Шупашкарти 76 ҫулти хӗрарӑм чутах ултавҫӑсене 2 пин доллар куҫарса паман. Юрать, ырӑ ҫын тӗлне лекнӗ вӑл.
Хӗрарӑмпа хӑйӗнпе Тӗп банк ӗҫченӗ тесе паллаштарнӑ ҫын калаҫнӑ. Хайхискер ӗненмелле пултӑр тесе удостоверенине те ӳкерсе ярса панӑ.
Хӗрарӑма 2 пин доллар куҫарма ӳкӗте кӗртнӗ. Ун валли илсе ҫитерекен служба ӗҫченне те чӗнсе панӑ, «банк ӗҫченӗ» ӑна кинемее укҫа куҫарса памашкӑн пулӑшма ыйтнӑ. Олег Михайлов хӗрарамӑн аллинчи укҫа пачкисене, хут ҫине ҫырнӑ счет номерне курсан тӳрех ӑнланнӑ: кинемее такамсем улталасшӑн. Вӑл полици чӗннӗ.
ЧР шалти ӗҫсен министрӗ Виктор Шметков Олег Михайлова кинемее утавҫӑсенчен хӑтарнӑшӑн тав тунӑ.
Ӗнер А-151 автоҫул ҫинче, Патӑрьел муниципаллӑ округӗнче, 21 сехет те 40 минутра авари пулнӑ. Аварире 48 ҫулти хӗрарӑмӑн пурнӑҫӗ татӑлнӑ.
Малтанлӑха пӗлтернӗ тӑрӑх, «Калина» рулӗ умӗнче ларнӑ хӗрарӑм руле итлеттереймесӗр кювета чӑмнӑ та йывӑҫа пырса тӑрӑннӑ. Вӑл хӑрушсӑрлӑх пиҫиххипе ҫыхӑнман пулнӑ. Правана вара кӑҫал кӑрлач уйӑхӗнче кӑна илнӗ.
Лавккасенче ӗҫлекенсене пӗри улталаса ҫӳренӗ. Вӑл Канаш тата Ҫӗрпӳ муниципаллӑ округӗсенче улталама ӗлкӗрнӗ.
Ҫамрӑк мар арҫын суту-илӳ точкисене кӗрсе хаклӑ мар япала туяннӑ. Уншӑн вӑл 5 пин тенкӗлӗх укҫапа татӑлнӑ. Кайран тавара тӗрлӗ сӑлтав тупса каялла пырса панӑ, ҫав вӑхӑтра банкнотӑсенчен пӗр пайне вӑрласа юлнӑ. Суту-илӳ точкисене вӑл 8 пин тенкӗлӗх шар кӑтартнӑ.
Сӑнпа пӑхсан арҫын 50-55 ҫулсенче, 175-180 сантиметр ҫӳллӗш.
Арҫынна паллакансене йӗрке хуралҫисене 8 937 959 79 99 е 102 телефонпа шӑнкӑравласа пӗтерме ыйтаҫҫӗ.
Чӑваш Енре дронсенчен хӳтӗленмелли 4 пӑшал туяннӑ. Вӗсене хысна шучӗпе илнӗ.
Кун пирки республика Элтеперӗ Олег Николаев Шалти ӗҫсен органӗсенче ӗҫлекенсен кунӗнче пӗлтернӗ.
«Ҫитес вӑхӑтра вӗсене эпир Чӑваш Енӗн Шалти ӗҫсен министерствине парӑпӑр. Асӑннӑ хатӗрсем уйрӑмах асӑрханмалли зонӑсене хӳтӗлеме кирлӗ», – тенӗ Олег Николаев.
Кӑҫал утӑ уйӑхӗн 29-мӗшӗнче республикӑра ҫил-тӑвӑл алхасрӗ. Ҫав вӑхӑтра Ҫӗнӗ Шупашкарти полици капитанӗ Сергей Ежов патруль катерӗпе Атӑл акваторийӗнче пулнӑ.
Ҫил-тӑвӑл пуҫлансан Атӑлӑн сулахай енче канакансем ҫуйхашма пуҫланӑ: ачасем макӑрнӑ, хӗрарӑмсем кӑшкӑрашнӑ, йывӑҫсем ӳкнӗ. Сергей Ежов вӗсене ҫыран хӗррине пырса катера ларма хушнӑ. Ҫапла вӑл 7 рейс туса 30 хӗрарӑмпа ачана Ҫӗнӗ Шупашкар еннелле каҫарнӑ.
Куншӑн полици капитане ШӖМӗн «Ҫӑлнӑ чухне хӑюлӑх кӑтартнӑшӑн» медалӗпе чысланӑ.
Пирӗн ҫӗршыва ют ҫӗршывсенчи ҫынсем сахал мар килеҫҫӗ. Ҫывӑх Хӗвелтухӑҫӗнчи ҫынсем уйрӑмах йышлӑ.
