Етӗрне районӗнчи Кӑкшӑмри шкулта та Литература ҫулталӑкне халалласа уяв иртрӗ. Ку шкулта вӗренекенсем чӑваш чӗлхи вӗрентекенӗ Людмила Иосифовна Александрова ертсе пынипе литература альманахӗсем кӑларса тӑраҫҫӗ, вырӑнти ҫыравҫӑсемпе тӗлпулусем ирттереҫҫӗ. Нумаях пулмасть, сӑмахран, Галина Зотова ҫыравҫӑ-таврапӗлӳҫӗпе курнӑҫрӗҫ.

Галина Зотова ачасене хӑйӗн кӗнекисемпе паллаштарчӗ, кӑҫалхи май уйӑхӗнче Константин Иванов ҫуралса ӳснӗ Слакпуҫ ялне, поэта халлалланӑ уява кайса курни пирки каласа кӑтартрӗ, сӑнӳкерчӗксемпе паллаштарчӗ. Кӑкшӑм ялӗн вулавӑш ертӳҫи Бундина Надежда Павловна Константин Иванов ҫулталӑкӗнче туса ирттернӗ ӗҫсемпе паллаштарчӗ.

Уявра Кӑкшӑм шкулӗн учителӗсемпе вӗренекенӗсем «Нарспи» поэма сыпӑкӗсене пӑхмасӑр каларӗҫ. Пухӑннисем патне хӑнана Нарспипе Сетнер, Сенттипе Тӑхтаман килчӗҫ.

Кӑҫал вырӑс халӑх поэчӗ Сергей Есенин ҫуралнӑранпа 120 ҫул тултарчӗ. 4-мӗш класра вӗренекенсем поэтӑн юратнӑ сӑввисене пӑхмасӑр каларӗҫ.

Уява вырӑнти поэтсене те хӑнана чӗннӗ. Е.Б. Кркалевская тата Ф.Н. Бежанидзе хӑйсем хайланӑ сӑвӑсемпе паллаштарчӗҫ, ачасене хӑйсен пултарулӑхӗсене аталантарма чӗнсе каларӗҫ. Кӳршӗри Уйкас ялӗнчи Сандыркина Рената Порфирьевна библиотекарь пухӑннисене Светлана Асаматпа Елена Нарпи ҫинчен хӑтлавсем кӑтартрӗ, вӗсен сӑввисемпе ҫырнӑ юрӑсем шӑрантарчӗ. Кӑкшӑм шкулӗчи «Чародеи» ташӑ ушкӑнӗн ташши те пухӑннисен кӑмӑлне кайрӗ.

#вулавӑшсем, #Литература ҫулталӑкӗ, #Слакпуҫ, #ачасем, #шкулсем, #Уйкас, #Кӑкшӑм, #Етӗрне районӗ, #Константин Иванов ҫулталӑкӗ