тӗрлӗ стиле пӗрлештерме юратать. Калӑпӑр, этникӑна спорт стилӗпе. Ун пеккине хӗр, сӑмах май каласан, аслӑ шкулта вӗреннӗ чухнех ӑсталанӑ. Кайран ҫавӑн пек ӗҫ ӑна конкурсра ҫӗнтерме пулӑшнӑ.
Паян Дарья ҫамрӑк дизайнерсен хушшинче ят-сум ҫӗнсе илме пултарнӑ. «Dari Nago» брендпа хатӗрлекен тумсемпе Мускаври мода эрнине те, «Таврида.АРТ» форума та хутшӑннӑ. Кунсӑр пуҫне вӑл тӗрлӗ конкурсра ҫӗнтернӗ.
Ҫипуҫсӑр пуҫне хӗр сӑрантан тӗрлӗ аксессуар хатӗрлет.
Чӑваш Енри пикесем Мускавра раштав уйӑхӗн 24-27-мӗшӗсенче иртнӗ вокал конкурсӗнче палӑрнӑ.
«ЛУЧШИЙ ГОЛОС ЗЕМЛИ» (чӑв. Ҫӗр ҫинчи чи лайӑх сасӑ) пултарулӑх ӑмӑртӑвӗ кӑҫалхипе виҫҫӗмӗш хут иртет. Ӑна 18 ҫула ҫитмен ачасем валли йӗркелеҫҫӗ.
Конкурса Шупашкарти Ф.П. Павлов ячӗллӗ музыка училищинче эстрадӑри музыка ӳнерӗн уйрӑмӗнче вӗренекен Мария Лукинова тата Юлия Каплина та хутшӑннӑ. Юлия Каплина II степеньлӗ лауреат дипломне тивӗҫнӗ, Мария Лукинова – III степеньлӗ лауреат дипломне.
Шупашкарта тӑваттӑмӗш кун ӗнтӗ 16 ҫулти Митрофанова Вера Витальевнӑна шыраҫҫӗ. Вӑл раштав уйӑхӗн 26-мӗшӗнченпе килте пулман.
Вера 170 сантиметр ҫӳллӗш, вӑтам пӳ-силлӗ. Ҫав кун сӑрӑ куртка, хура шӑлавар, хура пушмак, сӑрӑ калпак тӑхӑннӑ пулнӑ. Хӑйӗнпе пӗрле кӗрен кутамкка илнӗ.
Вера Митрофанова пирки мӗн те пулин пӗлсен ҫак номерсемпе шӑнкӑравлама ыйтаҫҫӗ: 8(800)700-54-52, 112 е 89276667768.
Сӗнтӗрвӑрри районӗнче кӑҫалхи чӳк уйӑхӗнче ҫын виллине тупнӑ. Пакунлисем палӑртнӑ тӑрӑх, арҫынна вӗлернӗ.
Тӗпчевҫӗсем усал ӗҫ тунӑ ҫынсене шырама тытӑннӑ. Вӑрах вӑхӑт шыраса тӑман — пуҫтахсене тытса чарнӑ. Вӗсенчен пӗри Сӗнтӗрвӑрри хулинче пурӑнакан 19 ҫулти ҫамрӑк пулнӑ, тепри — унӑн 18 ҫулти пӗлӗшӗ.
Тӗпчевҫӗсем палӑртнӑ тӑрӑх, чӳк уйӑхӗн 17-мӗшӗнче ирхи 2 сехет тӗлӗнче ӳсӗр ҫамрӑксем хӑйсен пӗлӗшӗпе тӗлпулнӑ, унпа хирӗҫме тытӑннӑ. Ҫамрӑксем арҫынна тапса-ҫапса пӗтернӗ, вӗсенчен пӗри тата шар курни ҫумне арҫын шухӑшӗпе ҫулӑхнӑ.
Чӑваш Енри пысӑк пуҫлӑх ывӑлӗ пӑтӑрмаха ҫакланнӑ. Кӑҫал вӑл Шупашкарти Кадет корпусӗнчен вӗренсе тухнӑ иккен. Видео вара тӗнче тетелӗнче халӗ сарӑлнӑ.
Каччӑ шкулти географи учительне кӳреннӗ. Вӗрентекен такси тытса килне кайнӑ чухне каччӑ ун хыҫҫӑн «Ниссан» машинӑпа йӗрлесе кайнӑ. Ҫав вӑхӑтра вӑл учителе кӳрентермелле сӑмахсемпе перкелешсе пынӑ. Ҫавна видео ҫине ӳкерсе илнӗ.
Учитель пирки каччӑ: «Ҫӗршыври чи аскӑн хӗрарӑм», «Ӑна машинӑпа турттарса ҫӳреме унӑн арҫын та ҫук вӗт», — йышши сӑмахсемпе хурласа пынӑ.
Ҫав каччӑн ашшӗ Чӑваш Енри Кадастр палатин филиалне ертсе пырать-мӗн.
«Внукунук – философия добра» (чӑв. Внукунук — ырӑ философийӗ) проект хастарӗсем Ҫӗрпӳ районӗнчи пӗр ялта пурӑнакан Слава ятлӑ мучие пӗр машина вутӑ илсе килсе панӑ.
