Пилотсӑр вӗҫекен аппаратсенчен шар курнӑ ҫынсене виҫӗ общежитире вырӑн уйӑрса панӑ. Кун пирки Шупашкар мэрӗ Станислав Трофимов пӗлтернӗ.
Тӳре-шара пӗлтернӗ тӑрӑх, хулара 28 ҫурт сиенленнӗ. Камӑн ниҫта каймалли ҫук – общежитисенче ҫак адрессемпе йышӑнаҫҫӗ: Кременский урамӗнчи 34-мӗш ҫурт, Магницкий урамӗнче 5-мӗш ҫурт, Ленин проспектӗнчи 48-мӗш ҫурт.
Паян пӗлтернӗ тӑрӑх, пилотсӑр вӗҫекен аппаратсене пула 2 ҫын вилнӗ, 32 ҫын аманнӑ.
Чӑваш Республикинче инкеклӗ лару-тӑру режимне йышӑнас ыйтӑва пӑхса тухаҫҫӗ. Ку паян пилотсӑр вӗҫекен аппаратсем тапӑннипе ҫыхӑннӑ.
«Штабра йышӑнусем турӑмӑр, республика пӗлтерӗшлӗ инкеклӗ лару-тӑру режимне йышӑнасси пирки ыйтӑва пӑхса тухатпӑр», — тенӗ республика вице-премьерӗ Сергей Артамонов.
Аса илтерер: паян шкулсене дистанци мелӗпе вӗренме янӑ, Шупашкарта общество транспортне вӑхӑтлӑха ҫӳреме чарнӑ. Халӗ экспертсем тӑкака шутлаҫҫӗ.
Хальхи вӑхӑтра 16 ҫын аманни пирки пӗлтереҫҫӗ. Шел те, пӗр ҫын вилнӗ.
Чӑваш Ен экономикине епле кадрсем кирлине тишкерекен комисси туса хунӑ. Тӗрӗсрех каласан, вӑл ведомствӑсем хушшинчи ӗҫ ушкӑнӗ пулӗ.
Республикӑн Министрсен Кабинечӗн Председателӗн ҫумне (сывлӑх сыхлавӗ, ӗҫ тата социаллӑ хӳтлӗх, вӗрентӳ, ӑслӑлӑх, культура, физкультурӑпа спорт енӗпе ӗҫлекеннине) ӗҫлӗ ушкӑнӑн ведомствӑсем хушшинчи ертӳҫи пулма шаннӑ.
Йышра ҫавӑн пекех ҫаксем пур: ӗҫ тата социаллӑ хӳтлӗх министрӗ (вӑл — ӗҫлӗ ушкӑн ертӳҫин ҫумӗ), ӗҫ тата социаллӑ хӳтлӗх министрӗн ҫумӗ (вӑл — ӗҫлӗ ушкӑн секретарӗ), Чӑваш Ен Элтеперӗн пулӑшуҫи, ҫутҫанталӑк министрӗн пӗрремӗш ҫумӗ, ял хуҫалӑх министрӗн пӗрремӗш ҫумӗ, спорт министрӗн пӗрремӗш ҫумӗ, экономика аталанӑвӗн министрӗн пӗрремӗш ҫумӗ, промышленность министрӗн ҫумӗ, цифра аталанӑвӗн министрӗн ҫумӗ, Стройминӑн пай пуҫлӑхӗ, Транспорт министерствин пай пуҫлӑхӗ, Культура министерствин пай пуҫлӑхӗ, Вӗренӳ министерствин пай пуҫлӑхӗ, Чӑвашстат ертӳҫин ҫумӗ.
Чӑваш Енӗн промышленность министрӗ пулса ӗҫленӗ Сергей Лекарев Ҫӗнӗ Шупашкар хула пульницинче тӗп врачӑн администраципе хуҫалӑх енӗпе ӗҫлекен ҫумӗ пулса тӑрӑшать.
Сергей Лекарев эпир маларах асӑннӑ ведомствӑра 2020 ҫулхи пуш уйӑхӗнченпе министр ҫумӗ пулса тимленӗ, унтан тепӗр уйӑхран, министр тивӗҫне пурнӑҫлама тытӑннӑ. Тепӗр пилӗк уйӑхран каллех министр ҫумӗ пулса тӑнӑ. 2024 ҫулхи ҫӗртме уйӑхӗнче ӑна министрӑн тивӗҫӗсене пурнӑҫлама шаннӑ, тепӗр икӗ уйӑхран министр тилхепине тыттарнӑ. 2025 ҫулхи авӑн уйӑхӗнче вӑл ӗҫрен кайнӑ. Ун чухнехи ҫав хушура «урӑх ӗҫе куҫнӑран» тесе палӑртнӑ.
Хальхи вӑхӑтра экс-министр Ҫӗнӗ Шупашкарти хула пульницинче тӑрӑшать. Тӗп врач пулса асӑннӑ учреждение Николай Уруков ертсе пырать.
Муркаш округне ертсе пыма ҫӗнӗ ҫынна шаннӑ. Малашне пуҫлӑх пуканне Александр Иванов йышӑнӗ.
Ку должноҫе икӗ претендент пулнӑ: «Пӗрлӗхлӗ Раҫҫей» партин вырӑнти уйрӑмӗн секретарӗ Александр Иванов тата «Муркаш» территори уйрӑмӗн ертӳҫи Алексей Кириллов.
Депутатсем Александр Ивановшӑн сасӑланӑ. Палӑртмалла: вӑл пуш уйӑхӗнченпе Муркаш округӗн пуҫлӑхӗн тивӗҫӗсене пурнӑҫласа пынӑ.
