Сӗнтӗрвӑррипе Куславкка хулисенче причал тӑвакана кӑҫалхи кӑрлач уйӑхӗнчех палӑртнӑ. Шупашкарти «СтройКрафт» компанипе Республикӑн пӗрлехи заказчик служби контракта шӑпах ҫавӑн чухне алӑ пуснӑ. Халӗ вара подрядчик контракта пӑрахӑҫланӑ. Вӑл ӑнлантарнӑ тӑрӑх, заказчик хӑйӗн ҫине илнӗ яваплӑха пурнӑҫламан.
Сӗнтӗрвӑрринчи причала тума 378,7 млн тенкӗ кирлӗ, ӗҫе 2026 ҫулхи авӑн уйӑхӗн вӗҫӗччен туса пӗтермелле. Куславккарин хакӗ – 420 млн тенкӗ, ӑна 2026 ҫулхи ҫӗртме уйӑхӗн 1-мӗшӗччен туса пӗтермелле.
Шупашкарти ватӑсем паян Куславккари Николай Лобачевскийӗн музей-ҫуртӗнче пулса курнӑ. Хулара пурӑнакан хастар пенсионерсем Шупашкарти комплекслӑ центрта пурнӑҫлакан «Социаллӑ туризм» проект май панипе тӗрле ҫӗре тухса ҫӳреҫҫӗ. Нумаях пулмасть вӗсем Йошкар-Олара пулнӑччӗ, маларах Хусана ҫитсе килнӗччӗ.
Николай Лобачевский паллӑ математик пурӑннӑ ҫуртпа та вӗсем кӑсӑкланса паллашна. «Пире ҫакӑн пек ҫулҫӳревсем питех те кирлӗ. Ун тухса ҫуресен эпир хавхаланатпӑр, кӑмӑл та уҫӑлать», - палӑртса хӑварнӑ 78 ҫулти Геннадий Краснов.
«Ҫулталӑкри вӗрентекене» палӑртнӑ. Ку ята Куславккари Алевтина Алексеева тивӗҫнӗ.
Кӑҫал конкурса 1000 ытла ҫын хутшӑннӑ, 218 специалист куҫӑн майпа иртнӗ тӗрӗслев витӗр тухнӑ.
«Ҫулталӑкри воспитатель» — Дарья Жгарь (Шупашкар), «Чи лайӑх класс ертӳҫи» — Юлия Дельян (Ҫӗнӗ Шупашкар), «Ҫулталӑкри педагог-психолог» - Татьяна Анилина (Куславкка районӗнчи Тӗрлемес шкулӗ), «Ҫулталӑкри социаллӑ педагог» - Яна Молодцева (Шупашкар), «Чи лайӑх учитель-дефектолог» - Татьяна Гаранина (Ҫӗнӗ Шупашкар), «Чи лайӑх тӑван чӗлхе учителӗ» - Ираида Матьянова (Шупашкар), «Сывлӑх енчен хавшак ачасемпе ӗҫлекен чи лайӑх педагог» - Ирина Петрова (Йӗпреҫри интернат шкул), «Ҫулталӑкри чи лайӑх тьютор» - Наталия Прагуськина (Шупашкар), «Ҫулталӑкри чи лайӑх методист» - Ксения Коллэ (Шупашкар), «Педагогика дебючӗ» - Игорь Ятмаскин (Шупашкар).
«Пултарулӑхпа – куҫа-куҫӑн» – ҫапла ятлӑ Куславккари ача-пӑча искусство шкулӗн вӗрентекенӗн Эдуард Волчковӑн куравӗ. Вӑл вулавӑшра уҫӑлнӑ.
Курав ака уйӑхӗн вӗҫӗччен ӗҫлӗ. Унта кирек кам та пырса курма пултарать. Автор картинӑсене акрилпа, ҫупа, акварельпе ӳкернӗ.
Палӑртмалла: ӳсекен ӑрӑва воспитани пама пулӑшнӑшӑн Эдуард Волочкова ЧР Культура министерствини Тав хучӗпе чысланӑ.
Куславккари «Атӑл» спорт шкулӗнче ӗҫлекен Надежда Никонова «Чӑваш Республикин физкультурӑпа спортӑн тава тивӗҫлӗ ӗҫченӗ» ята тивӗҫнӗ.
Спорт шкулӗн тренер-преподавательне ҫав ятпа республика Элтеперӗ Олег Николаев хӑй саламланӑ. Хӗрарӑма республикӑн Спорт министерствин коллегийӗн анлӑ ларӑвне йыхравланӑ. Унта Элтепер удостоверени панӑ, кӑкӑр ҫине ҫакмалли паллӑна ҫакса янӑ.
Куславккари тренер спорт енӗпе 20 ҫул ытла ӗҫлет, ҫамрӑк ҫӑмӑл атлетсене хатӗрлет. Унӑн воспитанникӗсем республикӑри, ҫӗршыври тата тӗнче шайӗнчи ӑмӑртусене хутшӑнаҫҫӗ.
