Ҫӗнӗ Шупашкарта пурӑнакан 18 ҫулти Валерия Вадимовна Вяткина чӳк уйӑхӗн 16-мӗшӗнче килтен тухса кайнӑ та таврӑнман. Хӗр ӑҫта пулнине халь те пӗлмеҫҫӗ, ӑна шыраҫҫӗ.
Хыпарсӑр ҫухалнӑ хӗре ЧР ШӖМӗн уголовлӑ шырав ӗҫченӗсем шыраҫҫӗ. Валерия Вяткина 165 сантиметр ҫӳллӗш, тулли кӗлеткеллӗ, ҫӳҫӗ ҫырӑ, куҫӗ симӗс. Килтен кайнӑ чухне хура куртка, кӑвак джинс шӑлавар, хура кроссовка тӑхӑннӑ пулнӑ, пӗрле хура сумка тата телефон илнӗ.
Эсир ун пирки мӗн те пулин пӗлетӗр пулсан (8352) 73-80-02 е 102 номерпе шӑнкӑравлӑр.
Паян ирхи 8 сехет тӗлӗнче Етӗрне районӗнче кӗпер ҫине кӗнӗ вырӑнта инкек пулнӑ. ШӖМ пресс-служби пӗлтернӗ тӑрӑх, ҫамрӑк арҫын пысӑк машина кустӑрми айне пулса вилнӗ.
СуперМАЗ водителӗ, 21 ҫулти каччӑ, машинӑна юсама шутланӑ, анчах кустӑрмисене ятарлӑ хатӗрпе ҫирӗплетсе тӗкӗлемен. Ҫав вырӑнта вара ҫул кӑштах тӑвайккиллӗ, водитель ҫакна шута илмен ахӑртнех.
Каччӑ юсав тунӑ чухне пысӑк машина каялалла чакнӑ, водителе таптанӑ. Вӑл йывӑр сурансене пула ҫавӑнтах вилнӗ.
Палӑртмалла: сӗт турттаракан ҫак машина – Комсомольски районӗнчи предприятин.
Шупашкар районӗнче вырнаҫнӑ «Роса» (чӑв. Сывлӑм) коллективлӑ пахчари дача хаҫисем хӑйсен пурлӑхӗ ҫитнине пӗрин хыҫҫӑн тепри сиснӗ. Аптӑранӑскерсем пакунлисене евитлеме тытӑннӑ. Йӗрке хуралҫисем вӑрах шутласа тӑман — вӑрра вырӑнта тытас тенӗ. Ара, пӗрре иленнӗскер тата тепре пыма пултарӗ.
Чӑваш Енӗн Шалти ӗҫсен министерствинче пӗлтернӗ тӑрӑх, пакунлисен аллине 25 ҫулти ҫамрӑк арҫын ҫакланнӑ. Вӑл пӗр вырӑнтӑ тӗпленсе пурӑнмасть иккен. Дачӑсем патне вӑл машинӑпа пырса ҫитнӗ. Вӑрланӑ япаласене вӑрттӑн вырӑна пытарса хунӑ. Анчах тиесе кайма май килмен — ҫакланнӑ.
Ҫамрӑксер тӑватӑ дачӑри пурлӑха пӗр ҫӗре пухса хатӗрленӗ иккен. Каччӑ унччен те судпа айӑпланнӑ. Хӑш статьяпа айӑпланнине уҫӑмлатман та, анчах пурлӑхпа ҫыхӑннӑ преступлени туни паллӑ.
Чӑваш Ен Ӗҫ тата социаллӑ хӳтлӗх министерстви тата уполномоченнӑйсен аппарачӗсем ҫӗнӗ ҫурта куҫӗҫ. Ҫӗнӗ ҫуртах мар-ха. Ҫӗнӗ вырӑна.
Вӗсем наркотӗрӗслев вырнаҫнӑ ҫуртра пулӗҫ. Пӗлменнисене пӗлтерер: тытӑма федераци шайӗнче пӗтерсе Шалти ӗҫсен министерствине куҫариччен ҫав ведомство Шупашкарти Мускав проспектӗнчи 3-мӗш ҫуртра вырнаҫнӑччӗ. Наркотик ҫаврӑнӑшӗпе кӗрешекен федераци службин Чӑваш Енри управленийӗ унта 2017 ҫулччен ӗҫлерӗ.
