Пуш уйӑхӗн 28-мӗшӗнче Красноармейскинче черетлӗ 11-мӗш «Шетмӗпе Ҫавал кӗввисем» фестиваль иртрӗ.

Фестивале Красноармейски районӗн администраци пуҫлӑхӗн ҫумӗ Н.И. Антонов уҫрӗ. Тивӗҫлӗ ҫынсене тӗрлӗ хутсемпе парнесем парса тухнӑ хыҫҫӑн концерт пуҫланчӗ. Конкурса хутшӑнакансем 4 сехет хушшинче 40 юрӑ патнелле юрласа пачӗҫ — пурин те тенӗ пекех пӗрремӗш вырӑна йышӑнас кӑмӑл пысӑк пулчӗ.

Те вӗсен районӗнчи ушкӑнсемпе юрӑҫсем пӗрремӗш вырӑна йышӑнманнине пула, те урӑх сӑлтава пула ҫӗнтерӳҫӗсен ячӗсене вӗсен сайтӗнче тупма йывӑр. Мӗнех, шыраса пӑхар.

* Чи чаплӑ хор произведенийӗ: ку номинацире кам мала тухни паллӑ мар;

* Вокал ушкӑлӗ валли ҫырнӑ чи чаплӑ произведени — маларах асӑнтӑмӑр ӗнтӗ, ку номинацире Шупашкар районӗнчи Анатолий Печников ҫӗнтернине;

* Пӗччен юрлакан валли ҫырнӑ чи чаплӑ произведени: кунта кам мала тухни паллӑ мар;

* Ача-пӑча валли ҫырнӑ чи чаплӑ произведени: кунта тахӑшӗ малал тухнӑ ӗнтӗ, паллӑ мар;

* Халӑх юррине чи лайӑх илемлетни: ку номинацире те кам мала тухни паллӑ мар;

* Чи лайӑх юрлакан хор: тахӑш хорӗ лайӑхрах юрланӑ ӗнтӗ...;

* Чи лайӑх юрӑҫ: ку номинацине Кӳкеҫри культура ҫуртӗнчи ансамбльте юрлакан Ирине Беспалова тивӗҫрӗ.

* Чи лайӑх юрлакан вокал ушкӑнӗ: Элӗкри культурӑпа кану центрӗнчи волкал ушкӑнӗ ку номинацире хӑйне ыттисенчен лайӑхрах кӑтартрӗ.

* Чи лайӑх эстрада юрри: паллӑ мар ҫав.

Тем тесен те информаципе тивӗҫтернишӗн конкурса йӗрелекенсене хулӑм «иккӗ» лартмалла. Жюрире кам ларнине парӑртса хӑварнӑ, ҫӗнтерӳҫисем пирки вара пӗр сӑмах та пулин ҫырман. Номинацисем нумай, ҫӗнтерӳҫисем вара виҫҫӗн ҫеҫ. Юрать хӑш-пӗр район сайчӗсем хӑйсен енчи ҫӗнтерӳҫӗсене саламлани пур — унтан кирлине тупса кӑларма пулать. Ытти енчен вара пуш-пушӑ.

Санӳкерчӗксен галерейи

#Шетмӗпе Ҫавал кӗввисем, #Красноармейски районӗ, #фестивальсем, #Красноармейски, #Шупашкар районӗ, #Элӗк районӗ