Ҫу уйӑхӗн 31-мӗшӗнче Вӑрнара Раҫҫей халӑх артисчӗ, эстрада юрӑҫи Дмитрий Маликов килӗ. Ҫав кун поселокра Химик кунӗ иртӗ.
Уяв «Август» паркра 11 сехетре пуҫланӗ. Малтан «Парящее сердце» скульптурӑна уҫӗҫ. Пултарулӑх ушкӑнӗсем савӑнтарӗҫ, ӗҫре ҫитӗнӳсем тунисене чыслӗҫ. Кунӗпех ӑсталӑх класӗсем, квестсем, кӑпӑклӑ ташӑ каҫӗсем, спорт ӑмӑртӑвӗсем пулӗҫ.
19-23 сехетсенче сцена ҫине «Кристалл» шоу-балет, «Дорогуго» кавер-ушкӑн тата Дмитрий Маликов тухӗҫ. Концерта 6 ҫултан аслӑраххисем курма пултараҫҫӗ.
«Пуринчен малтан» телеграм-канал хыпарланӑ тӑрӑх, паян Шупашкарта «Кӗмӗл сасӑ» фестиваль иртнӗ.
Йӑлана кӗнӗ пултарулӑх конкурсне Чӑваш Енри кӑна мар, Тутарстанри, Пушкӑртстанри тата Пенза облаҫӗнчи ҫамрӑк юрӑҫсем те хутшӑннӑ.
Чи маттурри Елчӗк округӗнчи Виктория Романова пулнӑ, вӑл гран-прие тивӗҫнӗ. Ӑна санаторире 15 кун канмалли путевка панӑ.
Чӑваш эстрада юрӑҫи Ольга Осипова пӗтӗм тӗнчери «Музыка караванӗ» хит-парадра пӗрремӗш вырӑн йышӑннӑ. Унӑн «Пӗлӗт, пӗлӗт» юрри 500 юрӑран чи лайӑххи пулнӑ.
Ольга хӑйех юрӑсем ҫырать. Вӑл ултӑ чӗлхепе юрлать. Кунсӑр пуҫне «Юхха» фильмра ӳкерӗннӗ, унти трюксене хӑйех пурнӑҫланӑ.
Палӑртмалла: Ольга Элӗк тӑрӑхӗнчи Атмалкассинче ҫуралнӑ, И.Я.Яковлев ячӗллӗ Чӑваш патшалӑх педагогика университетӗнчен хӗрлӗ дипломпа вӗренсе тухнӑ.
Ф.П. Павлов ячӗллӗ музыка училищинче вӗренекенсем Елена Межова (Певчая) фолк-юрӑҫпа тӗл пулнӑ. Вӑл Раҫҫейри тӗрлӗ наградӑна тивӗҫме ӗлкӗрнӗ. Хальхинче «Звезда» телепроектра ӳкерӗнме кайма тухнӑ, хӑй пӗлӳ илнӗ вӗренӳ заведенине ҫула май тенӗ пек кӗрсе тухнӑ.
Юрӑҫ вырӑс фольклорне кӑмӑллать, автор юррисене ҫӗршыври тӗрлӗ музыка платформи ҫине вырнаҫтарать.
Ҫамрӑксене юрӑҫ сонграйтинг, продакшн, дистрибьюшн, монетизаци тата ытти япала мӗне пӗлтерни ҫинчен те каласа кӑтартнӑ.
Ӗнер Шупашкарта Раҫҫей шоу-бизнес ҫӑлтӑрӗ Игорь Николаев концерт лартнӑ. Вӑл ун чухне хӑйӗн аслашшӗ (е какашшӗ, «дедушка» тенипе пӗлме ҫук) чӑваш пулнине, йӑх-тымарӗпе мӑнаҫланнине пӗлтернӗ.
«Эпӗ манӑн чӑваш тымарӗ пулнине яланах пӗлнӗ, анчах ҫакна питӗ пӗлтерӗшлӗ тесе шутламан. Паян вара ҫакна каласшӑн: манра чӑваш юнӗ чупнӑшӑн мухтанатӑп», – тенӗ Игорь Николаев.
Чӑваш юрӑҫи Алёна Сергеева Дивноморскра юрлать.
Алёна халӑх тетелӗнчи хӑйӗн страницинче пӗлтернӗ тӑрӑх, вӑл яланах юрлама юратнӑ.