Проект хастарӗсем — ҫамрӑксем. Вӗсем ырӑ ӗҫе 2020 ҫулта медиа-проект евӗр пуҫарса янӑ. Ӑна йӗркелесе янӑ Лена ятлӑ хӗр малтан хӑйӗн укҫипе ҫынсене пулӑшнӑ, анчах кайран укҫа хӗсӗнсе ҫитнӗ. Кӑҫал проекта ҫӗнӗрен ӗҫлеттерсе янӑ. Маттур ҫамрӑксем ҫӗршыв тӑрӑх ҫӳресе пӗччен ватӑсене тупаҫҫӗ, вӗсен нуши-терчӗпе кӑсӑкланаҫҫӗ, ырӑ ӗҫпе пулӑшма тӑрӑшаҫҫӗ. Хастарсене ырӑ кӑмӑллӑ ытти ҫын та тӗрев кӳрет.
Ҫӗрпӳ районӗнчи пӗр ялта пурӑнакан Слава ятлӑ мучин килне газ кӗртмен, унӑн вутти те сахалланса юлнӑ. Хӗрсем ӑна пӗр машина вутӑ тата тутлӑ апат-ҫимӗҫ илсе килсе панӑ.
Питӗрти чӑваш хастарӗ Валериан Гаврилов асӑннӑ хулара пурӑнакан пултаруллӑ чӑваш хӗрӗ Пелагея Терентьева ҫинчен тӗнче тетелӗнчи хӑйӗн страницинче каласа кӑтартнӑ.
Чӑвашсен ентешлӗхӗ хутшӑнакан Питӗрти тата Ленинград облаҫӗнчи мероприятисене чӑваш ташши яланах илем кӳрет иккен. Кунта вырӑнти «Кевер» хореографи ансамблӗн тӳпи пысӑк-мӗн. Пултарулӑх ушкӑнне Пелагея Терентьева хореограф ертсе пырать.
Пелагея Шупашкарта ҫуралнӑ. 6 ҫултанпа вӑл хулари чи лайӑх ача-пӑча коллективӗсенчен пӗрне, «Рябинка» хореографи ансамбльне, ҫӳренӗ. Ушкӑн ертӳҫисем Елена Девяткинӑпа Михаил Девяткин пулнӑ.
Питӗре куҫса кайсан Пелагея чӑваш халӑх культурине аталантарассипе ҫине тӑма тытӑннӑ. Малтан вӑл «Кевер» хореографи ансамбльне ҫӳренӗ, кӑҫалхи ака уйӑхӗнченпе — ушкӑнӑн хореографӗ.
Ҫӗрпӳ районӗнчи Иккӗмӗш Вӑрманкас ял тӑрӑхӗн пуҫлӑхӗн тивӗҫӗсене вӑхӑтлӑха пурнӑҫлама 21 ҫулти Мария Ивановӑна шаннӑ.
Мария 2020 ҫулта Шупашкарти электромеханика колледжӗнчен "ЧПУ станокӗсен операторӗ" специальноҫпе вӗренсе тухнӑ. Вӑл И.Я.Яковлев ячӗллӗ Чӑваш патшалӑх педагогика университетӗнче "Физика вӗрентӗвӗн методики" специальноҫпе хатӗрленнӗ. Халӗ Мускав политехника университечӗн Шупашкарти филиалӗнче "Техника системинчи управлени" специальноҫпе 3-мӗш курсра вӗренет.
Ҫӗмӗрле районӗнче пурӑнакан пӗр ҫамрӑк энергетика предприятийӗн Хакас Республикинчи филиалне тапӑннӑ.
18 ҫулти яш компьютерти информацие хӳтӗлекен хатӗрсене ятарлӑ программӑпа усӑ курса тапӑннӑ.
Сиенлӗ компьютер программипе айкашнӑ каччӑ тӗлӗшпе Ҫӗмӗрлери прокуратура пуҫиле ӗҫ пуҫарнӑ. Ӑна РФ Пуҫиле кодексӗн 273-мӗш статйин 1-мӗш пайӗпе явап тыттарма йышӑннӑ. Сӑмах май каласан, каччӑ унччен те ҫавӑн пек хӑтланнӑ. Унччен ӑна пӗрре явап тыттарнӑ-ха. Хальхинче яша тӗрмене хупса хумасӑр ирӗкрен 1 ҫул та 6 уйӑхлӑха хӑтарма йышӑннӑ.
Ф.П. Павлов ячӗллӗ Шупашкарти музыка училищинче вӗренекен ҫамрӑксем фольклор экспедицийӗнче пулнӑ.
Асӑннӑ вӗренӳ заведенийӗнче халӑх юррисене пӗччен тата хорпа юрлама вӗрентекен уйрӑмра ӑс пухакан яшсемпе хӗрсем Елчӗк районӗнчи Вӑрӑмхӑва ялне ҫитсе килнӗ. Унта анатри чӑвашсем пурӑнаҫҫӗ.
«Музыка училищи — чӑвашсен фольклорне пухассипе, тӗпчессипе тата аталантарассипе ҫине тӑрса ӗҫлекен республикӑри пӗртен-пӗр вӗрентӳ учрежденийӗ. Ун пек тӗллевпе эпир час-часах тухса ҫӳреме тӑрӑшатпӑр», — тенӗ вӗрентӳ заведенийӗнче ӗҫлекен Людмила Петухова.
-1.7 °C