Тытӑма 2016 ҫулхи ҫӗртме уйӑхӗнче пӗтерчӗҫ. 2017 ҫулхи раштав уйӑхӗнче наркополицейскисем Шупашкарти Дзержинский урамӗнчи 4-мӗш ҫурта куҫрӗҫ.
Пушӑ пӳлӗмсене 2024 ҫулхи ҫурла уйӑхӗн 31-мӗшӗччен тесе ЧР Ӗҫ тата социаллӑ хӳтлӗх министерствине тата Этем правине хӳтӗлекен уполномоченнай аппаратне (вӑл Чӑваш Наци вулавӑшӗнче вырнаҫнӑ) тата Усламҫасен правине хӳтӗлекен уполномоченнӑй аппаратне (вӑл Республика лапамӗнче вырнаҫнӑ) пама йышӑннӑ.
Чӑваш Ен Шалти ӗҫсен министерстви Шупашкарта арҫын виллине тупнине пӗлтернӗ. Ӑна юпа уйӑхӗн 6-мӗшӗнчех асӑрханӑ. Анчах, ЧР ШӖМӗ ӗнер пӗлтернӗ тӑрӑх, ҫав арҫын камне пӗлмеҫҫӗ. Пакунлисем ҫынсенчен пулӑшу ыйтаҫҫӗ.
Арҫын виллине Шупашкарти Станци ҫумӗ урамӗнчи йывӑҫсем хушшинче асӑрханӑ. Паллӑ мар ҫын сӑнӗпе 45-50 ҫулсенче курӑнать, тӑршшӗ — 170 сантиметра яхӑн, вӑтам пӳ-силлӗ, ҫӳҫӗ хура.
Чӑваш Ен Шалти ӗҫсен министерстви пӗлтернӗ тӑрӑх, паллӑ мар арҫын капюшонлӑ хура курткӑпа, сӑрӑ толстовкӑпа, хура шӑлаварпа, хура сӑран атӑпа пулнӑ.
Йӗрке хуралҫисем паллӑ мар арҫын пирки мӗн те пулин пӗлекенсене 39-40-94 е 102 номерсемпе шӑнкӑравлама ыйтаҫҫӗ.
Маларах Сӑр юханшывӗнче арҫын виллине тупнӑччӗ.
Супермаркетсенче япала вӑрланӑ арҫынна полицейскисем тытса чарнӑ. Кун пирки ЧР ШӖМӗ пӗлтерет.
31 ҫулти арҫын Раҫҫейри хуласем тӑрӑх ҫӳренӗ, лавккасене кӗрсе апат-ҫимӗҫ вӑрланӑ.
Юпа уйӑхӗн 25-мӗшӗнче Шупашкарти лавккасенчен япала вӑрлани пирки полицие хыпар ҫитнӗ. Хайхи арҫын 9 лавккаран йӑкӑртма ӗлкӗрнӗ. Тытса чарнӑ чухне унӑн машининче 300 банка кофе, 100 флакон шампунь тупнӑ.
Арҫын хӑйӗн тӑван хулинче кунашкал хура ӗҫпе аппаланнӑ, куншӑн ӑна административлӑ майпа явап тыттарнӑ. Хальхинче вара ун тӗлӗшпе пуҫиле ӗҫ пуҫарнӑ.
Атӑл леш енче ҫӗтсе кайнӑ хӗрарӑма ҫӗрӗпе шыранӑ. Ҫакӑн пирки Чӑваш Ен Шалти ӗҫсен министерстви пӗлтернӗ. Хӗрарӑм «Заволжье» пахча юлташлӑхӗ тӗлӗнче ҫӗтсе кайнӑ. Дачӑран таврӑнакан арӑмӗ ҫухални ҫинчен унӑн упӑшки йӗрке хуралҫисене пӗлтернӗ.
Йӑлӑмри вӑрмана Шалти ӗҫсен министерствин ӗҫченӗсем, вӗсен йышӗнче виҫӗ кинолог пулнӑ, тухса кайнӑ. Инкеклӗ ӗҫсен министерствинче тӑрӑшакансем, ҫавӑн пекех «Лиза Алерт» шырав организацийӗн хастарӗсем те хӗрарӑма шыранӑ.