Кирек ӑҫта пурӑнсан та чунӗ юрласшӑн,ю пулнӑ. Сыктывкарта ӗҫлесе пурӑннӑ чух аслӑ шкул преподавателӗсемпе хора ҫӳренӗ, коми юррисене шӑрантарнӑ. «Студентсем ман ҫине тӗлӗнсе пӑхатчӗҫ. Халӗ Геленджик-Дивноморскра пурӑннӑ чух вырӑс халӑх тата Кубань юррисене юрлатӑп», — пӗлтернӗ Алёна. Вӑл «Дивноморские подружки» халӑх ансамблӗнче юрлать.
Кӳкеҫри ваттисен ҫуртӗнче пурӑнакан Клеопатра Георгиева юпа уйӑхӗн 10-мӗшӗнче 100 ҫул тултарнӑ.
Ватӑ ҫын — тыл ӗҫченӗ, ӗҫ ветеранӗ. Ӑна юбилейпа саламлама Кӳкеҫ пуҫлӑхӗ Владимир Михайлов пынӑ. Вӑл Раҫҫей Президенчӗн Владимир Путинӑн саламне илсе ҫитернӗ.
Кинемее ҫавӑн пекех посёлокри «Откровение» ансамбль те саламланӑ.
Чӑваш Республикин культурӑн тава тивӗҫлӗ ӗҫченӗ Ирина Угаслова пурнӑҫран уйрӑлса кайнӑ. Лидия Филиппова журналист пӗлтернӗ тӑрӑх, вӑл тӑван чӑваш культурине, йӑли-йӗркине, чӗлхине упрас, аталантарас ӗҫе нумай ҫул халалланӑ, халӑхсен пӗрлӗхне ҫирӗплетес, ӳссе пыракан ӑрӑва тивӗҫлӗ воспитани парас ӗҫе пысӑк тӳпе хывнӑ. Вӑл «Пӗртӑван Малинасем» ушкӑна ертсе пынӑ. Ушкӑна Чӑваш Енре ҫеҫ мар, Раҫҫейри ытти регионта та лайӑх пӗлнӗ, хакланӑ, юратнӑ.
Ӗнер, ҫурла уйӑхӗн 26-мӗшӗнче, чӑваш эстрадин паллӑ артисчӗ Типшӗм Сашук 50 ҫул тултарнӑ.
Пултаруллӑ сцена ӑсти Елчӗк районӗнчи Элекҫей Тимеш ялӗнче ҫуралнӑ. Саша — тӑван ҫӗршыва, тӑван кӗтесне, чӑваш халӑхне юратакан ҫын пулни унӑн юррисенче те сисӗнет. Вӑл чӑваш эстрадине музыкӑн рэп енне илсе килчӗ. Пӗрремӗш юррине вӑл 17-ре ҫырнӑ. Унӑн ячӗ 2000-мӗш ҫулсенче халӑхра сарӑлма пуҫларӗ.
Пултаруллӑ артист паян — икӗ ача ашшӗ, спортпа туслӑ. Пултарулӑхӗ вара унчченхиллех тапса тӑрать.
Шупашкар хулин 555 ҫулхине халалланӑ уява ҫӗршыври паллӑ юрӑҫа Шамана чӗннине Чӑваш халӑх сайчӗ пӗлтернӗччӗ-ха.
Концерта курма халӑх калама ҫук йышлӑн пуҫтарӑннӑччӗ. Анчах ахаль куракансене юрӑҫран вип-зонӑпа уйӑрнӑ. Унта ача-пӑчапа аслисем тата тӳрӗ-шара пурччӗ.
Куракансене ҫакӑн пек икӗ ушкӑна уйӑрни теприсене тӗлӗнтернӗ, вӗсем хула администрацийӗн пуҫлӑхӗ Владимир Доброхотов патне те халӑх тетелӗнче кӑмӑлсӑрланса ҫырнӑ.
Тӳрӗ-шара ӑнлантарнӑ тӑрӑх, фан-зонӑра Уҫӑ хулан хастарӗсем, волонтёрсем, ӗҫлекен ҫамрӑксен канашӗн, республикӑн районӗсен пайташӗсем, уяв мероприятийӗсене хутшӑннӑ артистсем пулнӑ-мӗн.
-21.7 °C