Чӑваш Енри Сывлӑх сыхлав министерстви шӑл ыратнӑран пуйӑсран анса юлнӑ пассажира пулӑшни пирки хӑпартланса пӗлтернӗ.
Мускавран Хусана кайма тухнӑ 024М-мӗш номерлӗ пуйӑсра ларса пыракан арҫыннӑн шӑл хытӑ ыратма тапранса кайнӑ. Александр малтан эмел ӗҫнӗ-ха, ыратни малтанласа лӑпланнӑ, анчах коронка айӗнчи шӑл кӑштахран чӑтма ҫук канӑҫсӑрлантарма тапранса кайнӑ.
Арҫын кун пек пулсан Хусана ҫитсе пӗтеймессине ӑнланса илнӗ те ҫул ҫинче стоматолог патне ӑҫта кӗрсе тухма май пуррипе кӑсӑкланма пуҫланӑ. Ҫапла вара вӑл Ҫӗмӗрлере анса юлнӑ. Республикӑн стоматологийӗн поликлиники уҫӑлнӑ ҫӗре вӑл пульница патне ҫитсе те тӑнӑ.
Любовь Грядинская стоматолог коронка айӗнче шӑла юсаса пломба лартса янӑ.
9 сехет те 45 минутра Ҫӗмӗрле витӗр Хусана каякан 130Х-мӗш номерлӗ пуйӑс ҫине ӗлкӗрнӗ, кӑнтӑрла иртни пӗрре ҫурӑна вӑл Хусана ҫитнӗ те.
Чӑваш патшалӑх юрӑпа ташӑ ансамблӗ кӗҫех Раҫҫейри хуласене гастрольпе тухса кайӗ. Ҫула вӑл «Чӑваш тӗнчи» театризациленӗ концерт программипе тухӗ.
Гастроль ака уйӑхӗн 21-мӗшӗнче Чӗмпӗр хулинче пуҫланӗ. Тепӗр кунне пултарулӑх коллективӗ асӑннӑ облаҫри Димитровград хулинче пулӗ.
Ака уйӑхӗн 23-мӗшӗнче ансамбль Чулхулари «Газ» культура ҫурчӗн сцени ҫине тухӗ. Тепӗр кунне, ака уйӑхӗн 24-мӗшӗнче, Пенза облаҫӗнчи Неверкино ялӗнче концерт кӑтартӗ. Ака уйӑхӗн 26-мӗшӗнче Хусанти куракансем Чӑваш Енри профессилле коллективӑн пултарулахӗпе киленӗҫ.
Сцена ҫине харӑсах 50 артист тухӗ, концерт вӑхӑтӗнче вӗсем 10 ытла тум ылмаштарса тӑхӑнӗҫ. Йышра тӗрлӗ конкурс лауреачӗсем, ят-сума тивӗҫнӗ ытти сцена ӑсти пулӗ.
К.В. Иванов ячӗллӗ Чӑваш патшалах академи драма театрӗ ҫак уйӑхӑн вӗҫӗнче Хусанта пулӗ. Унта вӑл «Карчӑксем качча каяҫҫӗ» спектакль кӑтартӗ.
Чӑваш спектакльне курма ӗмӗтленекенсне Хусанти Павлюхин урамӗнчи 57-мӗш ҫурта чӗнеҫҫӗ. Унта Халӑхсен туслӑхӗн ҫурчӗ вырнаҫнӑ. Артистсем ҫавӑн сцени ҫине ятарласа тухӗҫ.
Спектакле пуш уйӑхӗн 30-мӗшӗнче кӑтартӗҫ, вӑл 18 сехет те 30 минутра пуҫланӗ.
Чӑвашла пӗлмен куракансен ӑнланмӑпӑр тесе кулянма кирлӗ мар, спектакле синхрон мелӗпе вырӑсла куҫарса пырӗҫ.
Камитӗн билет хакӗ — 1000 тенкӗ.