Пирӗн патра ӗҫлесе пурӑнас тесен вӗсен вырӑс чӗлхи пӗлмелле. Ҫавна экзамен тытса, ятарлӑ сертификатпа ҫирӗплетсе памалла.
Анчах хутпа хут пӗр мар иккен. Тӗрӗсрех каласан, вырӑс чӗлхи пӗлмен мигрантсем те тупӑнаҫҫӗ иккен.
Чӑваш Енӗн Шалти ӗҫсен министерствин Миграци енӗпе ӗҫлекен управленийӗ ют ҫӗршыв ҫыннисем кӑтартакан сертификатсене тӗрӗслеҫҫӗ те хут ҫинче ҫырни пур чухне те тӳрре килменни палӑрать — документсен хуҫисем вырӑс чӗлхине пӗлмеҫҫӗ.
Чӗлхе пӗлмесӗрех сертификатлӑ панӑ тӗслӗхсене кӑҫал пирӗн тӑрӑхри полицейскисем 35 хутчен тупса палӑртнӑ. Ҫавна май яваплисем тӗлӗшпе пуҫиле ӗҫсем пуҫарнӑ. Сертификат илме пулӑшнисене судсем тӗрмене хупса хумасӑр явап тыттарнӑ, мигрантсене вырӑс чӗлхи пӗлет тесе панӑ сертификатсене вара суя тесе йышӑннӑ.
Паян, юпа уйӑхӗн 26-мӗшӗнче, Шупашкар муниципаллӑ округӗнче ҫул ҫинче инкек пулса иртнӗ. Унта арҫын пунӑҫӗ татӑлнӑ.
«Кӳкеҫ-Тутаркасси-Ҫӗнӗ Шупашкар» ҫулпа пынӑ чухне Тренккасси ялӗ тӗлӗнче «ВАЗ-2107» тата «Урал» автомашинӑсем пырса ҫапӑннӑ. Инкек ирхи 7 сехет те 20 минутра пулнӑ.
Малтанласа палӑртнӑ тӑрӑх, «ҫиччӗмӗшӗн» водителӗ руле пӑрса янӑран хирӗҫ килекен ҫул ҫине тухса кайнӑ. Унта вӑл пысӑк машинӑпа пырса ҫапӑннӑ.
52 ҫулти арҫын (Чӑваш Енӗн Шалти ӗҫсен министерствин сайтӗнчи хыпарта хӑш машина водительне палӑртман. Сӑнӳкерчӗк тӑрӑх хакласан, ҫӑмӑл машина лапчӑнсах ларнӑ. Апла пусан унӑн водителӗн пурнӑҫӗ сарӑмсӑр татӑлнӑ тесе пӗтӗмлетмелле-тӗр) инкек вырӑнӗнчех вилсе кайнӑ.
Паян ҫӗрле Улатӑр муниципаллӑ округӗнчи Кире поселокӗнче икӗ ҫын аварире вилнӗ. Инкек Ленин урамӗнче пулнӑ.
Малтанлӑха пӗлтернӗ тӑрӑх, мотоцикла тытса пынӑ каччӑ руле итлеттереймен – йывӑҫ ҫине пырса тӑрӑннӑ. Хӑй те, пассажир та вилнӗ. Водитель 21 ҫулта кӑна пулнӑ. ШӖМ хыпарланӑ тӑрӑх, вӑл мотоцикла икӗ кун маларах кӑна туяннӑ, регистрацилесе те ӗлкӗреймен.
Чӑваш Енре «Халӑх дружинникӗ» конкурс иртнӗ. Унта муниципалитет тата хула шайӗнче ҫӗнтернӗ 20 ҫын хутшӑннӑ. Конкурса Юстици ӗҫӗсен патшалӑх служби ШӖМпе пӗрле ирттернӗ.
Пӗрремӗш вырӑна Елчӗк районӗнчи Алексей Тихонов йышӑннӑ. Иккӗмӗш вырӑна Канаш районӗнчи Вячеслав Шпаков тухнӑ. Виҫҫӗмӗш вырӑна вара Элӗк районӗнчи халӑх дружинникӗ Эльвира Иванова йышӑннӑ.
Малти вырӑнсене тухнисене дипломпа тата парнесемпе хавхалантарнӑ.
Улатӑрта ҫамрӑк водителӗн пурнӑҫӗ татӑлнӑ. Вӑл руле итлеттереймен.
Инкек авӑн уйӑхӗн 23-мӗшӗнче Улатӑрти Тельман урамӗнче пулнӑ. ШӖМ малтанлӑха пӗлтернӗ тӑрӑх, 24 ҫулти каччӑ руле итлеттереймен - йывӑҫ ҫине пырса тӑрӑннӑ. Водитель вӑйлах аманнӑ. Ӑна пульницӑна илсе кайнӑ. Анчах, шел те, вӑл унта сывлама пӑрахнӑ.
-4.7 °C