Суйлав вӗҫленсе пырать. Темиҫе сехетрен сасӑлава пӗтӗмлетӗвӗпе паллашма та май пулӗ ахӑртнех. Хальлӗхе вара ҫынсем вӑл е ку кандидатшӑн сасӑ пама пултараҫҫӗ.
«Тӗрӗслӗхшӗн Раҫҫей» партин сайтӗнче суйлав участокӗнчи йӗркене пӑсни ҫинчен пӗлтереҫҫӗ. Сайтра ҫырнӑ тӑрӑх, Комсомольски районӗнчи Асанкасси ялӗнче 409-мӗш суйлав участокӗнче Михаил Игнатьев кандидатӑн агитацийӗ ҫакӑнса тӑнӑ.
«Кунсӑр пуҫне Шупашкарти 17-мӗш шкулта, Шумилов урамӗнче, алӑк патӗнче Шупашкар хула пухӑвӗн депутатне суйланмашкӑн «Пӗрлӗхлӗ Раҫҫей» партирен тӑратнӑ Ирина Клементьевӑн плакачӗ ҫакӑнса тӑрать. Ҫавӑн пекех Шупашкарта Мир проспектӗнче Шупашкар хула пухӑвӗн депутатне суйланмашкӑн «Пӗрлӗхлӗ Раҫҫей» партирен тӑратнӑ Антон Ковалевӑн рекламӑллӑ йывӑр тиевлӗ урапи тӑнӑ.
798, 799, 800-мӗш суйлав участокӗсенсенчи ӗҫченсем тата Шупашкарти 61-мӗш шкул вӗрентекенӗсем суйлавҫӑсен списокне илсе килсем тӑрӑх кайнӑ, ҫынсене суйлава пыма чӗннӗ», — ҫапла ҫырнӑ сайтра.
Паян пирӗн республикӑра та суйлав иртни пирки эпир пӗлтернӗччӗ. Официаллӑ пӗлтернине ӗненсен кӑнтӑрла иртни 15 сехет тӗлне суйлавҫӑсен 43,61 проценчӗ суйлава хутшӑннӑ.
Суйлава уйрӑмах хастар хутшӑнаканнисем елчӗксем иккен. Кӑнтӑрла иртни виҫӗ сехет тӗлне елчӗксен 67,05 проценчӗ сасӑлав участокне ҫитсе килнӗ. Ҫӗмӗрле хулинче пурӑнакансем суйлав тесе участока васкамаҫҫӗ. Асӑннӑ вӑхӑт тӗлне унтисенчен 27,01 проценчӗ кӑна хӑйӗн гражданла тивӗҫне пурнӑҫланӑ. Аса илтеретпӗр, Чӑваш Енре 1184 суйлав участокӗ ӗҫлет. Вӗсем ҫынсене каҫхи сакӑр сехетчен кӗтеҫҫӗ. Манран нимӗн те килмест тесе лариччен хӑвӑр сассӑра вӑл е ку кандидатшӑн пама ӳркенмелле мар.
Чӑваш Енӗн Элтеперӗ пулма пирӗн республикӑра тӑватӑ кандидат ӗмӗтленет: Михаил Игнатьев («Пӗрлӗхлӗ Раҫҫей» парти кандидачӗ), Валентин Шурчанов (Пӗтӗм Раҫҫейри коммунистсен партийӗ), Олег Николаев («Тӗрӗслӗхшӗн Раҫҫей»), Константин Солдатов (либерал-демократсен партийӗ). Вӗсем пурте суйлава хутшӑннӑ. Михаил Игнатьев ывӑлӗпе тата мӑшӑрӗпе суйлава ҫитсе килни пирки Чӑваш халӑх сайчӗ маларах пӗлтерчӗ ӗнтӗ.
