Нарӑс уйӑхӗн 11-мӗшӗнче Красноармейски районӗнчи Ҫирӗклӗ ялӗнче пурӑнакан Станислав Ильин ирхи 9 сехетре васкавлӑ медпулӑшу чӗннӗ. Унӑн амӑшӗн ӳт температури 40 градуса яхӑн хӑпанӑ.

Станислав тухтӑрсене 103 номерпе шӑнкӑравласа чӗннӗ. Диспетчер шӑнкӑрава йышӑннӑ, анчах тепӗр икӗ сехетрен васкавлӑ медпулӑшу килмессине пӗлтернӗ. Тухтӑрсем мӗншӗн ҫитеймессине ӑна ӑнлантарман.

Амӑшӗ пысӑк температурӑпа пӗр талӑк выртнӑ. Тепӗр кунхине кӑна ун патне район пульницинчен терапевт килнӗ, эмелсем ҫырса панӑ.

«Ҫын вилме пуҫласан? Анне калать: «Юрать, эпӗ ватӑ, анчах васкавлӑ медпулӑшу ачана кирлӗ пулсан?» Пирӗн районта унашкалли, васкавлӑ медпулӑшу килменни, пулкалать», - палӑртнӑ Славӑн пиччӗшӗ Сергей.

ЧР Сывлӑх сыхлавӗн министерстви пӗлтернӗ тӑрӑх, диспетчер йышӑннӑ ҫак шӑнкӑрава Красноармейски районӗн тӗп пульницине янӑ.

#Ҫирӗклӗ, #Красноармейски районӗ, #сывлӑх, #тухтӑрсем