Шупашкарти тухтӑрсем тепӗр ачана вертолетпа урӑх региона илсе ҫитернӗ. Хальхинче – Пензӑна. Ҫул ҫинче 2,2 сехет иртнӗ. Пензӑра 2 эрнери ачан чӗрине операци тунӑ. Вӑл ку енӗпе хавшакрах ҫуралнӑ.
Каялла килнӗ чухне тухтӑрсем операцие чӑтса ирттернӗ ачана илсе ҫитернӗ. 1 уйӑхри пепкен сывлӑхӗ йывӑртарах, ӑна ИВЛ аппаратпа сывлаттарнӑ, зонд витӗр ҫитернӗ.
Вертолетра васкавлӑ медпулӑшу анестезиолог-реаниматологӗ Валерий Ильин тата Республикӑри ача-пӑча клиника пульницин тухтӑрӗсем – Мария Курсова, Вероника Костюкова - пулнӑ.
Паян, Пӗтӗм Раҫҫейре уявлакан Ҫемье, юрату тата шанчӑклӑх кунӗнче, Чӑваш Ен Элтеперӗ Олег Николаев нумай ачаллӑ ҫемьесене пулӑшассипе ҫыхӑннӑ хушӑва алӑ пуснӑ.
Документра пӑхса хӑварнӑ тӑрӑх, ҫул ҫитмен сакӑр е унран та ытларах ача ӳстерекен ҫемьесене 150 лаша вӑйӗнчен пӗчӗкрех двигательлӗ автомбильшӗн транспорт налукӗ тӳлеттермӗҫ. Ку йышӑну кӑҫалтан вӑя кӗрӗ.
Республикӑра паракан амӑш капиталне ҫитес ҫултан нумай ачаллӑ ҫемьесем автотранспорт туянма усӑ курайӗҫ. Унсӑр пуҫне нумай ачаллисене шкулта апат тӳлевсӗр ҫитерессине те пӑхса хӑварнӑ.
Маларах асӑннӑ тӗллевпе республика хыснинчен 120 миллион тенкӗ ытла уйӑрӗҫ.
Калуга облаҫӗнчи арҫын алимент тӳлеменшӗн Улатӑрти 8-мӗш колони-поселенире ларнӑ. Утӑ уйӑхӗн 2-мӗшӗнче вӑл ирӗке тухнӑ. Ирӗке тухсанах арҫын алимент тӳлеменшӗн каллех тытса ан чарччӑр тесе тӑван тӑрӑхне тухса кайма палӑртнӑ. Анчах колони алӑкӗнчен тухса тӑнӑ ҫеҫ – каллех йӗрке хуралҫисен аллине лекнӗ.
Сӗнтӗрвӑрри районӗн суд приставӗсем ун тӗлӗшпе ӗҫ производстви пуҫарнӑ. Арҫын 18 ҫул тултарман икӗ ачишӗн алимент тӳлемен. Парӑм 630 пин тенкӗ ытла пухӑннӑ. Ӑна куншӑн административлӑ тата уголовлӑ майпа явап тыттарсан та тӳрӗ ҫул ҫине тӑман. Парӑм вара пухӑннӑ та пухӑннӑ.
Чӑваш Ен хыснинче нумай ачаллӑ ҫемьере ҫитӗнекен шӑпӑрлансене шкулта тӳлевсӗр ҫитерме укҫа тупӑннӑ. Сӑмах май, унччен ку укҫана муниципалитет уйӑрнӑ.
Ку ыйтӑва Правительство ҫуртӗнче иртнӗ планеркӑра сӳтсе явнӑ. ЧР вӗренӳ министрӗ Алла Салаева пӗлтернӗ тӑрах, республикӑра ку категорие кӗрекен 11800 ача шутланать. Вӗсене хула е район хыснинчи укҫапа тӳлевсӗр ҫитермелле, анчах пур чухне те укҫа ҫитмест-мӗн.
Нумаях пулмасть республика тухӑҫлӑ ӗҫленӗшӗн 455 миллион тенкӗ гранта тивӗҫнӗ. Шӑпах ку укҫа ачасене тӳлевсӗр ҫитермешкӗн кайӗ. Ҫапах район-хула хыснисем те ку тӗллевпе укҫа уйӑрӗҫ.
Абхазинчи Гагры курорт хулинче пӗр ҫемье шар курнӑ. Ӑна тата унӑн виҫӗ ачине вӑйлӑ ҫил тинӗсе туртса кӗрсе кайнӑ.
Ҫӗршывӑн кӑнтӑр енчи районӗсенче сак кунсенче вӑйлӑ ҫумӑр ҫунӑ. Асар-писер ҫанталӑк Абхазинче те алхаснӑ. Тинӗсри хум 3 метр таран ҫӗкленнӗ.
Пӗр хӗрарӑм тинӗс хумханнине пӑхса тӑман – шыва кӗме кайнӑ. Ӑна хӑна ҫуртӗнче ӗҫлекенсем те чарасшӑн пулнӑ имӗш, анчах виҫӗ ача амӑшӗ тӑнламан.
Ҫемье Бзыбь юханшывра шыва кӗнӗ. Тахӑш самантра вӑйлӑ юхӑм ҫемьене тинӗсе туртса кайнӑ. Инкеке лекнӗ ачасенчен пӗрне ҫынсем пулӑшма пултарнӑ. Вырӑна пырса ҫитнӗ ҫӑлавҫӑсем тепӗр икӗ ачана ҫӑлнӑ, анчах вӗсенчен пӗри пульницӑра вилсе кайнӑ. Хӗрарӑма тупайман-ха.