Чӑваш Енӗн Элтеперӗн тивӗҫӗсене вӑхӑтлӑх пурнӑҫлакан Михаил Игнатьев та, республикӑна ертсе пырас шухӑшлӑ ытти кандидат пекех, паян суйлава хутшӑннӑ. Суйлава Михаил Васильевич Шупашкарти Хусанкай ячӗллӗ Культура керменӗнче вырнаҫнӑ 629-мӗш номерлӗ суйлав участокне пынӑ. Пӗччен мар. Мӑшӑрӗпе тата ачисемпе. Унта вӑл хӑйӗн сассине тивӗҫлӗ тесе шухӑшлакан кандидатшӑн панӑ хыҫҫӑн журналистсен ыйтӑвӗсене хуравланӑ. Массӑллӑ информаци хатӗрӗсенче ӗҫлекенсемпе калаҫнӑ май Михаил Игнатьев суйлав тивӗҫлӗ шайра иртессине шаннине пӗлтернӗ.
Суйлава Михаил Васильевич ачисемпе пырса иртни пирки пӗлтертӗмӗр те, унӑн ывӑлне Чӑваш Енӗн Тӗп суйлав комиссийӗнчен асӑнмалӑх парне панӑ. Ҫакна вӑл Элтеперӗн тивӗҫӗсене вӑхӑтлӑх пурнӑҫлаканӑн ывӑлӗ пулнишӗн мар, суйлава пӗрремӗш хут хутшӑннишӗн тивӗҫнӗ. «Паян эпӗ пӗрремӗш хут суйларӑм. Хама Раҫҫей Федерацийӗн чӑн-чӑн ҫынни евӗр туйса илтӗм», — тенӗ Михаил Игнатьев ывӑлӗ журналистсене.
Сӑнсем (7)
Паян пирӗн ҫӗршывра Пӗрлехи суйлав кунӗ, ҫав шутра пирӗн республикӑра та, иртнине пурте пӗлетпӗр. Ҫавна май Чӑваш Енӗн Тӗп суйлав комиссийӗ те суйлав пирки аса илтерет, республикӑн влаҫ органӗсен официаллӑ порталӗнче те суйлавпа ҫыхӑннӑ хыпарсем кӑна темелле паян. Миҫе сехет тӗлне халӑхӑн миҫе проценчӗ суйлава пыни пирки кашни район-хула хыпарласа тӑрать.
Аса илтеретпӗр, паян эпир Чӑваш Енӗн Элтеперне тата вырӑнти хӑй тытӑмлӑх органӗсене депутатсене суйлатпӑр. 317 муниципалитет пӗрлешӗвӗнче 3746 депутата суйламалла.
Республикӑн Тӗп суйлав комиссийӗ ирхи сакӑр сехет тӗлне 1184 суйлав участокӗ хӑйӗн алӑкне уҫни пирки пӗлтерчӗ. Тепӗр майлӑ каласан, кашни участоках суйлавҫӑсене йышӑнма хатӗр. Суйлав участокӗсем каҫхи сакӑр сехетчен ӗҫлеҫҫӗ.
Енчен те суйлав участокне шута илме тивӗҫ сӑлтава пула ҫитме май килмесен 14 сехетрен кая юлмасӑр кун пирки хӑвӑр участока ҫырса е сӑмахпа пӗлтермелле, вара киле пырса суйлаттарӗҫ.
Авӑн уйӑхӗн 11-мӗшӗнче ЧР ял хуҫалӑх министрӗн ҫумӗ кам пулни паллӑ пулнӑ. Паян ЧР Министрсен Кабинечӗн председателӗ Иван Моторин кун тӗлӗшпе хушу алӑ пуснӑ.
Официаллӑ документ тӑрӑх, ЧР ял хуҫалӑх министрӗн Сергей Павловӑн виҫҫӗмӗш ҫумӗ Константин Никитин пулать. Вӑл Вӑрмар район администрацийӗн пуҫлӑхӗ пулнӑ.
