Шупашкарта ватӑ хӗрарӑм ултавҫӑсене ӗненсе 1 миллион тенке ҫухатнӑ. Укҫине вӑл Мускавах кайса панӑ.
Унпа палламан ҫын мессенджерта ҫыхӑннӑ. Вӑл ӗҫленӗ пульницӑра даннӑйсене такамсем илнӗ-мӗн. Кайран хӗрарӑмпа «ФСБ» ӗҫченӗ ҫыхӑннӑ, хушнине итлемесен явап тыттарассипе хӑратнӑ.
Ватӑскер палламан ҫын хушнине итлесе пуйӑса ларма билет туяннӑ, Мускава ҫитнӗ те темӗнле курьера 1 миллион тенкӗ тыттарнӑ. Киле таврӑнсан пиччӗшӗпе калаҫҫан тин вӑл ултавҫӑсен серепине лекнине ӑнланнӑ.
Комсомольскинче 640 ача вӗренмелӗх шкул пулӗ. Акцион ирттерсе ҫӗнтерӳҫе палӑртнӑ. Ку ӗҫе Ҫӗрпӳри «ПМК 8» организаци пурнӑҫлӗ. Кун валли 1 миллиард та 275 миллион та 878 пин те 462,81 тенкӗ уйӑрӗҫ.
Подрядчикӑн шкула 2026 ҫулхи утӑ уйӑхӗн 31-мӗшӗччен туса пӗтермелле. Унта 2 тата 3 хутлӑ икӗ блок пулӗ. Ӗҫе пуҫӑниччен малтан кивӗ шкула ишсе антармалла.
ЧР Патшалӑх Канашӗ республикӑра тӗплӗ юсав ирттересси пирки саккун пӑхса тухнӑ. ЧР Элтеперӗ ӑна ҫав кунах алӑ пуснӑ.
Унччен ҫӗнӗ ҫуртра пурӑнакансем ҫурта хута янӑранпа 5 ҫул ҫитсен ҫеҫ тӗплӗ юсавшӑн тӳлеме пуҫланӑ. Ҫӗнӗ саккунпа килӗшӳллӗн вара 1 ҫултан тӳлеме тытӑнӗҫ.
Влаҫ ку саккуна мӗншӗн йышӑннине ӑнлантарнӑ: Тӗплӗ юсав фондӗнче укҫа ҫитсе пымасть. Хальхи вахӑтра ҫынсен фонд умӗнче 700 миллион тенкӗ парӑм пур. Ҫӗнӗ ҫуртрисене тӳлеттерме пуҫласан регионти оператор патне хушма 132 миллион тенкӗ тупӑш кӗрӗ.
ЧР Элтеперӗн администрацийӗ 2 миллион тенкӗлӗх сувенир сехетсем илесшӗн. Вӗсемпе кам тивӗҫтерессине аукцион ирттерсе палӑртӗҫ.
Малтанхи хак - 1 миллион та 997 пин те 100 тенкӗ. Ку укҫапа алла ҫыхмалли арҫынсен - 389, хӗрарӑмсен 245 сехетне туянасшӑн. Ҫапла пӗр сехет 3150 тенке кайса ларӗ.
Аукциона юпа уйӑхӗн 16-мӗшӗнче пӗтӗмлетӗҫ. Ҫӗнтерӳҫӗн сехетсемпе 15 ӗҫ кунӗнче тивӗҫтермелле.
Патӑрьел тӑрӑхӗнчи Шӑнкӑртам ялӗнче пурӑнакан Марина Умерова патшалӑх пулӑшнипе хӑйӗн ӗҫне йӗркелесе янӑ.
Марина сӑнанӑ тӑрӑх, илем индустрийӗнче аппарат косметологийӗпе усӑ курма ӑнтӑлакансем йышлӑ. Ҫамрӑк хӗрарӑм бизнес-план хатӗрленӗ, ӑна тухӑҫлӑ хӳтӗленӗ.
Патӑрьел хӗрарӑмӗ ятарласа вӗренсе тухнӑ хыҫҫӑн сертификат илнӗ, социаллӑ контрактпа усӑ курса «Эстетика» илем студийӗ уҫнӑ. Халӗ вӑл юратнӑ ӗҫӗпе чунтан аппаланать.
