Георгий Семенович Самсонов

Ҫитес ҫул Хӗрлӗ Чутай районӗ 85 ҫул тултарнине паллӑ тӑваҫҫӗ. Сумлӑ юбилей ҫывхарса пынӑ май районта кунта ҫуралса ӳснӗ, район историйӗнче тарӑн йӗр хӑварнӑ паллӑ ентешсен ӗҫӗ-хӗлӗпе ҫыхӑннӑ мероприятисем ирттерме палӑртнӑ. Акан 27-мӗшӗнче Ҫӗн Атикасси шкулӗнче район шайӗнче «Манӑн шкул: истори, ҫынсем, пулӑмсем» ятпа конференци ирттерчӗҫ. Ӑна Ленина пытарма хутшӑннӑ Георгий Семенович Самсонов ҫу уйӑхӗн пуҫламӑшӗнче 125 ҫул тултарнӑ май йӗркеленӗ.

Конференци пуҫаруҫи — Георгий Семеновичӑн мӑнукӗ Юрий Никонович Григорьевский. Вӑлах конференци умӗн кукашшӗне халалласа «Жизнь, отданная народу» ятлӑ кӗнеке пичетлесе кӑларнӑ.

Конференци ӗҫне Штанашри чиркӳ пачӑшки Отец Вячеславпа унӑн пулӑшаканӗсем хутшӑнса пухӑннисене пил парса саламларӗҫ, залри кашни ҫынна сӑваплӑ мӑнкун ҫӑмарти парса хӑналарӗҫ.

Вӗренекенсем тӑватӑ номинаципе тӗпчев ӗҫӗ ҫырса хатӗрленӗ: шкулӑн пӗрремӗш директорӗ; шкул историйӗ; вӗсем пирӗн шкулта вӗреннӗ; вӗрентекен, сан умра пуҫ таятӑп...

Самсонов Г.С 1886 ҫулхи ҫӑвӑн 6-мӗшӗнче Кӑрмӑш уесӗнчи Атай вулӑсӗнчи Ҫӗнӗ Атикасси ялӗнче ҫуралнӑ. Штанашри (1900) унтан Хӗрлӗ Чутайри икӗ класлӑ шкул пӗтернӗ. 1909 ҫулта вӗрентекен ятне илме экзамен тытнӑ. Малтанах Ӗпхӳ кӗпернинче вӗрентекенре тӑрӑшнӑ, унтан — Кӑрмӑшри тата Етӗрнери РОНО инструкторӗнче. 1922 ҫулта Штанаш салинчи вулӑс библиотекинче, 1922-1925 — Атай вулӑсӗн ертӳҫи, 1925-1927 ҫулсенче Штанашри ултӑ ҫул вӗренмелли шул ертӳҫинче, 1927-1946 — Ҫӗн Атикассинчи пуҫламӑш, каярах 7 ҫул вӗренмелли шкул директорӗнче тӑрӑшнӑ. Ӑна 1940 ҫулхи ҫӗртмен 16-мӗшӗнче «Чӑваш АССРӗн тава тивӗҫлӗ учителӗ» хисеплӗ ят парса чысланӑ.

Г.С.Самсонова 1924 ҫулхи кӑрлач уйӑхӗнче Пӗтӗм Раҫҫейри Советсен XI-мӗш съезчӗн делегачӗ пулма суйланӑ. Ленин тупӑкӗ умӗнче караулта тӑма тивӗҫ пулнӑ, ӑна пытарма хутшӑннӑ.

Конференцире ӑна халалланӑ докладсем, хӑйсен шкул историне тӗпченӗ ӗҫсем, юратнӑ вӗрентекенсене халалланӑ ӗҫсем те чылай пулчӗҫ. Кашни ӗҫех презентаци илемлетрӗ.

Самсонов пурнӑҫӗнче Штанаш шкулӗ те паллӑ вырӑн йышӑнать. Ку шкула 1842 ҫулта уҫнӑ. Кӑрмӑш уесӗнчи Штанаш сали Атай вулӑсӗн центрӗ пулнӑ. Шкула 1871 ҫулхи раштавӑн 17-мӗшӗнче Ульянов инспектор ҫитсе курнӑ. Вӑл кунта пулни пирки шкулта Чӗмпӗрти архивран ярса панӑ материал упранать. Георгий Самсонов 1900 ҫулта Штанаш салинчи шкулта вӗреннӗ.

Конференци ҫӳллӗ шайра иртрӗ.

Кашни вӗренекен Хисеп хучӗ е сертификатилме тивӗҫлӗ пулчӗ. Вӗсене хатӗрленме пулӑшнӑ вӗрентекенсем те парнесемсӗр юлмарӗҫ.

Галина Зотова

#Ҫӗнӗ Атикасси, #конференцисем, #Хӗрлӗ Чутай районӗ, #Хӗрлӗ Чутай, #Штанаш