Патшалӑх службинче ӗҫличчен вӑл слесарьте, савутри цех наладчикӗнче, тӗп бухгалтерта, финанс уйрӑмӗн заведующийӗнче ӗҫленӗ. 1989-2010 ҫулсенче Константин Никитин Вӑрмарти РАЙПО председателӗнче вӑй хунӑ.
Министрӑн ҫӗнӗ ҫумӗн экономист тата юрист дипломӗсем пур. Унччен ку вырӑнта Алексей Самаркин ӗҫленӗ. Вӑл халӗ Комсомольски район администрацийӗн пуҫлӑхӗн пуканне йышӑнать.
Ҫӗнӗ Шупашкарта паллӑ мар ҫынсем Халӑх ирӗклӗхӗн партийӗн (ПАРНАС) хастарӗн Феликс Милицинӑн урапине киревсӗр сӑмахсемпе ҫырса пӗтернӗ.
Феликс Милицин урапине сӑрласа пӗтернине авӑн уйӑхӗн 4-мӗшӗнче ирхине асӑрханӑ. «Тимӗр урхамаха» хура сӑрӑпа вараланӑ.
Урапан малти чӳречи ҫине ашкӑнчӑксем «Фашист» тесе ҫырнӑ, водитель алӑкӗ ҫине «Вали» тесе сӑрланӑ. Кунсӑр пуҫне виҫӗ кустӑрмине шӑтарнӑ.
Хастар хӑй шутланӑ тӑрӑх, ку политикӑпа ҫыхӑннӑ. Вӑл Раҫҫей позицине Крым тата Украина тӗлӗшпе критиклесе пӗччен пикет темиҫе те ирттернӗ. Феликс Милицин ҫакӑнпа ҫыхӑнтарать ку пулӑма.
Унччен ӑна хӑратни те пулнӑ-мӗн, ҫавӑнпа вӑл хваттерне улӑштарнӑ. Халӗ хур курнӑскер полицие ыйту ҫырнӑ.
Информаци коммуникацийӗсен «Танлаштарӑм» (Рейтинг) центрӗ ҫӗршыври регионсене ертсе пыракансен утӑ-ҫурла уйӑхӗсенчи ӗҫне хакланӑ. Унта Чӑваш Ен Элтеперӗн тивӗҫӗсене вӑхӑтлӑх пурнӑҫлакан Михаил Игнатьев унчченхи 25-мӗш йӗркерен 21-мӗшне йышӑннӑ.
Михаил Игнатьев ҫӳлерех картлашка йышӑннине хаклакансем республикӑра усламҫӑсем валли лайӑх условисем туса панине, демографи тӑрӑмне, ҫӗнӗ шкулсемпе ача пахчисем уҫӑлнине, сывлӑх сыхлавӗ енӗпе лару-тӑру аваннине палӑртаҫҫӗ.
Танлаштарӑма йӗркеленӗ чух, чӑн та, уҫӑ ҫӑлкуҫри материалсемпе тата регионсенчи тата ҫӗршыв шайӗнчи экспертсен шухӑшне те усӑ курнӑ-мӗн.
Маларах Чӑваш Ен инвестици климачӗ енӗпе ҫӗршывра тӑххӑрмӗш вырӑн йышӑннӑччӗ. Кун пирки Раҫҫей Президенчӗ Питӗрти экономика форумӗнче палӑртнӑччӗ.
Чӑваш Ен Элтеперӗн должноҫне йышӑнассишӗн хӑйӗн кандидатурине тӑратнӑ ҫитмӗл урлӑ темиҫе ҫул каяллах каҫнӑ Валерий Сапожников суйлава хутшӑнмассине пӗлтерни пирки Чӑваш халӑх сайчӗ систернӗччӗ.
Аса илтеретпӗр, Сапожников хӑй шухӑшне Раҫҫейри пенсионерсен союзӗ тата парти хастарӗсем тӗл пулнӑ чухне пӗлтернӗ. Вӗсем Михаил Игнатьевӑн кандидатурине ырласа ӑна пулӑшма чӗнсе каланӑ.