Спектакль пирки тӗплӗнрех ыйтса пӗлес тесен карас телефонӗпе 89053183366 номерпе шӑнкӑравласа ыйтусене уҫӑмлатма май пур.
Пирӗн ентеш, Шупашкарта ҫуралса ӳснӗ Валентина Алексеева, ӗнер Хусан хулинче иртнӗ Пӗтӗм тӗнчери MISS BRICS илем конкурсӗнче ҫӗнтернӗ.
19 ҫулти Валентина 2023 ҫулта «Чӑваш Ен мисӗ» пулнӑччӗ, 2024 ҫулта «Раҫҫей мисӗ» хисеплӗ ята тивӗҫнӗ. Халӗ вара «БРИКС мисӗ» те пулса тӑнӑ. Конкурса Раҫҫей, Бразили, Инди, Китай, ЮАР, ОАЭ, Индонези, Куба, Боливи, Беларуҫ, Узбекистан, Малайзи, Казахстан, Уганда, Таиланд, Нигери, Вьетнам пикисем хутшӑннӑ.
Палӑртса хӑварар: Валентина 2006 ҫулхи ҫурлан 11-мӗшӗнче Шупашкарта ҫуралнӑ. 2024 ҫулта 5-мӗш гимназирен лайӑх паллӑсемпе вӗренсе тухсан Мускаври Н.И.Пирогов ячӗллӗ Раҫҫей наци тӗпчев медицина институтне вӗренме кӗнӗ.
Чӑваш эстрада юрӑҫи Ольга Осипова ӳкерӗннӗ «Пирӗшти куҫҫулӗ» фильм Пӗтӗм Раҫҫейри «Белая птица» кинофестивальте «Полное погружение» номинацире мала тухнӑ. Кинофестиваль Хусан хулинче иртнӗ.
Ольга Осипова (фильмсенче вӑл ытларах Ольга Палан хушма ятпа ӳкерӗнет) кинолентӑра тӗп роле вылянӑ. Ҫамрӑк упӑшкипе арӑмӗ пуян пурӑнмаҫҫӗ. Ҫемье пуҫӗ Андрей контракт ҫырса Сирие ҫапӑҫма каять. Арӑмӗ Анна куляннипе ним тума пӗлмесӗр Турӑран юратнӑ ҫыннине вӑрҫӑран сывӑ-чӗрӗ тавӑрма ыйтса авалхи кӗлӗсене вулать. Вӑл мӑшӑрӗ вилнине пӗлмест-ха. Ангел ӑна упӑшкин чунӗпе сыв пуллашма май парать. Юлашкинчен тӗлӗнтермӗш пулать: Анна ача кӗтнине пӗлет.
Фильма Сергей Щербаков тата Ольга Палан (Осипова) режиссёрсем ӳкернӗ.
Елчӗк округӗнчи Таяпа Энтри ялӗнче пурӑнакан Анисия Евдокимова ҫак кунсенче 102 ҫул тултарнӑ.
Унӑн ҫамрӑклӑхӗ Тӑван ҫӗршывӑн Аслӑ вӑрҫин тапхӑрне лекнӗ. 17 ҫулти хӗр Хусанта ҫул тунӑ ҫӗрте ӗҫленӗ, кайран ӑна Улатӑр районне окоп чавма янӑ. Тӑван ялне 1948 ҫулта кӑна таврӑннӑ вӑл. Унтан качча кайнӑ. Тивӗҫлӗ канӑва тухиччен Анисия Антоновна колхозра ӗҫленӗ.
Паянхи кун кинемей 3 ачипе, 8 мӑнукӗпе тата 12 кӗҫӗн мӑнукӗпе савӑнса пурӑнать. 102 ҫула ҫитсен те Анисия Евдокимова хастарлӑхӗпе, пурнӑҫа юратнипе палӑрать.
Пирӗн ентеш, Йӗпреҫ пики, Евгения Петрова (сӑнӳкерчӗкре — сулахайра) «Хусан мисӗ» илем конкурсӗнче ҫӗнтернӗ.
