Ӗнер, ҫурла уйӑхӗн 28-мӗш каҫхине, Йӗпреҫре паркри йывӑҫ ҫунма пуҫланӑ. Инкек вырӑнне ҫулӑмпа кӗрешекенсем васкавлӑн ҫитнӗ. «Хӗрлӗ автана» вӗсем вӑрах пуҫтахланма ирӗк паман — сӳнтернӗ. Ку хыпара Раҫҫейӗн Инкеклӗ ӗҫсен министерствин Чӑваш Енри управленийӗн пресс-служби пӗлтерет.
Ӗнерех Комсомольскинче пушар тухнӑ. Анчах, Турра шӗкӗр, ҫурт-йӗр ҫунман. Машина сиенленнӗ. Канаш урамӗнчи «ВАЗ-2104» автомобиль хыпса илни пирки пушар сӳнтерекенсене ирхи 9 сехет те 44 минутра хыпарланӑ. Транспорт «Мир продуктов» (чӑв. Апат-ҫимӗҫ тӗнчи) лавккана хирӗҫ ларнӑ. Пушар мӗн сӑлтавпа алхаснине специалистсем тӗпчесе пӗлӗҫ.
Раҫҫейӗн Инкеклӗ ӗҫсен министерствин Чӑваш Енри управленийӗн пресс-служби пӗлтернӗ тӑрӑх, ӗнер пушарсенче никам та вилмен.
Ҫӗнӗ Шупашкарта пурӑнакан арҫын шӑллӗне вӗлернӗ. Ун тӗлӗшпе пуҫарнӑ пуҫиле ӗҫе тӗпчесе пӗтернӗ ӗнтӗ. РФ Следстви комитечӗн Чӑваш Енри управленийӗн пресс-службинче пӗлтернӗ тӑрӑх, пуҫиле ӗҫе суда ярса панӑ.
54 ҫулти арҫынна суд РФ Пуҫиле кодексӗн 105-мӗш статйин 1-мӗш пайӗпе айӑпласшӑн. Кӑҫалхи утӑ уйӑхӗн 11-мӗшӗнче икӗ тӑван пӗрле эрех ӗҫнӗ. Ҫав вӑхӑтра иккӗшӗн тавлашу пуҫланнӑ. Хӑйӗнчен 11 ҫул кӗҫӗн шӑллӗне асли кӑкӑр тӗлӗнчен ҫӗҫӗпе сакӑр хут ытла чикнӗ. Хытӑ суранланнӑ ҫамрӑк арҫын кӑштахран вырӑнтах куҫне хупнӑ.
Алла ҫӗҫе ярса илнӗ арҫынна тӗпчев вӑхӑтӗнче следстви изоляторне хупса хунӑ. Унӑн ҫӗҫҫине туртса илнӗ. Тӗрлӗ тӗпчев ирттернӗ, ҫав шутра — судпа психиатри экспертизи те. Усалланнӑ арҫын пуҫӗ ӑслӑ-тӑнлах иккен.
Чӑваш Енри юсанмалли учрежденисенче саккунсене епле пӑхӑннине тӗрӗслесе тӑракан прокурорта тӑрӑшнӑ ҫынна суд ӗҫе илме килӗшменнине Чӑваш халӑх сайчӗ унччен пӗлтернӗччӗ-ха.
Аса илтерер: прокурор Ҫӗрпӳри 2-мӗш изоляторта ларакан хӑйӗн паллаканӗсем патне кайнӑ. Ҫакӑ надзор органӗнче калаҫу ҫуратнӑ. Прокурор сӑмахне тытман тата прокурор ӗҫченӗн ятне янӑ тесе ӑна 2018 ҫулхи раштав уйӑхӗнче ӗҫрен кӑларнӑ.
Йышӑнупа килӗшмесӗр экс-прокурор суда ҫитнӗ. Вӑл хӑйне ӗҫе каялла илме ыйтнӑ, ӗҫре ирӗксӗр пулайман кунсемшӗн вӑтам шалу шыраса илесшӗн пулнӑ. Районти суд хирӗҫленине кура приговора Чӑваш Енӗн Асла судне евитленӗ. Анчах унтисем те прокурор пулнӑ ҫынна хӳтӗлесе йышӑну кӑларман.
