Олег Мешков тата Валерий Иванов депутатсем

Хальхи вӑхӑтра Чӑваш Енре деклараци кампанийӗ пынине эпир пӗлтернӗччӗ. Налукҫӑсем ҫак уйӑхӑн 7-мӗшӗ тӗлне пӗлтернӗ тӑрӑх, пирӗн тарӑхри 15 ҫын декларацире 10-100 миллион тенкӗ ӗҫлесе илнине палӑртнӑ. 987 ҫыннӑн вара тупӑшӗ 1-10 миллион тенкӗпе танлашнӑ.

Халӗ тата ҫӗнӗ хыпар пӗлтерер. Пуянсем хушшинче республикӑн Патшалӑх Канашӗн депутачӗсем те пур. Тупӑш самай илнисем - "Пӗрлӗхлӗ Раҫҫей" партин пайташӗсем, пӗчӗк тупӑшлисем - коммунистсем.

Пӗлтӗр пуринчен ытла ӗҫлесе илни - парламентӑн вице-спикерӗ Олег Мешков. Иртнӗ ҫул унӑн тупӑшӗ 22,2 миллион тенкӗ пуҫтарӑннӑ, унӑн арӑмӗн - 11 миллион. Укҫа-тенкӗсӗр пусне Олег Мешковӑн ҫӗр лаптӑкӗ самай, урапасем нумай, ытти пурлӑх та пур. "Акконд" кондитер хапрӑкӗн директорӗ Валерий Иванов та юрлӑ пурӑнмасть. Унӑн ҫулталӑкри тупӑшӗ – 14,7 миллион тенкӗ. "Элара" савут гендиректорӗ Андрей Углов 13,5 миллион, Шупашкарти 1-мӗш ҫӑкӑр савучӗн пуҫлӑхӗ Елена Бадаева 11,9 миллион ӗҫлесе илнӗ. Юрий Попов спикер тупӑшӗ – 2,6 миллион тенкӗ, Николай Малов вице-спикерӑн, "Пӗрлӗхлӗ Раҫҫей" партин регионти секретарӗн Николай Маловӑн – 2,2 миллион тенкӗ.

Либерал-демократсен партийӗн пайташӗсенчен Андрей Кулагин 1,2 миллион тенкӗлӗх тупӑш курнӑ, Юрий Шлепнев – 14,2 миллион.

"Тӗрӗслӗхшӗн Раҫҫей" парти пайташӗсенчен Владимир Михайлов 7,9 миллион ӗҫлесе илнӗ, Сергей Семенов – 612 пин тенкӗ, Олег Николаев – 2 миллион, Леонид Лукин – 2,3 миллион, асӑннӑ фракци ертӳҫи Игорь Моляков – 1,2 миллион.

Коммунистсенчен Дмитрий Евсеев 1,2 миллион тенкӗлӗх тупӑш курнӑ. Ку партири Виктор Ильин, Татьяна Старева тата Олег Князькин – 306,8, 270,9 и 263,8 пиншер тенкӗ.

#укҫа-тенкӗ, #депутатсем, #политика, #налук служби, #партисем, #савутсем, #хуҫалӑх, #хапрӑксем