Дачӑран таврӑнакан хӗрарӑм карас телефонӗсӗр пулнӑ. Ӑна, ҫӗтсе кайнӑскерне, ҫӗрӗпе шыранӑ. Вӑрманта, Атӑл ҫыранӗ хӗрринче. Ирхи пиллӗкре ӑна волонтерсем тупнӑ. ЧР Шалти ӗҫсен министерствин пресс-службинче пӗлтернӗ тӑрӑх, пенси ҫулӗнчи хӗрарӑм таса сывах пулнӑ.
Юпа уйӑхӗн 26-мӗшӗнче 19 сехет те 40 минутра «Атӑл» М-7 федераци ҫулӗ ҫинче пилӗк машина инкеке лекнӗ.
Чӑваш Енӗн Шалти ӗҫсен министерстви пӗлтернӗ тӑрӑх, ГАЗ-3009А1 автофургон водителӗ ҫула май каякан ГАЗ-2705 машинӑпа ҫапӑннӑ. Лешӗ «Лада-111730» маркӑллӑ автомобиле пырса тӑрӑннӑ. Унтан микроавтобус хирӗҫ ҫул ҫине тухса кайнӑ, унта «Шевроле-Круз» машинӑпа ҫапӑннӑ. «Калина» «Ман» фура ҫине пырса тӑрӑннӑ.
Малтанласа шухӑшланӑ тӑрӑх,
автофургон рулӗ умӗнчи 61 ҫулти Шупашкар арҫынни пӗр машинӑпа тепӗр машина хушшинчи инҫӗше тытса пыман. Сурана пула вӑл вырӑнтах вилнӗ. Микроавтобусӑн суранланнӑ водительне васкавлӑ пулӑшу машини пульницӑна илсе кайнӑ. Инкек сӑлтавне специалистсем тӗплӗн тишкерсе палӑртӗҫ.
Ҫӗмӗрле хулинче юпа уйӑхӗн 26-мӗш каҫхине полицейскисем лӑпкӑ ыйхӑпа ҫывӑракан ҫынна ҫӗр хута вӑратса лартнӑ. Куншӑн арҫын питех те савӑннӑ, пакунлисене тав тунӑ.
Ҫав каҫхине, ҫурҫӗр иртни икӗ сехет тӗлӗнче, ШӖМӗн ҫул-йӗр инспекцийӗн ятарлӑ батальонӗн ӗҫченӗсем: полицин аслӑ лейтенанчӗ Василий Григорьев тата полицин лейтенанчӗ Сергей Ядранский — Ҫӗмӗрле хули тӑрӑх патрульпе ҫӳренӗ. Джержинский урамӗнче вӗсем пӗр ҫуртран тӗтӗм тухнине асӑрханӑ. Полицейскисем алӑкран тата чӳречесенчен шаккама тытӑннӑ. Вӗсем унта шалта ҫын пур пуль тесе шухӑшланӑ. Чӑн та, йӑнӑшман. 59 ҫулти арҫын пулнӑ. Часах ҫулӑм пурӑнмалли пӳрте ярса илнӗ. Полицейскисем кӳршӗсене те вӑратнӑ. Пушарпа кӗрешекенсене те вырӑна чӗнсе илнӗ. Вӗсем «хӗрлӗ автана» алхасма паман.
Кил хуҫи мунча хутнӑ иккен, хӑй ҫывӑрса кайнӑ.
ЧР ШӖМӗ «Контактра» халӑх тетелӗнчи страницинче 300 пин тенке йӑтса кайнӑ ҫынна шырани пирки пӗлтернӗ. Шупашкарта палламан арҫын хутаҫа чикнӗ укҫа-тенке тупнӑ та хӑйӗнпе пӗрле илсе кайнӑ.
Ку акӑ мӗнле пулса иртнӗ. Паян, юпа уйӑхӗн 22-мӗшӗнче, Граждан урамӗнчи пӗр урамри банкра пӗр ҫын хутаҫ манса хӑварнӑ. Унта вара 300 пин тенкӗ пулнӑ. Ӑна вара такам йӑтса кайнӑ.
Хутаҫа илсе кайнӑ ҫын видеокамерӑна лекнӗ. Вӑл ҫамрӑк курӑнать. Халӗ ӑна полицейскисем шыраҫҫӗ.
-1.7 °C