Чӑваш Енре ҫурхи сунар тапхӑрӗ пуҫланнӑ. Вӑл паянтан пуҫласа ака уйӑхӗн 30-мӗшӗччен пырӗ.
Сӑмах май каласан, пирӗн тӑрӑхра сунар улӑх-ҫаранне икӗ зонӑна уйӑрнӑ: пӗрремӗш тата иккӗмӗш. Кашни зонӑра сунар тапхӑрне палӑртнӑ.
Пӗрремӗш зонӑна Улатӑр, Патӑрьел, Йӗпреҫ, Комсомольски, Пӑрачкав, Шӑмӑршӑ, Ҫӗмӗрле, Елчӗк тӑрӑхӗсем кӗреҫҫӗ.
Иккӗмӗш зонӑра — Элӗк, Вӑрнар, Канаш, Куславкка, Красноармейски, Хӗрлӗ Чутай, Сӗнтӗрвӑрри, Муркаш, Вӑрмар, Ҫӗрпӳ, Шупашкар, Етӗрне, Тӑвай районӗсем.
Чӑваш Енри 9 территори туризм маршрутне кӗрӗ. Кун пирки республикӑн экономика аталанӑвӗн министрӗ Дмитрий Краснов «Контактри» хӑйӗн страницинче хыпарланӑ.
Шупашкарпа Йӑлӑм — санаторипе курорт туризмӗ валли юрӑхлӑ вырӑнсем. Куславккапа Сӗнтӗрвӑрри тӑрӑхӗсем юханшыв туризмӗн центрӗсем пулса тӑрӗҫ. Шупашкар тӑрӑхӗнче этника туризмне аталантарасшӑн, Етӗрне тӑрӑхӗ — юханшывпа агротуризма. Улатӑр тӑрӑхӗ паломниксене илӗртесшӗн. Муркаш тӑрӑхӗ Атӑл хӗрринче туристсем валли инфраструктурӑна аталантарӗ. Красноармейски тӑрӑхӗ юханшывсемпе тата кӳлӗсемпе хӑпартланасшӑн, Йӗпреҫ тӑрӑхӗ — кемпингпа глэмпинглӑ вӑрманлӑ вырӑнсемпе.
5-11-мӗш классенче вӗренекен ачасен хушшинче чӑваш чӗлхипе, литературипе тата культурипе интернет олимпиада иртнӗ. Унта 33 ҫӗнтерӳҫӗ ятне тивӗҫнӗ.
Кӑҫалхи олимпиадӑна Чӑваш Республикин тата республика тулашӗнчи вӗренӳ организацийӗсен 5–11 класӗсенче вӗренекен тӑват ҫӗр ытла ача хутшӑннӑ, ҫав шутра – республика тулашӗнчен – 26 ача.
Олимпиадӑна ирттернӗ Чӑваш Республикин Вӗренӳ институтӗнче пӗлтернӗ тӑрӑх, «пӗтӗмӗшле илсен, интернет олимпиадӑна кӑҫал пысӑк хастарлӑхпа Шупашкар, Ҫӗнӗ Шупашкар хулисен, Патӑрьел, Вӑрнар, Вӑрмар, Канаш, Куславкка, Йӗпреҫ, Ҫӗрпӳ, Муркаш, Тӑвай, Сӗнтӗрвӑрри, Шупашкар округӗсен шкул ачисем хутшӑннӑ».
Чӑваш Енри тепӗр икӗ кинемей ҫак кунсенче 100 ҫулхи юбилейне паллӑ тунӑ.
Куславккара пурӑнакан Антонина Ильинична Лебедева 16-ра чухне колхозра ӗҫлеме пуҫланӑ. 1941 ҫулта вӑл Сӑр хӳтӗлев чиккине тунӑ ҫӗре хутшӑннӑ. Халӗ вӑл 98 ҫулти йӑмӑкӗпе пурӑнать.
Канашри Татьяна Васильеана Смагина ӗмӗр тӑршшӗпе вӗрентекенре ӗҫленӗ. Паянхи кун вӑл ҫӗршывӑн тӗрлӗ кӗтесӗнчи нумай ачаллӑ ҫемьесене пулӑшать: утиял ҫӗлесе парнелет.
Чӑваш Енре туризма 2035 ҫулччен аталантармалли стратеги йышӑннӑ.
Республика Элтеперӗн пресс-служби пӗлтернӗ тӑрӑх, стратегире пирӗн тӑрӑха малашлӑхлӑ 14 туризм территорийӗ пӑхса хӑварнӑ. Вӗсем: «Шупашкар», «Ҫӗрпӳ», «Йӑлӑм», «Сӗнтӗвӑрри», «Етӗрне», «Канаш», «Куславкка», «Вӑрмар», «Вӑрнар», «Патӑрьел», «Ҫӗмӗрле», «Улатӑр», «Йӗпреҫ», «Шӑмӑршӑ».
Документра туристсене канма меллӗ услови туса парассине пӑхса хӑварнӑ.
+1.3 °C