Анчах республикӑн Тӗп суйлав комиссине «Регнум» Валерий Сапожников ун ҫыру ярса ӗлкӗреймен. Ӗнер вӑл унта ҫав хута ҫитернӗ.
Элтепер пуканӗшӗн кӗрешӗве ҫапла вара 4 ҫын тухӗ: Михаил Игнатьев («Пӗрлӗхлӗ Раҫҫей»), Валентин Шурчанов (КПРФ), Олег Николаев («Тӗрӗслӗхшӗн Раҫҫей»), Константин Субботин (ЛДПР).
Чӑваш Республикин Пуҫлӑхӗн тата вырӑнти хӑйтытӑмлӑх органӗсен суйлавӗ умӗн Чӑваш Енре «Хӗрӳ лини» уҫма йышӑннӑ. Вӑл — республикӑри Общество палатипе «Раҫҫейри ирӗклӗ суйлав фончӗ» коммерцилле мар общество организацийӗн пӗрле пуҫарнӑ проект-мӗн.
Федерацин 2016 тата 2018 ҫулсенчи суйлавӗ умӗн «Хӗрӳ лини» пункчӗн пӗлтерӗшӗ татах ӳсӗ тесе шухӑшлаҫҫӗ сӑнавҫӑсем.
Лини суйлав тапхӑрӗнче кӑна мар, малашне те ӗҫлӗ.
«Хӗрӳ лини» адресӗпе телефонӗсем: Шупашкар хули, Республика тӳремӗ, 2-мӗш ҫурт, 118 пӳлӗм; тел. (8352) 39-35-86; электрон почти: chuvashia21-hotline@mail.ru; SMS ямалли номер те пур: 8-927-668-35-67.
«Хӗрӳ линин» Мускаври тӗп пункчӗпе те ҫыхӑнма май парать. Унӑн тӳлевсӗр номерӗ — 8-800-333-4103.
Шупашкарта хула пухӑвӗн депутачӗсене суйлас тӗлӗшпе маларах пуҫланнӑ суйлава вӑхӑтлӑха чарса лартнӑ. Ҫапла майпа республикӑран авӑнӑн 13-мӗшӗччен тухса каякансен граждан тивӗҫне пурнӑҫлама май ҫук. Ҫапла «Правда ПФО» сайтра пӗлтереҫҫӗ.
Сайтра ҫапларах ҫырнӑ: «Маларах суйланисем улталаннӑ, мӗншӗн тесен вӗсен «сасӗ» вӑйра шутланмасть».
Авӑнӑн 5-мӗшӗнче суйлав комиссийӗ РФ Тӗп суйлав комиссийӗн йышӑнӑвне пурнӑҫласа «Раҫҫей патриочӗсем» парти списокне регистрациленӗ. Ҫапла майпа маларах пичетленӗ бюллетеньсем макулатура пулса тӑнӑ.
ЧР Тӗп суйлав комиссийӗн «хӗрӳ линийӗ» пӗлтернӗ тӑрӑх, ҫитес кунсенче ҫӗнӗ бюллетеньсем пичетлӗҫ, вӗсене участокри комиссийӗсене хӑвӑрт валеҫӗҫ. «Хальлӗхе маларах суйлама май ҫук», — тенӗ унта.
«Раҫҫей патриочӗсем» бюллетеньре ҫиччӗмӗш номер илӗҫ. Парти хӑйсенчен килмен сӑлтавсене пула шӑпа янӑ ҫӗре хутшӑнайман.
«Раҫҫей патриочӗсем» парти лидерӗ Владислав Солдатов каланӑ тӑрӑх, унчченхи бюллетеньсене пӑрахӑҫламасан та пултарӗҫ. Анчах кунашкал пулсан парти суда ыйту ҫырӗ.
+0.3 °C