Аса илтерер: унчченхи пуҫлӑх Александр Матросова тӗлӗшпе Мӑн Сӗнтӗрте тӑлӑхсем валли япӑх ҫурт-йӗр туяннӑшӑн явап тыттарма тӑнӑ. Ун хыҫҫӑн вӑл должноҫрен кайнӑ.
«Пӗрлӗхлӗ Раҫҫей» партин регионти уйрӑмне малашне ҫӗнӗ ҫын ертсе пырӗ. Ку должноҫе Сергей Артамонов йышӑннӑ.
Паян Шупашкарта Трактор тӑвакансен культура керменӗнче партин конференцийӗ иртнӗ. Унта депутатсем пӑхса тухнӑ тӗп ыйту парти уйрӑмӗн секретарьне суйласси пулнӑ. Депутатсем пӗр саслӑн ЧР Министрсен Кабинечӗн председателӗшӗн Сергей Артамоновшӑн сасӑланӑ.
Аса илтерер: унччен «Пӗрлӗхлӗ Раҫҫей» партин регионти уйрӑмӗн секретарӗ Леонид Черкесов пулнӑ. Пушӑн 31-мӗшӗнче Дмитрий Медведев Сергей Артамоновӑн кандидатурине ырланӑ.
Кӑҫал чӑвашсен Акатуйӗ Санкт-Петербургра та иртӗ. Кун пирки ЧР Элтеперӗ Олег Николаев тӳрӗ линире пӗлтернӗ. Аса илтерер: вӑл паян иртнӗ, 11:00 сехетре пуҫланнӑ.
Тӳрӗ лини вӑхӑтӗнче эфира Санкт-Петербургри Евгений Емельянов шӑнкӑравласа ҫитнӗ. Вӑл Питӗрте те, Мускаври пекех, чӑваш уявӗсене ирттерме пулмасть-и тесе кӑсӑкланнӑ.
Олег Николаев ҫапла хуравланӑ: нумаях пулмасть Чӑваш Ен правительствин председателӗ Сергей Артамонов тата культура министрӗ Светлана Каликова Санкт-Петербургра пулнӑ, Нева хӗрринчи хулара Акатуй ирттерме калаҫса татӑлнӑ. Программа интереслӗ пуласса шанаҫҫӗ, наци юрри-ташшипе пуян пулӗ вӑл.
Паян ЧР Министрсен Кабинечӗн ларӑвӗнче Сосновский пултӑранӗпе Америка вӗренине «хура списока» кӗртме йышӑннӑ.
Чӑваш Ен правительстви хӑрушӑ инвазивлӑ ӳсен-тӑранӑн переченӗ пирки постановлени проектне ҫирӗплетнӗ. ЧР Ҫутҫанталӑк министерствин ӗҫченӗсем регион тата вырӑнти уйрӑмах сыхлакан ҫутҫанталӑк территорийӗсенче унашкал ӳсен-тӑрана тупса палӑртса тӗп тӑвас енӗпе ӗҫлӗҫ.
«Хура списока» Сосновский пултӑранӗпе Америка вӗрени кӗрӗҫ. Унччен кунашкал йышӑнӑва Чӑваш Республикин Хӗрлӗ кӗнекепе ӗҫлекен правительство комиссийӗ тунӑ.
Палӑртса хӑварар: Чӑваш Енре – ӳсен-тӑранӑн 160 ытла инвазивлӑ тӗсӗ. Раҫҫей экологи обществин Чӑваш Енри уйрӑмӗ вӗсем мӗнле сарӑлнине 40 ҫул ытла тӗпчет. Экспертсем сиенлӗ ӳсен-тӑранпа кӗрешмелли программа хатӗрленӗ.
Чӑваш Енӗн финанс министрӗ Михаил Ноздряков хӑйӗн ирӗкӗпе ӗҫрен кайнине Чӑваш халӑх сайчӗ иртнӗ эрне вӗҫӗнче хыпарланӑччӗ-ха. Аса илтерер: Михаил Ноздряков патшалӑх органӗсенче 15 ҫул ытла ӗҫленӗ. Ҫавӑн пекех вӑл банксенче, Севастопольти финанс департаментӗнче вӑй хунӑ.
Паянтан министр тивӗҫне Ольга Метелева пурнӑҫлӗ. Кун пек йышӑнӑва республика Элтеперӗ Олег Николаев эрнекун алӑ пуснӑ, 172-мӗш номерлӗ документа паян республикӑн влаҫ органӗсен официаллӑ порталӗнчи «Законодательство» (чӑв. Саккунсем) ярӑмра вырнаҫтарнӑ.
Ольга Владимировна асӑннӑ министерствӑра ӗҫлекен ҫынах, вӑл республикӑн финанс министрӗн пӗрремӗш ҫумӗ пулса тӑрӑшать. Халӗ вӑл министр тивӗҫне вӑхӑтлӑха пурнӑҫласа пырӗ.
ЧР финанс министрӗ Михаил Ноздряков хӑйӗн ирӗкӗпе ӗҫрен кайнӑ. Кун пирки республика Правительстви телеграм-каналта пӗлтернӗ.
Хушӑва ЧР Элтеперӗ Олег Николаев алӑ пуснӑ. Унта ҫырнӑ тӑрӑх, ЧР Министрсен Кабинечӗн пӗрремӗш председателӗ – финанс министрӗ Михаил Ноздряков хӑйӗн ирӗкӗпе ӗҫрен кайнӑ
Палӑртса хӑварар: Михаил Ноздряков патшалӑх органӗсенче 15 ҫул ытла ӗҫленӗ. Ҫавӑн пекех вӑл банксенче, Севастопольти финанс департаментӗнче вӑй хунӑ.
+12.0 °C