Ҫурла уйӑхӗн 17-мӗшӗнче Комсомольски районӗнче «Гранта» «Шкода Октавиа» машина ҫине пырса кӗнӗ. Иномарка сулахаялла пӑрӑнма чарӑннӑ пулнӑ. Ӑна ҫапса кайнӑ хыҫҫӑн «Гранта» фурӑпа тӑрӑннӑ.
Аварире ҫын пурнӑҫӗ татӑлнӑ: «Шкода» водителӗн чӗри тапма чарӑннӑ. «Гранта» рулӗ умӗнче 17 ҫулти водитель ларнӑ. Вӑл ӳсӗр пулнӑ, унпа пӗрле хӗр салонра пынӑ. Вӗсем иккӗшӗ те пульницӑра.
Ҫамрӑк водитель тӗлӗшпе пуҫиле ӗҫ пуҫарнӑ. «Грантӑна» 17 ҫулти каччӑн пӗлӗшӗ тара илнӗ-мӗн, ку вара улталаса унӑн рулӗ умне ларнӑ /хальлӗхе кун пирки тӗп-тӗрӗс калама ҫук/.
Мӑкшӑ Республикинче Чӑваш Енри автобус аварие лекнӗ. Кун пирки ҫак регионти ШӖМ пӗлтерет.
Ҫурла уйӑхӗн 25-мӗшӗнче «Чулхула – Пенза – Сарӑту» ҫул ҫинче авари пулнӑ: малтанлӑха пӗлтернӗ тӑрӑх, «СангЙонг» микроавтобусри 39 ҫулти водитель руль умӗнче ҫывӑрса кайнӑ, сулахаялла тухса кювета чӑмнӑ, унтан йывӑҫа пырса ҫапӑннӑ.
Микроавтобусра водительсӗр пуҫне 34 ҫулти тата 29-ти хӗрарӑмсем, 9 ҫулти хӗрача пулнӑ. Вӗсен сывлӑхне васкавлӑ медпулӑшу бригади вырӑнтах тӗрӗсленӗ, тӑван тӑрӑхӗнчи пульницӑна тухтӑр патне ҫӳреме сӗннӗ.
Палӑртмалла: авари вӑхӑтӗнче водитель урӑ пулнӑ.
Ҫурла уйӑхӗн 25-мӗшӗнче Ҫӗнӗ Шупашкарта ача ҫӳллӗ хутран ӳкнӗ. Ку инкек 5 ҫулти хӗрачапа пулнӑ.
Химиксен урамӗнче 4-мӗш хутран ӳкнӗ хӗрачана асӑрхасан иртен-ҫӳрен васкавлӑ медпулӑшу чӗннӗ. Ҫынсем каланӑ тӑрӑх, ҫав вӑхӑтра хваттерте унӑ шӑллӗ те пулнӑ. Ӳкнӗ хӗрачана – васкавлӑ медпулӑшу, шӑллӗне йӗрке хуралҫисем илсе кайнӑ.
Хӗрача чӗрех, пульницӑра выртать. Следовательсем ӗҫ-пуҫа уҫӑмлатаҫҫӗ.
Шупашкарта пурӑнакан 71 ҫулти кинемей ҫак уйӑхӑн пӗр кунӗнче Шупашкарти право хуралҫисем патне персе ҫитнӗ. Вӗсене вӑл 20 пин тенкӗсӗр тӑрса юлнине евитленӗ.
Ҫав кун вӑл Шупашкарти банксенчен пӗринчи банкоматра укҫа илнӗ. Урама тухса ун патне пӗр арҫын утса пынӑ. Алӑри укҫа тӗркине кӑтартса мул тупнине ӗнентернӗ. Укҫана кинемее те пама хирӗҫ мар-мӗн. Ватӑ ҫын ӗненнӗ те савӑннӑ курӑнать. Палламан арҫынпа вӗсем ҫын ҫӳремен вырӑна пӑрӑннӑ. Ҫав самантра вӗсем патне тепӗр арҫын персе ҫитнӗ. Ҫухалнӑ укҫа унӑн-мӗн. Паллӑ тунӑскер. Кинемее вӑл сумккине кӑтартма ыйтнӑ. Ватти турткалашса тӑман.