Евгения Петрова 20 ҫулта кӑна-ха. Вӑл Йӗпреҫри 1-мӗш шкулта вӗреннӗ хыҫҫӑн Раҫҫей ШӖМӗн Хусанти юридици институчӗн студентки пулса тӑнӑ.
Евгения — пулас офицер, вӑл спортпа туслӑ, волейбол командин ертӳҫи. Ҫавӑн пекех пике халӑх, бал ташшисемпе кӑсӑкланать.
Ҫитес вӑхӑтра Евгения Петровӑн Тутарстан чысне «Раҫҫей мисӗ» конкурсра хӳтӗлеме тивӗ.
Шупашкарта фармацевтра ӗҫлӗкен хӗрарӑм ултавҫӑсемпе калаҫнӑ хыҫҫӑн 1,5 миллион тенкӗсӗр юлнӑ.
Малтан ултавҫӑсем унӑн хӗрӗпе ҫыхӑннӑ, ҫыхӑну операторӗпе килӗшӗве тӑсмаллине ӗнентернӗ. Кун хыҫҫӑн хӗрача смспа килнӗ кода пӗлтернӗ.
Кӑштахран электронлӑ почтӑна ҫыру килнӗ: такам «Госуслуги» порталти страницӑна ҫӗмӗрнӗ кӗнӗ-мӗн. Амӑшӗпе хӗрӗ ӗненнӗ, ҫырура кӑтартнӑ телефон номерӗпе шӑнкӑравланӑ.
Ултавҫӑсем 38 ҫулти хӗрарӑма Хусана кайса 1,5 миллион тенкӗ кредит илме, укҫана тӗрлӗ счет ҫине куҫарма ӳкӗте кӗртнӗ. Вӑл кун пирки 2 уйӑх никама та каламан. Хӑйне улталанине ӑнлансан полицие кайнӑ.
Чӑваш патшалӑх гуманитари ӑслӑлӑхӗсен институчӗ «Национальные картины мира в литературах народов Волго-Уралья» Пӗтӗм Раҫҫейри ӑслӑлӑхпа практика конференцийӗн материалӗсене пӗр ҫӗре пухса пичетленӗ.
Ҫеҫпӗл Мишши ҫуралнӑранпа 125 ҫул ҫитнине халалланӑ ҫав мероприятие 100-е яхӑн ученӑй-гуманитари, преподаватель, аспирант, магистр хутшӑннӑ. Вӗсем ҫӗршывӑн тӗрлӗ регионӗнчен: Мускавран, Хусантан, Ӗпхӳрен, Ижевскран, Глазовран, Саранскран, Йошкар-Оларан, Сыктывкартан, Воронежран, Мурманскран, Ханты-Мансийскран, Элистаран, Якутскран тата, паллах, Шупашкартан пулнӑ.
Ҫӗнӗ Шупашкарта вырнаҫнӑ «Химпром» предприятие ҫӗнӗ пуҫлӑх ертсе пыма тытӑннӑ.
2022 ҫулхи утӑ уйӑхӗнченпе унта директор пулса Хусанта ҫуралнӑ Дмитрий Колчин тӑрӑшнӑ. Анчах кӑҫалхи кӗркунне вӑл ӗҫрен пӑрахса кайнӑ. Халӗ Колчин Питӗрти «СВЕЗА-ЛЕС» йывӑҫ тирпейлекен компание ертсе пырать-мӗн.
«Группа Оргсинтез» тулли мар яваплӑ обществӑн директорсен канашӗ «Химпром» обществӑн управляющи директорӗ пулма Андрей Еремеева шаннӑ. Вӑл пуҫлӑх пуканне раштав уйӑхӗн 15-мӗшӗнче йышӑннӑ.
Андрей Еремеев Пермь тӑрӑхӗнчен. Химик профессиллӗскер ҫак енӗпе тӗрлӗ ҫӗрте ӗҫленӗ.
+24.8 °C