Чӗмпӗр хула администрацийӗ пулӑшнипе, Чӗмпӗр облаҫӗнчи чӑвашсен наципе культура атономийӗ, чӑваш культура центрӗ тата «И.Я. Яковлев хваттерӗ» музейӗ чӑваш букварӗн уявне паллӑ турӗҫ.

Шӑп та 145 ҫул каялла Хусанти К.А. Тилли типографийӗнче паллӑ педагог-ҫуттакӑларуҫӑ хатӗрленӗ чӑваш букварӗ кун ҫути курнӑ. Чӑваш ҫырулӑхӗн сӑпки Чӗмпӗр хули тесе ахальтен каламаҫҫӗ. Шӑпах Чӗмпӗрте хатӗрленӗ те букваре. И.Я. Яковлевӑн ҫак ӗҫри пӗрремӗш пулӑшаканӗсем студент-филолог В.А. Белилин тата пӗрремӗш вӗренекенӗ, педагог, тӑлмач, этнограф А.В. Рекеев пулнӑ. Букварь 1872 ҫулта «Чӑваш ачисене ҫырӑва вӗрентмелли кӗнеке» ятпа пичетленсе тухнӑ.

Мероприятие Чӗмпӗрти 6, 21, 40, 55-мӗш, Луговойӗнчи, Чӑнлӑ районӗнчи Аслӑ Нагаткин, Репьевка шкулӗсенче чӑваш чӗлхипе культурине тӗрлӗ майсемпе вӗренекен ачасемпе вӗрентекенсем килсе ҫитнӗ. Чи малтан вӗсем Чӗмпӗр чӑваш шкулӗн комплексӗпе паллашнӑ, «И.Я. Яковлев хваттерӗ» музейра экскурси иртнӗ. Музейӑн ӑслӑлӑх ӗҫтешӗ Светлана Борисова уйрӑмах иккӗмӗш хутри чӑваш алфавичӗпе тата чӑваш букварӗпе ҫыхӑннӑ экспонатсене тимлӗх уйӑрнӑ. Виҫҫӗмӗш хутра ачасем И.Я. Яковлевӑн, унӑн ҫемйин пурнӑҫӗпе ӗҫӗ-хӗлӗпе паллашнӑ. Чӗмпӗр чӑваш шкулӗнче вӗренекенсем ларнӑ ӗлӗкхи партӑсем хушшинче вырнаҫса вӑл вӑхӑтри пурнӑҫа путнӑ. Экскурсовод вӗсемпе урок ирттернӗ.

Уява пухӑннисене УОЧНКА председателӗ Олег Мустаев саламланӑ. Вӑл чӑваш ҫырулӑхӗ мӗнле аталанни пирки кӗскен каласа панӑ: тӗрӗ (руна) ҫырулӑхӗнчен пуҫласа паянхи кунччен. Чӑваш халӑхӗ наци пек сыхланса юлнинче И.Я. Яковлевӑн тӳпи ҫав тери пысӑккине палӑртнӑ, мӗншӗн тесен 19-мӗш ӗмӗрччен чӑвашсен 70 проценчӗ ислам тӗнне йышӑнса культурине те, чӗлхине те ҫухатнӑ. Букварь тухни чӑваш нацине сыхласа хӑварнӑ.

Малалла вӗренекенсемпе аслисем «Что завещал нам Патриарх» (чӑв. Патриарх пиллесе хӑварни) документлӑ фильм курнӑ.

Мероприяти Аслӑ Нагаткинти «Хӗвел» тата «Укӑлча» ансамблӗсен юрри-ташшипе вӗҫленнӗ.

#кӳршӗре, #Аслӑ Нагаткин, #Чӗмпӗр, #уявсем, #Чӗмпӗр облаҫӗ, #чӑваш чӗлхи, #Чӑнлӑ районӗ