Палламан арҫынсенчен уйрӑлнӑ хыҫҫӑн кинемей 20 пин тенкӗ ҫухалнине асӑрханӑ. Ватӑ шухӑшланӑ тӑрӑх, сумкӑна ухтарнӑ хушӑра вӑрӑсенчен пӗри укҫана кӗсьерен кӑларса илме пултарнӑ.
Нумаях пулмасть преступниксене Тутарстанра тытса чарнӑ. Вӗсем ҫывӑхри ют ҫӗршывсенчен пӗринчен иккен. Ҫынсене унччен те ултанланӑскерсем маларах судпа айӑпланнӑскерсем пулнӑ.
Ҫурла уйӑхӗн 24-мӗшӗнче 21 сехет ҫурӑра А-151 автоҫулӑн 108-мӗш ҫухрӑмӗнче, Шӑмӑршӑ районӗнчи Карапай-Шӑмӑршӑ ялӗ ҫывӑхӗнче, хӑрушӑ авари пулнӑ – унта тӳрех пилӗк ҫыннӑн пурнӑҫӗ татӑлнӑ.
Малтанлӑха пӗлтернӗ тӑрӑх, «Тойота» рулӗ умӗнче ларнӑ 23-ри каччӑ Чӗмпӗр еннелле кайнӑ чухне хирӗҫ ҫул ҫине тухнӑ та «Лада Вестӑпа» ҫапӑннӑ. Лешӗн рулӗ умӗнче Самар облаҫӗнчи 51 ҫулти арҫын пулнӑ.
Аварире «Тайотӑри» 31 ҫулти хӗрарӑм, «Лада» водителӗ тата унти 3 пассажир (41-ри тата 47 ҫулсенчи арҫынсем) вилнӗ. «Тойота» водительне тата 27 ҫулти пассажира пульницӑна илсе ҫитернӗ. Иномаркӑра Чӗмпӗр облаҫӗн ҫыннисем пулнӑ, «Ладӑра» - Самар тата Чӗмпӗр облаҫӗнчи ҫынсем.
Ҫурла уйӑхӗн 22-мӗшӗнче Шупашкар районӗнче арҫын путса вилнӗ. Инкеклӗ лару-тӑру патшалӑх комитечӗ пӗлтернӗ тӑрӑх, 16 сехет те 41 минутра ҫӑлавҫӑсен пульчӗ ҫине хыпар килнӗ: Ваҫликассинче пурӑннӑ арҫын пӗвере путнӑ.
59 ҫултискер тусӗсемпе вырӑнти масар ҫинче виле пытарма шӑтӑк чавнӑ. Ӗҫ пӗтерсен вӗсем пӗвене шыва кӗме кайнӑ. 59-ти арҫын шыва чӑмнӑ та тухман.
Тусӗсем «112» номерпе шӑнкӑравласа ҫӑлавҫӑсене чӗннӗ. Анчах арҫынна ҫӑлма май килмен. Малтанлӑха пӗлтернӗ тӑрӑх, вӑл тата унӑн тусӗсем ӳсӗр пулнӑ.
Шупашкара виле пытарма килекен хӗрарӑма самолета лартман. Пӑтӑрмах пирки «Baza» телеграм-канал пӗлтернӗ.
Хӗрарӑм Мускавран «Победа» авиакомпани рейсӗпе ҫитме ӗмӗтленнӗ. Анчах ҫапла тума багаж кансӗрленӗ. Уншӑн тӳлемен иккен. Самолета лартманнине кура хӗрарӑм сумкӑри хӑш-пӗр япалана аэропортрах персе хӑварнӑ.
Вӑл хӑйне лартма макӑрса тата урипе тӑпӑртатса ӳкӗтлекен видеона тӗнче тетелне вырнаҫтарнӑ. Апла пулин те вӑл ӳкӗте кӗртеймен. Хӗрарӑм сумкӑна пушатнӑ ҫӗре самолета авиапассажирсене лартса пӗтернӗ, гейт хупӑннӑ тесе ӑна ирттермен.
Виле пытарма килекен хӗрарӑм шӑв-шав ҫӗкленӗрен йӗрке хуралҫисене чӗннӗ. Авиакомпани те хӗрарӑмран каҫару ыйтман — багажшӑн тӳлемеллине палӑртнӑ, салона илсе кӗмелли япаласен виҫи шутран пысӑк пулмалла маррине аса илтернӗ.
+1.3 °C