Ҫӗмӗрлере пурӑнакан 25 ҫулти арҫын ют ҫӗршыври машина туянма шутланӑ. Вӑл тӗнче тетелӗнче пӗлтерӳ тупнӑ.
Кӗҫех вӑл «сутуҫӑпа» калаҫма тытӑннӑ. Килӗшӳ ҫырмалла тесе палламан ҫын унран укҫа ыйтнӑ та ыйтнӑ. Ҫапла арҫын вӑл калана счетсем ҫине 1 миллиона яхӑн тенкӗ куҫарнӑ. Анчах машинӑна кӗтсе илеймен.
Ку тӗслӗх тӗлӗшпе пуҫиле ӗҫ пуҫарнӑ.
Ҫитес ҫул нарӑс уйӑхӗн 1-мӗшӗнчен амӑшӗн капиталне индексаци тӑвӗҫ. Ҫапла вӑл 7,3 процент ӳсӗ.
Ҫитес ҫул нарӑсӑн 1-мӗшӗнчен пӗрремӗш ачана ҫуратнӑшӑн паракан амӑшӗн капиталӗ 676 пин тенкӗ пулӗ. Иккӗмӗшӗшӗн параканни вара 893 пин тенке ҫитӗ.
Хальхи вӑхӑтра амӑшӗн капиталӗ /пӗрремӗш ачашӑн/ 630,4 пин тенкӗпе танлашать. Иккӗмӗш ачана ҫуратсан вара 834 пин тенкӗ параҫҫӗ.
Шупашкарти 56 ҫулти хӗрарӑм ӗҫри пуҫлӑх ҫырнӑ тесе ӗненнӗ те шар курнӑ. Мессенджерта пуҫлӑх ятӗнчен ун патне ҫыру килнӗ: такамсем унӑн харпӑр даннӑйӗсене пӗлнӗ те хӑрушлӑх сиксе тухнӑ-мӗн, Украинӑна укҫа куҫарма пултараҫҫӗ, банксенче темиҫе кредит илме пултараҫҫӗ имӗш. Хайхискер кӗҫех унпа йӗрке хуралҫисем ҫыхӑнассине пӗлтернӗ.
Хӗрарӑм банксене кайса кредитсем илнӗ. Лешсем хушнипе укҫа машина туянма кирлӗ тесе суйнӑ. Укҫине куҫарсан тин ывӑлне кун пирки каласа кӑтартнӑ. Ҫапла вӑл 3 миллион та 300 пин тенкӗсӗр юлнӑ.
Шупашкарта пурӑнакан 68 ҫулти хӗрарӑм патне мессенджерсенчен пӗринче такам шӑнкӑравланӑ, ҫав вӑхӑтра «поликлиника» тесе ҫырни тухнӑ.
Шӑнкӑравлаканни кинемее медицина тӗрӗслевӗ тухма сӗннӗ, ун валли регистрациленмелле тесе ӗнентернӗ.
Ют ҫын каланине итлесе хӗрарӑм телефона приложени вырнаҫтарнӑ, вӑл сиенлӗскер пулнӑ май ватӑ ҫыннӑн счёчӗпе усӑ курма май панӑ.
Ҫапла вара такамсем хӗрарӑмӑн 800 пине яхӑн тенкине вӑрланӑ.
Вӑрнар округӗнче Ҫӗнӗ ҫул тӗлне тивӗҫлӗ канури 6 ҫын пенси укҫине илеймен. Мӗншӗн тесен ӑна почта уйрӑмӗн пуҫлӑхӗ /халӗ вӑл ӗҫлемест/ хӑйен кӗсйине чикнӗ.
Судра палӑртнӑ тӑрӑх, 2023 ҫулхи раштавран пуҫласа 2024 ҫулхи кӑрлаччен ҫак пуҫлӑх вӗсемшӗн хӑй алӑ пусса укҫине хӑй илнӗ. Пӗтӗмпе – 197 пине яхӑн тенкӗ.
50 ҫултискер ҫапла тунине прокуратура палӑртнӑ. Пуҫиле ӗҫ пуҫарсан ӑна ӗҫрен кӑларнӑ. Судра вал айӑпне йышӑннӑ, тӑкака саплаштарнӑ. Ӑна тӗрмене хупмасӑр 1 ҫуллӑха айӑпланӑ.
+21.3 °C