Людмила Муравьева

Чӳкӗн 28-мӗшӗнче Шупашкарти Яков Ухсай ячӗллӗ культура керменӗнче «Чӑваш пики — 2014» конкурс иртнӗ. Кӑҫалхипе вӑл 8-мӗш хут йӗркеленнӗ.

Кӑҫал унта 16 пике хутшӑннӑ. Малтан конкурсҫӑсене ЧНК президенчӗ Николай Угаслов саламланӑ, унтан ЧР Культура министерствин пай пуҫлӑхӗ Сергей Казаков, пӗлтӗрхи конкурс ҫӗнтерӳҫи Алиса Чайникова сӑмах илнӗ.

Пӗрремӗш конкурсра пикесем хӑйсемпе паллаштарнӑ. Вӗсем куракансене хӑйсене сцена ҫинче хӑюллӑн тытма пӗлнипе, ҫепӗҫ чӗлхипе тыткӑнланӑ. Тепӗр конкурсра пикесем анлӑ тавракурӑмлӑ пулнипе тӗлӗнтернӗ. Хӗрсем республикӑри хула ячӗсене те, чӑваш гимнӗн авторӗсене те, чӑваш театрне кам пуҫарнине те, чӑвашсен ӗлӗкхи календарьне те пӗлнӗ. Тӗрӗссипе, ыйтусем йывӑрах та пулман. Ҫапах такӑнакан та тупӑннӑ. Пӗр пике «ӑраскал» сӑмах пӗлтерӗшне пӗлеймен, тепри чӑвашсен этнографи ушкӑнӗсене калайман.

Пултарулӑх конкурсӗнче пикесем чӑваш ташшине те, тангӑна та ташланӑ, чӑваш юррисене шӑрантарнӑ, сӑвӑсем вуланӑ. Акӑ Трак тӑрӑхӗнчен килнӗ Мария Козлова «Илеймӗн телее укҫа парса» сӑвӑ вуланӑ, Ҫӗрпӳ районӗнчи Зоя Михайлова Хусанкайӑн «Таня» поэмин сыпӑкне пӑхмасӑр каланӑ. Етӗрне районӗнчи Людмила Муравьева вара «Нарспи» мюзикл пайне кӑтартнӑ.

Тӑваттӑмӗш конкурсра пикесем чӑваш апат-ҫимӗҫӗпе паллаштарнӑ. Сӑра вӗретсе, шӳрпе, хуплу пӗҫерсе, шӑрттан хатӗрлесе килнӗ. Куславкка районӗнчи Ирина Батманова вара Атӑл пуллипе хӑналанӑ. Тӑвай пики Кристина Федотова уйран уҫласа килнӗ.

Ҫапла майпа кӑҫал «Чӑваш пики» ята Етӗрне хӗрӗ Людмила Муравьева ҫӗнсе илнӗ. Йӗпреҫ районӗнчи Диана Козлова «Вице чӑваш пики» пулса тӑнӑ. Красноармейски районӗнчи Мария Козлова — «Сӑпайлӑ пике», Тӑвай районӗн пики Кристина Федотова — «Куракансем кӑмӑлланӑ пике», Муркаш районӗн пики Елизавета Смирнова — «Чи хӳхӗм пике», Куславкка тӑрӑхӗнчи Ирина Батманова «Чи ӑслӑ пике» номинацисенче ҫӗнтернӗ. Шел те, кӑҫал Патӑрьел, Комсомольски, Шӑмӑршӑ пикисем хутшӑнман.

Сӑнсем (17)

#Чӑваш пики, #Яков Ухсай ячӗллӗ КК, #культура, #конкурссем, #ЧНК, #Етӗрне районӗ, #Красноармейски районӗ, #Йӗпреҫ районӗ, #Тӑвай районӗ, #Куславкка районӗ, #Патӑрьел районӗ, #Комсомольски районӗ, #Шӑмӑршӑ районӗ