Ака уйӑхӗн 15-мӗш кунӗнче Чӑваш патшалӑх гуманитари ӑслӑлӑхӗсен институчӗн вулав залӗ илемлӗ сӑмахлӑх тусӗсемпе тулчӗ. Вӗсен йышӗнче пултарулӑх интеллигенцийӗн тӗрлӗ сийӗсем пурччӗ. Пӗрисем – чӑваш литературин сумлӑ тӗчевҫисем: Юрий Артемьевпа Георгий Федоров профессорсем, Валентин Абрамовпа Юрий Яковлев тата Вячеслав Ендеровпа Вера Никифорова ӑсчахсем. Теприсем – проза ӑстисем: Борис Чиндыковпа Аристарх Дмитриев, Надежда Ильинапа Измаил Исемпек тата Владимир Степановпа Ион Шеремет. Виҫҫӗмӗшсем – поэзи пахчин шӑпчӑкӗсем: Раиса Сарпипе Петӗр Яккусен, Марина Карягинӑпа Надежда Сельвестрова. Чӗлхеҫӗсем те самаях йышлӑ: Атнер Хусанкайпа Геннадий Дегтярев, Александр Кузнецовпа Леонид Петров... Кӗвве-ҫемме кӑмӑллакансем Николай Казаков композитора тӳрех палласа илчӗҫ. Сцена ӑстисен элчи вара Надежда Кириллова пулчӗ. Хаҫат-журналта вӑй хуракансен “десантне” Римма Прокопьева журналистка ертсе пычӗ.

Тӗлпулу сӑлтавӗ – Владимир Степановӑн “Эфемероптера каҫӗ, е ФАУст - 2” роман-киллерӗ кун ҫути курни. Кӗнекен ячӗпе жанрӗ ҫеҫ мар, унӑн чӗлхипе сюжечӗ те, тытӑмӗ те хӑйне май. Романри ӗҫсем Ион Шереметпе ун тавра пулса иртеҫҫӗ. Чӑваш литература чӗлхинче кун пекки пулманччӗ-ха: чикан майрин арки пек хутлӑ-хутлӑ танлаштарусем, вырӑсла-чӑвашла словарь пек калаҫусем, юратупа секс сӑмах-юмахӗ...

Кӗнеке уявне ятарлӑ тум тӑхӑннӑ Атнер Хусанкай ертсе пычӗ. Пухӑннисем ҫӗнӗ романа тӗрлӗ енлӗ тишкерсе хак пачӗҫ, вӑл пирӗн литературӑра ҫӗнӗ пулӑм пулнине палӑртрӗҫ. Вӑл хальхи чӑваш прозин шыравӗсене кӑтартать.

Роман ятӗнчи тӗлӗнтермӗш эфемероптера шыв лӗппи иккен. Ҫав лӗпӗш хӑйӗн кӗске ӗмӗрӗпе чапа тухнӑ: вӑл пӗр каҫлӑх пурӑнасшӑн ҫут тӗнчене килет имӗш. Тӗлӗнмелле, эпир пин-пин, вун-вун пин лӗпӗш ӗмӗрне пурӑнатпӑр. Хамӑр хыҫҫӑн мӗн хӑваратпӑр?

«Чӑваш бестселлерӗ» сӑн галерейи

#мероприятисем, #Чӑваш патшалӑх гуманитари ӑслӑлӑхӗсен институчӗ