Утӑ уйӑхӗн 5-мӗшӗнче Сартури 42 ҫулти арҫын-турист Гагры хулинче путса вилнӗ. Ун чухне те тинӗс вӑйлӑ хумханнӑ.
Паян ирхине, утӑ уйӑхӗн 5-мӗшӗнче, чӗре чирӗпе аптӑракан тин ҫуралнӑ арҫын ачана санитари вертолечӗпе Хусана васкавлӑн илсе ҫитернӗ.
Ача 4 кун каялла ҫуралнӑ, ӑна тухтӑрсем тӗрӗсленӗ те Хусанти ача-пӑча пульницине илсе каймаллине палӑртнӑ. 4 кунра арҫын ача кӑшт ҫирӗпленнӗ, ҫула йӗркеллех чӑтса ирттернӗ.
Ҫул ҫинче унӑн сывлӑхӗ япӑхланман, унпа юнашар тухтӑрсем пулнӑ. Вертолет Хусана 45 минутра ҫитнӗ.
Ашшӗ-амӑш хӑйсен ывӑл-хӗрне сайра тӗл пулакан ят пама ӑнтӑлать. Ҫакӑн пек талпӑннине Шупашкар хулин загсӗнче ӗҫлекенсем асӑрханӑ.
Республикӑн тӗп хулинче пӗрисем хӑйсен хӗрне «Яра» тесе чӗнеҫҫӗ. Ку ят хӗвеллӗ, кӑра, ҫине тӑракан тенине пӗлтерет иккен. Ашшӗ-амӑшӗ шухӑшланӑ тӑрӑх, ята кура ҫын пурнӑҫӗ, унӑн шӑпи йӗркеленӗ.
Хула ҫыннисене халь ҫеҫ асӑннӑ Ярӑсӑр пуҫне Таисия, Майя, Маргарита, Эмилия, Надежда, Розалина, Мишель ятсем килӗшеҫҫӗ. Арҫын ачасем валли вӗсем Николай, Родион, Семен, Прохор, Леон, Гордей, Азаль.
Хурлӑхлӑ хыпар: Ҫӗрпӳре 3 ҫулти арҫын ача 5-мӗш хутран ӳкнӑ. Шел те, вӑл вилнӗ. Кун пирки Следстви комитечӗ пӗлтерет.
Маланлӑха пӗлтернӗ тӑрӑх, ҫӗртме уйӑхӗн 23-мӗшӗнче 8 сехет те 40 минутра арҫын ачана килте 5-ри тата 12 ҫулти аппӑшӗсем пӑхнӑ, аслисем пулман. Вӑл тӗпелте чӳрече ҫине хӑпарса кайнӑ та аялалла ӳкнӗ.
Арҫын ачана Шупашкарти пульницӑна илсе ҫитернӗ. Анчах вӑл ҫӗртме уйӑхӗн 24-мӗшӗнче ирхине вилнӗ.
Ҫӗнӗ Шупашкарта та кун пек пӑтӑрмах пулнӑ. 2 ҫулти арҫын ача 4-мӗш хутри чӳречерен тухса ӳкнӗ. Ҫав вӑхӑтра амӑшӗ те килтех пулнӑ. Халӗ ӑна пульницӑра тухтӑрсем май килнӗ таран пулӑшаҫҫӗ.
Ҫӗртме уйӑхӗн 24-мӗшӗнче 19 сехет те 20 минутра Ҫӗнӗ Шупашкарти Винокуров урамӗнчи ҫул урлӑ каҫмалли вырӑнта икӗ ачана машина ҫапса хӑварнӑ.
«Киа Рио» водителӗ, 26 ҫулти арҫын, 8-ти тата 14 ҫулти хӗрачасем ҫине кӗрсе кайнӑ. Лешсем ятарлӑ вырӑнта ҫул урлӑ каҫма тӑнӑ. Ачасен сывлӑхӗ самаях сиенленнӗ. Тӑнсӑр пулнӑскерсене пульницӑна илсе кайнӑ.
Кун тӗлӗшпе Следстви комитечӗ пуҫиле ӗҫ пуҫарнӑ. Руль умӗнче Чӑваш Енӗн Адвокатсен палатин ваккачӗ пулнӑ. Ҫакӑ паллӑ: ачасене таптаса кайнӑ чухне вӑл урӑ пулнӑ. Аварие курнӑ ҫынсем каланӑ тӑрӑх, вӑл шӑп ҫав вӑхӑтра телефонпа калӑҫнӑ имӗш.
Ӗнер, ҫӗртме уйӑхӗн 21-мӗшӗнче, Шупашкарти тӗп пляжра инкек пулнӑ. 12 ҫулти хӗрача Атӑлта юраман вырӑна ишсе кайнӑ та путса вилнӗ. РФ Следстви комитечӗн Чӑваш Енри следстви органӗсем кун тӗлӗшпе следстви умӗнхи тӗрӗслев ирттереҫҫӗ.
Ҫакӑ паллӑ: хӗрача пляжра амӑшӗпе тата икӗ аппӑшӗпе пулнӑ. Тахӑш самантра вӑл ишсе кайма юраман вырӑналла кайнӑ, ҫавӑнта путнӑ. Ҫӑлавҫӑсем унӑн виллине пӗр сехетрен ҫеҫ тупнӑ.
Халӗ ӗҫ-пуҫ мӗнле пулса иртнине уҫӑмлатаҫҫӗ.
-7.7 °C